ШКОЛА ПРАВА ИМЕНИ СВЯТОГО РАВНОАПОСТОЛЬНОГО ВЛАДИМИРА

православное богословие, культура, образование и право

Школа / Журнал / Путь спасения / Библиотека / Молитвослов на церковнославянском языке

ПРАВОСЛАВНЫЙ МОЛИТВОСЛОВ

Правосла́вный молитвосло́въ

УДК 264–1
ББК 86–372
П 68

Просите, и дано будет вам; ищите, и найдете; стучите, и отворят вам;
ибо всякий просящий получает, и ищущий находит, и стучащему отворят.
Есть ли между вами такой человек, который,
когда сын его попросит у него хлеба, подал бы ему камень?
и когда попросит рыбы, подал бы ему змею?
Итак, если вы, будучи злы, умеете даяния благие давать детям вашим,
тем более Отец ваш Небесный даст блага просящим у Него.
Евангелие от Матфея

Православный молитвослов на церковнославянском языке. Выпуск 6.3. [Электронный ресурс] // Школа права имени святого равноапостольного Владимира. Электронные материалы журнала «Праведность и мир». ISSN 2078-8932. URL: http://sancti.ru/patr/serv/molitvoslov-pre-v.6.3.html, (дата публикации: 2024.05.23).

Молитвослов содержит минимум молитвословий на церковнославянском языке, необходимых мирянину Православной Церкви для домашнего ежедневного молитвенного правила, в том числе, для подготовки к участию в таинстве Евхаристии. Тексты молитвослова соответствуют изданным Русской Православной Церковью, а также утвержденным её дорволюционной цензурой или современным Издательским советом.

Издание выполнено, как часть образовательной программы основ православной веры и культуры, лицензируется для свободного, бесплатного распространения и использования в соответствии со святыми канонами Православной Церкви и законодательством России.
Молитвослов с параллельным толковым переводом на русский язык, кратким словарем и введением смотреть и скачать можно в библиотеке: http://sancti.ru/patr/in-libre.htm.
Шрифт церковнославянского текста Panteley-1.8.ttf (UTF 8) и клавиатура разработаны Калашниковым Ю.В.
http://sancti.ru/patr/soft/font/slavonic.htm.

Предисловие от редактора расположено после основного текста, смотреть далее…

Е-почта для замечаний, информации о возможных опечатках и иного: sl@sancti.ru, vcsl-k@ya.ru

Содержание краткое

МЛ҃ТВЫ Ѹ҆́ТРЄННӀ̈Ѧ

ПОМѦ́ННИК

МЛ҃ТВЫ НА СО́НЪ ГРѦДꙊ́ЩИМЪ

МЛ҃И́ТВЫ КО КАНѠ́НАМ

КАНѠ́НЪ ПОКАѦ́ННЫЙ КО ГДⷭ҇Ꙋ НА́ШЄМꙊ Ӏ҆И҃СꙊ ХРⷭ҇ТꙊ

КАНѠ́НЪ МОЛЄ́БНЫЙ КО ПРЄСТ҃Ѣ́Й БЦⷣѢ

КАНѠ́НЪ А҆́ГГ҃ЛꙊ ХРАНИ́ТЄЛЮ

КАНѠ́НЪ СТ҃О́МꙊ Ӏ҆ѠА́ННꙊ ПРⷣТЄ́ЧИ

А҆КА́ФӀ̈СТЪ Ӏ҆И҃СꙊ СЛАДЧА́ЙШЄМꙊ

А҆КА́ФӀ̈СТЪ ПРЄСТ҃Ѣ́Й ВЛⷣЧЦѢ НА́ШЄЙ БЦⷣѢ

А҆КА́ФӀ̈СТЪ СТ҃И́ТЄЛЮ ХРⷭ҇ТО́ВꙊ НӀ̈КОЛА́Ю ЧꙊДОТВО́РЦꙊ

ПОСЛѢ́ДОВАНИЄ КО СТ҃О́МꙊ ПРИЧАЩЄ́НӀ̈Ю

БЛ҃ГОДА́РСТВЄННЫѦ МЛ҃ТВЫ ПО СТ҃Ѣ́МЪ ПРИЧАЩЄ́НИИ

ЧАСЫ̀ СТ҃Ы́Ѧ ПА́СХИ

СТӀ̈ХИ̑РЫ СТ҃Ы́Ѧ ПА́СХИ

КАНѠ́НЪ СТ҃Ы́Ѧ ПА́СХИ

ТРОПАРЍ И҆ КОНДАКЍ ВОСКРⷭ҇НЫ Ѻ҆СМЍ ГЛАСѠ́ВЪ

ТРОПАРЍ И҆ КОНДАКЍ ВСЄѦ̀ СЄДМИ́ЦЫ

ТРОПАРЍ, КОНДАКЍ, ЗАДОСТО́ЙНИКИ И҆ ВЄЛИЧА̑НӀ̈Ѧ ДВАНАДЄСѦ́ТЫХЪ ПРА́ЗДНИКОВ И҆ ПА́СХИ

МЛ҃ТВЫ РА̑ЗНЫѦ

СЛОВАРЬ

СОДЕРЖАНИЕ ПОЛНОЕ

ОТ РЕДАКТОРА

МЛ҃ТВЫ Ѹ҆́ТРЄННӀ̈Ѧ

Воспрѧнꙋ́въ без̾ лѣ́ности, и҆ и҆стрезви́всѧ, воста́въ ѿ сна̀, рцы̀ сӏ̈ѐ: [а҃]

Во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а. А҆ми́нь.

Посе́мъ посто́й ма́лѡ молча́, до́ндеже ѹ҆тиша́тсѧ всѧ̑ чꙋ̑вствӏ̈ѧ, и҆ тогда̀ сотворѝ трѝ покло́ны, глаго́лѧ:

Гдⷭ҇и, ӏ҆и҃се хрⷭ҇тѐ, сн҃е бж҃ӏ̈й, поми́лꙋй мѧ̀ грѣ́шнаго.

Та́же начнѝ си́це.

Мл҃тва предначина́тельнаѧ:

Гдⷭ҇и ӏ҆и҃се хрⷭ҇тѐ, сн҃е бж҃ӏ̈й, мл҃твъ ра́ди пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ, поми́лꙋй на́съ. А҆ми́нь.

Сла́ва тебѣ̀, бж҃е на́шъ, сла́ва тебѣ̀.

Мл҃тва ст҃о́мꙋ дх҃ꙋ: [в҃]

Цр҃ю̀ нбⷭ҇ный, ѹ҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище бл҃ги́хъ, и҆ жи́зни пода́телю, прӏ̈идѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кӏ̈ѧ скве́рны, и҆ сп҃сѝ, бл҃же, дꙋ́шы на́шѧ.

Трист҃ое:

Ст҃ы́й бж҃е, ст҃ы́й крѣ́пкӏ̈й, ст҃ы́й безсме́ртный, поми́лꙋй на́съ. Три́жды, и҆ покло́ны трѝ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ко прест҃ѣ́й трⷪ҇цѣ:

Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нӏ̈ѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.

Гдⷭ҇и поми́лꙋй, три́жды.

Сла́ва, и҆ ны́нѣ: [г҃]

Мл҃тва гдⷭ҇нѧ:

Ѻ҆́ч҃е на́шъ, и҆́же є҆сѝ на нб҃сѣ́хъ, да ст҃и́тсѧ и҆́мѧ твоѐ, да прӏ̈и́детъ црⷭ҇твӏ̈е твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ, и҆ на землѝ. хлѣ́бъ на́шъ насꙋ́щный да́ждь на́мъ дне́сь: и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нӏ̈е, но и҆зба́ви на́съ ѿ лꙋка́вагѡ.

Тропарѝ трⷪ҇чны, гла́съ а҃:

Воста́вше ѿ сна̀, припа́даемъ тѝ, бл҃же, и҆ а҆́гг҃льскꙋю пѣ́снь вопӏ̈е́мъ тѝ, си́льне: ст҃ъ, ст҃ъ, ст҃ъ є҆сѝ, бж҃е, бцⷣею поми́лꙋй на́съ.

Сла́ва: Ѿ ѻ҆дра̀ и҆ сна̀ воздви́глъ мѧ̀ є҆сѝ гдⷭ҇и: ѹ҆́мъ мо́й просвѣтѝ и҆ се́рдце, и҆ ѹ҆стнѣ̀ моѝ ѿве́рзи, во є҆́же пѣ́ти тѧ̀ ст҃а́ѧ трⷪ҇це: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.

И҆ ны́нѣ: Внеза́пꙋ сꙋдӏ̈ѧ̀ прӏ̈и́детъ, и҆ коегѡ́ждо дѣѧ̑нӏ̈ѧ ѡ҆бнажа́тсѧ, но стра́хомъ зове́мъ въ полꙋ́нощи: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.

Гдⷭ҇и, поми́лꙋй, в҃ӏ.

И҆ мл҃твꙋ сӏ̈ю̀:

Ѿ сна̀ воста́въ, бл҃годарю́ тѧ ст҃а́ѧ трⷪ҇це, ꙗ҆́кѡ мно́гӏ̈ѧ ра́ди твоеѧ̀ бла́гости и҆ долготерпѣ́нӏ̈ѧ, не прогнѣ́валсѧ є҆сѝ на мѧ̀ лѣни́ваго и҆ грѣ́шнаго, нижѐ погꙋби́лъ мѧ̀ є҆сѝ со беззако́ньми мои́ми: но человѣколю́бствовалъ є҆сѝ ѻ҆бы́чнѡ, и҆ въ неча́ѧнӏ̈и лежа́ща воздви́глъ мѧ̀ є҆сѝ, во є҆́же ѹ҆́треневати, и҆ славосло́вити держа́вꙋ твою̀. и҆ ны́нѣ просвѣтѝ моѝ ѻ҆́чи мы́слєнныѧ, ѿве́рзи моѧ̑ ѹ҆ста̀, поꙋча́тисѧ словесє́мъ твои̑мъ, и҆ разꙋмѣ́ти за́пѡвѣди твоѧ̑, и҆ твори́ти во́лю твою̀, и҆ пѣ́ти тѧ̀ во и҆сповѣ́данӏ̈и серде́чнѣмъ, и҆ воспѣва́ти всест҃о́е и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Прӏ̈иди́те, поклони́мсѧ цр҃е́ви на́шемꙋ бг҃ꙋ. Покло́нъ.

Прӏ̈иди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ. Покло́нъ.

Прӏ̈иди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ. Покло́нъ.

Ѱало́мъ н҃:

Поми́лꙋй мѧ̀ бж҃е, по вели́цѣй млⷭ҇сти твое́й, и҆ по мно́жествꙋ щедро́тъ твои́хъ ѡ҆чи́сти беззако́нӏ̈е моѐ. Наипа́че ѡ҆мы́й мѧ̀ ѿ беззако́нӏ̈ѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. Ꙗ҆́кѡ беззако́нӏ̈е моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. Тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ: ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши, внегда̀ сꙋди́ти тѝ. Се́ бо въ беззако́нӏ̈ихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. Се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ѹ҆бѣлю́сѧ. Слꙋ́хꙋ моемꙋ̀ да́си ра́дость и҆ весе́лӏ̈е, возра́дꙋютсѧ кѡ́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нӏ̈ѧ моѧ̑ ѡ҆чи́сти. Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й. Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ. Возда́ждь мѝ ра́дость сп҃се́нӏ̈ѧ твоегѡ̀, и҆ дх҃омъ влⷣчнимъ ѹ҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вӏ̈и къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й бж҃е, бж҃е сп҃се́нӏ̈ѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ѹ҆стнѣ̀ моѝ ѿве́рзеши, и҆ ѹ҆ста̀ моѧ̑ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ѹ҆́бѡ: всесожже́нӏ̈ѧ не бл҃говоли́ши. Же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ѹ҆ничижи́тъ. Ѹ҆бл҃жѝ гдⷭ҇и, бл҃говоле́нӏ̈емъ твои́мъ сӏ̈ѡ́на, и҆ да сози́ждꙋтсѧ стѣ́ны ӏ҆ерⷭ҇ли̑мскӏ̈ѧ. Тогда̀ бл҃говоли́ши же́ртвꙋ пра́вды, возноше́нӏ̈е и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.

Сѷмво́лъ правосла́вныѧ вѣ́ры:

Вѣ́рꙋю во є҆ди́наго бг҃а ѻ҆ц҃а̀, вседержи́телѧ, творца̀ нб҃ꙋ и҆ землѝ, ви̑димымъ же всѣ̑мъ, и҆ неви̑димымъ. И҆ во є҆ди́наго гдⷭ҇а ӏ҆и҃са хрⷭ҇та̀, сн҃а бж҃ӏ̈ѧ, є҆диноро́днаго, и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ: свѣ́та ѿ свѣ́та, бг҃а и҆́стинна ѿ бг҃а и҆́стинна, рожде́нна, не сотворе́нна, є҆диносꙋ́щна ѻ҆ц҃ꙋ̀, и҆́мже всѧ̑ бы́ша. На́съ ра́ди человѣ́къ, и҆ на́шегѡ ра́ди сп҃се́нӏ̈ѧ сше́дшаго съ нб҃съ, и҆ воплоти́вшагосѧ ѿ дх҃а ст҃а и҆ мр҃ӏ́и дв҃ы, и҆ вочл҃вѣ́чшасѧ. Распѧ́таго же за ны̀ при понтӏ́йстѣмъ пӏ̈ла́тѣ, и҆ страда́вша, и҆ погребе́на. И҆ воскр҃сшаго въ тре́тӏ̈й де́нь по писа́нӏ̈ємъ. И҆ возше́дшаго на нб҃са̀, и҆ сѣдѧ́ща ѡ҆деснꙋ́ю ѻ҆ц҃а̀. И҆ па́ки грѧдꙋ́щаго со сла́вою, сꙋди́ти живы̑мъ и҆ мє́ртвымъ, є҆гѡ́же црⷭ҇твӏ̈ю не бꙋ́детъ конца̀. И҆ въ дх҃а ст҃а́го, гдⷭ҇а, животворѧ́щаго, и҆́же ѿ ѻ҆ц҃а̀ и҆сходѧ́щаго, и҆́же со ѻ҆ц҃е́мъ и҆ сн҃омъ спокланѧ́ема и҆ ссла́вима, гл҃го́лавшаго прⷪ҇ро́ки. Во є҆ди́нꙋ свѧтꙋ́ю, собо́рнꙋю и҆ а҆пⷭ҇льскꙋю цр҃ковь. И҆сповѣ́дꙋю є҆ди́но кр҃ще́нӏ̈е, во ѡ҆ставле́нӏ̈е грѣхѡ́въ. Ча́ю воскрⷭ҇нӏ̈ѧ ме́ртвыхъ: И҆ жи́зни бꙋ́дꙋщагѡ вѣ́ка. А҆ми́нь.

Мл҃тва а҃, ст҃а́гѡ мака́рӏ̈а вели́кагѡ:

Бж҃е, ѡ҆чи́сти мѧ̀ грѣ́шнаго, ꙗ҆́кѡ николи́же сотвори́хъ бл҃го́е пред̾ тобо́ю, но и҆зба́ви мѧ̀ ѿ лꙋка́вагѡ, и҆ да бꙋ́детъ во мнѣ̀ во́лѧ твоѧ̀: да неѡсꙋжде́ннѡ ѿве́рзꙋ ѹ҆ста̀ моѧ̑ недостѡ́йнаѧ, и҆ восхвалю̀ и҆́мѧ твоѐ ст҃о́е, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва в҃, тогѡ́жде ст҃а́гѡ:

Ѿ сна̀ воста́въ полꙋ́нощнꙋю пѣ́снь приношꙋ́ ти сп҃се, и҆ припа́даѧ вопӏ̈ю́ ти: не да́ждь мѝ ѹ҆снꙋ́ти во грѣхо́внѣй сме́рти, но ѹ҆ще́дри мѧ̀ распны́йсѧ во́лею, и҆ лежа́щаго мѧ̀ въ лѣ́ности ѹ҆скори́въ возста́ви, и҆ сп҃си́ мѧ въ предстоѧ́нӏ̈и и҆ мл҃твѣ, и҆ по снѣ̀ нощнѣ́мъ возсӏ̈ѧ́й мѝ де́нь безгрѣ́шенъ хрⷭ҇тѐ бж҃е, и҆ сп҃си́ мѧ.

Мл҃тва г҃, тогѡ́жде ст҃а́гѡ:

Къ тебѣ̀ влⷣко чл҃вѣколю́бче, ѿ сна̀ воста́въ прибѣга́ю, и҆ на дѣла̀ твоѧ̑ подвиза́юсѧ млⷭ҇рдӏ̈емъ твои́мъ, молю́сѧ тебѣ̀: помозѝ мнѣ̀ на всѧ́кое вре́мѧ, во всѧ́кой ве́щи, и҆ и҆зба́ви мѧ̀ ѿ всѧ́кӏ̈ѧ мӏ̈рскӏ́ѧ ѕлы́ѧ ве́щи, и҆ дӏ̈а́вольскагѡ поспѣше́нӏ̈ѧ, и҆ сп҃си́ мѧ, и҆ введѝ въ црⷭ҇тво твоѐ вѣ́чное. ты́ бо є҆сѝ мо́й сотвори́тель, и҆ всѧ́комꙋ бл҃гꙋ промы́сленникъ и҆ пода́тель, ѡ҆ тебѣ́ же всѐ ѹ҆пова́нӏ̈е моѐ, и҆ тебѣ̀ сла́вꙋ возсыла́ю, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва д҃, тогѡ́жде ст҃а́гѡ:

Гдⷭ҇и, и҆́же мно́гою твое́ю бл҃гостӏ̈ю и҆ вели́кими щедро́тами твои́ми, да́лъ є҆сѝ мнѣ̀ рабꙋ̀ твоемꙋ̀ мимоше́дшее вре́мѧ но́щи сеѧ̀ без̾ напа́сти прейтѝ ѿ всѧ́кагѡ ѕла̀ проти́вна: ты̀ са́мъ, влⷣко, всѧ́ческихъ тво́рче, сподо́би мѧ̀ и҆́стиннымъ твои́мъ свѣ́томъ, и҆ просвѣще́ннымъ се́рдцемъ твори́ти во́лю твою̀, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва є҃, ст҃а́гѡ васӏ́лӏ̈а вели́кагѡ:

Гдⷭ҇и вседержи́телю, бж҃е си́лъ и҆ всѧ́кӏ̈ѧ пло́ти, въ вы́шнихъ живы́й, и҆ на смирє́нныѧ призира́ѧй, сердца́ же и҆ ѹ҆трѡ́бы и҆спытꙋ́ѧй, и҆ сокровє́ннаѧ человѣ́кѡвъ ꙗ҆́вѣ предвѣ́дый, безнача́льный и҆ присносꙋ́щный свѣ́те, ѹ҆ негѡ́же нѣ́сть премѣне́нӏ̈ѧ, и҆лѝ преложе́нӏ̈ѧ ѡ҆сѣне́нӏ̈е: са́мъ, безсме́ртный цр҃ю̀, прӏ̈имѝ молє́нӏ̈ѧ на̑ша, ꙗ҆̀же въ настоѧ́щее вре́мѧ, на мно́жество твои́хъ щедро́тъ дерза́юще, ѿ скве́рныхъ къ тебѣ̀ ѹ҆сте́нъ твори́мъ: и҆ ѡ҆ста́ви на́мъ прегрѣшє́нӏ̈ѧ на̑ша, ꙗ҆̀же дѣ́ломъ, и҆ сло́вомъ, и҆ мы́слӏ̈ю, вѣ́дѣнӏ̈емъ и҆лѝ невѣ́дѣнӏ̈емъ согрѣшє́ннаѧ на́ми, и҆ ѡ҆чи́сти ны̀ ѿ всѧ́кӏ̈ѧ скве́рны пло́ти и҆ дꙋ́ха: и҆ да́рꙋй на́мъ бо́дреннымъ се́рдцемъ, и҆ тре́звенною мы́слӏ̈ю, всю̀ настоѧ́щагѡ житӏ̈ѧ̀ но́щь прейтѝ, ѡ҆жида́ющымъ прише́ствӏ̈ѧ свѣ́тлагѡ и҆ ꙗ҆вле́ннагѡ днѐ, є҆диноро́днагѡ твоегѡ̀ сн҃а, гдⷭ҇а и҆ бг҃а и҆ сп҃са на́шегѡ ӏ҆и҃са хрⷭ҇та̀, во́ньже со сла́вою сꙋдӏ̈ѧ̀ всѣ́хъ прӏ̈и́детъ, комꙋ́ждо ѿда́ти по дѣлѡ́мъ є҆гѡ̀: да не па́дше и҆ ѡ҆блѣни́вшесѧ, но бо́дрствꙋюще, и҆ воздви́жени въ дѣ́ланӏ̈е, ѡ҆брѧ́щемсѧ гото́ви, въ ра́дость и҆ бжⷭ҇твенный черто́гъ сла́вы є҆гѡ̀ совни́демъ, и҆дѣ́же пра́зднꙋющихъ гла́съ непреста́нный, и҆ неизрече́ннаѧ сла́дость зрѧ́щихъ твоегѡ̀ лица̀ добро́тꙋ неизрече́ннꙋю. ты́ бо є҆сѝ и҆́стинный свѣ́тъ, просвѣща́ѧй и҆ ѡ҆сщ҃а́ѧй всѧ́чєскаѧ, и҆ тѧ̀ пое́тъ всѧ̀ тва́рь во вѣ́ки вѣкѡ́въ. А҆ми́нь.

Мл҃тва ѕ҃ тогѡ́жде ст҃а́го:

Тѧ̀ бл҃гослови́мъ, вы́шнӏ̈й бж҃е и҆ гдⷭ҇и млⷭ҇ти, творѧ́щаго при́снѡ съ на́ми вели̑каѧ же и҆ неизслѣ́дѡваннаѧ, сла̑внаѧ же и҆ ѹ҆жа̑снаѧ, и҆́хже нѣ́сть числа̀, пода́вшаго на́мъ со́нъ во ѹ҆покое́нӏ̈е не́мощи на́шеѧ, и҆ ѡ҆слабле́нӏ̈е трꙋдѡ́въ многотрꙋ́дныѧ пло́ти. бл҃годари́мъ тѧ̀, ꙗ҆́кѡ не погꙋби́лъ є҆сѝ на́съ со беззако́ньми на́шими, но чл҃вѣколю́бствовалъ є҆сѝ ѻ҆бы́чнѡ, и҆ въ неча́ѧнӏ̈и лежа́щыѧ ны̀ воздви́глъ є҆сѝ, во є҆́же славосло́вити держа́вꙋ твою̀. тѣ́мже мо́лимъ безмѣ́рнꙋю твою̀ бл҃гость, просвѣтѝ на́шѧ мы̑сли, ѻ҆чеса̀ и҆ ѹ҆́мъ на́шъ ѿ тѧ́жкагѡ сна̀ лѣ́ности возста́ви: ѿве́рзи на̑ша ѹ҆ста̀, и҆ и҆спо́лни ѧ҆̀ твоегѡ̀ хвале́нӏ̈ѧ, ꙗ҆́кѡ да возмо́жемъ непоколе́блемѡ пѣ́ти же и҆ и҆сповѣ́датисѧ тебѣ̀, во всѣ́хъ и҆ ѿ всѣ́хъ сла́вимомꙋ бг҃ꙋ, безнача́льномꙋ ѻ҆ц҃ꙋ̀, со є҆диноро́днымъ твои́мъ сн҃омъ, и҆ всест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва з҃, пѣ́снь полꙋ́нощнаѧ, ко прест҃ѣ́й бцⷣѣ:

Воспѣва́ю бл҃года́ть твою̀, влⷣчце, молю́ тѧ, ѹ҆́мъ мо́й ѡ҆бл҃годатѝ. Стꙋпа́ти пра́вѡ мѧ̀ наста́ви, пꙋтю̀ хрⷭ҇то́выхъ за́повѣдей. Бдѣ́ти къ пѣ́сни ѹ҆крѣпѝ, ѹ҆ны́нӏ̈ѧ со́нъ ѿгонѧ́ющи. Свѧ́зана плени́цами грѣхопаде́нӏ̈й, мольба́ми твои́ми разрѣшѝ бг҃оневѣ́сто. Въ нощѝ мѧ̀ и҆ во днѝ сохранѧ́й, борю́щихъ вра̑гъ и҆збавлѧ́ющи мѧ̀. Жизнода́телѧ бг҃а ро́ждшаѧ, ѹ҆мерщвле́на мѧ̀ страстьмѝ ѡ҆живѝ. Ꙗ҆́же свѣ́тъ невече́рнӏ̈й ро́ждшаѧ, дꙋ́шꙋ мою̀ ѡ҆слѣ́пшꙋю просвѣтѝ. ѽ ди́внаѧ влⷣчнѧ пала́то, до́мъ дх҃а бж҃е́ственна менѐ сотворѝ. Врача̀ ро́ждшаѧ, ѹ҆врачꙋ́й дꙋшѝ моеѧ̀ многолѣ̑тныѧ стра̑сти. Волнꙋ́ющасѧ жите́йскою бꙋ́рею, ко стези́ мѧ покаѧ́нӏ̈ѧ напра́ви. И҆зба́ви мѧ̀ ѻ҆гнѧ̀ вѣ́чнꙋющагѡ, и҆ че́рвӏ̈ѧ же ѕла́гѡ, и҆ та́ртара: Да мѧ̀ не ꙗ҆ви́ши бѣсѡ́мъ ра́дованӏ̈е, и҆́же мнѡ́гимъ грѣхѡ́мъ пови́нника. Но́ва сотворѝ мѧ̀ ѡ҆бетша́вшаго нечꙋ́вственными, пренепоро́чнаѧ, согрѣше́нӏ̈и. стра́нна мꙋ́ки всѧ́кӏ̈ѧ покажи́ мѧ, и҆ всѣ́хъ влⷣкꙋ ѹ҆молѝ. Нбⷭ҇наѧ мѝ ѹ҆лꙋчи́ти весє́лӏ̈ѧ со всѣ́ми ст҃ы́ми сподо́би. Прест҃а́ѧ дв҃о, ѹ҆слы́ши гла́съ непотре́бнагѡ раба̀ твоегѡ̀. Стрꙋю̀ дава́й мнѣ̀ слеза́мъ пречⷭ҇таѧ, дꙋшѝ моеѧ̀ скве́рнꙋ ѡ҆чища́ющи. Стена̑нӏ̈ѧ ѿ се́рдца приношꙋ́ ти непреста́ннѡ, ѹ҆се́рдствꙋй, влⷣчце. Моле́бнꙋю слꙋ́жбꙋ мою̀ прӏ̈имѝ, и҆ бг҃ꙋ бл҃гоꙋтро́бномꙋ принесѝ. Превы́шшаѧ а҆́гг҃лъ, мӏ̈рска́гѡ мѧ̀ превы́шша сли́тӏ̈ѧ сотворѝ. Свѣтоно́снаѧ сѣ́не нбⷭ҇наѧ, дх҃о́внꙋю бл҃года́ть во мнѣ̀ напра́ви. Рꙋ́цѣ воздѣ́ю и҆ ѹ҆стнѣ̀ къ похвале́нӏ̈ю, ѡ҆скверне́ны скве́рною, всенепоро́чнаѧ. Дꙋшетлѣ́нныхъ мѧ̀ па́костей и҆зба́ви, хрⷭ҇та̀ прилѣ́жнѡ ѹ҆молѧ́ющи: є҆мꙋ́же че́сть и҆ поклоне́нӏ̈е подоба́етъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва и҃, ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀:

Многомлⷭ҇тиве и҆ всемлⷭ҇тиве бж҃е мо́й, гдⷭ҇и ӏ҆и҃се хрⷭ҇тѐ, мно́гӏ̈ѧ ра́ди любвѐ сше́лъ и҆ воплоти́лсѧ є҆сѝ, ꙗ҆́кѡ да сп҃се́ши всѣ́хъ. И҆ па́ки сп҃се сп҃си́ мѧ по бл҃года́ти, молю́ тѧ. А҆́ще бо ѿ дѣ́лъ сп҃се́ши мѧ̀, нѣ́сть сѐ бл҃года́ть и҆ да́ръ, но до́лгъ па́че. є҆́й мно́гӏ̈й въ щедро́тахъ, и҆ неизрече́нный въ млⷭ҇ти! Вѣ́рꙋѧй бо въ мѧ̀, ре́клъ є҆сѝ, ѽ хрⷭ҇тѐ мо́й, жи́въ бꙋ́детъ и҆ не ѹ҆́зритъ сме́рти во вѣ́ки. А҆́ще ѹ҆́бѡ вѣ́ра ꙗ҆́же въ тѧ̀ сп҃са́етъ ѿча̑ѧнныѧ, сѐ вѣ́рꙋю, сп҃си́ мѧ, ꙗ҆́кѡ бг҃ъ мо́й є҆сѝ ты̀ и҆ созда́тель. Вѣ́ра же вмѣ́стѡ дѣ́лъ да вмѣни́тсѧ мнѣ̀, бж҃е мо́й, не взы́щеши бо дѣ́лъ ѿню́дъ ѡ҆правда́ющихъ мѧ̀. Но та̀ вѣ́ра моѧ̀ да довлѣ́етъ вмѣ́стѡ всѣ́хъ, та̀ да ѿвѣща́етъ, та̀ да ѡ҆правди́тъ мѧ̀, та̀ да пока́жетъ мѧ̀ прича́стника сла́вы твоеѧ̀ вѣ́чныѧ. Да не ѹ҆́бѡ похи́титъ мѧ̀ сатана̀, и҆ похва́литсѧ, сло́ве, є҆́же ѿто́ргнꙋти мѧ̀ ѿ твоеѧ̀ рꙋкѝ и҆ ѡ҆гра́ды. Но и҆лѝ хощꙋ̀, сп҃сѝ мѧ̀, и҆лѝ не хощꙋ̀, хрⷭ҇тѐ сп҃се мо́й, предварѝ ско́рѡ, ско́рѡ, погибо́хъ: ты́ бо є҆сѝ бг҃ъ мо́й ѿ чре́ва ма́тере моеѧ̀. Сподо́би мѧ̀, гдⷭ҇и, ны́нѣ возлюби́ти тѧ̀, ꙗ҆́коже возлюби́хъ и҆ногда̀ то́й са́мый грѣ́хъ, и҆ па́ки порабо́тати тебѣ̀ без̾ лѣ́ности то́щнѡ, ꙗ҆́коже порабо́тахъ пре́жде сатанѣ̀ льсти́вомꙋ. Наипа́че же порабо́таю тебѣ̀ гдⷭ҇ꙋ и҆ бг҃ꙋ моемꙋ̀ ӏ҆и҃сꙋ хрⷭ҇тꙋ̀, во всѧ̑ дни̑ живота̀ моегѡ̀, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ѳ҃, к храни́телю человѣ́ческӏ̈ѧ жи́зни а҆́гг҃лꙋ:

Ст҃ы́й а҆́гг҃ле, предстоѧ́й ѻ҆каѧ́ннѣй мое́й дꙋшѝ, и҆ стра́стнѣй мое́й жи́зни, не ѡ҆ста́ви менѐ грѣ́шнагѡ, нижѐ ѿстꙋпѝ ѿ менѐ за невоздержа́нӏ̈е моѐ: не да́ждь мѣ́ста лꙋка́вомꙋ де́монꙋ ѡ҆блада́ти мно́ю, наси́льствомъ сме́ртнагѡ сегѡ̀ тѣлесѐ: ѹ҆крѣпѝ бѣ́дствꙋющꙋю и҆ хꙋдꙋ́ю мою̀ рꙋ́кꙋ, и҆ наста́ви мѧ̀ на пꙋ́ть сп҃се́нӏ̈ѧ. є҆́й ст҃ы́й а҆́гг҃ле бж҃ӏ̈й, храни́телю и҆ покрови́телю ѻ҆каѧ́нныѧ моеѧ̀ дꙋшѝ и҆ тѣ́ла, всѧ̑ мнѣ̀ простѝ, є҆ли́кими тѧ̀ ѡ҆скорби́хъ во всѧ̑ дни̑ живота̀ моегѡ̀: и҆ а҆́ще что̀ согрѣши́хъ въ преше́дшꙋю но́щь сӏ̈ю̀, покры́й мѧ̀ въ настоѧ́щӏ̈й де́нь: и҆ сохранѝ мѧ̀ ѿ всѧ́кагѡ и҆скꙋше́нӏ̈ѧ проти́внагѡ, да ни въ ко́емъ грѣсѣ̀ прогнѣ́ваю бг҃а: и҆ моли́сѧ за мѧ̀ ко гдⷭ҇ꙋ, да ѹ҆тверди́тъ мѧ̀ въ стра́сѣ свое́мъ, и҆ досто́йна пока́жетъ мѧ̀ раба̀ своеѧ̀ бл҃гости. А҆ми́нь.

Мл҃тва ӏ҃, ѹ҆́треннѧѧ коне́чнаѧ, ко прест҃ѣ́й бцⷣѣ:

Прест҃а́ѧ влⷣчце моѧ̀ бцⷣе, ст҃ы́ми твои́ми и҆ всеси́льными мольба́ми, ѿженѝ ѿ менѐ смире́ннагѡ и҆ ѻ҆каѧ́ннагѡ раба̀ твоегѡ̀ ѹ҆ны́нӏ̈е, забве́нӏ̈е, неразꙋ́мӏ̈е, нерадѣ́нӏ̈е, и҆ всѧ̑ сквє́рнаѧ, лꙋка̑ваѧ и҆ хꙋ̑льнаѧ помышлє́нӏ̈ѧ, ѿ ѻ҆каѧ́ннагѡ моегѡ̀ се́рдца, и҆ ѿ помраче́ннагѡ ѹ҆ма̀ моегѡ̀. И҆ погасѝ пла́мень страсте́й мои́хъ, ꙗ҆́кѡ ни́щъ є҆́смь и҆ ѻ҆каѧ́ненъ: и҆ и҆зба́ви мѧ̀ ѿ мно́гихъ и҆ лю́тыхъ воспомина́нӏ̈й, и҆ предпрӏ̈ѧ́тӏ̈й, и҆ ѿ всѣ́хъ дѣ́йствъ ѕлы́хъ свободи́ мѧ. Ꙗ҆́кѡ бл҃гослове́на є҆сѝ ѿ всѣ́хъ родѡ́въ, и҆ сла́витсѧ пречⷭ҇тно́е и҆́мѧ твоѐ, во вѣ́ки вѣкѡ́въ. А҆ми́нь.

Мл҃твенное призыва́нӏ̈е ст҃а́гѡ, є҆гẃже и҆́мѧ но́сиши:

Молѝ бг҃а ѡ҆ мнѣ̀, ст҃ы́й ѹ҆го́дниче бж҃ӏ̈й [д҃] (и҆́мⷬ҇къ), ꙗ҆́кѡ а҆́зъ ѹ҆се́рднѡ къ тебѣ̀ прибѣга́ю, ско́ромꙋ помо́щникꙋ и҆ моли́твенникꙋ ѡ҆ дꙋшѝ мое́й.

Пѣ́снь прест҃ѣ́й бцⷣѣ, гла́съ д҃:

Бцⷣе дв҃о, ра́дꙋйсѧ, бл҃года́тнаѧ мр҃ӏ́е, гдⷭ҇ь съ тобо́ю: бл҃гослове́нна ты̀ въ жена́хъ, и҆ бл҃гослове́нъ пло́дъ чре́ва твоегѡ̀, ꙗ҆́кѡ сп҃са родила̀ є҆сѝ дꙋ́шъ на́шихъ.

Тропа́рь крⷭ҇тꙋ̀, гла́съ а҃,
мл҃итва за ѻ҆те́чество:

Сп҃сѝ, гдⷭ҇и, лю́ди твоѧ̑, и҆ благословѝ достоѧ́нӏ̈е твоѐ, побѣ̑ды правосла̑внымъ хрⷭ҇тӏ̈а́нѡмъ на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.

Мл҃тва ѡ҆ живы́хъ:

Сп҃сѝ, гдⷭ҇и, и҆ поми́лꙋй ѻ҆тца̀ моего̀ дꙋхо́внаго [и҆́мⷬ҇къ], роди́телей мои́хъ [и҆́мⷬ҇къ], сро́дникѡвъ [и҆́мⷬ҇къ], нача́льникѡвъ, наста́вникѡвъ, бл҃годѣ́телей [и҆́мⷬ҇къ], и҆ всѣ́хъ правосла́вныхъ хрⷭ҇тӏ̈а́нъ.

Мл҃тва ѡ҆ ѹ҆со́пшихъ:

Ѹ҆поко́й, гдⷭ҇и, дꙋ́шы ѹ҆со́пшихъ ра̑бъ твои́хъ: [роди́телей мои́хъ: и҆́мⷬ҇къ], сро́дникѡвъ, бл҃годѣ́телей [и҆́мⷬ҇къ], и҆ всѣ́хъ правосла́вныхъ хрⷭ҇тӏ̈а́нъ, и҆ простѝ и҆̀мъ всѧ̑ согрѣшє́нӏ̈ѧ вѡ́льнаѧ и҆ невѡ́льнаѧ, и҆ да́рꙋй и҆̀мъ црⷭ҇твӏ̈е нбⷭ҇ное.

Ѡ҆конча́ние мл҃итвъ: [є҃]

Досто́йно є҆́сть ꙗ҆́кѡ вои́стиннꙋ блажи́ти тѧ̀ бцⷣꙋ, приснобл҃же́ннꙋю, и҆ пренепоро́чнꙋю, и҆ мт҃рь бг҃а на́шегѡ: чⷭ҇тнѣ́йшꙋю херꙋвӏ̑мъ, и҆ сла́внѣйшꙋю без̾ сравне́нӏ̈ѧ серафӏ̑мъ, без̾ и҆стлѣ́нӏ̈ѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ. Покло́нъ.

Сла́ва, и҆ ны́нѣ:

Гдⷭ҇и поми́лꙋй, три́жды.

Ѿпꙋ́стъ: Гдⷭ҇и ӏ҆и҃се хрⷭ҇тѐ сн҃е бж҃ӏ̈й, мл҃твъ ра́ди пречⷭ҇тыѧ твоеѧ̀ мт҃ре, прпⷣбныхъ и҆ бг҃оно́сныхъ ѻ҆тє́цъ на́шихъ и҆ всѣ́хъ ст҃ы́хъ, поми́лꙋй на́съ. Ами́нь.

ПОМѦ́ННИК

є҆го́же до́лжно є҆́сть мона́хꙋ и҆лѝ мӏ̈рѧни́нꙋ на всѧ́къ де́нь по сконча́нӏ̈и келе́йнагѡ пра́вила, со всѧ́кимъ ѹ҆миле́нӏ̈емъ честѝ.

Ѡ҆ живы́хъ:

Помѧнѝ, гдⷭ҇и ӏ҆и҃се хрⷭ҇тѐ, бж҃е на́шъ, млⷭ҇ти и҆ щедрѡ́ты твоѧ̑ ѿ вѣ́ка сꙋ́щыѧ, и҆́хже ра́ди и҆ вочл҃вѣ́чилсѧ є҆сѝ, и҆ распѧ́тӏ̈е и҆ сме́рть, сп҃се́нӏ̈ѧ ра́ди пра́вѡ въ тѧ̀ вѣ́рꙋющихъ, претерпѣ́ти и҆зво́лилъ є҆сѝ: и҆ воскр҃съ и҆з̾ ме́ртвыхъ, возне́слсѧ є҆сѝ на нб҃са̀, и҆ сѣди́ши ѡ҆деснꙋ́ю бг҃а ѻ҆ц҃а̀, и҆ призира́еши на смирє́нныѧ мольбы̑ всѣ́мъ се́рдцемъ призыва́ющихъ тѧ̀: приклонѝ ѹ҆́хо твоѐ, и҆ ѹ҆слы́ши смире́нное моле́нӏ̈е менє̀, непотре́бнагѡ раба̀ твоегѡ̀, въ воню̀ бл҃гоꙋха́нӏ̈ѧ дх҃о́внагѡ тебѣ̀ за всѧ̑ лю́ди твоѧ̑ приносѧ́щагѡ. И҆ въ пе́рвыхъ помѧнѝ цр҃ковь твою̀ ст҃ꙋ́ю, собо́рнꙋю и҆ а҆пⷭ҇льскꙋю, ю҆́же снабдѣ́лъ є҆сѝ чⷭ҇тно́ю твое́ю кро́вӏ̈ю, и҆ ѹ҆твердѝ, и҆ ѹ҆крѣпѝ, и҆ разширѝ, ѹ҆мно́жи, ѹ҆мирѝ, и҆ непреѡбори́мꙋ а҆́довыми враты̀ во вѣ́ки сохранѝ: раздира̑нӏ̈ѧ цр҃кве́й ѹ҆тишѝ, шата̑нӏ̈ѧ ꙗ҆зы́чєскаѧ ѹ҆гасѝ, и҆ є҆ресе́й воста̑нӏ̈ѧ ско́рѡ разорѝ и҆ и҆скоренѝ, и҆ въ ничто́же си́лою ст҃а́гѡ твоегѡ̀ дх҃а ѡ҆братѝ. Покло́нъ.

Сп҃сѝ, гдⷭ҇и, и҆ поми́лꙋй бг҃охрани́мꙋю странꙋ̀ на́шꙋ, вла̑сти и҆ во́инство є҆ѧ̀, да ти́хое и҆ безмо́лвное житӏ̈ѐ поживе́мъ во всѧ́комъ бл҃гоче́стӏ̈и и҆ чⷭ҇тотѣ̀. Покло́нъ.

Сп҃сѝ, гдⷭ҇и, и҆ поми́лꙋй вели́каго господи́на и҆ ѻ҆тца̀ на́шего ст҃ѣ́йшаго патрӏ̈а́рха [и҆́мⷬ҇къ], преѡсщ҃є́нныѧ митрополӏ́ты, а҆рхӏ̈епⷭ҇кпы и҆ є҆пⷭ҇кпы правосла̑вныѧ, ӏ҆ерє́и же и҆ дӏ̈а́коны, и҆ ве́сь при́четъ цр҃ко́вный, ꙗ҆̀же поста́вилъ є҆сѝ пастѝ слове́сное твоѐ ста́до: и҆ мл҃твами и҆́хъ поми́лꙋй, и҆ сп҃си́ мѧ грѣ́шнаго. Покло́нъ.

Сп҃сѝ, гдⷭ҇и, и҆ поми́лꙋй ѻ҆тца̀ моего̀ дꙋхо́внаго [и҆́мⷬ҇къ], и҆ ст҃ы́ми є҆гѡ̀ мл҃твами простѝ моѧ̑ согрѣшє́нӏ̈ѧ. Покло́нъ.

Сп҃сѝ, гдⷭ҇и, и҆ поми́лꙋй роди́тели моѧ̑ [и҆́мⷬ҇къ], бра́тӏ̈ю и҆ сестры̑, и҆ сро́дники моѧ̑ по пло́ти, и҆ всѧ̑ бли̑жнӏ̈ѧ ро́да моегѡ̀, и҆ дрꙋ́ги, и҆ да́рꙋй и҆̀мъ мӏ̑рнаѧ твоѧ̑ и҆ премӏ̑рнаѧ бл҃га̑ѧ. Покло́нъ.

Сп҃сѝ, гдⷭ҇и, и҆ поми́лꙋй по мно́жествꙋ щедро́тъ твои́хъ всѧ̑ сщ҃еннои́ноки, и҆́ноки же и҆ и҆́нѡкини, и҆ всѧ̑ въ дѣ́вствѣ же и҆ бл҃гоговѣ́нӏ̈и и҆ по́стничествѣ живꙋ́щыѧ въ монастырѣ́хъ, въ пꙋсты́нѧхъ, въ пеще́рахъ, гора́хъ, столпѣ́хъ, затво́рѣхъ, разсѣ́линахъ ка́менныхъ, ѻ҆стровѣ́хъ же морски́хъ, и҆ на всѧ́комъ мѣ́стѣ влады́чествӏ̈ѧ твоегѡ̀ правовѣ́рнѡ живꙋ́щыѧ, и҆ бл҃гоче́стнѡ слꙋжа́щыѧ тѝ, и҆ молѧ́щыѧсѧ тебѣ̀: ѡ҆блегчѝ и҆̀мъ тѧготꙋ̀, и҆ ѹ҆тѣ́ши и҆̀хъ ско́рбь, и҆ къ по́двигꙋ ѿ тебѐ си́лꙋ и҆ крѣ́пость и҆̀мъ пода́ждь, и҆ мл҃твами и҆̀хъ да́рꙋй мѝ ѡ҆ставле́нӏ̈е грѣхѡ́въ. Покло́нъ.

Сп҃сѝ, гдⷭ҇и, и҆ поми́лꙋй ста́рцы и҆ ю҆̀ныѧ, ни́щыѧ и҆ сироты̑ и҆ вдови̑цы, и҆ сꙋ́щыѧ въ болѣ́зни и҆ въ печа́лѣхъ, бѣда́хъ же и҆ ско́рбехъ, ѡ҆бстоѧ́нӏ̈ихъ и҆ плѣне́нӏ̈ихъ, темни́цахъ же и҆ заточе́нӏ̈ихъ, и҆зрѧ́днѣе же въ гоне́нӏ̈ихъ, тебє̀ ра́ди и҆ вѣ́ры правосла́вныѧ ѿ ꙗ҆зы̑къ безбо́жныхъ, ѿ ѿстꙋ̑пникъ и҆ ѿ є҆ретӏ̈кѡ́въ, сꙋ́щыѧ рабы̑ твоѧ̑: и҆ помѧнѝ ѧ҆̀, посѣтѝ, ѹ҆крѣпѝ, ѹ҆тѣ́ши, и҆ вско́рѣ си́лою твое́ю ѡ҆сла́бꙋ, свобо́дꙋ и҆ и҆зба́вꙋ и҆̀мъ пода́ждь. Покло́нъ.

Сп҃сѝ, гдⷭ҇и, и҆ поми́лꙋй пѡ́сланныѧ въ слꙋ́жбꙋ, пꙋтеше́ствꙋющыѧ, ѻ҆тцы̀ и҆ бра́тӏ̈ю на́шꙋ, и҆ сестры̑, и҆ всѧ̑ правосла̑вныѧ хрⷭ҇тӏ̈а́ны. Покло́нъ.

Сп҃сѝ, гдⷭ҇и, и҆ поми́лꙋй и҆̀хже а҆́зъ безꙋ́мӏ̈емъ мои́мъ соблазни́хъ, и҆ ѿ пꙋтѝ сп҃си́тельнагѡ ѿврати́хъ, къ дѣлѡ́мъ ѕлы̑мъ и҆ неподѡ́бнымъ приведо́хъ: бжⷭ҇твеннымъ твои́мъ про́мысломъ къ пꙋти сп҃се́нӏ̈ѧ па́ки возвратѝ. Покло́нъ.

Сп҃сѝ, гдⷭ҇и, и҆ поми́лꙋй ненави́дѧщыѧ и҆ ѡ҆би́дѧщыѧ мѧ̀, и҆ творѧ́щыѧ мѝ ꙾напа̑сти꙾, и҆ не ѡ҆ста́ви и҆̀хъ поги́бнꙋти менє̀ ра́ди грѣ́шнагѡ. Покло́нъ.

꙾па́кѡсти꙾

Ѿстꙋпи́вшыѧ ѿ правосла́вныѧ вѣ́ры, и҆ поги́бельными є҆ресьмѝ ѡ҆слѣплє́нныѧ, свѣ́томъ твоегѡ̀ позна́нӏ̈ѧ просвѣтѝ, и҆ ст҃ѣ́й твое́й а҆пⷭ҇льстѣй собо́рнѣй цр҃кви причтѝ. Покло́нъ.

Ѡ҆ ѹ҆со́пшихъ:

Помѧнѝ, гдⷭ҇и, ѿ житӏ̈ѧ̀ сегѡ̀ ѿше́дшыѧ ст҃ѣ́йшыѧ патрӏ̈а́рхи, преѡсщ҃є́нныѧ митрополӏ́ты, а҆рхӏ̈епⷭ҇копы и҆ є҆пⷭ҇копы правосла̑вныѧ, во ӏ҆ере́йстѣмъ же и҆ при́чтѣ цр҃ко́внѣмъ и҆ мона́шестѣмъ чи́нѣ тебѣ̀ послꙋжи́вшыѧ, и҆ въ вѣ́чныхъ твои́хъ селе́нӏ̈ихъ со ст҃ы́ми ѹ҆поко́й. Покло́нъ.

Помѧнѝ, гдⷭ҇и, дꙋ́шы ѹ҆со́пшихъ рабѡ́въ твои́хъ, [роди́телей мои́хъ: и҆́мⷬ҇къ], и҆ всѣ́хъ сро́дникѡвъ по пло́ти: и҆ простѝ и҆́хъ всѧ̑ согрѣшє́нӏ̈ѧ вѡ́льнаѧ и҆ невѡ́льнаѧ, да́рꙋѧ и҆̀мъ црⷭ҇твӏ̈е, и҆ прича́стӏ̈е вѣ́чныхъ твои́хъ бл҃ги́хъ, и҆ твоеѧ̀ безконе́чныѧ и҆ бл҃же́нныѧ жи́зни наслажде́нӏ̈е. Покло́нъ.

Помѧнѝ, гдⷭ҇и, и҆ всѧ̑ въ наде́жди воскрⷭ҇нӏ̈ѧ и҆ жи́зни вѣ́чныѧ ѹ҆со́пшыѧ ѻ҆тцы̀ и҆ бра́тӏ̈ю на́шꙋ, и҆ сестры̑, и҆ здѣ̀ лежа́щыѧ, и҆ повсю́дꙋ, правосла̑вныѧ хрⷭ҇тӏ̈а́ны, и҆ со ст҃ы́ми твои́ми, и҆дѣ́же присѣща́етъ свѣ́тъ лица̀ твоегѡ̀, вселѝ, и҆ на́съ поми́лꙋй, ꙗ҆́кѡ бл҃гъ и҆ чл҃вѣколю́бецъ. А҆ми́нь. Покло́нъ.

Пода́ждь, гдⷭ҇и, ѡ҆ставле́нӏ̈е грѣхѡ́въ всѣ̑мъ пре́жде ѿше́дшымъ въ вѣ́рѣ и҆ наде́жди воскрⷭ҇нӏ̈ѧ ѻ҆тцє́мъ, бра́тӏ̈ѧмъ и҆ сестра́мъ на́шымъ, и҆ сотворѝ и҆̀мъ вѣ́чнꙋю па́мѧть. Сӏ̈ѐ глаго́ли три́жды.

Ѡ҆конча́ние молитвъ: [ѕ҃]

Досто́йно є҆́сть ꙗ҆́кѡ вои́стиннꙋ, блажи́ти тѧ̀ бцⷣꙋ, приснобл҃же́ннꙋю, и҆ пренепоро́чнꙋю, и҆ мт҃рь бг҃а на́шегѡ. чⷭ҇тнѣ́йшꙋю херꙋвӏ̑мъ, и҆ сла́внѣйшꙋю без̾ сравне́нӏ̈ѧ серафӏ̑мъ, без̾ и҆стлѣ́нӏ̈ѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ. Покло́нъ.

Сла́ва, и҆ ны́нѣ:

Гдⷭ҇и поми́лꙋй, три́жды.

МЛ҃ТВЫ НА СО́НЪ ГРѦДꙊ́ЩИМЪ

Во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а. А҆ми́нь. [з҃]

Гдⷭ҇и ӏ҆и҃се хрⷭ҇тѐ, сн҃е бж҃ӏ̈й, мл҃твъ ра́ди пречⷭ҇тыѧ твоеѧ̀ мт҃ре, прпⷣбныхъ и҆ бг҃оно́сныхъ ѻ҆тє́цъ на́шихъ, и҆ всѣ́хъ ст҃ы́хъ, поми́лꙋй на́съ. А҆ми́нь.

Сла́ва тебѣ̀ бж҃е на́шъ, сла́ва тебѣ̀.

Ст҃ы́й бж҃е, ст҃ы́й крѣ́пкӏ̈й, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѻ҆́ч҃е на́шъ, и҆́же є҆сѝ на нб҃сѣ́хъ, да ст҃и́тсѧ и҆́мѧ твоѐ, да прӏ̈и́детъ црⷭ҇твӏ̈е твоѐ, да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. Хлѣ́бъ на́шъ насꙋ́щный да́ждь на́мъ дне́сь: и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нӏ̈е, но и҆зба́ви на́съ ѿ лꙋка́вагѡ.

Тропарѝ, гла́съ ѕ҃:

Поми́лꙋй на́съ, гдⷭ҇и, поми́лꙋй на́съ: всѧ́кагѡ бо ѿвѣ́та недоꙋмѣ́юще, сӏ̈ю̀ тѝ мл҃твꙋ, ꙗ҆́кѡ влⷣцѣ грѣ́шнӏ̈и прино́симъ: поми́лꙋй на́съ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Гдⷭ҇и, поми́лꙋй на́съ, на тѧ́ бо ѹ҆пова́хомъ: не прогнѣ́вайсѧ на ны̀ ѕѣлѡ̀, нижѐ помѧнѝ беззако́нӏ̈й на́шихъ, но при́зри и҆ ны́нѣ, ꙗ҆́кѡ бл҃гоꙋтро́бенъ, и҆ и҆зба́ви ны̀ ѿ вра̑гъ на́шихъ: ты́ бо є҆сѝ бг҃ъ на́шъ, и҆ мы̀ лю́дӏ̈е твоѝ, всѝ дѣла̀ рꙋкꙋ̀ твоє́ю, и҆ и҆́мѧ твоѐ призыва́емъ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Млⷭ҇рдӏ̈ѧ двє́ри ѿве́рзи на́мъ, бл҃гослове́ннаѧ бцⷣе, надѣ́ющӏ̈исѧ на тѧ̀ да не поги́бнемъ, но да и҆зба́вимсѧ тобо́ю ѿ бѣ́дъ: ты́ бо є҆сѝ сп҃се́нӏ̈е ро́да хрⷭ҇тӏ̈а́нскагѡ.

Гдⷭ҇и, поми́лꙋй, в҃ӏ.

Мл҃тва а҃, ст҃а́гѡ мака́рӏ̈а вели́кагѡ, къ бг҃ꙋ ѻ҆ц҃ꙋ̀:

Бж҃е вѣ́чный и҆ цр҃ю̀ всѧ́кагѡ созда́нӏ̈ѧ, сподо́бивый мѧ̀ да́же въ ча́съ се́й доспѣ́ти, прости́ ми грѣхѝ, ꙗ҆̀же сотвори́хъ въ се́й де́нь, дѣ́ломъ, сло́вомъ и҆ помышле́нӏ̈емъ: и҆ ѡ҆чи́сти, гдⷭ҇и, смире́ннꙋю мою̀ дꙋ́шꙋ ѿ всѧ́кӏ̈ѧ скве́рны пло́ти и҆ дꙋ́ха, и҆ да́ждь мѝ, гдⷭ҇и, въ нощѝ се́й со́нъ прейтѝ въ ми́рѣ: да воста́въ ѿ смире́ннагѡ мѝ ло́жа, бл҃гоꙋгождꙋ̀ прест҃о́мꙋ и҆́мени твоемꙋ̀ во всѧ̑ дни̑ живота̀ моегѡ̀, и҆ поперꙋ̀ борю́щыѧ мѧ̀ врагѝ, плотскӏ̑ѧ и҆ безплѡ́тныѧ: и҆ и҆зба́ви мѧ̀, гдⷭ҇и, ѿ помышле́нӏ̈й сꙋ́етныхъ, ѡ҆сквернѧ́ющихъ мѧ̀, и҆ по́хотей лꙋка́выхъ. Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва в҃, ст҃а́гѡ а҆нтӏ̈о́ха, ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀:

Вседержи́телю, сло́во ѻ҆́ч҃ее, са́мъ соверше́нъ сы́й, ӏ҆и҃се хрⷭ҇тѐ, мно́гагѡ ра́ди млⷭ҇рдӏ̈ѧ твоегѡ̀ никогда́же ѿлꙋча́йсѧ менє̀ раба̀ твоегѡ̀, но всегда̀ во мнѣ̀ почива́й. Ӏ҆и҃се, до́брый па́стырю твои́хъ ѻ҆ве́цъ, не преда́ждь менє̀ крамолѣ̀ ѕмӏ̈и́нѣ, и҆ жела́нӏ̈ю сатанинꙋ̀ не ѡ҆ста́ви менє̀, ꙗ҆́кѡ сѣ́мѧ тлѝ во мнѣ̀ є҆́сть. Ты̀ ѹ҆́бѡ гдⷭ҇и бж҃е покланѧ́емый, цр҃ю̀ ст҃ы́й ӏ҆и҃се хрⷭ҇тѐ, спѧ́ща мѧ̀ сохранѝ немерца́ющимъ свѣ́томъ, дх҃омъ твои́мъ ст҃ы́мъ, и҆́мже ѡ҆ст҃и́лъ є҆сѝ твоѧ̑ ѹ҆ч҃нкѝ. Да́ждь, гдⷭ҇и и҆ мнѣ̀, недосто́йномꙋ рабꙋ̀ твоемꙋ̀, сп҃се́нӏ̈ѧ твоегѡ̀ на ло́жи мое́мъ: просвѣтѝ ѹ҆́мъ мо́й свѣ́томъ ра́зꙋма ст҃а́гѡ є҆ѵⷢ҇лӏ̈а твоегѡ̀, дꙋ́шꙋ любо́вӏ̈ю крⷭ҇та̀ твоегѡ̀, се́рдце чⷭ҇тото́ю словесѐ твоегѡ̀, тѣ́ло моѐ твое́ю стрⷭ҇тӏ̈ю безстра́стною: мы́сль мою̀ твои́мъ смире́нӏ̈емъ сохранѝ, и҆ воздви́гни мѧ̀ во вре́мѧ подо́бно на твоѐ славосло́вӏ̈е. Ꙗ҆́кѡ препросла́вленъ є҆сѝ со безнача́льнымъ твои́мъ ѻ҆ц҃е́мъ и҆ съ прест҃ы́мъ дх҃омъ, во вѣ́ки. А҆ми́нь.

Мл҃тва г҃, ко прест҃о́мꙋ дх҃ꙋ:

Гдⷭ҇и, цр҃ю̀ нбⷭ҇ный, ѹ҆тѣ́шителю, дш҃е и҆́стины, ѹ҆млⷭ҇рдисѧ, и҆ поми́лꙋй мѧ̀ грѣ́шнаго раба̀ твоего̀, и҆ ѿпꙋсти́ ми недосто́йномꙋ, и҆ простѝ всѧ̑, є҆ли̑ка тѝ согрѣши́хъ дне́сь ꙗ҆́кѡ человѣ́къ, па́че же и҆ не ꙗ҆́кѡ человѣ́къ, но и҆ горѣ́е скота̀: вѡ́льныѧ моѧ̑ грѣхѝ и҆ невѡ́льныѧ, вѣ́дѡмыѧ и҆ невѣ́дѡмыѧ, ꙗ҆̀же ѿ ю҆́ности, и҆ ѿ наꙋ́ки ѕлы̀, и҆ ꙗ҆̀же сꙋ́ть ѿ на́гльства и҆ ѹ҆ны́нӏ̈ѧ. А҆́ще и҆́менемъ твои́мъ клѧ́хсѧ, и҆лѝ похꙋ́лихъ є҆̀ въ помышле́нӏ̈и мое́мъ: и҆лѝ кого̀ ѹ҆кори́хъ, и҆лѝ ѡ҆клевета́хъ кого̀ гнѣ́вомъ мои́мъ, и҆лѝ ѡ҆печа́лихъ, и҆лѝ ѡ҆ че́мъ прогнѣ́вахсѧ: и҆лѝ солга́хъ, и҆лѝ безго́днѡ спа́хъ: и҆лѝ ни́щъ прӏ̈и́де ко мнѣ̀, и҆ презрѣ́хъ є҆го̀: и҆лѝ бра́та моего̀ ѡ҆печа́лихъ, и҆лѝ сва́дихъ, и҆лѝ кого̀ ѡ҆сꙋди́хъ: и҆лѝ развелича́хсѧ, и҆лѝ разгордѣ́хсѧ, и҆лѝ разгнѣ́вахсѧ: и҆лѝ стоѧ́щꙋ мѝ на мл҃твѣ, ѹ҆́мъ мо́й ѡ҆ лꙋка́вствӏ̈и мӏ́ра сегѡ̀ подви́жесѧ: и҆лѝ развраще́нӏ̈е помы́слихъ, и҆лѝ ѡ҆б̾ѧдо́хсѧ, и҆лѝ ѡ҆пи́хсѧ, и҆лѝ без̾ ѹ҆ма̀ смѣѧ́хсѧ: и҆лѝ лꙋка́вое помы́слихъ, и҆лѝ добро́тꙋ чꙋждꙋ́ю ви́дѣвъ, и҆ то́ю ѹ҆ѧ́звленъ бы́хъ се́рдцемъ: и҆лѝ неподѡ́бнаѧ глаго́лахъ, и҆лѝ грѣхꙋ̀ бра́та моегѡ̀ посмѣѧ́хсѧ, моѧ̑ же сꙋ́ть безчи́слєннаѧ согрѣшє́нӏ̈ѧ: и҆лѝ ѡ҆ мл҃твѣ неради́хъ, и҆лѝ и҆́но что̀ содѣ́ѧхъ лꙋка́вое, не по́мню: та̑ бо всѧ̑ и҆ бѡ́льша си́хъ содѣ́ѧхъ. Поми́лꙋй мѧ̀ тво́рче мо́й влⷣко, ѹ҆ны́лаго и҆ недосто́йнаго раба̀ твоего̀, и҆ ѡ҆ста́ви мѝ, и҆ ѿпꙋстѝ, и҆ прости́ мѧ, ꙗ҆́кѡ бл҃гъ и҆ чл҃вѣколю́бецъ: да съ ми́ромъ лѧ́гꙋ, ѹ҆снꙋ̀ и҆ почӏ́ю, блꙋ́дный, грѣ́шный и҆ ѻ҆каѧ́нный а҆́зъ: и҆ поклоню́сѧ, и҆ воспою̀, и҆ просла́влю пречⷭ҇тно́е и҆́мѧ твоѐ, со ѻ҆ц҃е́мъ и҆ є҆диноро́днымъ є҆гѡ̀ сн҃омъ, ны́нѣ и҆ при́снѡ, и҆ во вѣ́ки. А҆ми́нь.

Мл҃тва д҃, ст҃а́гѡ мака́рӏ̈а вели́кагѡ:

Что́ ти принесꙋ̀, и҆лѝ что́ ти возда́мъ, великодарови́тый безсме́ртный цр҃ю̀, ще́дре и҆ чл҃вѣколю́бче гдⷭ҇и, ꙗ҆́кѡ лѣнѧ́щасѧ менѐ на твоѐ ѹ҆гожде́нӏ̈е, и҆ ничто́же бл҃го сотво́рша, приве́лъ є҆сѝ на коне́цъ мимоше́дшагѡ днѐ сегѡ̀, ѡ҆браще́нӏ̈е и҆ сп҃се́нӏ̈е дꙋшѝ мое́й стро́ѧ; Млⷭ҇тивъ мѝ бꙋ́ди грѣ́шномꙋ и҆ ѡ҆бнаже́нномꙋ всѧ́кагѡ дѣ́ла бл҃га: возста́ви па́дшꙋю мою̀ дꙋ́шꙋ, ѡ҆скверни́вшꙋюсѧ въ безмѣ́рныхъ согрѣше́нӏ̈ихъ, и҆ ѿимѝ ѿ менє̀ ве́сь по́мыслъ лꙋка́вый ви́димагѡ сегѡ̀ житӏ̈ѧ̀. Простѝ моѧ̑ согрѣшє́нӏ̈ѧ, є҆ди́не безгрѣ́шне, є҆́же тѝ согрѣши́хъ въ се́й де́нь, вѣ́дѣнӏ̈емъ и҆ невѣ́дѣнӏ̈емъ, сло́вомъ, и҆ дѣ́ломъ, и҆ помышле́нӏ̈емъ, и҆ всѣ́ми мои́ми чꙋ́вствы. Ты̀ са́мъ покрыва́ѧ сохрани́ мѧ ѿ всѧ́кагѡ сопроти́внагѡ ѡ҆бстоѧ́нӏ̈ѧ, бжⷭ҇твенною твое́ю вла́стӏ̈ю, и҆ неизрече́ннымъ чл҃вѣколю́бӏ̈емъ, и҆ си́лою. Ѡ҆чи́сти бж҃е, ѡ҆чи́сти мно́жество грѣхѡ́въ мои́хъ. Бл҃говолѝ, гдⷭ҇и и҆зба́вити мѧ̀ ѿ сѣ́ти лꙋка́вагѡ, и҆ сп҃сѝ стра́стнꙋю мою̀ дꙋ́шꙋ, и҆ ѡ҆сѣни́ мѧ свѣ́томъ лица̀ твоегѡ̀, є҆гда̀ прӏ̈и́деши во сла́вѣ, и҆ неѡсꙋжде́нна ны́нѣ сно́мъ ѹ҆снꙋ́ти сотворѝ, и҆ без̾ мечта́нӏ̈ѧ: и҆ несмꙋще́нъ по́мыслъ раба̀ твоегѡ̀ соблюдѝ, и҆ всю̀ сатанинꙋ̀ дѣ́тель ѿженѝ ѿ менє̀: и҆ просвѣти́ ми разꙋ̑мныѧ ѻ҆́чи сердє́чныѧ, да не ѹ҆снꙋ̀ въ сме́рть. И҆ посли́ ми а҆́гг҃ла ми́рна, храни́телѧ и҆ наста́вника дꙋшѝ и҆ тѣ́лꙋ моемꙋ̀, да и҆зба́витъ мѧ̀ ѿ вра̑гъ мои́хъ: да воста́въ со ѻ҆дра̀ моегѡ̀, принесꙋ́ ти бл҃года́рствєнныѧ мольбы̑. Є҆́й гдⷭ҇и, ѹ҆слы́ши мѧ̀ грѣ́шнаго и҆ ѹ҆бо́гаго раба̀ твоего̀, и҆зволе́нӏ̈емъ и҆ со́вѣстӏ̈ю: да́рꙋй мѝ воста́вшꙋ словесє́мъ твои̑мъ поꙋчи́тисѧ, и҆ ѹ҆ны́нӏ̈е бѣсо́вское дале́че ѿ менє̀ ѿгна́но бы́ти сотворѝ твои́ми а҆́гг҃лы: да бл҃гословлю̀ и҆́мѧ твоѐ ст҃о́е, и҆ просла́влю, и҆ сла́влю пречⷭ҇тꙋю бцⷣꙋ мр҃ӏ́ю, ю҆́же да́лъ є҆сѝ на́мъ грѣ̑шнымъ застꙋпле́нӏ̈е, и҆ прӏ̈имѝ сӏ̈ю̀ молѧ́щꙋюсѧ за ны̀: вѣ́мъ бо, ꙗ҆́кѡ подража́етъ твоѐ чл҃вѣколю́бӏ̈е, и҆ молѧ́щисѧ не престае́тъ. Тоѧ̀ застꙋпле́нӏ̈емъ, и҆ чⷭ҇тна́гѡ крⷭ҇та̀ зна́менӏ̈емъ, и҆ всѣ́хъ ст҃ы́хъ твои́хъ ра́ди, ѹ҆бо́гꙋю дꙋ́шꙋ мою̀ соблюдѝ, ӏ҆и҃се хрⷭ҇тѐ бж҃е на́шъ, ꙗ҆́кѡ ст҃ъ є҆сѝ, и҆ препросла́вленъ во вѣ́ки. А҆ми́нь.

Мл҃тва є҃:

Гдⷭ҇и бж҃е на́шъ, є҆́же согрѣши́хъ во днѝ се́мъ сло́вомъ, дѣ́ломъ и҆ помышле́нӏ̈емъ, ꙗ҆́кѡ бл҃гъ и҆ чл҃вѣколю́бецъ прости́ ми. Ми́ренъ со́нъ и҆ безмѧте́женъ да́рꙋй мѝ: а҆́гг҃ла твоего̀ храни́телѧ послѝ, покрыва́юща и҆ соблюда́юща мѧ̀ ѿ всѧ́кагѡ ѕла̀: ꙗ҆́кѡ ты̀ є҆сѝ храни́тель дꙋша́мъ и҆ тѣлесє́мъ на́шымъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ѕ҃:

Гдⷭ҇и бж҃е на́шъ, въ него́же вѣ́ровахомъ, и҆ є҆гѡ́же и҆́мѧ па́че всѧ́кагѡ и҆́мене призыва́емъ, да́ждь на́мъ, ко снꙋ̀ ѿходѧ́щымъ, ѡ҆сла́бꙋ дꙋшѝ и҆ тѣ́лꙋ, и҆ соблюдѝ на́съ ѿ всѧ́кагѡ мечта́нӏ̈ѧ, и҆ те́мныѧ сла́сти кромѣ̀: ѹ҆ста́ви стремле́нӏ̈е страсте́й, ѹ҆гасѝ разжжє́нӏ̈ѧ воста́нӏ̈ѧ тѣле́снагѡ. Да́ждь на́мъ цѣломꙋ́дреннѣ пожи́ти дѣ́лы и҆ словесы̀: да добродѣ́тельное жи́тельство воспрӏ̈е́млюще, ѡ҆бѣтова́нныхъ не ѿпаде́мъ бл҃ги́хъ твои́хъ, ꙗ҆́кѡ бл҃гослове́нъ є҆сѝ во вѣ́ки. А҆ми́нь.

Мл҃тва з҃, ст҃а́гѡ ӏ҆ѡа́нна златоꙋ́стагѡ:
мл҃твы молє́бныѧ, число́мъ два́десѧтимъ четы́ремъ часѡ́мъ, дневны̑мъ и҆ нощны̑мъ.

Дне́ви:

[а҃] Гдⷭ҇и, не лишѝ менє̀ нбⷭ҇ныхъ твои́хъ бла̑гъ. [в҃] Гдⷭ҇и, и҆зба́ви мѧ̀ вѣ́чныхъ мꙋ́къ. [г҃] Гдⷭ҇и, ѹ҆мо́мъ ли и҆лѝ помышле́нӏ̈емъ, сло́вомъ и҆лѝ дѣ́ломъ согрѣши́хъ, прости́ мѧ. [д҃] Гдⷭ҇и, и҆зба́ви мѧ̀ всѧ́кагѡ невѣ́дѣнӏ̈ѧ, и҆ забве́нӏ̈ѧ, и҆ малодꙋ́шӏ̈ѧ, и҆ ѡ҆камене́ннагѡ нечꙋ́вствӏ̈ѧ. [є҃] Гдⷭ҇и, и҆зба́ви мѧ̀ ѿ всѧ́кагѡ и҆скꙋше́нӏ̈ѧ. [ѕ҃] Гдⷭ҇и, просвѣтѝ моѐ се́рдце, є҆́же помрачѝ лꙋка́вое похотѣ́нӏ̈е. [з҃] Гдⷭ҇и, а҆́зъ ꙗ҆́кѡ человѣ́къ согрѣши́хъ, ты́ же ꙗ҆́кѡ бг҃ъ ще́дръ, поми́лꙋй мѧ̀, ви́дѧ не́мощь дꙋшѝ моеѧ̀. [и҃] Гдⷭ҇и, послѝ бл҃года́ть твою̀ въ по́мощь мнѣ̀, да просла́влю и҆́мѧ твоѐ ст҃о́е. [ѳ҃] Гдⷭ҇и ӏ҆и҃се хрⷭ҇тѐ, напиши́ мѧ раба̀ твоего̀ въ кни́зѣ живо́тнѣй, и҆ да́рꙋй мѝ коне́цъ бл҃гӏ́й. [ӏ҃] Гдⷭ҇и бж҃е мо́й, а҆́ще и҆ ничто́же бл҃го сотвори́хъ пред̾ тобо́ю, но да́ждь мѝ по бл҃года́ти твое́й, положи́ти нача́ло бл҃го́е. [а҃ӏ] Гдⷭ҇и, ѡ҆кропѝ въ се́рдцѣ мое́мъ ро́сꙋ бл҃года́ти твоеѧ̀. [в҃ӏ] Гдⷭ҇и нб҃сѐ и҆ землѝ, помѧни́ мѧ грѣ́шнаго раба̀ твоего̀, стꙋ́днаго и҆ нечи́стаго, во црⷭ҇твӏ̈и твое́мъ. А҆ми́нь.

Но́щи:

[а҃] Гдⷭ҇и, въ покаѧ́нӏ̈и прӏ̈ими́ мѧ. [в҃] Гдⷭ҇и, не ѡ҆ста́ви менє̀. [г҃] Гдⷭ҇и, не введѝ менє̀ въ напа́сть. [д҃] Гдⷭ҇и, да́ждь мѝ мы́сль бл҃гꙋ. [є҃] Гдⷭ҇и, да́ждь мѝ сле́зы, и҆ па́мѧть сме́ртнꙋю, и҆ ѹ҆миле́нӏ̈е. [ѕ҃] Гдⷭ҇и, да́ждь мѝ по́мыслъ и҆сповѣ́данӏ̈ѧ грѣхѡ́въ мои́хъ. [з҃] Гдⷭ҇и, да́ждь мѝ смире́нӏ̈е, цѣломꙋ́дрӏ̈е и҆ послꙋша́нӏ̈е. [и҃] Гдⷭ҇и, да́ждь мѝ терпѣ́нӏ̈е, великодꙋ́шӏ̈е и҆ кро́тость. [ѳ҃] Гдⷭ҇и, вселѝ въ мѧ̀ ко́рень бл҃ги́хъ, стра́хъ тво́й въ се́рдце моѐ. [ӏ҃] Гдⷭ҇и, сподо́би мѧ̀ люби́ти тѧ̀ ѿ всеѧ̀ дꙋшѝ моеѧ̀ и҆ помышле́нӏ̈ѧ, и҆ твори́ти во все́мъ во́лю твою̀. [а҃ӏ] Гдⷭ҇и, покры́й мѧ̀ ѿ человѣ̑къ нѣ́которыхъ, и҆ бѣсѡ́въ, и҆ страсте́й, и҆ ѿ всѧ́кӏ̈ѧ и҆ны́ѧ неподо́бныѧ ве́щи. [в҃ӏ] Гдⷭ҇и, вѣ́си, ꙗ҆́кѡ твори́ши, ꙗ҆́коже ты̀ во́лиши, да бꙋ́детъ во́лѧ твоѧ̀ и҆ во мнѣ̀ грѣ́шнѣмъ: ꙗ҆́кѡ бл҃гослове́нъ є҆сѝ во вѣ́ки. А҆ми́нь.

Мл҃тва и҃, ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀:

Гдⷭ҇и ӏ҆и҃се хрⷭ҇тѐ, сн҃е бж҃ӏ̈й, ра́ди чⷭ҇тнѣ́йшӏ̈ѧ мт҃ре твоеѧ̀, и҆ безпло́тныхъ твои́хъ а҆́гг҃лъ, прⷪ҇ро́ка же и҆ прⷣте́чи и҆ крⷭ҇ти́телѧ твоегѡ̀, бг҃оглаго́ливыхъ же а҆пⷭ҇лъ, свѣ́тлыхъ и҆ добропобѣ́дныхъ мч҃нкъ, прпⷣбныхъ и҆ бг҃оно́сныхъ ѻ҆тє́цъ, и҆ всѣ́хъ ст҃ы́хъ мл҃твами, и҆зба́ви мѧ̀ настоѧ́щагѡ ѡ҆бстоѧ́нӏ̈ѧ бѣсо́вскагѡ. Є҆́й, гдⷭ҇и мо́й и҆ тво́рче, не хотѧ́й сме́рти грѣ́шнагѡ, но ꙗ҆́коже ѡ҆брати́тисѧ и҆ жи́вꙋ бы́ти є҆мꙋ̀, да́ждь и҆ мнѣ̀ ѡ҆браще́нӏ̈е ѻ҆каѧ́нномꙋ и҆ недосто́йномꙋ: и҆зми́ мѧ ѿ ѹ҆́стъ па́гꙋбнагѡ ѕмӏ́ѧ, зӏ̈ѧ́ющагѡ пожре́ти мѧ̀, и҆ свестѝ во а҆́дъ жи́ва. Є҆́й, гдⷭ҇и мо́й, ѹ҆тѣше́нӏ̈е моѐ, и҆́же менє̀ ра́ди ѻ҆каѧ́ннагѡ въ тлѣ́ннꙋю пло́ть ѡ҆болкӏ́йсѧ, и҆сто́ргни мѧ̀ ѿ ѻ҆каѧ́нства, и҆ ѹ҆тѣше́нӏ̈е пода́ждь дꙋшѝ мое́й ѻ҆каѧ́ннѣй. Всадѝ въ се́рдце моѐ твори́ти твоѧ̑ повелѣ̑нӏ̈ѧ, и҆ ѡ҆ста́вити лꙋка̑ваѧ дѣѧ̑нӏ̈ѧ, и҆ полꙋчи́ти бл҃жє́нства твоѧ̑: на тѧ́ бо гдⷭ҇и ѹ҆пова́хъ, сп҃си́ мѧ.

Мл҃тва ѳ҃, ко прест҃ѣ́й бцⷣѣ, ст҃а́гѡ петра̀ стꙋдӏ́йскагѡ:

Къ тебѣ̀ пречтⷭ҇ѣй бж҃ӏ̈ей мт҃ри а҆́зъ ѻ҆каѧ́нный припа́даѧ молю́сѧ: вѣ́си, цр҃и́це, ꙗ҆́кѡ безпреста́ни согрѣша́ю и҆ прогнѣвлѧ́ю сн҃а твоего̀ и҆ бг҃а моего̀, и҆ мно́гажды а҆́ще ка́юсѧ, ло́жъ пред̾ бг҃омъ ѡ҆брѣта́юсѧ, и҆ ка́юсѧ трепе́щѧ: не ѹ҆же́ли гдⷭ҇ь порази́тъ мѧ̀, и҆ по часѣ̀ па́ки та̑ѧжде творю̀. Вѣ́дꙋщи сӏ̈ѧ̑, влⷣчце моѧ̀ гпⷭ҇жѐ бцⷣе, молю̀, да поми́лꙋеши, да ѹ҆крѣпи́ши, и҆ бл҃га̑ѧ твори́ти да пода́си мѝ. Вѣ́си бо, влⷣчце моѧ̀ бцⷣе, ꙗ҆́кѡ ѿню́дъ и҆́мамъ въ не́нависти ѕла̑ѧ моѧ̑ дѣла̀, и҆ все́ю мы́слӏ̈ю люблю̀ зако́нъ бг҃а моегѡ̀: но не вѣ́мъ, гпⷭ҇жѐ пречтⷭ҇аѧ, ѿкꙋ́дꙋ ꙗ҆̀же ненави́ждꙋ, та̑ и҆ люблю̀, а҆ бл҃га̑ѧ престꙋпа́ю. Не попꙋща́й, пречтⷭ҇аѧ, во́ли мое́й соверша́тисѧ, не ѹ҆го́дна бо є҆́сть: но да бꙋ́детъ во́лѧ сн҃а твоегѡ̀ и҆ бг҃а моегѡ̀: да мѧ̀ сп҃се́тъ, и҆ вразꙋми́тъ, и҆ пода́стъ бл҃года́ть ст҃а́гѡ дх҃а, да бы́хъ а҆́зъ ѿсе́лѣ преста́лъ сквернодѣ́йства, и҆ про́чее пожи́лъ бы́хъ въ повелѣ́нӏ̈и сн҃а твоегѡ̀, є҆мꙋ́же подоба́етъ всѧ́каѧ сла́ва, че́сть и҆ держа́ва, со безнача́льнымъ є҆гѡ̀ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ӏ҃, ко прест҃ѣ́й бцⷣѣ:

Бл҃га́гѡ цр҃ѧ̀ бл҃га́ѧ мт҃и, пречⷭ҇таѧ и҆ бл҃гослове́ннаѧ бцⷣе мр҃ӏ́е, млⷭ҇ть сн҃а твоегѡ̀ и҆ бг҃а на́шегѡ и҆зле́й на стра́стнꙋю мою̀ дꙋ́шꙋ, и҆ твои́ми мл҃твами наста́ви мѧ̀ на дѣѧ̑нӏ̈ѧ бл҃га̑ѧ: да про́чее вре́мѧ живота̀ моегѡ̀ без̾ поро́ка прейдꙋ̀, и҆ тобо́ю ра́й да ѡ҆брѧ́щꙋ, бцⷣе дв҃о, є҆ди́на чⷭ҇таѧ и҆ бл҃гослове́ннаѧ.

Мл҃тва а҃ӏ, ко ст҃о́мꙋ а҆́гг҃лꙋ храни́телю:

А҆́гг҃ле хрⷭ҇то́въ, храни́телю мо́й ст҃ы́й, и҆ покрови́телю дꙋшѝ и҆ тѣ́ла моегѡ̀, всѧ̑ мѝ простѝ, є҆ли̑ка согрѣши́хъ во дне́шнӏ̈й де́нь, и҆ ѿ всѧ́кагѡ лꙋка́вствӏ̈ѧ проти́внагѡ мѝ врага̀ и҆зба́ви мѧ̀, да ни въ ко́емже грѣсѣ̀ прогнѣ́ваю бг҃а моего̀: но молѝ за мѧ̀ грѣ́шнаго и҆ недосто́йнаго раба̀, ꙗ҆́кѡ да досто́йна мѧ̀ пока́жеши бл҃гости и҆ млⷭ҇ти всест҃ы́ѧ трⷪ҇цы, и҆ мт҃ре гдⷭ҇а моегѡ̀ ӏ҆и҃са хрⷭ҇та̀, и҆ всѣ́хъ ст҃ы́хъ. А҆ми́нь.

Конда́къ бцⷣѣ, гла́съ и҃:

Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ, бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: ра́дꙋйсѧ, невѣ́сто неневѣ́стнаѧ.

Пресла́внаѧ приснодв҃о, мт҃и хрⷭ҇та̀ бг҃а, принесѝ на́шꙋ мл҃твꙋ сн҃ꙋ твоемꙋ̀ и҆ бг҃ꙋ на́шемꙋ, да сп҃се́тъ тобо́ю дꙋ́шы на́шѧ.

Всѐ ѹ҆пова́нӏ̈е моѐ на тѧ̀ возлага́ю, мт҃и бж҃ӏ̈ѧ, сохрани́ мѧ под̾ кро́вомъ твои́мъ.

Бцⷣе дв҃о, не пре́зри менє̀ грѣ́шнагѡ, тре́бꙋюща твоеѧ̀ по́мощи и҆ твоегѡ̀ застꙋпле́нӏ̈ѧ: на тѧ́ бо ѹ҆пова̀ дꙋша̀ моѧ̀, и҆ поми́лꙋй мѧ̀.

Мл҃тва ст҃а́гѡ ӏ҆ѡаннӏ́кӏ̈а:

Ѹ҆пова́нӏ̈е моѐ ѻ҆ц҃ъ, прибѣ́жище моѐ сн҃ъ, покро́въ мо́й дх҃ъ ст҃ы́й: трⷪ҇це ст҃а́ѧ, сла́ва тебѣ̀.

Сла́ва, и҆ ны́нѣ:

Гдⷭ҇и поми́лꙋй, три́жды.

Мл҃тва ст҃а́гѡ ӏ҆ѡа́нна дамаски́на,
ю҆́же ѹ҆казꙋ́ѧ на ѻ҆́дръ тво́й, глаго́ли:

Влⷣко чл҃вѣколю́бче, не ѹ҆же́ли мнѣ̀ ѻ҆́дръ се́й гро́бъ бꙋ́детъ; и҆лѝ є҆щѐ ѻ҆каѧ́ннꙋю мою̀ дꙋ́шꙋ просвѣти́ши дне́мъ; Се́ ми гро́бъ предлежи́тъ, се́ ми сме́рть предстои́тъ. Сꙋда̀ твоегѡ̀ гдⷭ҇и бою́сѧ, и҆ мꙋ́ки безконе́чныѧ, ѕло́е же творѧ̀ не престаю̀: тебѐ гдⷭ҇а бг҃а моего̀ всегда̀ прогнѣвлѧ́ю, и҆ пречⷭ҇тꙋю твою̀ мт҃рь, и҆ всѧ̑ нбⷭ҇ныѧ си̑лы, и҆ ст҃а́го а҆́гг҃ла храни́телѧ моего̀. Вѣ́мъ ѹ҆̀бо гдⷭ҇и, ꙗ҆́кѡ недосто́инъ є҆́смь чл҃вѣколю́бӏ̈ѧ твоегѡ̀, но досто́инъ є҆́смь всѧ́кагѡ ѡ҆сꙋжде́нӏ̈ѧ и҆ мꙋ́ки. Но, гдⷭ҇и, и҆лѝ хощꙋ̀, и҆лѝ не хощꙋ̀, сп҃си́ мѧ. А҆́ще бо првⷣника сп҃се́ши, ничто́же ве́лӏ̈е, и҆ а҆́ще чⷭ҇таго поми́лꙋеши, ничто́же ди́вно: досто́йни бо сꙋ́ть млⷭ҇ти твоеѧ̀. Но на мнѣ̀ грѣ́шнѣмъ ѹ҆дивѝ млⷭ҇ть твою̀: ѡ҆ се́мъ ꙗ҆вѝ чл҃вѣколю́бӏ̈е твоѐ, да не ѡ҆долѣ́етъ моѧ̀ ѕло́ба твое́й неизглаго́ланнѣй бл҃гости и҆ млⷭ҇рдӏ̈ю, и҆ ꙗ҆́коже хо́щеши, ѹ҆стро́й ѡ҆ мнѣ̀ ве́щь.

И҆ та́кѡ хотѧ́й возлещѝ на посте́лю, глаго́ли сӏ̈ѐ:

Просвѣтѝ ѻ҆́чи моѝ хрⷭ҇тѐ бж҃е: да не когда̀ ѹ҆снꙋ̀ въ сме́рть, да не когда̀ рече́тъ вра́гъ мо́й: ѹ҆крѣпи́хсѧ на него̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Застꙋ́пникъ дꙋшѝ моеѧ̀ бꙋ́ди бж҃е, ꙗ҆́кѡ посредѣ̀ хождꙋ̀ сѣте́й мно́гихъ: и҆зба́ви мѧ̀ ѿ ни́хъ, и҆ сп҃си́ мѧ бл҃же, ꙗ҆́кѡ чл҃вѣколю́бецъ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Пресла́внꙋю бж҃ӏ̈ю мт҃рь, и҆ ст҃ы́хъ а҆́гг҃лъ ст҃ѣ́йшꙋю, немо́лчнѡ воспои́мъ се́рдцемъ и҆ ѹ҆сты̀, бцⷣꙋ сӏ̈ю̀ и҆сповѣ́дающе, ꙗ҆́кѡ вои́стиннꙋ ро́ждшꙋю на́мъ бг҃а воплоще́нна, и҆ молѧ́щꙋюсѧ непреста́ннѡ ѡ҆ дꙋша́хъ на́шихъ.

Та́же цѣлꙋ́й крⷭ҇тъ тво́й, и҆ прекрестѝ крⷭ҇то́мъ мѣ́сто твоѐ ѿ главы̀ до но́гъ, та́кожде и҆ ѿ всѣ́хъ стра́нъ, глаго́лѧ:

Мл҃тва чⷭ҇тно́мꙋ крⷭ҇тꙋ̀:

Да воскр҃снетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщӏ̈и є҆го̀: ꙗ҆́кѡ и҆счеза́етъ ды́мъ, да и҆сче́знꙋтъ, ꙗ҆́кѡ та́етъ во́скъ ѿ лица̀ ѻ҆гнѧ̀, та́кѡ да поги́бнꙋтъ бѣ́си ѿ лица̀ лю́бѧщихъ бг҃а, и҆ зна́менꙋющихсѧ крⷭ҇тнымъ зна́менӏ̈емъ, и҆ въ весе́лӏ̈и глаго́лющихъ: ра́дꙋйсѧ, пречⷭ҇тны́й и҆ животворѧ́щӏ̈й крⷭ҇те гдⷭ҇ень, прогонѧ́ѧй бѣ́сы си́лою на тебѣ̀ пропѧ́тагѡ гдⷭ҇а на́шегѡ ӏ҆и҃са хрⷭ҇та̀, во а҆́дъ сше́дшагѡ, и҆ попра́вшагѡ си́лꙋ дӏ̈а́волю, и҆ дарова́вшагѡ на́мъ тебѐ, крⷭ҇тъ сво́й чⷭ҇тны́й, на прогна́нӏ̈е всѧ́кагѡ сꙋпоста́та. Ѽ пречⷭ҇тны́й и҆ животворѧ́щӏ̈й крⷭ҇те гдⷭ҇ень, помога́й мѝ со ст҃о́ю гпⷭ҇же́ю дв҃ою бцⷣею, и҆ со всѣ́ми ст҃ы́ми во вѣ́ки. А҆ми́нь.

И҆ли кра́ткѡ:

Ѡ҆гради́ мѧ, гдⷭ҇и, си́лою чⷭ҇тна́гѡ и҆ животворѧ́щагѡ твоегѡ̀ крⷭ҇та̀, и҆ сохрани́ мѧ ѿ всѧ́кагѡ ѕла̀.

Та́же, вмѣ́стѡ проще́нӏ̈ѧ:

Ѡ҆сла́би, ѡ҆ста́ви, простѝ бж҃е прегрѣшє́нӏ̈ѧ на̑ша, вѡ́льнаѧ и҆ невѡ́льнаѧ, ꙗ҆̀же въ сло́вѣ и҆ въ дѣ́лѣ, ꙗ҆̀же въ вѣ́дѣнӏ̈и и҆ не въ вѣ́дѣнӏ̈и, ꙗ҆̀же во днѝ и҆ въ нощѝ, ꙗ҆̀же во ѹ҆мѣ̀ и҆ въ помышле́нӏ̈и: всѧ̑ на́мъ простѝ, ꙗ҆́кѡ бл҃гъ и҆ чл҃вѣколю́бецъ.

Мл҃тва:

Ненави́дѧщихъ и҆ ѡ҆би́дѧщихъ на́съ простѝ, гдⷭ҇и чл҃вѣколю́бче. Бл҃готворѧ́щымъ бл҃госотворѝ. Бра́тӏ̈ѧмъ и҆ сро́дникѡмъ на́шымъ да́рꙋй ꙗ҆̀же ко сп҃се́нӏ̈ю прошє́нӏ̈ѧ, и҆ жи́знь вѣ́чнꙋю. Въ не́мощехъ сꙋ́щыѧ посѣтѝ, и҆ и҆сцѣле́нӏ̈е да́рꙋй. Ꙗ҆̀же въ мо́ри ѹ҆пра́ви. Пꙋтеше́ствꙋющымъ спꙋтеше́ствꙋй. Хрⷭ҇тӏ̈а́нѡмъ спобо́рствꙋй. Слꙋжа́щымъ и҆ ми́лꙋющымъ на́съ грѣхѡ́въ ѡ҆ставле́нӏ̈е да́рꙋй. Заповѣ́давшихъ на́мъ недостѡ́йнымъ моли́тисѧ ѡ҆ ни́хъ, поми́лꙋй по вели́цѣй твое́й млⷭ҇ти. Помѧнѝ гдⷭ҇и, пре́жде ѹ҆со́пшихъ ѻ҆тє́цъ и҆ бра́тӏ̈й на́шихъ, и҆ ѹ҆поко́й и҆̀хъ, и҆дѣ́же присѣща́етъ свѣ́тъ лица̀ твоегѡ̀. Помѧнѝ гдⷭ҇и, бра́тӏ̈й на́шихъ плѣне́нныхъ, и҆ и҆зба́ви ѧ҆̀ ѿ всѧ́кагѡ ѡ҆бстоѧ́нӏ̈ѧ. Помѧнѝ гдⷭ҇и, плодоносѧ́щихъ и҆ добродѣ́лающихъ во ст҃ы́хъ твои́хъ цр҃квахъ, и҆ да́ждь и҆̀мъ ꙗ҆́же ко сп҃се́нӏ̈ю прошє́нӏ̈ѧ, и҆ жи́знь вѣ́чнꙋю. Помѧнѝ гдⷭ҇и и҆ на́съ, смире́нныхъ, и҆ грѣ́шныхъ, и҆ недосто́йныхъ ра̑бъ твои́хъ, и҆ просвѣтѝ на́шъ ѹ҆́мъ свѣ́томъ ра́зꙋма твоегѡ̀, и҆ наста́ви на́съ на стезю̀ за́повѣдей твои́хъ, мл҃твами пречⷭ҇тыѧ влⷣчцы на́шеѧ бцⷣы и҆ приснодв҃ы мр҃ӏ́и, и҆ всѣ́хъ твои́хъ ст҃ы́хъ, ꙗ҆́кѡ бл҃гослове́нъ є҆сѝ во вѣ́ки вѣкѡ́въ. А҆ми́нь.

И҆сповѣ́данӏ̈е грѣхѡ́въ повседне́вное:

И҆сповѣ́даю тебѣ̀ гдⷭ҇ꙋ бг҃ꙋ моемꙋ̀ и҆ творцꙋ̀, во ст҃ѣ́й трⷪ҇цѣ є҆ди́номꙋ, сла́вимомꙋ и҆ покланѧ́емомꙋ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, всѧ̑ моѧ̑ грѣхѝ, ꙗ҆̀же содѣ́ѧхъ во всѧ̑ дни̑ живота̀ моегѡ̀, и҆ на всѧ́кӏ̈й ча́съ, и҆ въ настоѧ́щее вре́мѧ, и҆ въ преше́дшыѧ дни̑ и҆ нѡ́щи: дѣ́ломъ, сло́вомъ, помышле́нӏ̈емъ, ѡ҆б̾ѧде́нӏ̈емъ, пӏ̈ѧ́нствомъ, тайноѧде́нӏ̈емъ, праздносло́вӏ̈емъ, ѹ҆ны́нӏ̈емъ, лѣ́ностӏ̈ю, прекосло́вӏ̈емъ, непослꙋша́нӏ̈емъ, ѡ҆клевета́нӏ̈емъ, ѡ҆сꙋжде́нӏ̈емъ, небреже́нӏ̈емъ, самолю́бӏ̈емъ, многостѧжа́нӏ̈емъ, хище́нӏ̈емъ, неправдоглаго́ланӏ̈емъ, скверноприбы́тчествомъ, мшелои́мствомъ, ревнова́нӏ̈емъ, за́вистӏ̈ю, гнѣ́вомъ, памѧтоѕло́бӏ̈емъ, не́навистӏ̈ю, лихои́мствомъ, и҆ всѣ́ми мои́ми чꙋ́вствы: зрѣ́нӏ̈емъ, слꙋ́хомъ, ѡ҆бонѧ́нӏ̈емъ, вкꙋ́сомъ, ѡ҆сѧза́нӏ̈емъ, и҆ про́чими мои́ми грѣхи̑, дꙋше́вными вкꙋ́пѣ и҆ тѣле́сными, и҆́миже тебѐ бг҃а моего̀ и҆ творца̀ прогнѣ́вахъ, и҆ бли́жнѧго моего̀ ѡ҆непра́вдовахъ. Ѡ҆ си́хъ жалѣ́ѧ, ви́нна себѐ тебѣ̀, бг҃ꙋ моемꙋ̀, представлѧ́ю, и҆ и҆мѣ́ю во́лю ка́ѧтисѧ: то́чӏ̈ю, гдⷭ҇и бж҃е мо́й, помози́ ми, со слеза́ми смире́ннѡ молю́ тѧ: прешє́дшаѧ же согрѣшє́нӏ̈ѧ моѧ̑ млⷭ҇рдӏ̈емъ твои́мъ прости́ ми, и҆ разрѣшѝ ѿ всѣ́хъ си́хъ, ꙗ҆̀же и҆зглаго́лахъ пред̾ тобо́ю, ꙗ҆́кѡ бл҃гъ и҆ чл҃вѣколю́бецъ.

Є҆гда̀ ѿхо́диши ко снꙋ̀, глаго́ли:

Въ рꙋ́цѣ твоѝ, гдⷭ҇и ӏ҆и҃се хрⷭ҇тѐ бж҃е мо́й, предаю̀ дꙋ́хъ мо́й: ты́ же мѧ̀ бл҃гословѝ, ты̀ мѧ̀ поми́лꙋй, и҆ живо́тъ вѣ́чный да́рꙋй мѝ. А҆ми́нь.

МЛ҃И́ТВЫ КО КАНѠ́НАМ

Мл҃твами ст҃ы́хъ ѻ҆тє́цъ на́шихъ, гдⷭ҇и ӏ҆и҃се хрⷭ҇тѐ бж҃е на́шъ, поми́лꙋй на́съ. А҆ми́нь. [ӏ҃]

Сла́ва тебѣ̀ бж҃е на́шъ, сла́ва тебѣ̀.

Ст҃ы́й бж҃е, ст҃ы́й крѣ́пкӏ̈й, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй, в҃ӏ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

КАНѠ́НЪ ПОКАѦ́ННЫЙ
КО ГДⷭ҇Ꙋ НА́ШЄМꙊ Ӏ҆И҃СꙊ ХРⷭ҇ТꙊ

Гла́съ ѕ҃. Пѣ́снь а҃. [в҃ӏ]

Ӏ҆рмо́съ: Ꙗ҆́кѡ по сꙋ́хꙋ пѣшеше́ствовавъ ӏ҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопӏ̈ѧ́ше.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ны́нѣ пристꙋпи́хъ а҆́зъ грѣ́шный и҆ ѡ҆бремене́нный къ тебѣ̀ влⷣцѣ и҆ бг҃ꙋ моемꙋ̀: не смѣ́ю же взира́ти на нб҃о, то́кмѡ молю́сѧ, глаго́лѧ: да́ждь мѝ гдⷭ҇и ѹ҆́мъ, да пла́чꙋсѧ дѣ́лъ мои́хъ го́рькѡ.

Поми́лꙋй мѧ̀, бж҃е, поми́лꙋй мѧ̀.

Ѽ го́ре мнѣ̀ грѣ́шномꙋ! па́че всѣ́хъ человѣ̑къ ѻ҆каѧ́ненъ є҆́смь: покаѧ́нӏ̈ѧ нѣ́сть во мнѣ̀: да́ждь мѝ гдⷭ҇и сле́зы, да пла́чꙋсѧ дѣ́лъ мои́хъ го́рькѡ.

Сла́ва: Безꙋ́мне ѻ҆каѧ́нне человѣ́че, въ лѣ́ности вре́мѧ гꙋби́ши: помы́сли житӏ̈ѐ твоѐ, и҆ ѡ҆брати́сѧ ко гдⷭ҇ꙋ бг҃ꙋ, и҆ пла́чисѧ ѡ҆ дѣ́лѣхъ твои́хъ го́рькѡ.

И҆ ны́нѣ: Мт҃и бж҃ӏ̈ѧ пречⷭ҇таѧ, воззрѝ на мѧ̀ грѣ́шнаго, и҆ ѿ сѣ́ти дӏ̈а́воли и҆зба́ви мѧ̀, и҆ на пꙋ́ть покаѧ́нӏ̈ѧ наста́ви мѧ̀, да пла́чꙋсѧ дѣ́лъ мои́хъ го́рькѡ.

Пѣ́снь г҃.

Ӏ҆рмо́съ: Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ѹ҆тверди́вый на́съ на ка́мени и҆сповѣ́данӏ̈ѧ твоегѡ̀.

Поми́лꙋй мѧ̀, бж҃е, поми́лꙋй мѧ̀.

Внегда̀ поста́влени бꙋ́дꙋтъ престо́ли на сꙋди́щи стра́шнѣмъ, тогда̀ всѣ́хъ человѣ̑къ дѣла̀ ѡ҆блича́тсѧ: го́ре та́мѡ бꙋ́детъ грѣ̑шнымъ, въ мꙋ́кꙋ ѿсыла́ємымъ: и҆ то̀ вѣ́дꙋщи, дꙋшѐ моѧ̀, пока́йсѧ ѿ ѕлы́хъ дѣ́лъ твои́хъ.

Поми́лꙋй мѧ̀, бж҃е, поми́лꙋй мѧ̀.

Првⷣницы возра́дꙋютсѧ, а҆ грѣ́шнӏ̈и воспла́чꙋтсѧ: тогда̀ никто́же возмо́жетъ помощѝ на́мъ, но дѣла̀ на̑ша ѡ҆сꙋ́дѧтъ на́съ. Тѣ́мже пре́жде конца̀ пока́йсѧ ѿ ѕлы́хъ дѣ́лъ твои́хъ.

Сла́ва: Ѹ҆вы̀ мнѣ̀ великогрѣ́шномꙋ! и҆́же дѣ́лы и҆ мы́сльми ѡ҆скверни́всѧ, ни ка́пли сле́зъ и҆мѣ́ю ѿ жестосе́рдӏ̈ѧ: ны́нѣ возни́кни ѿ землѝ, дꙋшѐ моѧ̀, и҆ пока́йсѧ ѿ ѕлы́хъ дѣ́лъ твои́хъ.

И҆ ны́нѣ: Сѐ взыва́етъ, гпⷭ҇жѐ, сн҃ъ тво́й, и҆ поꙋча́етъ на́съ на до́брое, а҆́зъ же грѣ́шный добра̀ всегда̀ бѣ́гаю: но ты̀, млⷭ҇тиваѧ, поми́лꙋй мѧ̀, да пока́юсѧ ѿ ѕлы́хъ мои́хъ дѣ́лъ.

Сѣда́ленъ, гла́съ ѕ҃:

Помышлѧ́ю де́нь стра́шный, и҆ пла́чꙋсѧ дѣѧ́нӏ̈й мои́хъ лꙋка́выхъ: ка́кѡ ѿвѣща́ю безсме́ртномꙋ цр҃ю̀; и҆лѝ ко́имъ дерзнове́нӏ̈емъ воззрю̀ на сꙋдӏ̈ю̀, блꙋ́дный а҆́зъ; бл҃гоꙋтро́бный ѻ҆́ч҃е, сн҃е є҆диноро́дный, и҆ дш҃е ст҃ы́й, поми́лꙋй мѧ̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ:

Свѧ́занъ мно́гими ны́нѣ плени́цами грѣхѡ́въ, и҆ содержи́мь лю́тыми страстьмѝ и҆ бѣда́ми, къ тебѣ̀ прибѣга́ю моемꙋ̀ сп҃се́нӏ̈ю, и҆ вопӏ̈ю̀: помози́ ми, дв҃о, мт҃и бж҃ӏ̈ѧ.

Пѣ́снь д҃.

Ӏ҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чⷭ҇тна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Поми́лꙋй мѧ̀, бж҃е, поми́лꙋй мѧ̀.

Широ́къ пꙋ́ть здѣ̀ и҆ ѹ҆го́дный сла̑сти твори́ти, но го́рькѡ бꙋ́детъ въ послѣ́днӏ̈й де́нь, є҆гда̀ дꙋша̀ ѿ тѣ́ла разлꙋча́тисѧ бꙋ́детъ: блюди́сѧ ѿ си́хъ, человѣ́че, црⷭ҇твӏ̈ѧ ра́ди бж҃ӏ̈ѧ.

Поми́лꙋй мѧ̀, бж҃е, поми́лꙋй мѧ̀.

Почто̀ ѹ҆бо́гаго ѡ҆би́диши; мздꙋ̀ нае́мничꙋ ѹ҆де́ржꙋеши; бра́та твоего̀ не лю́биши; блꙋ́дъ и҆ го́рдость го́ниши; ѡ҆ста́ви ѹ҆́бѡ сӏ̈ѧ̑, дꙋшѐ моѧ̀, и҆ пока́йсѧ црⷭ҇твӏ̈ѧ ра́ди бж҃ӏ̈ѧ.

Сла́ва: Ѽ безꙋ́мный человѣ́че, доко́лѣ ѹ҆глѣба́еши ꙗ҆́кѡ пчела̀, собира́ющи бога́тство твоѐ; вско́рѣ бо поги́бнетъ ꙗ҆́кѡ пра́хъ и҆ пе́пелъ: но бо́лѣе взыщѝ црⷭ҇твӏ̈ѧ бж҃ӏ̈ѧ.

И҆ ны́нѣ: Гпⷭ҇жѐ бцⷣе, поми́лꙋй мѧ̀ грѣ́шнаго, и҆ въ добродѣ́тели ѹ҆крѣпѝ, и҆ соблюди́ мѧ, да на́глаѧ сме́рть не похи́титъ мѧ̀ негото́ваго, и҆ доведи́ мѧ, дв҃о, црⷭ҇твӏ̈ѧ бж҃ӏ̈ѧ.

Пѣ́снь є҃.

Ӏ҆рмо́съ: Бж҃ӏ̈имъ свѣ́томъ твои́мъ, бл҃же, ѹ҆́тренюющихъ тѝ дꙋ́шы любо́вӏ̈ю ѡ҆зарѝ, молю́сѧ: тѧ̀ вѣ́дѣти, сло́ве бж҃ӏ̈й, и҆́стиннаго бг҃а, ѿ мра́ка грѣхо́внагѡ взыва́юща.

Поми́лꙋй мѧ̀, бж҃е, поми́лꙋй мѧ̀.

Воспомѧнѝ, ѻ҆каѧ́нный человѣ́че, ка́кѡ лжа́мъ, клевета́мъ, разбо́ю, не́мощемъ, лю̑тымъ ѕвѣрє́мъ, грѣхѡ́въ ра́ди порабоще́нъ є҆сѝ; дꙋшѐ моѧ̀ грѣ́шнаѧ, тогѡ́ ли восхотѣ́ла є҆сѝ;

Поми́лꙋй мѧ̀, бж҃е, поми́лꙋй мѧ̀.

Трепе́щꙋтъ мѝ ѹ҆́ди, всѣ́ми бо сотвори́хъ винꙋ̀: ѻ҆чи́ма взира́ѧй, ѹ҆ши́ма слы́шай, ѧ҆зы́комъ ѕла̑ѧ глаго́лѧй, всего̀ себѐ гее́ннѣ предаѧ́й: дꙋшѐ моѧ̀ грѣ́шнаѧ, сегѡ́ ли восхотѣ́ла є҆сѝ;

Сла́ва: Блꙋдника̀ и҆ разбо́йника ка́ющасѧ прӏ̈ѧ́лъ є҆сѝ, сп҃се: а҆́зъ же є҆ди́нъ лѣ́ностӏ̈ю грѣхо́вною ѡ҆тѧгчи́хсѧ, и҆ ѕлы̑мъ дѣлѡ́мъ порабо́тихсѧ: дꙋшѐ моѧ̀ грѣ́шнаѧ, сегѡ́ ли восхотѣ́ла є҆сѝ;

И҆ ны́нѣ: Ди́внаѧ и҆ ско́раѧ помо́щнице всѣ̑мъ человѣ́кѡмъ, мт҃и бж҃ӏ̈ѧ, помозѝ мнѣ̀ недосто́йномꙋ, дꙋша́ бо моѧ̀ грѣ́шнаѧ тогѡ̀ восхотѣ̀.

Пѣ́снь ѕ҃.

Ӏ҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопӏ̈ю́ ти: возведѝ ѿ тлѝ живо́тъ мо́й, многомлⷭ҇тиве.

Поми́лꙋй мѧ̀, бж҃е, поми́лꙋй мѧ̀.

Житӏ̈ѐ на землѝ блꙋ́днѡ пожи́хъ, и҆ дꙋ́шꙋ во тьмꙋ̀ преда́хъ: ны́нѣ ѹ҆́бѡ молю́ тѧ, млⷭ҇тивый влⷣко: свободи́ мѧ ѿ рабо́ты сеѧ̀ вра́жӏ̈ѧ, и҆ да́ждь мѝ ра́зꙋмъ твори́ти во́лю твою̀.

Поми́лꙋй мѧ̀, бж҃е, поми́лꙋй мѧ̀.

Кто̀ твори́тъ такѡва́ѧ, ꙗ҆́коже а҆́зъ; ꙗ҆́коже бо свинӏ̈ѧ̀ лежи́тъ въ калꙋ̀, та́кѡ и҆ а҆́зъ грѣхꙋ̀ слꙋжꙋ̀: но ты̀ гдⷭ҇и, и҆сто́ргни мѧ̀ ѿ гнꙋ́са сегѡ̀, и҆ да́ждь мѝ се́рдце твори́ти за́пѡвѣди твоѧ̑.

Сла́ва: Воспрѧнѝ, ѻ҆каѧ́нный человѣ́че, къ бг҃ꙋ, воспомѧнꙋ́въ своѧ̑ согрѣшє́нӏ̈ѧ, припа́даѧ ко творцꙋ̀, слезѧ̀ и҆ стенѧ̀, то́йже ꙗ҆́кѡ млⷭ҇рдъ, да́стъ тѝ ѹ҆́мъ зна́ти во́лю свою̀.

И҆ ны́нѣ: Бцⷣе дв҃о, ѿ ви́димагѡ и҆ неви́димагѡ ѕла̀ сохрани́ мѧ, пречтⷭ҇аѧ, и҆ прӏ̈имѝ мл҃твы моѧ̑, и҆ донесѝ ѧ҆̀ сн҃ꙋ твоемꙋ̀, да да́стъ мѝ ѹ҆́мъ твори́ти во́лю є҆гѡ̀.

Конда́къ:

Дꙋшѐ моѧ̀, почто̀ грѣха́ми богатѣ́еши; почто̀ во́лю дӏ̈а́волю твори́ши; въ чесо́мъ наде́ждꙋ полага́еши; преста́ни ѿ си́хъ, и҆ ѡ҆брати́сѧ къ бг҃ꙋ съ пла́чемъ, зовꙋ́щи: млⷭ҇рде гдⷭ҇и, поми́лꙋй мѧ̀ грѣ́шнаго.

Ӏ҆́косъ:

Помы́сли, дꙋшѐ моѧ̀, го́рькӏ̈й ча́съ сме́рти, и҆ стра́шный сꙋ́дъ творца̀ твоегѡ̀ и҆ бг҃а: а҆́гг҃ли бо гро́знӏ̈и по́ймꙋтъ тѧ̀, дꙋшѐ, и҆ въ вѣ́чный ѻ҆́гнь введꙋ́тъ: ѹ҆̀бо пре́жде сме́рти пока́йсѧ, вопӏ̈ю́щи: гдⷭ҇и, поми́лꙋй мѧ̀ грѣ́шнаго.

Пѣ́снь з҃.

Ӏ҆рмо́съ: Росода́тельнꙋ ѹ҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нӏ̈е бж҃ӏ̈е мꙋчи́телѧ ѹ҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Поми́лꙋй мѧ̀, бж҃е, поми́лꙋй мѧ̀.

Не надѣ́йсѧ, дꙋшѐ моѧ̀, на тлѣ́нное бога́тство, и҆ на непра́ведное собра́нӏ̈е, всѧ̑ бо сӏ̈ѧ̑ не вѣ́си комꙋ̀ ѡ҆ста́виши, но возопӏ́й: поми́лꙋй мѧ̀, хрⷭ҇тѐ бж҃е, недосто́йнаго.

Поми́лꙋй мѧ̀, бж҃е, поми́лꙋй мѧ̀.

Не ѹ҆пова́й, дꙋшѐ моѧ̀, на тѣле́сное здра́вӏ̈е, и҆ на скоромимоходѧ́щꙋю красотꙋ̀: ви́диши бо, ꙗ҆́кѡ си́льнӏ̈и и҆ младӏ́и ѹ҆мира́ютъ, но возопӏ́й: поми́лꙋй мѧ̀, хрⷭ҇тѐ бж҃е, недосто́йнаго.

Сла́ва: Воспомѧнѝ, дꙋшѐ моѧ̀, вѣ́чное житӏ̈ѐ, црⷭ҇тво нбⷭ҇ное, ѹ҆гото́ванное ст҃ы̑мъ, и҆ тьмꙋ̀ кромѣ́шнюю, и҆ гнѣ́въ бж҃ӏ̈й ѕлы̑мъ, и҆ возопӏ́й: поми́лꙋй мѧ̀, хрⷭ҇тѐ бж҃е, недосто́йнаго.

И҆ ны́нѣ: Припадѝ, дꙋшѐ моѧ̀, къ бж҃ӏ̈ей мт҃ри, и҆ помоли́сѧ то́й, є҆́сть бо ско́раѧ помо́щница ка́ющымсѧ, ѹ҆мо́литъ сн҃а хрⷭ҇та̀ бг҃а, и҆ поми́лꙋетъ мѧ̀ недосто́йнаго.

Пѣ́снь и҃.

Ӏ҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки.

Ка́кѡ не и҆́мамъ пла́катисѧ, є҆гда̀ помышлѧ́ю сме́рть; ви́дѣхъ бо во гро́бѣ лежа́ща бра́та моего̀, безсла́вна и҆ безѡбра́зна: что̀ ѹ҆́бѡ ча́ю; и҆ на что̀ надѣ́юсѧ; то́кмѡ да́ждь мѝ гдⷭ҇и пре́жде конца̀ покаѧ́нӏ̈е. Два́жды.

Поми́лꙋй мѧ̀, бж҃е, поми́лꙋй мѧ̀.

Сла́ва: Вѣ́рꙋю, ꙗ҆́кѡ прӏ̈и́деши сꙋди́ти живы́хъ и҆ ме́ртвыхъ, и҆ всѝ во свое́мъ чи́нꙋ ста́нꙋтъ, ста́рӏ̈и и҆ младӏ́и, влады̑ки и҆ кнѧ́зи, дѣ̑вы и҆ сщ҃е́нницы: гдѣ̀ ѡ҆брѧ́щꙋсѧ а҆́зъ; сегѡ̀ ра́ди вопӏ̈ю̀: да́ждь мѝ гдⷭ҇и пре́жде конца̀ покаѧ́нӏ̈е. ̑

И҆ ны́нѣ: Пречⷭ҇таѧ бцⷣе, прӏ̈имѝ недосто́йнꙋю мл҃твꙋ мою̀, и҆ сохрани́ мѧ ѿ на́глыѧ сме́рти, и҆ да́рꙋй мѝ пре́жде конца̀ покаѧ́нӏ̈е.

Пѣ́снь ѳ҃.

Ӏ҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстӏ̈и взира́ти: тобо́ю же всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и тѧ̀ ѹ҆бл҃жа́емъ.

Поми́лꙋй мѧ̀, бж҃е, поми́лꙋй мѧ̀.

Ны́нѣ къ ва́мъ прибѣга́ю, а҆́гг҃ли, а҆рха́гг҃ли, и҆ всѧ̑ нбⷭ҇ныѧ си̑лы, ѹ҆ прⷭ҇то́ла бж҃ӏ̈ѧ стоѧ́щӏ̈и, моли́тесѧ ко творцꙋ̀ своемꙋ̀, да и҆зба́витъ дꙋ́шꙋ мою̀ ѿ мꙋ́ки вѣ́чныѧ.

Поми́лꙋй мѧ̀, бж҃е, поми́лꙋй мѧ̀.

Ны́нѣ пла́чꙋсѧ къ ва́мъ, ст҃ӏ́и патрӏ̈а́рси, ца́рӏ̈е и҆ прⷪ҇ро́цы, а҆пⷭ҇ли и҆ ст҃и́тели, и҆ всѝ и҆збра́ннӏ̈и хрⷭ҇тѡ́вы: помози́те мѝ на сꙋдѣ̀, да сп҃се́тъ дꙋ́шꙋ мою̀ ѿ си́лы вра́жӏ̈ѧ.

Сла́ва: Ны́нѣ къ ва́мъ воздѣжꙋ̀ рꙋ́цѣ, ст҃ӏ́и мч҃нцы, пꙋсты̑нницы, дѣ́вствєнницы, првⷣницы, и҆ всѝ ст҃ӏ́и, молѧ́щӏ̈исѧ ко гдⷭ҇ꙋ за ве́сь мӏ́ръ, да поми́лꙋетъ мѧ̀ въ ча́съ сме́рти моеѧ̀.

И҆ ны́нѣ: Мт҃и бж҃ӏ̈ѧ, помози́ ми, на тѧ̀ си́льнѣ надѣ́ющемꙋсѧ, ѹ҆молѝ сн҃а своего̀, да поста́витъ мѧ̀ недосто́йнаго ѡ҆деснꙋ́ю себє̀, є҆гда̀ сѧ́детъ сꙋдѧ́й живы́хъ и҆ ме́ртвыхъ. А҆ми́нь.

Мл҃тва ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀:

Влⷣко хрⷭ҇тѐ бж҃е, и҆́же стрⷭ҇тьмѝ твои́ми стра̑сти моѧ̑ и҆сцѣли́вый, и҆ ꙗ҆́звами твои́ми ꙗ҆́звы моѧ̑ ѹ҆врачева́вый, да́рꙋй мнѣ̀, мно́гѡ тебѣ̀ прегрѣши́вшемꙋ, сле́зы ѹ҆миле́нӏ̈ѧ, срастворѝ моемꙋ̀ тѣ́лꙋ ѿ ѡ҆бонѧ́нӏ̈ѧ животворѧ́щагѡ тѣ́ла твоегѡ̀, и҆ насладѝ дꙋ́шꙋ мою̀ твое́ю чⷭ҇тно́ю кро́вӏ̈ю, ѿ го́рести, є҆́юже мѧ̀ сопроти́вникъ напоѝ: возвы́си мо́й ѹ҆́мъ къ тебѣ̀, до́лꙋ пони́кшӏ̈й, и҆ возведѝ ѿ про́пасти поги́бели, ꙗ҆́кѡ не и҆́мамъ покаѧ́нӏ̈ѧ, не и҆́мамъ ѹ҆миле́нӏ̈ѧ, не и҆́мамъ слезы̀ ѹ҆тѣ́шительныѧ, возводѧ́щӏ̈ѧ ча̑да ко своемꙋ̀ наслѣ́дӏ̈ю. Ѡ҆мрачи́хсѧ ѹ҆мо́мъ въ жите́йскихъ страсте́хъ, не могꙋ̀ воззрѣ́ти къ тебѣ̀ въ болѣ́зни, не могꙋ̀ согрѣ́тисѧ слеза́ми ꙗ҆̀же къ тебѣ̀ любвѐ. Но влⷣко гдⷭ҇и ӏ҆и҃се хрⷭ҇тѐ, сокро́вище бл҃ги́хъ, да́рꙋй мнѣ̀ покаѧ́нӏ̈е всецѣ́лое, и҆ се́рдце люботрꙋ́дное во взыска́нӏ̈е твоѐ: да́рꙋй мнѣ̀ бл҃года́ть твою̀, и҆ ѡ҆бновѝ во мнѣ̀ зра́ки твоегѡ̀ ѡ҆́браза. Ѡ҆ста́вихъ тѧ̀, не ѡ҆ста́ви менє̀: и҆зы́ди на взыска́нӏ̈е моѐ: возведѝ къ па́жити твое́й, и҆ сопричти́ мѧ ѻ҆вца́мъ и҆збра́ннагѡ твоегѡ̀ ста́да: воспита́й мѧ̀ съ ни́ми ѿ ѕла́ка бжⷭ҇твенныхъ твои́хъ та́инствъ, мл҃твами пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ твои́хъ. А҆ми́нь.

КАНѠ́НЪ МОЛЄ́БНЫЙ КО ПРЄСТ҃Ѣ́Й БЦⷣѢ,

пое́мый во всѧ́цѣй ско́рби дꙋше́внѣй, и҆ ѡ҆бстоѧ́нӏ̈и. [г҃ӏ]

Творе́нӏ̈е ѳеостирӏ́кта мона́ха.

Тропа́рь бцⷣѣ:

Къ бцⷣѣ прилѣ́жнѡ ны́нѣ притеце́мъ грѣ́шнӏ̈и и҆ смире́ннӏ̈и, и҆ припаде́мъ въ покаѧ́нӏ̈и зовꙋ́ще и҆з̾ глꙋбины̀ дꙋшѝ: влⷣчце помозѝ, на ны̀ млⷭ҇рдовавши: потщи́сѧ, погиба́емъ ѿ мно́жества прегрѣше́нӏ̈й. не ѿвратѝ твоѧ̑ рабы̑ тщы̀, тѧ́ бо и҆ є҆ди́нꙋ наде́ждꙋ и҆́мамы. Два́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Не ѹ҆молчи́мъ никогда̀, бцⷣе, си̑лы твоѧ̑ глаго́лати недосто́йнӏ̈и: а҆́ще бо ты̀ не бы̀ предстоѧ́ла молѧ́щи, кто̀ бы на́съ и҆зба́вилъ ѿ толи́кихъ бѣ́дъ; кто́ же бы сохрани́лъ до ны́нѣ свобо́дны; не ѿстꙋ́пимъ влⷣчце ѿ тебѐ, твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ.

Та́же ѱало́мъ н҃:

Канѡ́нъ ко прест҃ѣ́й бцⷣѣ, гла́съ и҃.

Пѣ́снь а҃.

Ӏ҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, ӏ҆и҃льтѧнинъ вопӏ̈ѧ́ше: и҆зба́вителю и҆ бг҃ꙋ на́шемꙋ пои́мъ.

Припѣ́въ: Прест҃а́ѧ бцⷣе, сп҃сѝ на́съ.

Мно́гими содержи́мь напа́стьми, къ тебѣ̀ прибѣга́ю сп҃се́нӏ̈ѧ и҆скӏ́й: ѽ мт҃и сло́ва и҆ дв҃о, ѿ тѧ́жкихъ и҆ лю́тыхъ мѧ̀ сп҃сѝ.

Страсте́й мѧ̀ смꙋща́ютъ прило́зи, мно́гагѡ ѹ҆ны́нӏ̈ѧ и҆спо́лнити мою̀ дꙋ́шꙋ: ѹ҆мирѝ, ѻ҆трокови́це, тишино́ю сн҃а и҆ бг҃а твоегѡ̀, всенепоро́чнаѧ.

Сла́ва: Сп҃са ро́ждшꙋю тѧ̀ и҆ бг҃а, молю̀, дв҃о, и҆зба́витисѧ мѝ лю́тыхъ: къ тебѣ́ бо ны́нѣ прибѣга́ѧ, простира́ю и҆ дꙋ́шꙋ и҆ помышле́нӏ̈е.

И҆ ны́нѣ: Недꙋ́гꙋюща тѣ́ломъ и҆ дꙋше́ю, посѣще́нӏ̈ѧ бжⷭ҇твеннагѡ и҆ промышле́нӏ̈ѧ ѿ тебє̀ сподо́би, є҆ди́на бг҃омт҃и, ꙗ҆́кѡ бл҃га́ѧ, бл҃га́гѡ же роди́тельница.

Пѣ́снь г҃.

Ӏ҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ѹ҆твердѝ въ любвѝ твое́й, жела́нӏ̈й кра́ю, вѣ́рныхъ ѹ҆твержде́нӏ̈е, є҆ди́не чл҃вѣколю́бче.

Прест҃а́ѧ бц҃е, сп҃сѝ на́съ.

Предста́тельство и҆ покро́въ жи́зни моеѧ̀ полага́ю тѧ̀, бг҃ороди́тельнице дв҃о, ты́ мѧ ѡ҆кормѝ ко приста́нищꙋ твоемꙋ̀, бл҃ги́хъ вино́вна, вѣ́рныхъ ѹ҆твержде́нӏ̈е, є҆ди́на всепѣ́таѧ.

Прест҃а́ѧ бц҃е, сп҃сѝ на́съ.

Молю̀ дв҃о, дꙋше́вное смꙋще́нӏ̈е и҆ печа́ли моеѧ̀ бꙋ́рю разори́ти: ты́ бо бг҃оневѣ́стнаѧ, нача́льника тишины̀ хрⷭ҇та̀ родила̀ є҆сѝ, є҆ди́на пречⷭ҇таѧ.

Сла́ва: Бл҃годѣ́телѧ ро́ждши до́брыхъ вино́внаго, бл҃годѣѧ́нӏ̈ѧ бога́тство всѣ̑мъ и҆сточѝ: всѧ̑ бо мо́жеши, ꙗ҆́кѡ си́льнаго въ крѣ́пости хрⷭ҇та̀ ро́ждши, бг҃обл҃же́ннаѧ.

И҆ ны́нѣ: Лю́тыми недꙋ́ги, и҆ болѣ́зненными страстьмѝ и҆стѧза́емꙋ, дв҃о, ты́ ми помозѝ: и҆сцѣле́нӏ̈й бо неѡскꙋ́дное тѧ̀ зна́ю сокро́вище, пренепоро́чнаѧ, неиждива́емое.

Та́же:

Конда́къ, гла́съ ѕ҃:

Предста́тельство хрⷭ҇тӏ̈а́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нӏ̈й гла́сы, но предварѝ ꙗ҆́кѡ бл҃га́ѧ на по́мощь на́съ, вѣ́рнѡ зовꙋ́щихъ тѝ: ѹ҆скорѝ на мл҃твꙋ, и҆ потщи́сѧ на ѹ҆моле́нӏ̈е, предста́тельствꙋющи при́снѡ, бцⷣе, чтꙋ́щихъ тѧ̀.

И҆́нъ конда́къ, гла́съ то́йже:

Ра́дости моѐ се́рдце и҆спо́лни, дв҃о, ꙗ҆́же ра́дости прӏ̈е́мшаѧ и҆сполне́нӏ̈е, грѣхо́внꙋю печа́ль потреблѧ́ющи.

Прест҃а́ѧ бц҃е, сп҃сѝ на́съ.

Приста́нище и҆ предста́тельство тебѣ̀ прибѣга́ющихъ бꙋ́ди, дв҃о, и҆ стѣна̀ нерꙋши́маѧ, прибѣ́жище же и҆ покро́въ и҆ весе́лӏ̈е.

Сла́ва: Свѣ́та твоегѡ̀ зарѧ́ми просвѣтѝ, дв҃о, мра́къ невѣ́дѣнӏ̈ѧ ѿгонѧ́ющи, бл҃говѣ́рнѡ бцⷣꙋ тѧ̀ и҆сповѣ́дающихъ.

И҆ ны́нѣ: На мѣ́стѣ ѡ҆ѕлобле́нӏ̈ѧ не́мощи, смири́вшагосѧ дв҃о, и҆сцѣлѝ, и҆з̾ нездра́вӏ̈ѧ во здра́вӏ̈е претворѧ́ющи.

Стихи́ры, глас в҃:

Вы́шшꙋю нб҃съ и҆ чи́стшꙋю свѣ́тлостей со́лнечныхъ, и҆зба́вльшꙋю на́съ ѿ клѧ́твы, влⷣчцꙋ мӏ́ра пѣ́сньми почти́мъ.

Ѿ мно́гихъ мои́хъ грѣхѡ́въ немощствꙋ́етъ тѣ́ло, немощствꙋ́етъ и҆ дꙋша̀ моѧ̀: къ тебѣ̀ прибѣга́ю, бл҃года́тнѣй, наде́ждо ненаде́жныхъ, ты́ ми помозѝ.

Влⷣчце и҆ ма́ти и҆зба́вителѧ, прӏ̈имѝ моле́нӏ̈е недосто́йныхъ ра̑бъ твои́хъ, да хода́тайствꙋеши къ ро́ждшемꙋсѧ ѿ тебѐ: ѽ влⷣчце мӏ́ра, бꙋ́ди хода́таица!

Пое́мъ прилѣ́жнѡ тебѣ̀ пѣ́снь ны́нѣ, всепѣ́той бцⷣѣ, ра́достнѡ: со прⷣте́чею, и҆ всѣ́ми ст҃ы́ми молѝ, бцⷣе, є҆́же ѹ҆ще́дрити ны̀.

Всѧ̑ а҆́гг҃лѡвъ вѡ́инства, прⷣте́че гдⷭ҇нь, а҆пⷭ҇лѡвъ двоенадесѧ́тице, ст҃ӏ́и всѝ съ бцⷣею сотвори́те мл҃твꙋ, во є҆́же сп҃сти́сѧ на́мъ.

Мл҃твы ко прест҃ѣ́й бцⷣѣ:

Цр҃и́це моѧ̀ пребл҃га́ѧ, наде́ждо моѧ̀ бцⷣе, прӏ̈ѧ́телище си́рыхъ, и҆ стра́нныхъ предста́тельнице, скорбѧ́щихъ ра́досте, ѡ҆би́димыхъ покрови́тельнице! Зри́ши мою̀ бѣдꙋ̀, зри́ши мою̀ ско́рбь, помози́ ми ꙗ҆́кѡ не́мощнꙋ, ѡ҆корми́ мѧ ꙗ҆́кѡ стра́нна: ѡ҆би́дꙋ мою̀ вѣ́си, разрѣшѝ тꙋ̀, ꙗ҆́коже во́лиши: ꙗ҆́кѡ не и҆́мамъ и҆ны́ѧ по́мощи ра́звѣ тебє̀, ни и҆ны́ѧ предста́тельницы, ни бл҃гӏ́ѧ ѹ҆тѣ́шительницы, то́кмѡ тебѐ, ѽ бг҃омт҃и: ꙗ҆́кѡ да сохрани́ши мѧ̀, и҆ покры́еши во вѣ́ки вѣкѡ́въ. А҆ми́нь.

Къ комꙋ̀ возопӏ̈ю̀, влⷣчце; къ комꙋ̀ прибѣ́гнꙋ въ го́рести мое́й, а҆́ще не къ тебѣ̀, цр҃и́це нбⷭ҇наѧ; кто̀ пла́чь мо́й и҆ воздыха́нӏ̈е моѐ прӏ̈и́метъ, а҆́ще не ты̀, пренепоро́чнаѧ, наде́ждо хрⷭ҇тӏ̈а́нъ и҆ прибѣ́жище на́мъ грѣ̑шнымъ; кто̀ па́че тебє̀ въ напа́стехъ защи́титъ; Ѹ҆слы́ши ѹ҆̀бо стена́нӏ̈е моѐ, и҆ приклонѝ ѹ҆́хо твоѐ ко мнѣ̀, влⷣчце мт҃и бг҃а моегѡ̀, и҆ не пре́зри менє̀ тре́бꙋющагѡ твоеѧ̀ по́мощи, и҆ не ѿри́ни менє̀ грѣ́шнагѡ. Вразꙋмѝ и҆ наꙋчи́ мѧ, цр҃и́це нбⷭ҇наѧ: не ѿстꙋпѝ ѿ менє̀ раба̀ твоегѡ̀, влⷣчце, за ропта́нӏ̈е моѐ, но бꙋ́ди мнѣ̀ мт҃и и҆ застꙋ́пница. Врꙋча́ю себѐ млⷭ҇тивомꙋ покро́вꙋ твоемꙋ̀: приведи́ мѧ грѣ́шнаго къ ти́хой и҆ безмѧте́жнѣй жи́зни, да пла́чꙋсѧ ѡ҆ грѣсѣ́хъ мои́хъ. Къ комꙋ́ бо прибѣ́гнꙋ пови́нный а҆́зъ, а҆́ще не къ тебѣ̀, ѹ҆пова́нӏ̈ю и҆ прибѣ́жищꙋ грѣ́шныхъ, наде́ждою на неизрече́ннꙋю млⷭ҇ть твою̀ и҆ щедрѡ́ты твоѧ̑ ѡ҆крилѧ́емь; Ѽ влⷣчце цр҃и́це нбⷭ҇наѧ! ты̀ мнѣ̀ ѹ҆пова́нӏ̈е и҆ прибѣ́жище, покро́въ и҆ застꙋпле́нӏ̈е и҆ по́мощь. Цр҃и́це моѧ̀ пребл҃га́ѧ и҆ ско́раѧ застꙋ́пнице! покры́й твои́мъ хода́тайствомъ моѧ̑ прегрѣшє́нӏ̈ѧ, защитѝ менѐ ѿ вра̑гъ ви́димыхъ и҆ неви́димыхъ: ѹ҆мѧгчѝ сердца̀ ѕлы́хъ человѣ̑къ, востаю́щихъ на мѧ̀. Ѽ мт҃и гдⷭ҇а моегѡ̀ творца̀! ты̀ є҆сѝ ко́рень двⷭ҇тва и҆ неꙋвѧда́емый цвѣ́тъ чⷭ҇тоты̀. Ѽ бг҃ороди́тельнице! ты̀ пода́ждь мѝ по́мощь немощствꙋ́ющемꙋ плотски́ми страстьмѝ и҆ болѣ́знꙋющемꙋ се́рдцемъ, є҆ди́но бо твоѐ и҆ съ тобо́ю твоегѡ̀ сн҃а и҆ бг҃а на́шегѡ и҆́мамъ застꙋпле́нӏ̈е: и҆ твои́мъ пречꙋ́днымъ застꙋпле́нӏ̈емъ да и҆зба́влюсѧ ѿ всѧ́кӏ̈ѧ бѣды̀ и҆ напа́сти, ѽ пренепоро́чнаѧ и҆ пресла́внаѧ бж҃ӏ̈ѧ мт҃и мр҃ӏ́е. Тѣ́мже со ѹ҆пова́нӏ̈емъ глаго́лю и҆ вопӏ̈ю̀: ра́дꙋйсѧ, бл҃года́тнаѧ: ра́дꙋйсѧ, ѡ҆бра́дованнаѧ: ра́дꙋйсѧ, пребл҃гослове́ннаѧ: гдⷭ҇ь съ тобо́ю.

КАНѠ́НЪ А҆́ГГ҃ЛꙊ ХРАНИ́ТЄЛЮ [д҃ӏ]

Тропа́рь, гла́съ ѕ҃.

А҆́гг҃ле бж҃ӏ̈й, храни́телю мо́й ст҃ы́й, живо́тъ мо́й соблюдѝ во стра́сѣ хрⷭ҇та̀ бг҃а, ѹ҆́мъ мо́й ѹ҆твердѝ во и҆́стиннѣмъ пꙋтѝ, и҆ къ любвѝ го́рнѣй ѹ҆ѧзвѝ дꙋ́шꙋ мою̀, да тобо́ю направлѧ́емь, полꙋчꙋ̀ ѿ хрⷭ҇та̀ бг҃а ве́лӏ̈ю млⷭ҇ть.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ:

Ст҃а́ѧ влⷣчце, хрⷭ҇та̀ бг҃а на́шегѡ мт҃и, ꙗ҆́кѡ всѣ́хъ творца̀ недоꙋмѣ́ннѡ ро́ждшаѧ, молѝ бл҃гость є҆гѡ̀ всегда̀, со храни́телемъ мои́мъ а҆́гг҃ломъ, сп҃стѝ дꙋ́шꙋ мою̀ страстьмѝ ѡ҆держи́мꙋю, и҆ ѡ҆ставле́нӏ̈е грѣхѡ́въ дарова́ти мѝ.

Канѡ́нъ, гла́съ и҃.

Пѣ́снь а҃.

Ӏ҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Припѣ́въ ӏ҆и҃сꙋ: Гдⷭ҇и ӏ҆и҃се хрⷭ҇тѐ бж҃е мо́й, поми́лꙋй мѧ̀. [є҃ӏ]

Пѣ́снь воспѣ́ти и҆ восхвали́ти, сп҃се, твоего̀ раба̀ досто́йнѡ сподо́би, безпло́тномꙋ а҆́гг҃лꙋ, наста́вникꙋ и҆ храни́телю моемꙋ̀.

Припѣ́въ: Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Є҆ди́нъ а҆́зъ въ неразꙋ́мӏ̈и и҆ въ лѣ́ности ны́нѣ лежꙋ̀, наста́вниче мо́й и҆ храни́телю, не ѡ҆ста́ви менє̀ погиба́юща.

Сла́ва: Ѹ҆́мъ мо́й твое́ю мл҃твою напра́ви, твори́ти мѝ бж҃ӏ̈ѧ повелѣ̑нӏ̈ѧ, да полꙋчꙋ̀ ѿ бг҃а ѿда́нӏ̈е грѣхѡ́въ, и҆ ненави́дѣти мѝ ѕлы́хъ наста́ви мѧ̀, молю́сѧ тѝ.

И҆ ны́нѣ: Моли́сѧ дв҃и́це ѡ҆ мнѣ̀ рабѣ̀ твое́мъ ко бл҃года́телю, со храни́телемъ мои́мъ а҆́гг҃ломъ, и҆ наста́ви мѧ̀ твори́ти за́пѡвѣди сн҃а твоегѡ̀, и҆ творца̀ моегѡ̀.

Пѣ́снь г҃.

Ӏ҆рмо́съ: Ты̀ є҆сѝ ѹ҆твержде́нӏ̈е притека́ющихъ къ тебѣ̀ гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Всѐ помышле́нӏ̈е моѐ и҆ дꙋ́шꙋ мою̀ къ тебѣ̀ возложи́хъ, храни́телю мо́й, ты̀ ѿ всѧ́кӏ̈ѧ мѧ̀ напа́сти вра́жӏ̈ѧ и҆зба́ви.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Вра́гъ попира́етъ мѧ̀ и҆ ѡ҆ѕлоблѧ́етъ, и҆ поꙋча́етъ всегда̀ твори́ти своѧ̑ хотѣ̑нӏ̈ѧ: но ты̀, наста́вниче мо́й, не ѡ҆ста́ви менє̀ погиба́юща.

Сла́ва: Пѣ́ти пѣ́снь со бл҃годаре́нӏ̈емъ и҆ ѹ҆се́рдӏ̈емъ творцꙋ̀ и҆ бг҃ꙋ да́ждь мѝ, и҆ тебѣ̀ бл҃го́мꙋ а҆́гг҃лꙋ храни́телю моемꙋ̀: и҆зба́вителю мо́й, и҆зми́ мѧ ѿ вра̑гъ ѡ҆ѕлоблѧ́ющихъ мѧ̀.

И҆ ны́нѣ: И҆сцѣлѝ пречⷭ҇таѧ, моѧ̑ многонедꙋ̑жныѧ стрꙋ́пы, ꙗ҆̀же въ дꙋшѝ, проженѝ врагѝ, и҆̀же при́снѡ бо́рютсѧ со мно́ю.

Сѣда́ленъ, гла́съ в҃.

Ѿ любвѐ дꙋше́вныѧ вопӏ̈ю́ ти, храни́телю моеѧ̀ дꙋшѝ, всест҃ы́й мо́й а҆́гг҃ле: покры́й мѧ̀ и҆ соблюдѝ ѿ лꙋка́вагѡ ловле́нӏ̈ѧ всегда̀, и҆ къ жи́зни наста́ви нбⷭ҇нѣй, вразꙋмлѧ́ѧ, и҆ просвѣща́ѧ и҆ ѹ҆крѣплѧ́ѧ мѧ̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ:

Бцⷣе безневѣ́стнаѧ пречⷭ҇таѧ, ꙗ҆́же без̾ сѣ́мене ро́ждши всѣ́хъ влⷣкꙋ, того̀ со а҆́гг҃ломъ храни́телемъ мои́мъ молѝ, и҆зба́вити ми сѧ всѧ́кагѡ недоꙋмѣ́нӏ̈ѧ, и҆ да́ти ѹ҆миле́нӏ̈е и҆ свѣ́тъ дꙋшѝ мое́й, и҆ согрѣше́нӏ̈ємъ ѡ҆чище́нӏ̈е, ꙗ҆́же є҆ди́на вско́рѣ застꙋпа́ющи.

Пѣ́снь д҃.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Молѝ чл҃вѣколю́бца бг҃а ты̀, храни́телю мо́й, и҆ не ѡ҆ста́ви менє̀, но при́снѡ въ ми́рѣ житӏ̈ѐ моѐ соблюдѝ, и҆ пода́ждь мѝ сп҃се́нӏ̈е неѡбори́мое.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Ꙗ҆́кѡ застꙋ́пника и҆ храни́телѧ животꙋ̀ моемꙋ̀ прӏ̈е́мъ тѧ̀ ѿ бг҃а а҆́гг҃ле, молю́ тѧ, ст҃ы́й: ѿ всѧ́кихъ мѧ̀ бѣ́дъ свободѝ.

Сла́ва: Мою̀ скве́рность твое́ю ст҃ы́нею ѡ҆чи́сти, храни́телю мо́й, и҆ ѿ ча́сти шꙋ́ӏ̈ѧ да ѿлꙋче́нъ бꙋ́дꙋ мл҃твами твои́ми, и҆ прича́стникъ сла́вы ꙗ҆влю́сѧ.

И҆ ны́нѣ: Недоꙋмѣ́нӏ̈е предлежи́тъ мѝ ѿ ѡ҆быше́дшихъ мѧ̀ ѕѡ́лъ, пречⷭ҇таѧ: но и҆зба́ви мѧ̀ ѿ ни́хъ ско́рѡ, къ тебѣ́ бо є҆ди́нѣй прибѣго́хъ.

Пѣ́снь є҃.

Ӏ҆рмо́съ: Ѹ҆́тренююще вопӏ̈е́мъ тѝ: гдⷭ҇и, сп҃си́ ны. Ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Ꙗ҆́кѡ и҆мѣ́ѧ дерзнове́нӏ̈е къ бг҃ꙋ, храни́телю мо́й ст҃ы́й, сего̀ ѹ҆молѝ ѿ ѡ҆скорблѧ́ющихъ мѧ̀ ѕѡ́лъ и҆зба́вити.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Свѣ́те свѣ́тлый, свѣ́тлѡ просвѣтѝ дꙋ́шꙋ мою̀, наста́вниче мо́й и҆ храни́телю, ѿ бг҃а да́нный мѝ а҆́гг҃ле.

Сла́ва: Спѧ́ща мѧ̀ ѕлѣ̀ тѧгото́ю грѣхо́вною ꙗ҆́кѡ бдѧ́ща сохранѝ, а҆́гг҃ле бж҃ӏ̈й, и҆ возста́ви мѧ̀ на славосло́вӏ̈е моле́нӏ̈емъ твои́мъ.

И҆ ны́нѣ: Мр҃ӏ́е, гпⷭ҇жѐ бцⷣе безневѣ́стнаѧ, наде́ждо вѣ́рныхъ, вра̑жӏ̈ѧ возношє́нӏ̈ѧ низложѝ, пою́щыѧ же тѧ̀ возвеселѝ.

Пѣ́снь ѕ҃.

Ӏ҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Всѧ́кихъ мѧ̀ напа́стей свободѝ, и҆ ѿ печа́лей сп҃сѝ, молю́сѧ тѝ ст҃ы́й а҆́гг҃ле, да́нный мѝ ѿ бг҃а, храни́телю мо́й до́брый.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Ѡ҆свѣтѝ ѹ҆́мъ мо́й, бл҃же, и҆ просвѣти́ мѧ, молю́сѧ тѝ ст҃ы́й а҆́гг҃ле, и҆ мы́слити мѝ полє́знаѧ всегда̀ наста́ви мѧ̀.

Сла́ва: Ѹ҆ста́ви се́рдце моѐ ѿ настоѧ́щагѡ мѧте́жа, и҆ бдѣ́ти ѹ҆крѣпи́ мѧ во бл҃ги́хъ, храни́телю мо́й, и҆ наста́ви мѧ̀ чꙋ́днѡ къ тишинѣ̀ живо́тнѣй.

И҆ ны́нѣ: Сло́во бж҃ӏ̈е въ тѧ̀ всели́сѧ бцⷣе, и҆ человѣ́кѡмъ тѧ̀ показа̀ нбⷭ҇нꙋю лѣ́ствицꙋ: тобо́ю бо къ на́мъ вы́шнӏ̈й соше́лъ є҆́сть.

Конда́къ, гла́съ д҃:

Ꙗ҆ви́сѧ мнѣ̀ млⷭ҇рдъ, ст҃ы́й а҆́гг҃ле гдⷭ҇ень, храни́телю мо́й, и҆ не ѿлꙋча́йсѧ ѿ менє̀ скве́рнагѡ, но просвѣти́ мѧ свѣ́томъ неприкоснове́ннымъ, и҆ сотвори́ мѧ досто́йна црⷭ҇твӏ̈ѧ нбⷭ҇нагѡ.

Ӏ҆́косъ:

Ѹ҆ничиже́ннꙋю дꙋ́шꙋ мою̀ мно́гими собла́зны, ты̀ ст҃ы́й предста́телю, неизрече́нныѧ сла́вы нбⷭ҇ныѧ сподо́би, и҆ пѣвє́цъ съ ли́ки безпло́тныхъ си́лъ бж҃ӏ̈ихъ, поми́лꙋй мѧ̀ и҆ сохранѝ, и҆ по́мыслы до́брыми дꙋ́шꙋ мою̀ просвѣтѝ, да твое́ю сла́вою а҆́гг҃ле мо́й ѡ҆богащꙋ́сѧ, и҆ низложѝ ѕломы́слѧщыѧ мнѣ̀ врагѝ, и҆ сотвори́ мѧ досто́йна црⷭ҇твӏ̈ѧ нбⷭ҇нагѡ.

Пѣ́снь з҃.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Млⷭ҇тивъ бꙋ́ди мѝ и҆ ѹ҆молѝ бг҃а, гдⷭ҇ень а҆́гг҃ле: и҆мѣ́ю бо тѧ̀ застꙋ́пника во все́мъ животѣ̀ мое́мъ, наста́вника же и҆ храни́телѧ, ѿ бг҃а дарова́ннаго мѝ во вѣ́ки.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Не ѡ҆ста́ви въ пꙋ́ть ше́ствꙋющӏ̈ѧ дꙋшѝ моеѧ̀ ѻ҆каѧ́нныѧ ѹ҆би́ти разбо́йникѡмъ, ст҃ы́й а҆́гг҃ле, ꙗ҆́же тѝ ѿ бг҃а предана̀ бы́сть непоро́чнѣ: но наста́ви ю҆̀ на пꙋ́ть покаѧ́нӏ̈ѧ.

Сла́ва: Всю̀ посра́мленꙋ дꙋ́шꙋ мою̀ привождꙋ̀ ѿ лꙋка́выхъ мѝ пѡ́мыслъ и҆ дѣ́лъ: но предварѝ наста́вниче мо́й, и҆ и҆сцѣле́нӏ̈е мѝ пода́ждь бл҃ги́ми по́мыслы, ѹ҆клонѧ́ти ми сѧ всегда̀ на пра̑выѧ стєзѝ.

И҆ ны́нѣ: Премꙋ́дрости и҆спо́лни всѣ́хъ, и҆ крѣ́пости бжⷭ҇твенныѧ, ѵ҆поста́снаѧ премⷣросте вы́шнѧгѡ, бцⷣы ра́ди, вѣ́рою вопӏ̈ю́щихъ: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

Ӏ҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстӏ̈и, хвали́те и҆ превозноси́те во всѧ̑ вѣ́ки.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Ѿ бг҃а по́сланный, ѹ҆твердѝ живо́тъ мо́й, раба̀ твоегѡ̀, пребл҃гӏ́й а҆́гг҃ле, и҆ не ѡ҆ста́ви менє̀ во вѣ́ки.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

А҆́гг҃ла тѧ̀ сꙋ́ща бл҃га, дꙋшѝ моеѧ̀ наста́вника и҆ храни́телѧ, пребл҃же́нне, воспѣва́ю во вѣ́ки.

Сла́ва: Бꙋ́ди мѝ покро́въ и҆ забра́ло въ де́нь и҆спыта́нӏ̈ѧ всѣ́хъ человѣ̑къ, во́ньже ѻ҆гне́мъ и҆скꙋша́ютсѧ дѣла̀ бл҃га̑ѧ же и҆ ѕла̑ѧ.

И҆ ны́нѣ: Бꙋ́ди мѝ помо́щница и҆ тишина̀, бцⷣе приснодв҃о, рабꙋ̀ твоемꙋ̀, и҆ не ѡ҆ста́ви менє̀ лише́на бы́ти твоегѡ̀ влады́чества.

Пѣ́снь ѳ҃.

Ӏ҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннӏ̈и тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.

Припѣ́въ ӏ҆и҃сꙋ: Гдⷭ҇и ӏ҆и҃се хрⷭ҇тѐ бж҃е мо́й, поми́лꙋй мѧ̀.

Поми́лꙋй мѧ̀, є҆ди́не сп҃се мо́й, ꙗ҆́кѡ млⷭ҇тивъ є҆сѝ и҆ млⷭ҇рдъ, и҆ првⷣныхъ ликѡ́въ сотвори́ мѧ прича́стника.

Ст҃ы́й а҆́гг҃ле бж҃ӏ̈й, храни́телю мо́й, молѝ бг҃а ѡ҆ мнѣ̀.

Мы́слити мѝ при́снѡ и҆ твори́ти, гдⷭ҇ень а҆́гг҃ле, бл҃га̑ѧ и҆ полє́знаѧ да́рꙋй, ꙗ҆́кѡ си́льна ꙗ҆вѝ въ не́мощи и҆ непоро́чна.

Сла́ва: Ꙗ҆́кѡ и҆мѣ́ѧ дерзнове́нӏ̈е къ цр҃ю̀ нбⷭ҇номꙋ, того̀ молѝ, съ про́чими безпло́тными, поми́ловати мѧ̀ ѡ҆каѧ́ннаго.

И҆ ны́нѣ: Мно́го дерзнове́нӏ̈е и҆мꙋ́щи дв҃о, къ вопло́щшемꙋсѧ и҆з̾ тебє̀, преложи́ мѧ ѿ ѹ҆́зъ, и҆ разрѣше́нӏ̈е мѝ пода́ждь и҆ сп҃се́нӏ̈е, мл҃твами твои́ми.

Мл҃тва ко а҆́гг҃лꙋ храни́телю:

А҆́гг҃ле хрⷭ҇то́въ ст҃ы́й, къ тебѣ̀ припа́даѧ молю́сѧ, храни́телю мо́й ст҃ы́й, прида́нный мнѣ̀ на соблюде́нӏ̈е дꙋшѝ и҆ тѣ́лꙋ моемꙋ̀ грѣ́шномꙋ ѿ ст҃а́гѡ кр҃ще́нӏ̈ѧ, а҆́зъ же свое́ю лѣ́ностӏ̈ю и҆ свои́мъ ѕлы́мъ ѻ҆бы́чаемъ прогнѣ́вахъ твою̀ пречⷭ҇тꙋю свѣ́тлость, и҆ ѿгна́хъ тѧ̀ ѿ себє̀ всѣ́ми стꙋ́дными дѣ́лы: лжа́ми, клевета́ми, за́вистӏ̈ю, ѡ҆сꙋжде́нӏ̈емъ, презо́рствомъ, непоко́рствомъ, братоненавидѣ́нӏ̈емъ и҆ ѕлопомнѣ́нӏ̈емъ, сребролю́бӏ̈емъ, прелюбодѣѧ́нӏ̈емъ, ꙗ҆́ростӏ̈ю, скꙋ́постӏ̈ю, ѡ҆б̾ѧде́нӏ̈емъ без̾ сы́тости и҆ ѡ҆пи́вствомъ, многоглаго́ланӏ̈емъ, ѕлы́ми по́мыслы и҆ лꙋка́выми, го́рдымъ ѡ҆бы́чаемъ и҆ блꙋ́днымъ возбѣше́нӏ̈емъ, и҆мы́й самохотѣ́нӏ̈е на всѧ́кое плотско́е вожделѣ́нӏ̈е. ѽ ѕло́е моѐ произволе́нӏ̈е, є҆гѡ́же и҆ ско́ти безслове́снӏ̈и не творѧ́тъ! да ка́кѡ возмо́жеши воззрѣ́ти на мѧ̀, и҆лѝ пристꙋпи́ти ко мнѣ̀ а҆́ки псꙋ̀ смердѧ́щемꙋ; кото́рыма ѻ҆чи́ма, а҆́гг҃ле хрⷭ҇то́въ, воззри́ши на мѧ̀, ѡ҆пле́тшасѧ ѕлѣ̀ во гнꙋ́сныхъ дѣ́лѣхъ; да ка́кѡ ѹ҆жѐ возмогꙋ̀ ѿпꙋще́нӏ̈ѧ проси́ти гѡ́рькимъ и҆ ѕлы̑мъ мои̑мъ и҆ лꙋка̑вымъ дѣѧ́нӏ̈ємъ, въ нѧ́же впа́даю по всѧ̑ дни̑ и҆ нѡ́щи, и҆ на всѧ́къ ча́съ; Но молю́сѧ тѝ припа́даѧ, храни́телю мо́й ст҃ы́й, ѹ҆млⷭ҇рдисѧ на мѧ̀ грѣ́шнаго и҆ недосто́йнаго раба̀ твоего̀ [и҆́мⷬ҇къ], бꙋ́ди мѝ помо́щникъ и҆ застꙋ́пникъ на ѕла́го моего̀ сопроти́вника, ст҃ы́ми твои́ми мл҃твами, и҆ црⷭ҇твӏ̈ѧ бж҃ӏ̈ѧ прича́стника мѧ̀ сотворѝ, со всѣ́ми ст҃ы́ми, всегда̀, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

КАНѠ́НЪ СТ҃О́МꙊ Ӏ҆ѠА́ННꙊ ПРⷣТЄ́ЧИ.

Гла́съ в҃.

Пѣ́снь а҃.

Ӏ҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла: вопло́щшеесѧ же сло́во всеsло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Припѣ́въ: Ст҃ы́й вели́кӏ̈й ӏ҆ѡа́нне прⷣте́че гдⷭ҇ень, молѝ бг҃а ѡ҆ на́съ.

Крⷭ҇ти́телю и҆ прⷣте́че хрⷭ҇то́въ, погрꙋжа́емый всегда̀ сластьмѝ тѣле́сными ѹ҆́мъ мо́й ѹ҆пра́ви, и҆ во́лны страсте́й ѹ҆кротѝ, ꙗ҆́кѡ да въ тишинѣ̀ бж҃е́ственнѣй бы́въ пѣсносло́влю тѧ̀.

Недоꙋмѣ́ннымъ просвѣти́всѧ просвѣще́нӏ̈емъ, ꙗ҆́кѡ многосвѣ́тлаѧ sвѣзда̀, мы́сленномꙋ восто́кꙋ предте́клъ є҆сѝ: и҆́мже ѡ҆зари́тисѧ се́рдцꙋ моемꙋ̀, крⷭ҇ти́телю молѝ, ѡ҆мраче́нномꙋ всѣ́ми бѣсо́вскими преложе́нӏ̈и.

Сла́ва: Въ рѣцѣ̀ бе́зднꙋ и҆ногда̀ всемꙋ́дре погрꙋзи́лъ є҆сѝ, пото́пъ содѣва́ющꙋю бл҃года́тӏ̈ю, всегѡ̀ престꙋпле́нӏ̈ѧ: но молю́сѧ, пото́ки бл҃же́нне мои́хъ прегрѣше́нӏ̈й и҆зсꙋшѝ, бж҃е́ственнымъ хода́тайствомъ твои́мъ.

И҆ ны́нѣ: Чⷭ҇тыѧ дв҃ы бг҃а воплоти́вшӏ̈ѧ сро́дникъ бы́лъ є҆сѝ бл҃же́нне прⷣте́че, съ не́юже тѧ̀ чти́мъ и҆ мо́лимъ, и҆̀же въ бж҃е́ственнѣмъ хра́мѣ твое́мъ ны́нѣ живꙋ́ще, хра́мы и҆ на́съ сотворѝ дх҃а ст҃а́гѡ.

Пѣ́снь г҃.

Ӏ҆рмо́съ: На ка́мени мѧ̀ вѣ́ры ѹ҆тверди́въ, разшири́лъ є҆сѝ ѹ҆ста̀ моѧ̑ на врагѝ моѧ̑, возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть првⷣнъ, па́че тебѐ гдⷭ҇и.

И҆сцѣлѝ стрꙋ́пы дꙋшѝ моеѧ̀, ѹ҆́мъ мо́й ѡ҆мраче́нный небреже́нӏ̈емъ, ѡ҆зарѝ бж҃е́ственнымъ твои́мъ хода́тайствомъ гдⷭ҇ень прⷣте́че: и҆ всѧ́кагѡ и҆зба́ви мѧ̀ сопроти́внагѡ ѡ҆бстоѧ́нӏ̈ѧ, молю́сѧ.

Непло́дствӏ̈е разрѣши́лъ є҆сѝ ро́ждшӏ̈ѧ, роди́всѧ бж҃ӏ̈имъ промышле́нӏ̈емъ премꙋ́дре прⷪ҇ро́че: непло́дное ѹ҆́бѡ се́рдце моѐ плодоно́сно ны́нѣ содѣ́лай гдⷭ҇ень прⷣте́че хода́тайствомъ твои́мъ, добродѣ́телей приноси́ти прозѧбє́нӏ̈ѧ.

Сла́ва: И҆́же любо́вӏ̈ю твое́ю созида́ющаго бж҃е́ственный до́мъ, вы́шнѧгѡ житӏ̈ѧ̀ ѹ҆лꙋчи́ти молѝ, вѣ́рою хра́мꙋ твоемꙋ̀ слꙋжа́щыѧ, хра́мы дх҃а бж҃е́ственнагѡ сотворѝ, крⷭ҇ти́телю и҆ прⷣте́че, хода́тайствы твои́ми.

И҆ ны́нѣ: Веселѧ́шесѧ прⷣте́ча въ ложесна́хъ носи́мь мт҃рнихъ, и҆ покланѧ́шесѧ гдⷭ҇ꙋ носи́мꙋ въ ложесна́хъ твои́хъ бг҃обл҃года́тнаѧ, є҆го́же молѝ ѿ всѧ́кӏ̈ѧ ско́рби и҆зба́вити мѧ̀.

Сѣда́ленъ, гла́съ в҃.

Бл҃гоꙋтро́бӏ̈ѧ ра́ди млⷭ҇ти бл҃же, сп҃стѝ твоѐ созда́нӏ̈е хрⷭ҇тѐ прише́лъ є҆сѝ, прекло́нь нб҃са̀ схожде́нӏ̈емъ твои́мъ. тѣ́мже, стра́шное смотре́нӏ̈е твоѐ пою́ще, вопӏ̈е́мъ тѝ: мольба́ми прⷣте́чи твоегѡ̀, ѡ҆чище́нӏ̈е грѣхѡ́въ пода́ждь на́мъ, ꙗ҆́кѡ є҆ди́нъ бл҃гоꙋтро́бенъ.

Сла́ва, и҆ ны́нѣ:

Бг҃оро́диченъ: Предста́тельнице те́плаѧ хрⷭ҇тӏ̈а́нѡмъ, сн҃ꙋ твоемꙋ̀ моли́сѧ при́снѡ бцⷣе, всѧ́кагѡ sлодѣ́йства и҆ ѡ҆горче́нӏ̈ѧ и҆зба́вити на́съ борца̀, и҆ да́ти на́мъ проще́нӏ̈е, въ ни́хже согрѣши́хомъ, за млⷭ҇рдӏ̈е щедро́тъ, твои́ми мл҃твами мт҃и дв҃о.

Пѣ́снь д҃.

Ӏ҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.

Прекло́ньшемꙋ нб҃са̀, и҆ человѣ́кѡмъ бесѣ́довавшꙋ, главꙋ̀ преклони́лъ є҆сѝ, десни́цею твое́ю пребога́те: є҆́юже мѧ̀ соблюдѝ, во смире́нӏ̈и сохранѧ́ѧ се́рдце моѐ.

Пꙋсты́нѧ тебѐ граждани́на непрохо́днаѧ и҆мѧ́ше, бл҃же́нне прⷣте́че. тѣ́мже вопӏ̈ю́ ти: пꙋ́стꙋ всѧ́кагѡ бж҃е́ственнагѡ дѣѧ́нӏ̈ѧ бы́вшꙋ, дꙋ́шꙋ мою̀ снабдѝ.

Зако́нъ бж҃е́ственный ѹ҆правлѧ́ѧ, беззако́ннѡ закла́нъ бы́лъ є҆сѝ. тѣ́мже молю́сѧ тебѣ̀, беззако́ннꙋюща мѧ̀ всегда̀, и҆ прельща́ема бѣсо́вскими прельще́ньми и҆спра́ви.

Сла́ва: Созда́въ са́мъ себѐ хра́мъ влⷣцѣ цр҃ю̀, къ бж҃е́ствєннымъ селе́нӏ̈ємъ ны́нѣ преше́лъ є҆сѝ прⷣте́че: и҆́хже полꙋчи́ти молѝ тебѣ̀ прест҃ы́й до́мъ воздви́гшаго.

И҆ ны́нѣ: При́зри на мѧ̀ недꙋ́гꙋющаго всенепоро́чнаѧ, и҆ разрѣшѝ стра̑сти моѧ̑ лю̑тыѧ, и҆ неꙋдо́бь и҆сцѣ̑льныѧ: ꙗ҆́кѡ да велича́ю тѧ̀, возвели́чившꙋю всѐ человѣ́чество.

Пѣ́снь є҃.

Ӏ҆рмо́съ: Просвѣще́нӏ̈е во тьмѣ̀ лежа́щихъ, сп҃се́нӏ̈е ѿча́ѧнныхъ, хрⷭ҇тѐ сп҃се мо́й, къ тебѣ̀ ѹ҆́тренюю цр҃ю̀ ми́ра, просвѣти́ мѧ сӏ̈ѧ́нӏ̈емъ твои́мъ: и҆но́гѡ бо ра́звѣ тебѐ бг҃а не зна́ю.

Въ тече́нӏ̈ихъ ӏ҆҆ѻрда́нскихъ, стрꙋю̀ нетлѣ́нӏ̈ѧ прⷣте́че, крⷭ҇ти́въ хрⷭ҇та̀, молѝ и҆стека̑нӏ̈ѧ страсте́й мои́хъ и҆зсꙋши́ти, и҆ пото́ки сла́дѡстныѧ наслѣ́довати, и҆ првⷣныхъ кра́снагѡ ра́дованӏ̈ѧ.

Ѹ҆жѐ рыда́ю и҆ содрога́юсѧ, стра́хомъ и҆ недоꙋмѣ́нӏ̈емъ всегда̀ содержи́мь є҆́смь, помышлѧ́ѧ моѧ̑ содѣ̑ѧннаѧ, и҆ бꙋ́дꙋщӏ̈й сꙋ́дъ ѹ҆жа́сный. бл҃гоꙋтро́бне гдⷭ҇и, пощади́ мѧ, твоегѡ̀ крⷭ҇ти́телѧ мольба́ми.

Законополага́ѧй лю́демъ сп҃се́нӏ̈е въ раска́ѧнӏ̈и, прⷣте́че, прегрѣше́нӏ̈й бы́вшее, посредѣ̀ зако́на и҆ бл҃года́ти ста́лъ є҆сѝ. сегѡ̀ ра́ди мо́лимъ тѧ̀, ѡ҆бразмѝ покаѧ́нӏ̈ѧ на́съ просвѣтѝ.

Сла́ва: Да́ждь мѝ вре́мѧ покаѧ́нӏ̈ѧ, ѹ҆ны́ннѡ преше́дшее, всѐ и҆жди́вшемꙋ, бл҃годѣ́телю, и҆мѣ́ѧ на сӏ̈ѐ молѧ́щаго тѧ̀, сло́ве, ӏ҆ѡа́нна вели́каго прⷣте́чꙋ, и҆ покаѧ́нӏ̈ю всемӏ́рнаго проповѣ́дника.

И҆ ны́нѣ: Навѣ́ты и҆ ловлє́нӏ̈и льсти́вагѡ ѹ҆мертви́хсѧ, влⷣчце всенепоро́чнаѧ ѡ҆живи́ мѧ, ꙗ҆́же ро́ждшаѧ живо́тъ всѣ́хъ бцⷣе ѵ҆поста́сный, да тѧ̀ пою̀ бл҃гоче́стнѡ всенепоро́чнꙋю.

Пѣ́снь ѕ҃.

Ӏ҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдӏ̈ѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.

Гла́съ сло́ва проповѣ́давый, всѣ́хъ гла́сы воспрӏ̈е́мъ, просѝ грѣхѡ́въ проще́нӏ̈е дарова́ти, и҆̀же вѣ́рою пою́щымъ тѧ̀.

Сокрꙋше́нӏ̈е дꙋшѝ моеѧ̀ и҆сцѣлѝ, и҆ грѣхѡ́въ бре́мѧ разрѣшѝ, и҆ па́че наде́жди сп҃си́ мѧ, мл҃твами твои́ми бл҃же́нне прⷣте́че.

Сла́ва: И҆ ны́нѣ: Ӏ҆и҃са, є҆го́же рꙋко́ю твое́ю крⷭ҇ти́лъ є҆сѝ прⷣте́че, молѝ, рꙋки́ мѧ и҆зба́вити грѣха̀, взима́юща къ немꙋ̀ рꙋ́цѣ при́снѡ всесла́вне.

И҆ ны́нѣ: Дрема́нӏ̈емъ лѣ́ностнымъ ѡ҆держи́мь є҆́смь, со́нъ грѣхо́вный тѧготи́тъ се́рдце моѐ: твои́мъ пречⷭ҇таѧ, бдѣ́ннымъ хода́тайствомъ воздви́гни и҆ сп҃си́ мѧ.

Конда́къ, гла́съ г҃.

Пре́жде непло́ды дне́сь хрⷭ҇то́ва прⷣте́чꙋ ражда́етъ, и҆ то́й є҆́сть и҆сполне́нӏ̈е всѧ́кагѡ проро́чества: є҆го́же бо прⷪ҇ро́цы проповѣ́даша, на сего̀ во ӏ҆ѻрда́нѣ рꙋ́кꙋ положи́въ, ꙗ҆ви́сѧ бж҃ӏ̈ѧ сло́ва прⷪ҇ро́къ и҆ проповѣ́дникъ, вкꙋ́пѣ и҆ прⷣте́ча.

Ӏ҆́косъ:

Восхва́лимъ ны́нѣ гдⷭ҇нѧ прⷣте́чꙋ, є҆го́же сщ҃е́нникꙋ є҆лӏ̈саве́тъ родѝ, и҆з̾ ложе́снъ непло́дныхъ, но не без̾ сѣ́мене: хрⷭ҇то́съ бо є҆ди́нъ вмѣсти́лище про́йде непроходи́мо без̾ сѣ́мене. ӏ҆ѡа́нна непло́ды родѝ, без̾ мꙋ́жа же сего̀ не родѝ: ӏ҆и҃са же, ѡ҆сѣне́нӏ̈емъ ѻ҆ц҃а̀ и҆ дх҃а бж҃ӏ̈ѧ, дв҃а родѝ чⷭ҇таѧ. но безсѣ́менномꙋ ꙗ҆ви́сѧ ѿ непло́дове прⷪ҇ро́къ и҆ проповѣ́дникъ, вкꙋ́пѣ и҆ прⷣте́ча.

Пѣ́снь з҃.

Ӏ҆рмо́съ: Бг҃опроти́вное велѣ́нӏ̈е беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

И҆з̾ ко́рене сѣки́рою твоегѡ̀ покаѧ́нӏ̈ѧ и҆сто́ргъ ꙗ҆́звы стра́стнагѡ се́рдца моегѡ̀, всадѝ прⷣте́че бж҃е́ственное безстра́стӏ̈е, и҆ стра́хъ чⷭ҇тѣ́йшӏ̈й бж҃ӏ̈й, всѧ́кӏ̈ѧ sло́бы ѿчꙋжда́ющӏ̈й мѧ̀.

Во стрꙋѧ́хъ ӏ҆ѻрда́нскихъ ꙗ҆́кѡ крⷭ҇ти́лъ є҆сѝ покрыва́ющаго вода́ми превы́спрєннѧѧ гдⷭ҇а, того̀ молѝ, во́дꙋ дарова́ти бж҃е́ственнагѡ ѹ҆миле́нӏ̈ѧ при́снѡ ѻ҆чи́ма мои́ма, сла́вный прⷣте́че.

Сла́ва: И҆́же мӏ́рꙋ взе́млющаго грѣ́хъ, а҆́гнца бж҃ӏ̈ѧ прⷣте́че проповѣ́давъ, того̀ молѝ ѿ ко́злищъ ча́сти ꙗ҆ви́ти мѧ̀ чꙋ́жда, и҆ десны̑мъ є҆гѡ̀ ѻ҆вца́мъ и҆ менѐ сочета́ти, сла́вне.

И҆ ны́нѣ: Непло́днаѧ ѹ҆тро́ба носѧ́ше тѧ̀ дв҃о, во чре́вѣ носи́вшꙋю сло́во воплоще́нно: є҆го́же бж҃е́ственными взыгра́нӏ̈и, вели́кӏ̈й прⷣте́ча, непло́дныѧ всест҃ы́й пло́дъ, позна̀ ра́дꙋѧсѧ, и҆ поклони́сѧ.

Пѣ́снь и҃.

Ӏ҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃ӏ̈имъ велѣ́нӏ̈емъ халдє́и ѡ҆палѧ́ющаѧ: вѣ̑рныѧ же ѡ҆роша́ющаѧ, пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.

Да́ждь десни́цꙋ мнѣ̀ на землѝ лежа́щемꙋ, прⷣте́че, и҆́же десни́цꙋ просте́ръ, и҆ ѡ҆мы́лъ є҆сѝ вода́ми нескве́рнаго: и҆ и҆зба́ви мѧ̀ скве́рны тѣле́сныѧ, всего́ мѧ ѡ҆чища́ѧ покаѧ́нӏ̈емъ, и҆ сп҃си́ мѧ.

И҆мꙋ́щи дꙋшѐ вре́мѧ пока́ѧтисѧ, лѣ́ности тѧжча́йшӏ̈й со́нъ ѿтрѧсѝ, и҆ спѣ́шнѡ побдѝ, вопӏ̈ю́щи влⷣцѣ твоемꙋ̀: млⷭ҇рде, ѹ҆ще́дри мѧ̀ крⷭ҇ти́телѧ твоегѡ̀ мольба́ми.

Пото́цы страсте́й, и҆ во́ды sло́бы до дꙋшѝ моеѧ̀ внидо́ша: бл҃же́нне прⷣте́че, потщи́сѧ ско́рѡ и҆з̾ѧ́ти мѧ̀, и҆́же рѣчны́ми стрꙋѧ́ми и҆змы́въ безстра́стӏ̈ѧ тиша́йшꙋю пꙋчи́нꙋ.

Сла́ва: Ѹ҆вы̀ мнѣ̀, мнѡ́га sла̑ сотво́ршемꙋ! ѹ҆вы̀ мнѣ̀ є҆ди́номꙋ, прогнѣ́вавшемꙋ бг҃а пребл҃га́го! крⷭ҇ти́телю хрⷭ҇то́въ помозѝ мѝ, и҆ пода́ждь прегрѣше́нӏ̈й мои́хъ разрѣше́нӏ̈е, и҆ долгѡ́въ мои́хъ ѿсѣче́нӏ̈е, хода́тайствы твои́ми.

И҆ ны́нѣ: Вы́шнѧго бг҃а пло́тӏ̈ю ро́ждшаѧ, ѿ гно́ѧ мѧ̀ возста́ви страсте́й ѡ҆скорблѧ́ющихъ мѧ̀: и҆ лю́тѣ всего̀ ѡ҆бнища́вша, бж҃е́ственными ѡ҆богатѝ пречⷭ҇таѧ, добродѣ́тельми, ꙗ҆́кѡ да воспою́ тѧ сп҃са́емь.

Пѣ́снь ѳ҃.

Ӏ҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Ка́ла мѧ̀ и҆зба́ви грѣхо́внагѡ гдⷭ҇и, безгрѣ́шне є҆ди́не и҆ многомлⷭ҇тиве, крⷭ҇ти́телѧ мольба́ми, и҆́же тебѐ проповѣ́да всемꙋ̀ мӏ́рꙋ а҆́гнца бж҃ӏ̈ѧ, взе́млющаго человѣ́кѡвъ грѣхѝ.

Ꙗ҆́кѡ ши́покъ бл҃гово́ненъ, ꙗ҆́кѡ бл҃гоꙋха́нный кѷпарӏ́съ, ꙗ҆́кѡ неꙋвѧда́емый крӏ́нъ, ꙗ҆́кѡ мѵ́ро че́стно и҆мѣ́ѧй тѧ̀ гдⷭ҇ень прⷣте́че, мои́хъ дѣ́лъ sлосмра́дӏ̈ѧ и҆збавлѧ́юсѧ мл҃твами твои́ми, притека́ѧ къ покро́вꙋ твоемꙋ̀.

Непло́дствовати мѧ̀ непло́дными дѣ́лы всебл҃же́нне сотворѝ, добродѣ́телей бл҃гопло́дӏ̈е при́снѡ приносѧ́ща, ча́до мѧ̀ гдⷭ҇не творѧ̀, и҆ прича́стника бж҃е́ственномꙋ црⷭ҇твӏ̈ю, и҆ ст҃ы́хъ собо́рꙋ кꙋпножи́телѧ.

Сла́ва: На́мъ лю́бѧщымъ тѧ̀, и҆ любо́вӏ̈ю почита́ющымъ, и҆ въ бж҃е́ственнѣмъ хра́мѣ твое́мъ ликꙋ́ющымъ, да́ждь съ нб҃сѐ разрѣше́нӏ̈е лю́тыхъ, прⷣте́че гдⷭ҇ень, и҆ житӏ̈ѧ̀ и҆справле́нӏ̈е, и҆ прегрѣше́нӏ̈й и҆збавле́нӏ̈е.

И҆ ны́нѣ: Носи́мꙋ во ѹ҆тро́бѣ бг҃омт҃рни, и҆́же всѧ̑ носѧ́щемꙋ ма́нӏ̈емъ, поклони́лсѧ є҆сѝ прⷪ҇ро́че: съ не́юже молѝ смире́ннѣй сп҃сти́сѧ дꙋшѝ мое́й, во мнѡ́гаѧ впа́дающей по всѧ̑ дни̑ согрѣшє́нӏ̈ѧ.

А҆КА́ФӀ̈СТЪ Ӏ҆И҃СꙊ СЛАДЧА́ЙШЄМꙊ

Конда́къ а҃, гла́съ и҃:

Возбра́нный воево́до и҆ гдⷭ҇и, а҆́да побѣди́телю, ꙗ҆́кѡ и҆зба́вльсѧ ѿ вѣ́чныѧ сме́рти, похва̑льнаѧ восписꙋ́ю тѝ, созда́нӏ̈е и҆ ра́бъ тво́й: но ꙗ҆́кѡ и҆мѣ́ѧй млⷭ҇рдӏ̈е неизрече́нное, ѿ всѧ́кихъ мѧ̀ бѣ́дъ свободѝ, зовꙋ́ща: Ӏ҆и҃се сн҃е бж҃ӏ̈й, поми́лꙋй мѧ̀.

Ӏ҆́косъ а҃.

А҆́гг҃лѡвъ тво́рче, и҆ гдⷭ҇и си́лъ, ѿве́рзи мѝ недоꙋмѣ́нный ѹ҆́мъ и҆ ѧ҆зы́къ, на похвалꙋ̀ пречⷭ҇тагѡ твоегѡ̀ и҆́мене, ꙗ҆́коже глꙋхо́мꙋ и҆ гꙋгни́вомꙋ дре́вле слꙋ́хъ и҆ ѧ҆зы́къ ѿве́рзлъ є҆сѝ, и҆ глаго́лаше зовы́й такѡва́ѧ:

Ӏ҆и҃се пречꙋ́дный, а҆́гг҃лѡвъ ѹ҆дивле́нӏ̈е:
ӏ҆и҃се преси́льный, прароди́телей и҆збавле́нӏ̈е.

Ӏ҆и҃се пресла́дкӏ̈й, патрӏ̈а́рхѡвъ велича́нӏ̈е:
ӏ҆и҃се пресла́вный, царе́й ѹ҆крѣпле́нӏ̈е.

Ӏ҆и҃се прелюби́мый, прⷪ҇ро́кѡвъ и҆сполне́нӏ̈е:
ӏ҆и҃се преди́вный, мч҃нкѡвъ крѣ́посте.

Ӏ҆и҃се прети́хӏ̈й, мона́хѡвъ ра́досте:
ӏ҆и҃се премлⷭ҇тивый, пресвѵ́терѡвъ сла́досте.

Ӏ҆и҃се премлⷭ҇рдый, по́стникѡвъ воздержа́нӏ̈е:
ӏ҆и҃се пресла́достный, прпⷣбныхъ ра́дованӏ̈е.

Ӏ҆и҃се пречⷭ҇тны́й, дѣ́вственныхъ цѣломꙋ́дрӏ̈е:
ӏ҆и҃се предвѣ́чный, грѣ́шникѡвъ сп҃се́нӏ̈е.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ в҃.

Ви́дѧ вдови́цꙋ ѕѣ́льнѣ пла́чꙋщꙋ, гдⷭ҇и, ꙗ҆́коже бо тогда̀ ѹ҆млⷭ҇рдивсѧ, сы́на є҆ѧ̀ на погребе́нӏ̈е несо́ма воскр҃си́лъ є҆сѝ: си́це и҆ ѡ҆ мнѣ̀ ѹ҆млⷭ҇рдисѧ, чл҃вѣколю́бче, и҆ грѣхмѝ ѹ҆мерщвле́ннꙋю мою̀ дꙋ́шꙋ воскр҃сѝ, зовꙋ́щꙋю: А҆ллилꙋ́ӏ̈а.

Ӏ҆́косъ в҃.

Ра́зꙋмъ неꙋразꙋмѣ́нный разꙋмѣ́ти фӏ̈лӏ́ппъ и҆щѧ̀, гдⷭ҇и покажѝ на́мъ ѻ҆ц҃а̀, глаго́лаше. Ты́ же къ немꙋ̀: толи́кое вре́мѧ сы́й со мно́ю, не позна́лъ ли є҆сѝ, ꙗ҆́кѡ ѻ҆ц҃ъ во мнѣ̀, и҆ а҆́зъ во ѻ҆ц҃ѣ̀ є҆́смь; тѣ́мже, неизслѣ́дованне, со стра́хомъ зовꙋ́ ти:

Ӏ҆и҃се, бж҃е предвѣ́чный:
ӏ҆и҃се, цр҃ю̀ преси́льный.

Ӏ҆и҃се, влⷣко долготерпѣли́вый:
ӏ҆и҃се, сп҃се премлⷭ҇тивый.

Ӏ҆и҃се, храни́телю мо́й пребл҃гӏ́й:
ӏ҆и҃се, ѡ҆чи́сти грѣхѝ моѧ̑.

Ӏ҆и҃се, ѿимѝ беззакѡ́нӏ̈ѧ моѧ̑:
ӏ҆и҃се, ѿпꙋстѝ непра̑вды моѧ̑.

Ӏ҆и҃се, наде́ждо моѧ̀, не ѡ҆ста́ви менє̀:
ӏ҆и҃се, помо́щниче мо́й, не ѿри́ни менє̀.

Ӏ҆и҃се, созда́телю мо́й, не забꙋ́ди менє̀:
ӏ҆и҃се, па́стырю мо́й, не погꙋбѝ менє̀.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ г҃.

Си́лою свы́ше а҆пⷭ҇лы ѡ҆блекӏ́й, ӏ҆и҃се, во ӏ҆ерⷭ҇ли́мѣ сѣдѧ́щыѧ, ѡ҆блецы̀ и҆ менѐ ѡ҆бнаже́ннаго ѿ всѧ́кагѡ бл҃готворе́нӏ̈ѧ, теплото́ю дх҃а ст҃а́гѡ твоегѡ̀, и҆ да́ждь мѝ съ любо́вӏ̈ю пѣ́ти тебѣ̀: А҆ллилꙋ́ӏ̈а.

Ӏ҆́косъ г҃.

И҆мѣ́ѧй бога́тство млⷭ҇рдӏ̈ѧ, мытарѝ и҆ грѣ́шники, и҆ невѣ̑рныѧ призва́лъ є҆сѝ ӏ҆и҃се: не пре́зри и҆ менє̀ ны́нѣ, подо́бнагѡ и҆̀мъ, но ꙗ҆́кѡ многоцѣ́нное мѵ́ро, прӏ̈имѝ пѣ́снь сӏ̈ю̀:

Ӏ҆и҃се, си́ло непобѣди́маѧ:
ӏ҆и҃се, млⷭ҇те безконе́чнаѧ.

Ӏ҆и҃се, красото̀ пресвѣ́тлаѧ:
ӏ҆и҃се, любы̀ неизрече́ннаѧ.

Ӏ҆и҃се, сн҃е бг҃а жива́гѡ:
ӏ҆и҃се, поми́лꙋй мѧ̀ грѣ́шнаго.

Ӏ҆и҃се, ѹ҆слы́ши мѧ̀ въ беззако́нӏ̈ихъ зача́таго:
ӏ҆и҃се, ѡ҆чи́сти мѧ̀ во грѣсѣ́хъ рожде́ннаго.

Ӏ҆и҃се, наꙋчи́ мѧ непотре́бнаго:
ӏ҆и҃се, ѡ҆свѣти́ мѧ те́мнаго.

Ӏ҆и҃се, ѡ҆чи́сти мѧ̀ скве́рнаго:
ӏ҆и҃се, возведи́ мѧ блꙋ́днаго.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ д҃.

Бꙋ́рю внꙋ́трь и҆мѣ́ѧй помышле́нӏ̈й сꙋмни́тельныхъ, пе́тръ ѹ҆топа́ше: ѹ҆зрѣ́въ же во пло́ти тѧ̀ сꙋ́ща, ӏ҆и҃се, и҆ по вода́мъ ходѧ́ща, позна̀ тѧ̀ бг҃а и҆́стиннаго, и҆ рꙋ́кꙋ сп҃се́нӏ̈ѧ полꙋчи́въ, речѐ: А҆ллилꙋ́ӏ̈а.

Ӏ҆́косъ д҃.

Слы́ша слѣпы́й мимоходѧ́ща тѧ̀, гдⷭ҇и, пꙋте́мъ, вопӏ̈ѧ́ше: ӏ҆и҃се сн҃е дв҃довъ, поми́лꙋй мѧ̀: и҆ призва́въ ѿве́рзлъ є҆сѝ ѻ҆́чи є҆гѡ̀. Просвѣтѝ ѹ҆́бѡ млⷭ҇тӏ̈ю твое́ю ѻ҆́чи мы́слєнныѧ се́рдца и҆ менє̀, вопӏ̈ю́ща тѝ, и҆ глаго́люща:

Ӏ҆и҃се, вы́шнихъ созда́телю:
ӏ҆и҃се, ни́жнихъ и҆скꙋпи́телю.

Ӏ҆и҃се, преиспо́днихъ потреби́телю:
ӏ҆и҃се, всеѧ̀ тва́ри ѹ҆краси́телю.

Ӏ҆и҃се, дꙋшѝ моеѧ̀ ѹ҆тѣ́шителю:
ӏ҆и҃се, ѹ҆ма̀ моегѡ̀ просвѣти́телю.

Ӏ҆и҃се, се́рдца моегѡ̀ весе́лӏ̈е:
ӏ҆и҃се, тѣ́ла моегѡ̀ здра́вӏ̈е.

Ӏ҆и҃се сп҃се мо́й, сп҃си́ мѧ:
ӏ҆и҃се свѣ́те мо́й, просвѣти́ мѧ.

Ӏ҆и҃се, мꙋ́ки всѧ́кӏ̈ѧ и҆зба́ви мѧ̀:
ӏ҆и҃се, сп҃си́ мѧ недосто́йнаго.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ є҃.

Бг҃ото́чною кро́вӏ̈ю, ꙗ҆́коже и҆скꙋпи́лъ є҆сѝ на́съ дре́вле ѿ зако́нныѧ клѧ́твы ӏ҆и҃се, си́це и҆змѝ на́съ ѿ сѣ́ти, є҆́юже ѕмӏ́й запѧ́тъ ны̀ страстьмѝ плотски́ми, и҆ блꙋ́днымъ наважде́нӏ̈емъ, и҆ ѕлы́мъ ѹ҆ны́нӏ̈емъ, вопӏ̈ю́щыѧ тѝ: А҆ллилꙋ́ӏ̈а.

Ӏ҆́косъ є҃.

Ви́дѣвше ѻ҆́троцы є҆вре́йстӏ̈и во ѡ҆́бразѣ человѣ́честѣмъ созда́вшаго рꙋко́ю человѣ́ка, и҆ влⷣкꙋ разꙋмѣ́вше є҆го̀, потща́шасѧ вѣ́твьми ѹ҆годи́ти є҆мꙋ̀, ѡ҆са́нна вопӏ̈ю́ще. мы́ же пѣ́снь прино́симъ тѝ глаго́люще:

Ӏ҆и҃се, бж҃е и҆́стинный:
ӏ҆и҃се, сн҃е дв҃довъ.

Ӏ҆и҃се, цр҃ю̀ пресла́вный:
ӏ҆и҃се, а҆́гнче непоро́чный.

Ӏ҆и҃се, па́стырю преди́вный:
ӏ҆и҃се, храни́телю во мла́дости мое́й.

Ӏ҆и҃се, корми́телю во ю҆́ности мое́й:
ӏ҆и҃се, похвало̀ въ ста́рости мое́й.

Ӏ҆и҃се, наде́ждо въ сме́рти мое́й:
ӏ҆и҃се, животѐ по сме́рти мое́й.

Ӏ҆и҃се, ѹ҆тѣше́нӏ̈е моѐ на сꙋдѣ̀ твое́мъ:
ӏ҆и҃се, жела́нӏ̈е моѐ, не посрамѝ менє̀ тогда̀.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ ѕ҃.

Проповѣ̑дникъ бг҃оно́сныхъ вѣща́нӏ̈е и҆ глаго́лы и҆сполнѧ́ѧ ӏ҆и҃се, на землѝ ꙗ҆́вльсѧ, и҆ съ человѣ́ки невмѣсти́мый пожи́лъ є҆сѝ, и҆ болѣ̑зни на́шѧ под̾ѧ́лъ є҆сѝ. Ѿню́дꙋже ра́нами твои́ми мы̀ и҆сцѣлѣ́вше, пѣ́ти навыко́хомъ: А҆ллилꙋ́ӏ̈а.

Ӏ҆́косъ ѕ҃.

Возсӏ̈ѧ̀ вселе́ннѣй просвѣще́нӏ̈е и҆́стины твоеѧ̀, и҆ ѿгна́сѧ ле́сть бѣсо́вскаѧ: ӏ҆́дѡли бо, сп҃се на́шъ, не терпѧ́ще твоеѧ̀ крѣ́пости, падо́ша. Мы́ же сп҃се́нӏ̈е полꙋчи́вше, вопӏ̈е́мъ тѝ:

Ӏ҆и҃се, и҆́стино, ле́сть ѿгонѧ́щаѧ:
ӏ҆и҃се, свѣ́те превы́шшӏ̈й всѣ́хъ свѣ́тлостей.

Ӏ҆и҃се цр҃ю̀, премога́ѧй всѣ́хъ крѣ́пѡсти:
ӏ҆и҃се бж҃е, пребыва́ѧй въ млⷭ҇ти.

Ӏ҆и҃се, хлѣ́бе живо́тный, насы́ти мѧ̀ а҆́лчꙋщаго:
ӏ҆и҃се, и҆сто́чниче ра́зꙋма, напо́й мѧ̀ жа́ждꙋщаго.

Ӏ҆и҃се, ѡ҆де́ждо весе́лӏ̈ѧ, ѡ҆дѣ́й мѧ̀ тлѣ́ннаго:
ӏ҆и҃се, покро́ве ра́дости, покры́й мѧ̀ недосто́йнаго.

Ӏ҆и҃се, пода́телю просѧ́щымъ, да́ждь мѝ пла́чь за грѣхѝ моѧ̑:
ӏ҆и҃се, ѡ҆брѣ́тенӏ̈е и҆́щꙋщихъ, ѡ҆брѧ́щи дꙋ́шꙋ мою̀.

Ӏ҆и҃се, ѿве́рзителю толкꙋ́щымъ, ѿве́рзи се́рдце моѐ ѡ҆каѧ́нное:
ӏ҆и҃се, и҆скꙋпи́телю грѣ́шныхъ, ѡ҆чи́сти беззакѡ́нӏ̈ѧ моѧ̑.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ з҃.

Хотѧ̀ сокрове́ннꙋю та́йнꙋ ѿ вѣ́ка ѿкры́ти, ꙗ҆́кѡ ѻ҆вча̀ на заколе́нӏ̈е веде́нъ бы́лъ є҆сѝ, ӏ҆и҃се, и҆ ꙗ҆́кѡ а҆́гнецъ прѧ́мѡ стригꙋ́щагѡ є҆го̀ безгла́сенъ, и҆ ꙗ҆́кѡ бг҃ъ и҆з̾ ме́ртвыхъ воскрⷭ҇лъ є҆сѝ, и҆ со сла́вою на нб҃са̀ возне́слсѧ є҆сѝ, и҆ на́съ совоздви́глъ є҆сѝ, зовꙋ́щихъ: А҆ллилꙋ́ӏ̈а.

Ӏ҆́косъ з҃.

Ди́внꙋю показа̀ тва́рь ꙗ҆вле́йсѧ творе́цъ на́мъ: без̾ сѣ́мене ѿ дв҃ы воплоти́сѧ, и҆з̾ гро́ба печа́ти не рꙋши́въ воскр҃се, и҆ ко а҆пⷭ҇лѡмъ две́ремъ затворє́ннымъ съ пло́тӏ̈ю вни́де. Тѣ́мже чꙋдѧ́щесѧ, воспои́мъ:

Ӏ҆и҃се, сло́ве неѡб̾име́нный:
ӏ҆и҃се, сло́ве несоглѧда́емый.

Ӏ҆и҃се, си́ло непостижи́маѧ:
ӏ҆и҃се, мꙋ́дросте недомы́слимаѧ.

Ӏ҆и҃се, бж҃ество̀ неѡпи́санное:
ӏ҆и҃се, гдⷭ҇ьство неисче́тное.

Ӏ҆и҃се, црⷭ҇тво непобѣди́мое:
ӏ҆и҃се, влⷣчество безконе́чное.

Ӏ҆и҃се, крѣ́посте высоча́йшаѧ:
ӏ҆и҃се, вла́сте вѣ́чнаѧ.

Ӏ҆и҃се, тво́рче мо́й, ѹ҆ще́дри мѧ̀:
ӏ҆и҃се, сп҃се мо́й, сп҃си́ мѧ.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ и҃.

Стра́ннѡ бг҃а вочл҃вѣ́чшасѧ ви́дѧще, ѹ҆страни́мсѧ сꙋ́етнагѡ мӏ́ра, и҆ ѹ҆́мъ на бжⷭ҇твєннаѧ возложи́мъ: сегѡ́ бо ра́ди бг҃ъ на зе́млю сни́де, да на́съ на нб҃са̀ возведе́тъ, вопӏ̈ю́щихъ є҆мꙋ̀: А҆ллилꙋ́ӏ̈а.

Ӏ҆́косъ и҃.

Ве́сь бѣ̀ въ ни́жнихъ, и҆ вы́шнихъ ника́коже ѿстꙋпѝ неисче́тный, є҆гда̀ во́лею на́съ ра́ди пострада̀, и҆ сме́ртӏ̈ю свое́ю на́шꙋ сме́рть ѹ҆мертвѝ, и҆ воскрⷭ҇нӏ̈емъ живо́тъ дарова̀, пою́щымъ:

Ӏ҆и҃се, сла́досте серде́чнаѧ:
Ӏ҆и҃се, крѣ́посте тѣле́снаѧ.

Ӏ҆и҃се, свѣ́тлосте дꙋше́внаѧ:
Ӏ҆и҃се, быстрото̀ ѹ҆́мнаѧ.

Ӏ҆и҃се, ра́досте со́вѣстнаѧ:
Ӏ҆и҃се, наде́ждо и҆звѣ́стнаѧ.

Ӏ҆и҃се, па́мѧте предвѣ́чнаѧ:
Ӏ҆и҃се, похвало̀ высо́каѧ.

Ӏ҆и҃се, сла́во моѧ̀ превознесе́ннаѧ:
Ӏ҆и҃се, жела́нӏ̈е моѐ, не ѿри́ни менє̀.

Ӏ҆и҃се, па́стырю мо́й, взыщѝ менѐ:
Ӏ҆и҃се, сп҃се мо́й, сп҃сѝ менѐ.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ ѳ҃.

Всѐ є҆стество̀ а҆́гг҃льское безпреста́ни сла́витъ прест҃о́е и҆́мѧ твоѐ, ӏ҆и҃се, на нб҃сѝ, ст҃ъ, ст҃ъ, ст҃ъ, вопӏ̈ю́ще: мы́ же грѣ́шнӏ̈и на землѝ бре́нными ѹ҆стна́ми вопӏ̈е́мъ: А҆ллилꙋ́ӏ̈а.

Ӏ҆́косъ ѳ҃.

Вѣтӏ̑ѧ многовѣща̑нныѧ, ꙗ҆́коже ры̑бы безгла̑сныѧ ви́димъ ѡ҆ тебѣ̀, ӏ҆и҃се сп҃се на́шъ: недоꙋмѣ́ютъ бо глаго́лати, ка́кѡ бг҃ъ непрело́жный, и҆ чл҃вѣ́къ соверше́нный пребыва́еши; мы́ же та́инствꙋ дивѧ́щесѧ, вопӏ̈е́мъ вѣ́рнѡ:

Ӏ҆и҃се, бж҃е предвѣ́чный:
ӏ҆и҃се, цр҃ю̀ ца́рствꙋющихъ.

Ӏ҆и҃се, влⷣко владѣ́ющихъ:
ӏ҆и҃се, сꙋдӏ̈ѐ живы́хъ и҆ ме́ртвыхъ.

Ӏ҆и҃се, наде́ждо ненаде́жныхъ:
ӏ҆и҃се, ѹ҆тѣше́нӏ̈е пла́чꙋщихъ.

Ӏ҆и҃се, сла́во ни́щихъ:
ӏ҆и҃се, не ѡ҆сꙋди́ мѧ по дѣлѡ́мъ мои̑мъ.

Ӏ҆и҃се, ѡ҆чи́сти мѧ̀ по млⷭ҇ти твое́й:
ӏ҆и҃се, ѿженѝ ѿ менє̀ ѹ҆ны́нӏ̈е.

Ӏ҆и҃се, просвѣтѝ моѧ̑ мы̑сли сердє́чныѧ:
ӏ҆и҃се, да́ждь мѝ па́мѧть сме́ртнꙋю.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ ӏ҃.

Сп҃стѝ хотѧ̀ мӏ́ръ, восто́че восто́кѡмъ, къ те́мномꙋ за́падꙋ, є҆стествꙋ̀ на́шемꙋ прише́дъ, смири́лсѧ є҆сѝ до сме́рти: тѣ́мже превознесе́сѧ и҆́мѧ твоѐ па́че всѧ́кагѡ и҆́мене, и҆ ѿ всѣ́хъ колѣ́нъ нбⷭ҇ныхъ и҆ земны́хъ слы́шиши: А҆ллилꙋ́ӏ̈а.

Ӏ҆́косъ ӏ҃.

Цр҃ю̀ превѣ́чный, ѹ҆тѣ́шителю хрⷭ҇тѐ и҆́стинный, ѡ҆чи́сти ны̀ ѿ всѧ́кӏ̈ѧ скве́рны, ꙗ҆́коже ѡ҆чи́стилъ є҆сѝ де́сѧть прокаже́нныхъ: и҆ и҆сцѣли́ ны, ꙗ҆́коже и҆сцѣли́лъ є҆сѝ сребролюби́вꙋю дꙋ́шꙋ закхе́а мытарѧ̀, да вопӏ̈е́мъ тѝ во ѹ҆миле́нӏ̈и, зовꙋ́ще:

Ӏ҆и҃се, сокро́вище нетлѣ́нное:
ӏ҆и҃се, бога́тство неистощи́мое.

Ӏ҆и҃се, пи́ще крѣ́пкаѧ:
ӏ҆и҃се, питӏ̈ѐ неисчерпа́емое.

Ӏ҆и҃се, ни́щихъ ѡ҆дѣѧ́нӏ̈е:
ӏ҆и҃се, вдѡ́въ застꙋпле́нӏ̈е.

Ӏ҆и҃се, си́рыхъ защи́тниче:
ӏ҆и҃се, трꙋжда́ющихсѧ по́моще.

Ӏ҆и҃се, стра́нныхъ наста́вниче:
ӏ҆и҃се, пла́вающихъ ко́рмчӏ̈й.

Ӏ҆и҃се, бꙋ́рныхъ ѡ҆ти́шӏ̈е:
ӏ҆и҃се бж҃е, воздви́гни мѧ̀ па́дшаго.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ а҃ӏ.

Пѣ́нӏ̈е всеꙋмиле́нное приношꙋ́ ти недосто́йный, вопӏ̈ю́ ти ꙗ҆́кѡ ханане́а: ӏ҆и҃се, поми́лꙋй мѧ̀: не дще́рь бо, но пло́ть и҆́мамъ страстьмѝ лю́тѣ бѣсѧ́щꙋюсѧ, и҆ ꙗ҆́ростӏ̈ю пали́мꙋю, и҆ и҆сцѣле́нӏ̈е да́ждь вопӏ̈ю́щꙋ тѝ: А҆ллилꙋ́ӏ̈а.

Ӏ҆́косъ а҃ӏ.

Свѣтопода́тельна свѣти́льника сꙋ́щымъ во тьмѣ̀ неразꙋ́мӏ̈ѧ, пре́жде гонѧ́й тѧ̀ па́ѵелъ, бг҃оразꙋ́мнагѡ гла́са си́лꙋ внꙋшѝ, и҆ дꙋше́внꙋю быстротꙋ̀ ѹ҆ѧснѝ: си́це и҆ менє̀ тє́мныѧ зѣ̑ницы дꙋшє́вныѧ просвѣтѝ, зовꙋ́ща:

Ӏ҆и҃се, цр҃ю̀ мо́й прекрѣ́пкӏ̈й:
ӏ҆и҃се, бж҃е мо́й преси́льный.

Ӏ҆и҃се, гдⷭ҇и мо́й пребезсме́ртный:
ӏ҆и҃се, созда́телю мо́й пресла́вный.

Ӏ҆и҃се, наста́вниче мо́й предо́брый:
ӏ҆и҃се, па́стырю мо́й преще́дрый.

Ӏ҆и҃се, влⷣко мо́й премлⷭ҇тивый:
ӏ҆и҃се, сп҃се мо́й премлⷭ҇рдый.

Ӏ҆и҃се, просвѣтѝ моѧ̑ чꙋ̑вствӏ̈ѧ потемнє́ннаѧ страстьмѝ:
ӏ҆и҃се, и҆сцѣлѝ моѐ тѣ́ло ѡ҆стрꙋпле́нное грѣхмѝ.

Ӏ҆и҃се, ѡ҆чи́сти мо́й ѹ҆́мъ ѿ по́мыслѡвъ сꙋ́етныхъ:
ӏ҆и҃се, сохранѝ се́рдце моѐ ѿ по́хотей лꙋка́выхъ.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ в҃ӏ.

Бл҃года́ть пода́ждь мѝ, всѣ́хъ долгѡ́въ рѣши́телю, ӏ҆и҃се, и҆ прӏ̈ими́ мѧ ка́ющасѧ, ꙗ҆́коже прӏ̈ѧ́лъ є҆сѝ петра̀ ѿве́ргшагосѧ тебє̀, и҆ призови́ мѧ ѹ҆ныва́ющаго, ꙗ҆́коже дре́вле па́ѵла гонѧ́ща тѧ̀, и҆ ѹ҆слы́ши мѧ̀ вопӏ̈ю́ща тѝ: А҆ллилꙋ́ӏ̈а.

Ӏ҆́косъ в҃ӏ.

Пою́ще твоѐ вочл҃вѣ́ченӏ̈е, восхвалѧ́емъ тѧ̀ всѝ, и҆ вѣ́рꙋемъ со ѳѡмо́ю, ꙗ҆́кѡ гдⷭ҇ь и҆ бг҃ъ є҆сѝ, сѣдѧ́й со ѻ҆ц҃е́мъ, и҆ хотѧ́й сꙋди́ти живы̑мъ и҆ мє́ртвымъ. Тогда̀ ѹ҆́бѡ сподо́би мѧ̀ десна́гѡ стоѧ́нӏ̈ѧ, вопӏ̈ю́щаго:

Ӏ҆и҃се, цр҃ю̀ предвѣ́чный, поми́лꙋй мѧ̀:
ӏ҆и҃се, цвѣ́те бл҃гово́нный, ѡ҆бл҃гоꙋха́й мѧ̀.

Ӏ҆и҃се, теплото̀ люби́маѧ, ѡ҆грѣ́й мѧ̀:
ӏ҆и҃се, хра́ме предвѣ́чный, покры́й мѧ̀.

Ӏ҆и҃се, ѻ҆де́ждо свѣ́тлаѧ, ѹ҆краси́ мѧ:
ӏ҆и҃се, би́сере чⷭ҇тны́й, ѡ҆сӏ̈ѧ́й мѧ̀.

Ӏ҆и҃се, ка́меню драгӏ́й, просвѣти́ мѧ:
ӏ҆и҃се, сл҃нце пра́вды, ѡ҆свѣти́ мѧ.

Ӏ҆и҃се, свѣ́те ст҃ы́й, ѡ҆блиста́й мѧ̀:
ӏ҆и҃се, болѣ́зни дꙋше́вныѧ и҆ тѣле́сныѧ и҆зба́ви мѧ̀.

Ӏ҆и҃се, и҆з̾ рꙋкѝ сопроти́вныѧ и҆зми́ мѧ:
ӏ҆и҃се, ѻ҆гнѧ̀ неꙋгаси́магѡ, и҆ про́чихъ вѣ́чныхъ мꙋ́къ свободи́ мѧ.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ г҃ӏ.

Ѽ пресла́дкӏ̈й и҆ всеще́дрый ӏ҆и҃се, прӏ̈имѝ ны́нѣ ма́лое моле́нӏ̈е сӏ̈ѐ на́ше, ꙗ҆́коже прӏ̈ѧ́лъ є҆сѝ вдови́цы двѣ̀ лє́птѣ, и҆ сохранѝ достоѧ́нӏ̈е твоѐ ѿ вра̑гъ ви́димыхъ и҆ неви́димыхъ, ѿ наше́ствӏ̈ѧ и҆ноплемє́нникъ, ѿ недꙋ́га и҆ гла́да, ѿ всѧ́кӏ̈ѧ ско́рби и҆ смертоно́сныѧ ра́ны, и҆ грѧдꙋ́щӏ̈ѧ и҆змѝ мꙋ́ки всѣ́хъ, вопӏ̈ю́щихъ тѝ: А҆ллилꙋ́ӏ̈а, а҆ллилꙋ́ӏ̈а, а҆ллилꙋ́ӏ̈а. Се́й конда́къ глаго́ли три́жды.

И҆ па́ки:

Ӏ҆́косъ а҃.

Ӏ҆и҃се пречꙋ́дный, а҆́гг҃лѡвъ ѹ҆дивле́нӏ̈е:
ӏ҆и҃се преси́льный, прароди́телей и҆збавле́нӏ̈е.

Ӏ҆и҃се пресла́дкӏ̈й, патрӏ̈а́рхѡвъ велича́нӏ̈е:
ӏ҆и҃се пресла́вный, царе́й ѹ҆крѣпле́нӏ̈е.

Ӏ҆и҃се прелюби́мый, прⷪ҇ро́кѡвъ и҆сполне́нӏ̈е:
ӏ҆и҃се преди́вный, мч҃нкѡвъ крѣ́посте.

Ӏ҆и҃се прети́хӏ̈й, мона́хѡвъ ра́досте:
ӏ҆и҃се премлⷭ҇тивый, пресвѵ́терѡвъ сла́досте.

Ӏ҆и҃се премлⷭ҇рдый, по́стникѡвъ воздержа́нӏ̈е:
ӏ҆и҃се пресла́достный, прпⷣбныхъ ра́дованӏ̈е.

Ӏ҆и҃се пречⷭ҇тны́й, дѣ́вственныхъ цѣломꙋ́дрӏ̈е:
ӏ҆и҃се предвѣ́чный, грѣ́шникѡвъ сп҃се́нӏ̈е.

Ӏ҆и҃се сн҃е бж҃ӏ̈й, поми́лꙋй мѧ̀.

Конда́къ а҃, гла́съ и҃:

Ӏ҆и҃се сн҃е бж҃ӏ̈й, поми́лꙋй мѧ̀.

Мл҃тва ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀:

Влⷣко гдⷭ҇и ӏ҆и҃се хрⷭ҇тѐ бж҃е мо́й, и҆́же неизрече́ннагѡ ра́ди твоегѡ̀ чл҃вѣколю́бӏ̈ѧ на коне́цъ вѣкѡ́въ во пло́ть ѡ҆болкӏ́йсѧ ѿ приснодв҃ы мр҃ӏ́и, сла́влю ѡ҆ мнѣ̀ твоѐ сп҃си́тельное промышле́нӏ̈е ра́бъ тво́й, влⷣко: пѣсносло́влю тѧ̀, ꙗ҆́кѡ тебє̀ ра́ди ѻ҆ц҃а̀ позна́хъ: бл҃гословлю̀ тѧ̀, є҆гѡ́же ра́ди и҆ дх҃ъ ст҃ы́й въ мӏ́ръ прӏ̈и́де: покланѧ́юсѧ твое́й по пло́ти пречⷭ҇тѣй мт҃ри, таковѣ́й стра́шнѣй та́йнѣ послꙋжи́вшей: восхвалѧ́ю твоѧ̑ а҆́гг҃льскаѧ ликостоѧ̑нӏ̈ѧ, ꙗ҆́кѡ воспѣва́тели и҆ слꙋжи́тели твоегѡ̀ вели́чествӏ̈ѧ: ѹ҆бл҃жа́ю прⷣте́чꙋ ӏ҆ѡа́нна, тебѐ крести́вшаго, гдⷭ҇и: почита́ю и҆ провозвѣсти́вшыѧ тѧ̀ прⷪ҇ро́ки: прославлѧ́ю а҆пⷭ҇лы твоѧ̑ ст҃ы̑ѧ: торжествꙋ́ю же и҆ мч҃нки, сщ҃е́нники же твоѧ̑ сла́влю: покланѧ́юсѧ прпⷣбнымъ твои̑мъ, и҆ всѧ̑ твоѧ̑ првⷣники пѣ́стꙋнствꙋю. Такова́го и҆ толи́кѡ мно́гаго и҆ неизрече́ннаго ли́ка бжⷭ҇твеннаго въ мл҃твꙋ привождꙋ̀ тебѣ̀ всеще́дромꙋ бг҃ꙋ ра́бъ тво́й, и҆ сегѡ̀ ра́ди прошꙋ̀ мои̑мъ согрѣше́нӏ̈ємъ проще́нӏ̈ѧ, є҆́же да́рꙋй мѝ всѣ́хъ твои́хъ ра́ди ст҃ы́хъ, и҆зрѧ́днѣе же ст҃ы́хъ твои́хъ щедро́тъ: ꙗ҆́кѡ бл҃гослове́нъ є҆сѝ во вѣ́ки. А҆ми́нь.

А҆КА́ФӀ̈СТЪ ПРЄСТ҃Ѣ́Й ВЛⷣЧЦѢ НА́ШЄЙ БЦⷣѢ.

Конда́къ а҃.

Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ, бцⷣе, но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: Ра́дꙋйсѧ, невѣ́сто неневѣ́стнаѧ.

Ӏ҆́косъ а҃.

А҆́гг҃лъ предста́тель съ нб҃сѐ по́сланъ бы́сть, рещѝ бцⷣѣ: ра́дꙋйсѧ! и҆ со безпло́тнымъ гла́сомъ воплоща́ема тѧ̀ зрѧ̀ гдⷭ҇и, ѹ҆жаса́шесѧ и҆ стоѧ́ше, зовы́й къ не́й такѡва́ѧ:

Ра́дꙋйсѧ, є҆́юже ра́дость возсӏ̈ѧ́етъ:
ра́дꙋйсѧ, є҆́юже клѧ́тва и҆сче́знетъ.

Ра́дꙋйсѧ, па́дшагѡ а҆да́ма воззва́нӏ̈е:
ра́дꙋйсѧ, сле́зъ є҆́ѵиныхъ и҆збавле́нӏ̈е.

Ра́дꙋйсѧ, высото̀ неꙋдобовосходи́маѧ человѣ́ческими по́мыслы:
ра́дꙋйсѧ, глꙋбино̀ неꙋдобозри́маѧ и҆ а҆́гг҃льскима ѻ҆чи́ма.

Ра́дꙋйсѧ, ꙗ҆́кѡ є҆сѝ цр҃е́во сѣда́лище:
ра́дꙋйсѧ, ꙗ҆́кѡ но́сиши носѧ́щаго всѧ̑.

Ра́дꙋйсѧ, ѕвѣздо̀ ꙗ҆влѧ́ющаѧ сл҃нце:
ра́дꙋйсѧ, ѹ҆тро́бо бжⷭ҇твеннагѡ воплоще́нӏ̈ѧ.

Ра́дꙋйсѧ, є҆́юже ѡ҆бновлѧ́етсѧ тва́рь:
ра́дꙋйсѧ, є҆́юже покланѧ́емсѧ творцꙋ̀.

Ра́дꙋйсѧ, невѣ́сто неневѣ́стнаѧ.

Конда́къ в҃.

Ви́дѧщи ст҃а́ѧ себѐ въ чⷭ҇тотѣ̀, глаго́летъ гаврӏ̈и́лꙋ де́рзостнѡ: пресла́вное твоегѡ̀ гла́са неꙋдобопрӏ̈ѧ́тельно дꙋшѝ мое́й ꙗ҆влѧ́етсѧ: безсѣ́меннагѡ бо зача́тӏ̈ѧ ржⷭ҇тво̀ ка́кѡ глаго́леши, зовы́й: А҆ллилꙋ́ӏ̈а.

Ӏ҆́косъ в҃.

Ра́зꙋмъ недоразꙋмѣва́емый разꙋмѣ́ти дв҃а и҆́щꙋщи, возопѝ къ слꙋжа́щемꙋ: и҆з̾ бокꙋ̀ чи̑стꙋ, сн҃ꙋ ка́кѡ є҆́сть роди́тисѧ мо́щно, рцы́ ми; къ не́йже ѻ҆́нъ речѐ со стра́хомъ, ѻ҆ба́че зовы́й си́це:

Ра́дꙋйсѧ, совѣ́та неизрече́ннагѡ таи́ннице:
ра́дꙋйсѧ, молча́нӏ̈ѧ просѧ́щихъ вѣ́ро.

Ра́дꙋйсѧ, чꙋде́съ хрⷭ҇то́выхъ нача́ло:
ра́дꙋйсѧ, велѣ́нӏ̈й є҆гѡ̀ глави́зно.

Ра́дꙋйсѧ, лѣ́ствице нбⷭ҇наѧ, є҆́юже сни́де бг҃ъ:
ра́дꙋйсѧ, мо́сте, преводѧ́й сꙋ́щихъ ѿ землѝ на нб҃о.

Ра́дꙋйсѧ, а҆́гг҃лѡвъ многословꙋ́щее чꙋ́до:
ра́дꙋйсѧ, бѣсѡ́въ многоплаче́вный стрꙋ́пе.

Ра́дꙋйсѧ, свѣ́тъ неизрече́ннѡ роди́вшаѧ:
ра́дꙋйсѧ, є҆́же ка́кѡ, ни є҆ди́нагѡ же наꙋчи́вшаѧ.

Ра́дꙋйсѧ, премꙋ́дрыхъ превосходѧ́щаѧ ра́зꙋмъ:
ра́дꙋйсѧ, вѣ́рныхъ ѡ҆зарѧ́ющаѧ смы́слы.

Ра́дꙋйсѧ, невѣ́сто неневѣ́стнаѧ.

Конда́къ г҃.

Си́ла вы́шнѧгѡ ѡ҆сѣнѝ тогда̀ къ зача́тӏ̈ю браконеискꙋ́снꙋю, и҆ бл҃гоплѡ́днаѧ тоѧ̀ ложесна̀, ꙗ҆́кѡ село̀ показа̀ сла́дкое всѣ̑мъ хотѧ́щымъ жа́ти сп҃се́нӏ̈е, внегда̀ пѣ́ти си́це: А҆ллилꙋ́ӏ̈а.

Ӏ҆́косъ г҃.

И҆мꙋ́щи бг҃опрӏ̈ѧ́тнꙋю дв҃а ѹ҆тро́бꙋ, востечѐ ко є҆лӏ̈саве́ти: младе́нецъ же ѻ҆́ноѧ а҆́бӏ̈е позна́въ сеѧ̀ цѣлова́нӏ̈е, ра́довашесѧ, и҆ и҆гра́ньми ꙗ҆́кѡ пѣ́сньми вопӏ̈ѧ́ше къ бцⷣѣ:

Ра́дꙋйсѧ, ѻ҆́трасли неꙋвѧда́емыѧ розго̀:
ра́дꙋйсѧ, плода̀ безсме́ртнагѡ стѧжа́нӏ̈е.

Ра́дꙋйсѧ, дѣ́лателѧ дѣ́лающаѧ чл҃вѣколю́бца:
ра́дꙋйсѧ, сади́телѧ жи́зни на́шеѧ ро́ждшаѧ.

Ра́дꙋйсѧ, ни́во, растѧ́щаѧ гобзова́нӏ̈е щедро́тъ:
ра́дꙋйсѧ, трапе́зо, носѧ́щаѧ ѻ҆би́лӏ̈е ѡ҆чище́нӏ̈й.

Ра́дꙋйсѧ, ꙗ҆́кѡ ра́й пи́щный процвѣта́еши:
ра́дꙋйсѧ, ꙗ҆́кѡ приста́нище дꙋша́мъ гото́виши.

Ра́дꙋйсѧ, прӏ̈ѧ́тное мл҃твы кади́ло:
ра́дꙋйсѧ, всегѡ̀ мӏ́ра ѡ҆чище́нӏ̈е.

Ра́дꙋйсѧ, бж҃ӏ̈е къ смє́ртнымъ бл҃говоле́нӏ̈е:
ра́дꙋйсѧ, сме́ртныхъ къ бг҃ꙋ дерзнове́нӏ̈е.

Ра́дꙋйсѧ, невѣ́сто неневѣ́стнаѧ.

Конда́къ д҃.

Бꙋ́рю внꙋ́трь и҆мѣ́ѧ помышле́нӏ̈й сꙋмни́тельныхъ, цѣломꙋ́дренный ӏ҆ѡ́сифъ смѧте́сѧ, къ тебѣ̀ зрѧ̀ небра́чнѣй, и҆ бракоѡкра́дованнꙋю помышлѧ́ѧ, непоро́чнаѧ: ѹ҆вѣ́дѣвъ же твоѐ зача́тӏ̈е ѿ дх҃а ст҃а, речѐ: А҆ллилꙋ́ӏ̈а.

Ӏ҆́косъ д҃.

Слы́шаша па́стырӏ̈е а҆́гг҃лѡвъ пою́щихъ плотско́е хрⷭ҇то́во прише́ствӏ̈е, и҆ те́кше ꙗ҆́кѡ къ па́стырю, ви́дѧтъ сего̀ ꙗ҆́кѡ а҆́гнца непоро́чна, во чре́вѣ мр҃ӏ́инѣ ѹ҆па́сшасѧ, ю҆́же пою́ще рѣ́ша:

Ра́дꙋйсѧ, а҆́гнца и҆ па́стырѧ мт҃и:
ра́дꙋйсѧ, дво́ре слове́сныхъ ѻ҆ве́цъ.

Ра́дꙋйсѧ, неви́димыхъ врагѡ́въ мꙋче́нӏ̈е:
ра́дꙋйсѧ, ра́йскихъ две́рей ѿверзе́нӏ̈е.

Ра́дꙋйсѧ, ꙗ҆́кѡ нбⷭ҇наѧ сра́дꙋютсѧ земны̑мъ:
ра́дꙋйсѧ, ꙗ҆́кѡ зємна́ѧ сликовствꙋ́ютъ нбⷭ҇нымъ.

Ра́дꙋйсѧ, а҆пⷭ҇лѡвъ немѡ́лчнаѧ ѹ҆ста̀:
ра́дꙋйсѧ, страстоте́рпцєвъ непобѣди́маѧ де́рзосте.

Ра́дꙋйсѧ, тве́рдое вѣ́ры ѹ҆твержде́нӏ̈е:
ра́дꙋйсѧ, свѣ́тлое бл҃года́ти позна́нӏ̈е.

Ра́дꙋйсѧ, є҆́юже ѡ҆бнажи́сѧ а҆́дъ:
ра́дꙋйсѧ, є҆́юже ѡ҆блеко́хомсѧ сла́вою.

Ра́дꙋйсѧ, невѣ́сто неневѣ́стнаѧ.

Конда́къ є҃.

Бг҃оте́чнꙋю ѕвѣздꙋ̀ ѹ҆зрѣ́вше волсвѝ, тоѧ̀ послѣ́доваша зарѝ: и҆ ꙗ҆́кѡ свѣти́льникъ держа́ще ю҆̀, то́ю и҆спыта́хꙋ крѣ́пкаго царѧ̀, и҆ дости́гше непостижи́магѡ, возра́довашасѧ, є҆мꙋ̀ вопӏ̈ю́ще: А҆ллилꙋ́ӏ̈а.

Ӏ҆́косъ є҃.

Ви́дѣша ѻ҆́троцы халде́йстӏ̈и, на рꙋкꙋ̀ дв҃и́чꙋ созда́вшаго рꙋка́ма человѣ́ки, и҆ влⷣкꙋ разꙋмѣва́юще є҆го̀, а҆́ще и҆ ра́бӏ̈й прӏ̈ѧ́тъ зра́къ, потща́шасѧ дармѝ послꙋжи́ти є҆мꙋ̀, и҆ возопи́ти бл҃гослове́ннѣй:

Ра́дꙋйсѧ, ѕвѣзды̀ незаходи́мыѧ мт҃и:
ра́дꙋйсѧ, зарѐ та́инственнагѡ днѐ.

Ра́дꙋйсѧ, пре́лести пе́щь ѹ҆гаси́вшаѧ:
ра́дꙋйсѧ, трⷪ҇цы таи́нники просвѣща́ющаѧ.

Ра́дꙋйсѧ, мꙋчи́телѧ безчеловѣ́чнаго и҆змета́ющаѧ ѿ нача́льства:
ра́дꙋйсѧ, гдⷭ҇а чл҃вѣколю́бца показа́вшаѧ хрⷭ҇та̀.

Ра́дꙋйсѧ, ва́рварскагѡ и҆збавлѧ́ющаѧ слꙋже́нӏ̈ѧ:
ра́дꙋйсѧ, тимѣ́нӏ̈ѧ и҆з̾има́ющаѧ дѣ́лъ.

Ра́дꙋйсѧ, ѻ҆гнѧ̀ поклоне́нӏ̈е ѹ҆гаси́вшаѧ:
ра́дꙋйсѧ, пла́мене страсте́й и҆змѣнѧ́ющаѧ.

Ра́дꙋйсѧ, вѣ́рныхъ наста́внице цѣломꙋ́дрӏ̈ѧ:
ра́дꙋйсѧ, всѣ́хъ родѡ́въ весе́лӏ̈е.

Ра́дꙋйсѧ, невѣ́сто неневѣ́стнаѧ.

Конда́къ ѕ҃.

Проповѣ̑дницы бг҃оно́снӏ̈и бы́вше волсвѝ, возврати́шасѧ въ вавѷлѡ́нъ, сконча́вше твоѐ прⷪ҇ро́чество: и҆ проповѣ́давше тѧ̀ хрⷭ҇та̀ всѣ̑мъ, ѡ҆ста́виша и҆́рѡда ꙗ҆́кѡ бꙋесло́вѧща, не вѣ́дꙋща пѣ́ти: А҆ллилꙋ́ӏ̈а.

Ӏ҆́косъ ѕ҃.

Возсӏ̈ѧ́вый во є҆гѵ́птѣ просвѣще́нӏ̈е и҆́стины, ѿгна́лъ є҆сѝ лжѝ тьмꙋ̀: ӏ҆́дѡли бо є҆гѡ̀, сп҃се, не терпѧ́ще твоеѧ̀ крѣ́пости, падо́ша. Си́хъ же и҆зба́вльшӏ̈исѧ вопӏ̈ѧ́хꙋ къ бцⷣѣ:

Ра́дꙋйсѧ, и҆справле́нӏ̈е человѣ́кѡвъ:
ра́дꙋйсѧ, низпаде́нӏ̈е бѣсѡ́въ.

Ра́дꙋйсѧ, пре́лести держа́вꙋ попра́вшаѧ:
ра́дꙋйсѧ, ӏ҆́дѡльскꙋю ле́сть ѡ҆бличи́вшаѧ.

Ра́дꙋйсѧ, мо́ре, потопи́вшее фараѡ́на мы́сленнаго:
ра́дꙋйсѧ, ка́меню, напои́вшӏ̈й жа́ждꙋщыѧ жи́зни.

Ра́дꙋйсѧ, ѻ҆́гненный сто́лпе, наставлѧ́ѧй сꙋ́щыѧ во тьмѣ̀:
ра́дꙋйсѧ, покро́ве мӏ́рꙋ, ши́ршӏ̈й ѻ҆́блака.

Ра́дꙋйсѧ, пи́ще, ма́нны прӏ̈е́мнице:
ра́дꙋйсѧ, сла́дости ст҃ы́ѧ слꙋжи́тельнице.

Ра́дꙋйсѧ, землѐ ѡ҆бѣтова́нӏ̈ѧ:
ра́дꙋйсѧ, и҆з̾ неѧ́же тече́тъ ме́дъ и҆ млеко̀.

Ра́дꙋйсѧ, невѣ́сто неневѣ́стнаѧ.

Конда́къ з҃.

Хотѧ́щꙋ сѷмеѡ́нꙋ ѿ ны́нѣшнѧгѡ вѣ́ка преста́витисѧ преле́стнагѡ, вда́лсѧ є҆сѝ ꙗ҆́кѡ млⷣнцъ томꙋ̀, но позна́лсѧ є҆сѝ є҆мꙋ̀ и҆ бг҃ъ соверше́нный: тѣ́мже ѹ҆диви́сѧ твое́й неизрече́ннѣй премꙋ́дрости, зовы́й: А҆ллилꙋ́ӏ̈а.

Ӏ҆́косъ з҃.

Но́вꙋю показа̀ тва́рь, ꙗ҆́вльсѧ зижди́тель на́мъ ѿ негѡ̀ бы́вшымъ, и҆з̾ безсѣ́менныѧ прозѧ́бъ ѹ҆тро́бы, и҆ сохрани́въ ю҆̀, ꙗ҆́коже бѣ̀, нетлѣ́ннꙋ, да чꙋ́до ви́дѧще воспои́мъ ю҆̀, вопӏ̈ю́ще:

Ра́дꙋйсѧ, цвѣ́те нетлѣ́нӏ̈ѧ:
ра́дꙋйсѧ, вѣ́нче воздержа́нӏ̈ѧ.

Ра́дꙋйсѧ, воскрⷭ҇нӏ̈ѧ ѡ҆́бразъ ѡ҆блиста́ющаѧ:
ра́дꙋйсѧ, а҆́гг҃льское житӏ̈ѐ ꙗ҆влѧ́ющаѧ.

Ра́дꙋйсѧ, дре́во свѣтлоплодови́тое, ѿ негѡ́же пита́ютсѧ вѣ́рнӏ̈и:
ра́дꙋйсѧ, дре́во бл҃госѣнноли́ственное, и҆́мже покрыва́ютсѧ мно́зи.

Ра́дꙋйсѧ, во чре́вѣ носѧ́щаѧ и҆зба́вителѧ плѣнє́ннымъ:
ра́дꙋйсѧ, ро́ждшаѧ наста́вника заблꙋ́ждшымъ.

Ра́дꙋйсѧ, сꙋдӏ̈ѝ првⷣнагѡ ѹ҆моле́нӏ̈е:
ра́дꙋйсѧ, мно́гихъ согрѣше́нӏ̈й проще́нӏ̈е.

Ра́дꙋйсѧ, ѻ҆де́ждо наги́хъ дерзнове́нӏ̈ѧ:
ра́дꙋйсѧ, любы̀, всѧ́кое жела́нӏ̈е побѣжда́ющаѧ.

Ра́дꙋйсѧ, невѣ́сто неневѣ́стнаѧ.

Конда́къ и҃.

Стра́нное ржⷭ҇тво̀ ви́дѣвше, ѹ҆страни́мсѧ мӏ́ра, ѹ҆́мъ на нб҃са̀ прело́жше: сегѡ́ бо ра́ди высо́кӏ̈й бг҃ъ, на землѝ ꙗ҆ви́сѧ смире́нный чл҃вѣ́къ, хотѧ́й привлещѝ къ высотѣ̀ томꙋ̀ вопӏ̈ю́щыѧ: А҆ллилꙋ́ӏ̈а.

Ӏ҆́косъ и҃.

Ве́сь бѣ̀ въ ни́жнихъ, и҆ вы́шнихъ ника́коже ѿстꙋпѝ неѡпи́санное сло́во: снизхожде́нӏ̈е бо бжⷭ҇твенное, не прехожде́нӏ̈е же мѣ́стное бы́сть, и҆ ржⷭ҇тво̀ ѿ дв҃ы бг҃опрӏ̈ѧ́тныѧ, слы́шащӏ̈ѧ сӏ̈ѧ̑:

Ра́дꙋйсѧ, бг҃а невмѣсти́магѡ вмѣсти́лище:
ра́дꙋйсѧ, чⷭ҇тна́гѡ та́инства двє́ри.

Ра́дꙋйсѧ, невѣ́рныхъ сꙋмни́тельное слы́шанӏ̈е:
ра́дꙋйсѧ, вѣ́рныхъ и҆звѣ́стнаѧ похвало̀.

Ра́дꙋйсѧ, колесни́це прест҃а́ѧ сꙋ́щагѡ на херꙋвӏ́мѣхъ:
ра́дꙋйсѧ, селе́нӏ̈е пресла́вное сꙋ́щагѡ на серафӏ́мѣхъ.

Ра́дꙋйсѧ, проти̑внаѧ въ то́жде собра́вшаѧ:
ра́дꙋйсѧ, двⷭ҇тво и҆ ржⷭ҇тво̀ сочета́вшаѧ.

Ра́дꙋйсѧ, є҆́юже разрѣши́сѧ престꙋпле́нӏ̈е:
ра́дꙋйсѧ, є҆́юже ѿве́рзесѧ ра́й.

Ра́дꙋйсѧ, ключꙋ̀ црⷭ҇твӏ̈ѧ хрⷭ҇то́ва:
ра́дꙋйсѧ, наде́ждо бла̑гъ вѣ́чныхъ.

Ра́дꙋйсѧ, невѣ́сто неневѣ́стнаѧ.

Конда́къ ѳ҃.

Всѧ́кое є҆стество̀ а҆́гг҃льское ѹ҆диви́сѧ вели́комꙋ твоегѡ̀ вочл҃вѣ́ченӏ̈ѧ дѣ́лꙋ: непристꙋ́пнаго бо ꙗ҆́кѡ бг҃а, зрѧ́ше всѣ̑мъ пристꙋ́пнаго чл҃вѣ́ка, на́мъ ѹ҆́бѡ спребыва́юща, слы́шаща же ѿ всѣ́хъ: А҆ллилꙋ́ӏ̈а.

Ӏ҆́косъ ѳ҃.

Вѣтӏ̑ѧ многовѣща̑нныѧ, ꙗ҆́кѡ ры̑бы безгла̑сныѧ ви́димъ ѡ҆ тебѣ̀, бцⷣе: недоꙋмѣва́ютъ бо глаго́лати, є҆́же ка́кѡ и҆ дв҃а пребыва́еши, и҆ роди́ти возмогла̀ є҆сѝ; Мы́ же та́инствꙋ дивѧ́щесѧ, вѣ́рнѡ вопӏ̈е́мъ:

Ра́дꙋйсѧ, премⷣрости бж҃ӏ̈ѧ прӏ̈ѧ́телище:
ра́дꙋйсѧ, промышле́нӏ̈ѧ є҆гѡ̀ сокро́вище.

Ра́дꙋйсѧ, любомꙋ̑дрыѧ немꙋ̑дрыѧ ꙗ҆влѧ́ющаѧ:
ра́дꙋйсѧ, хитрословє́сныѧ безсловє́сныѧ ѡ҆блича́ющаѧ.

Ра́дꙋйсѧ, ꙗ҆́кѡ ѡ҆бꙋѧ́ша лю́тӏ̈и взыска́телє:
ра́дꙋйсѧ, ꙗ҆́кѡ ѹ҆вѧдо́ша баснотво́рцы.

Ра́дꙋйсѧ, а҆ѳӏ̈нє́йскаѧ плетє́нӏ̈ѧ растерза́ющаѧ:
ра́дꙋйсѧ, ры̑барскӏ̈ѧ мрє́жи и҆сполнѧ́ющаѧ.

Ра́дꙋйсѧ, и҆з̾ глꙋбины̀ невѣ́дѣнӏ̈ѧ и҆звлача́ющаѧ:
ра́дꙋйсѧ, мнѡ́ги въ ра́зꙋмѣ просвѣща́ющаѧ.

Ра́дꙋйсѧ, кораблю̀ хотѧ́щихъ сп҃сти́сѧ:
ра́дꙋйсѧ, приста́нище жите́йскихъ пла́ванӏ̈й.

Ра́дꙋйсѧ, невѣ́сто неневѣ́стнаѧ.

Конда́къ ӏ҃.

Сп҃стѝ хотѧ̀ мӏ́ръ, и҆́же всѣ́хъ ѹ҆краси́тель, къ семꙋ̀ самоѡбѣтова́нъ прӏ̈и́де, и҆ па́стырь сы́й ꙗ҆́кѡ бг҃ъ, на́съ ра́ди ꙗ҆ви́сѧ по на́мъ чл҃вѣ́къ: подо́бнымъ бо подо́бное призва́въ, ꙗ҆́кѡ бг҃ъ слы́шитъ: А҆ллилꙋ́ӏ̈а.

Ӏ҆́косъ ӏ҃.

Стѣна̀ є҆сѝ дѣ́вамъ бцⷣе дв҃о, и҆ всѣ̑мъ къ тебѣ̀ прибѣга́ющымъ: и҆́бо нб҃сѐ и҆ землѝ творе́цъ ѹ҆стро́и тѧ̀ пречⷭ҇таѧ, все́льсѧ во ѹ҆тро́бѣ твое́й, и҆ всѧ̑ приглаша́ти тебѣ̀ наꙋчи́въ:

Ра́дꙋйсѧ, сто́лпе двⷭ҇тва:
ра́дꙋйсѧ, две́рь сп҃се́нӏ̈ѧ.

Ра́дꙋйсѧ, нача́льнице мы́сленнагѡ назда́нӏ̈ѧ:
ра́дꙋйсѧ, пода́тельнице бжⷭ҇твенныѧ бл҃гости.

Ра́дꙋйсѧ, ты́ бо ѡ҆бнови́ла є҆сѝ зача̑тыѧ стꙋ́днѡ:
ра́дꙋйсѧ, ты́ бо наказа́ла є҆сѝ ѡ҆кра́дєнныѧ ѹ҆мо́мъ.

Ра́дꙋйсѧ, тли́телѧ смы́слѡвъ ѹ҆пражднѧ́ющаѧ:
ра́дꙋйсѧ, сѣ́ѧтелѧ чⷭ҇тоты̀ ро́ждшаѧ.

Ра́дꙋйсѧ, черто́же безсѣ́меннагѡ ѹ҆невѣ́щенӏ̈ѧ:
ра́дꙋйсѧ, вѣ́рныхъ гдⷭ҇еви сочета́вшаѧ.

Ра́дꙋйсѧ, до́браѧ младопита́тельнице дѣ́вамъ:
ра́дꙋйсѧ, невѣстокраси́тельнице дꙋ́шъ ст҃ы́хъ.

Ра́дꙋйсѧ, невѣ́сто неневѣ́стнаѧ.

Конда́къ а҃ӏ.

Пѣ́нӏ̈е всѧ́кое побѣжда́етсѧ, спростре́тисѧ тща́щеесѧ ко мно́жествꙋ мно́гихъ щедро́тъ твои́хъ: равночи́слєнныѧ бо песка̀ пѣ̑сни а҆́ще прино́симъ тѝ цр҃ю̀ ст҃ы́й, ничто́же соверша́емъ досто́йно, ꙗ҆̀же да́лъ є҆сѝ на́мъ тебѣ̀ вопӏ̈ю́щымъ: А҆ллилꙋ́ӏ̈а.

Ӏ҆́косъ а҃ӏ.

Свѣтопрӏ̈е́мнꙋю свѣщꙋ̀, сꙋ́щымъ во тьмѣ̀ ꙗ҆́вльшꙋюсѧ, зри́мъ ст҃ꙋ́ю дв҃ꙋ: невеще́ственный бо вжига́ющи ѻ҆́гнь, наставлѧ́етъ къ ра́зꙋмꙋ бжⷭ҇твенномꙋ всѧ̑, заре́ю ѹ҆́мъ просвѣща́ющаѧ, зва́нӏ̈емъ же почита́емаѧ, си́ми:

Ра́дꙋйсѧ, лꙋчѐ ѹ҆́мнагѡ сл҃нца:
ра́дꙋйсѧ, свѣти́ло незаходи́магѡ свѣ́та.

Ра́дꙋйсѧ, мо́лнӏ̈е, дꙋ́шы просвѣща́ющаѧ:
ра́дꙋйсѧ, ꙗ҆́кѡ гро́мъ врагѝ ѹ҆страша́ющаѧ.

Ра́дꙋйсѧ, ꙗ҆́кѡ многосвѣ́тлое возсӏ̈ѧва́еши просвѣще́нӏ̈е:
ра́дꙋйсѧ, ꙗ҆́кѡ многотекꙋ́щꙋю и҆сточа́еши рѣкꙋ̀.

Ра́дꙋйсѧ, кꙋпѣ́ли живописꙋ́ющаѧ ѡ҆́бразъ:
ра́дꙋйсѧ, грѣхо́внꙋю ѿе́млющаѧ скве́рнꙋ.

Ра́дꙋйсѧ, ба́не, ѡ҆мыва́ющаѧ со́вѣсть:
ра́дꙋйсѧ, ча́ше, че́рплющаѧ ра́дость.

Ра́дꙋйсѧ, ѡ҆бонѧ́нӏ̈е хрⷭ҇то́ва бл҃гоꙋха́нӏ̈ѧ:
ра́дꙋйсѧ, животѐ та́йнагѡ весе́лӏ̈ѧ.

Ра́дꙋйсѧ, невѣ́сто неневѣ́стнаѧ.

Конда́къ в҃ӏ.

Бл҃года́ть да́ти восхотѣ́въ долгѡ́въ дре́внихъ, всѣ́хъ долгѡ́въ рѣши́тель человѣ́кѡмъ, прӏ̈и́де собо́ю ко ѿше́дшымъ тогѡ̀ бл҃года́ти, и҆ раздра́въ рꙋкописа́нӏ̈е, слы́шитъ ѿ всѣ́хъ си́це: А҆ллилꙋ́ӏ̈а.

Ӏ҆́косъ в҃ӏ.

Пою́ще твоѐ ржⷭ҇тво̀, хва́лимъ тѧ̀ всѝ, ꙗ҆́кѡ ѡ҆дꙋшевле́нный хра́мъ бцⷣе: во твое́й бо всели́всѧ ѹ҆тро́бѣ, содержа́й всѧ̑ рꙋко́ю гдⷭ҇ь, ѡ҆ст҃ѝ, просла́ви, и҆ наꙋчѝ вопи́ти тебѣ̀ всѣ́хъ:

Ра́дꙋйсѧ, селе́нӏ̈е бг҃а и҆ сло́ва:
ра́дꙋйсѧ, ст҃а́ѧ ст҃ы́хъ бо́льшаѧ.

Ра́дꙋйсѧ, ковче́же, позлаще́нный дх҃омъ:
ра́дꙋйсѧ, сокро́вище живота̀ неистощи́мое.

Ра́дꙋйсѧ, чⷭ҇тны́й вѣ́нче царе́й бл҃гочести́выхъ:
ра́дꙋйсѧ, чⷭ҇тна́ѧ похвало̀ ӏ҆ере́євъ бл҃гоговѣ́йныхъ.

Ра́дꙋйсѧ, цр҃кве непоколеби́мый сто́лпе:
ра́дꙋйсѧ, ца́рствӏ̈ѧ нерꙋши́маѧ стѣно̀.

Ра́дꙋйсѧ, є҆́юже воздви́жꙋтсѧ побѣ̑ды:
ра́дꙋйсѧ, є҆́юже низпа́даютъ вразѝ.

Ра́дꙋйсѧ, тѣ́ла моегѡ̀ врачева́нӏ̈е:
ра́дꙋйсѧ, дꙋшѝ моеѧ̀ сп҃се́нӏ̈е.

Ра́дꙋйсѧ, невѣ́сто неневѣ́стнаѧ.

Конда́къ г҃ӏ.

Ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во, ны́нѣшнее прӏ̈е́мши приноше́нӏ̈е, ѿ всѧ́кӏ̈ѧ и҆зба́ви напа́сти всѣ́хъ, и҆ бꙋ́дꙋщӏ̈ѧ и҆змѝ мꙋ́ки, ѡ҆ тебѣ̀ вопӏ̈ю́щихъ: А҆ллилꙋ́ӏ̈а, а҆ллилꙋ́ӏ̈а, а҆ллилꙋ́ӏ̈а.

Се́й конда́къ глаго́ли три́жды.
И҆ па́ки:

Ӏ҆́косъ а҃.

Ра́дꙋйсѧ, є҆́юже ра́дость возсӏ̈ѧ́етъ:
ра́дꙋйсѧ, є҆́юже клѧ́тва и҆сче́знетъ.

Ра́дꙋйсѧ, па́дшагѡ а҆да́ма воззва́нӏ̈е:
ра́дꙋйсѧ, сле́зъ є҆́ѵиныхъ и҆збавле́нӏ̈е.

Ра́дꙋйсѧ, ꙗ҆́кѡ є҆сѝ цр҃е́во сѣда́лище:
ра́дꙋйсѧ, ꙗ҆́кѡ но́сиши носѧ́щаго всѧ̑.

Ра́дꙋйсѧ, ѕвѣздо̀ ꙗ҆влѧ́ющаѧ сл҃нце:
ра́дꙋйсѧ, ѹ҆тро́бо бжⷭ҇твеннагѡ воплоще́нӏ̈ѧ.

Ра́дꙋйсѧ, є҆́юже ѡ҆бновлѧ́етсѧ тва́рь:
ра́дꙋйсѧ, є҆́юже покланѧ́емсѧ творцꙋ̀.

Ра́дꙋйсѧ, невѣ́сто неневѣ́стнаѧ.

Конда́къ а҃.

Ра́дꙋйсѧ, невѣ́сто неневѣ́стнаѧ.

Мл҃твы ко прест҃ѣ́й бцⷣѣ:

Ѽ прест҃а́ѧ гпⷭ҇жѐ влⷣчце бцⷣе, вы́шши є҆сѝ всѣ́хъ а҆́гг҃лъ и҆ а҆рха̑гг҃лъ, и҆ всеѧ̀ тва́ри чⷭ҇тнѣ́йши, помо́щница є҆сѝ ѡ҆би́димыхъ, ненадѣ́ющихсѧ надѣ́ѧнӏ̈е, ѹ҆бо́гихъ застꙋ́пница, печа́льныхъ ѹ҆тѣше́нӏ̈е, а҆́лчꙋщихъ корми́тельница, наги́хъ ѡ҆дѣѧ́нӏ̈е, больны́хъ и҆сцѣле́нӏ̈е, грѣ́шныхъ сп҃се́нӏ̈е, хрⷭ҇тӏ̈а́нъ всѣ́хъ поможе́нӏ̈е и҆ застꙋпле́нӏ̈е. Ѽ всемлⷭ҇тиваѧ гпⷭ҇жѐ, дв҃о бцⷣе влⷣчце, млⷭ҇тӏ̈ю твое́ю сп҃сѝ и҆ поми́лꙋй ст҃ѣ́йшыѧ патрӏ̈а́рхи правосла̑вныѧ, преѡсщ҃є́нныѧ митрополӏ́ты, а҆рхӏ̈епⷭ҇кпы и҆ є҆пⷭ҇кпы, и҆ ве́сь сщ҃е́нническӏ̈й и҆ и҆́ноческӏ̈й чи́нъ, и҆ всѧ̑ правосла̑вныѧ хрⷭ҇тӏ̈а́ны ри́зою твое́ю чⷭ҇тно́ю защитѝ: и҆ ѹ҆молѝ, гпⷭ҇жѐ, и҆з̾ тебє̀ без̾ сѣ́мене воплоти́вшагосѧ хрⷭ҇та̀ бг҃а на́шего, да препоѧ́шетъ на́съ си́лою свое́ю свы́ше на неви̑димыѧ и҆ ви̑димыѧ врагѝ на́шѧ. Ѽ всемлⷭ҇тиваѧ гпⷭ҇жѐ влⷣчце бцⷣе, воздви́гни на́съ и҆з̾ глꙋбины̀ грѣхо́вныѧ, и҆ и҆зба́ви на́съ ѿ гла́да, гꙋби́тельства, ѿ трꙋ́са и҆ пото́па, ѿ ѻ҆гнѧ̀ и҆ меча̀, ѿ нахожде́нӏ̈ѧ и҆ноплеме́нныхъ и҆ междоꙋсо́бныѧ бра́ни, и҆ ѿ напра́сныѧ сме́рти, и҆ ѿ нападе́нӏ̈ѧ вра́жӏ̈ѧ, и҆ ѿ тлетво́рныхъ вѣ̑тръ, и҆ ѿ смертоно́сныѧ ꙗ҆́звы, и҆ ѿ всѧ́кагѡ ѕла̀. Пода́ждь, гпⷭ҇жѐ, ми́ръ и҆ здра́вӏ̈е рабѡ́мъ твои̑мъ, всѣ̑мъ правосла̑внымъ хрⷭ҇тӏ̈а́нѡмъ, и҆ просвѣтѝ и҆̀мъ ѹ҆́мъ и҆ ѻ҆́чи сердє́чныѧ, є҆́же ко спасе́нӏ̈ю: и҆ сподо́би ны̀ грѣ̑шныѧ рабы̑ твоѧ̑, црⷭ҇твӏ̈ѧ сн҃а твоегѡ̀, хрⷭ҇та̀ бг҃а на́шегѡ: ꙗ҆́кѡ держа́ва є҆гѡ̀ бл҃гослове́на и҆ препросла́влена, со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѽ прест҃а́ѧ дв҃о, мт҃и хрⷭ҇та̀ бг҃а на́шегѡ, цр҃и́це нб҃сѐ и҆ землѝ! Вонмѝ многоболѣ́зненномꙋ воздыха́нӏ̈ю дꙋ́шъ на́шихъ, при́зри съ высоты̀ ст҃ы́ѧ твоеѧ̀ на на́съ, съ вѣ́рою и҆ любо́вӏ̈ю покланѧ́ющихсѧ пречтⷭ҇омꙋ ѡ҆́бразꙋ твоемꙋ̀. Се́ бо грѣхмѝ погрꙋжа́емӏ̈и и҆ скорбьмѝ ѡ҆бꙋрева́емӏ̈и, взира́юще на тво́й ѡ҆́бразъ, ꙗ҆́кѡ живѣ́й тебѣ̀ сꙋ́щей съ на́ми, прино́симъ смирє́ннаѧ молє́нӏ̈ѧ на̑ша. Не и҆́мамы бо и҆ны́ѧ по́мощи, ни и҆на́гѡ предста́тельства, ни ѹ҆тѣше́нӏ̈ѧ, то́кмѡ тебѐ, ѽ мт҃и всѣ́хъ скорбѧ́щихъ и҆ ѡ҆бремене́нныхъ! Помозѝ на́мъ немощны̑мъ, ѹ҆толѝ скѡ́рби на́шѧ, наста́ви на пꙋ́ть пра́вый на́съ заблꙋжда́ющихъ, ѹ҆врачꙋ́й болѣ́знєннаѧ сердца̀ на̑ша, и҆ сп҃сѝ безнаде́жныхъ, да́рꙋй на́мъ про́чее вре́мѧ житӏ̈ѧ̀ на́шегѡ въ ми́рѣ и҆ покаѧ́нӏ̈и проводи́ти, пода́ждь хрⷭ҇тӏ̈а́нскꙋю кончи́нꙋ, и҆ на стра́шнѣмъ сꙋдѣ̀ сн҃а твоегѡ̀ ꙗ҆ви́сѧ на́мъ млⷭ҇рдаѧ предста́тельница, да всегда̀ пое́мъ, велича́емъ и҆ сла́вимъ тѧ̀, ꙗ҆́кѡ бл҃гꙋ́ю застꙋ́пницꙋ ро́да хрⷭ҇тӏ̈а́нскагѡ, со всѣ́ми ѹ҆годи́вшими бг҃ꙋ, во вѣ́ки вѣкѡ́въ. А҆ми́нь.

А҆КА́ФӀ̈СТЪ СТ҃И́ТЄЛЮ ХРⷭ҇ТО́ВꙊ
НӀ̈КОЛА́Ю ЧꙊДОТВО́РЦꙊ.

Конда́къ а҃.

Возбра́нный чꙋдотво́рче, и҆ и҆зрѧ́дный ѹ҆го́дниче хрⷭ҇то́въ, мӏ́рꙋ всемꙋ̀ и҆сточа́ѧй многоцѣ́нное млⷭ҇ти мѵ́ро, и҆ неисчерпа́емое чꙋде́съ мо́ре, восхвалѧ́ю тѧ̀ любо́вӏ̈ю, ст҃и́телю нӏ̈ко́лае: ты́ же ꙗ҆́кѡ и҆мѣ́ѧй дерзнове́нӏ̈е ко гдⷭ҇ꙋ, ѿ всѧ́кихъ мѧ̀ бѣ́дъ свободѝ, да зовꙋ́ ти:

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Ӏ҆́косъ а҃.

А҆́гг҃ла ѡ҆́бразомъ, земна́го сꙋ́ща є҆стество́мъ, ꙗ҆вѝ тебѐ всеѧ̀ тва́ри созда́тель: бл҃гопло́днꙋю бо добро́тꙋ дꙋшѝ твоеѧ̀ прови́дѣвъ, пребл҃же́нне нӏ̈ко́лае, наꙋчѝ всѣ́хъ вопи́ти тебѣ̀ си́це:

Ра́дꙋйсѧ, ѿ ѹ҆тро́бы ма́тернӏ̈ѧ ѡ҆чище́нный:
Ра́дꙋйсѧ, да́же до конца̀ ѡ҆сщ҃е́нный.

Ра́дꙋйсѧ, рожде́нӏ̈емъ свои́мъ роди́телей ѹ҆диви́вый:
Ра́дꙋйсѧ, си́лꙋ дꙋше́внꙋю а҆́бӏ̈е по рождествѣ̀ ꙗ҆ви́вый.

Ра́дꙋйсѧ, са́де землѝ ѡ҆бѣтова́нӏ̈ѧ:
Ра́дꙋйсѧ, цвѣ́те бжⷭ҇твеннагѡ сажде́нӏ̈ѧ.

Ра́дꙋйсѧ, лозо̀ добродѣ́тельнаѧ вӏ̈ногра́да хрⷭ҇то́ва:
Ра́дꙋйсѧ, дре́во чꙋдото́чное раѧ̀ ӏ҆и҃сова.

Ра́дꙋйсѧ, крӏ́не ра́йскагѡ прозѧбе́нӏ̈ѧ:
Ра́дꙋйсѧ, мѵ́ро хрⷭ҇то́ва бл҃гоꙋха́нӏ̈ѧ.

Ра́дꙋйсѧ, ꙗ҆́кѡ тобо́ю ѿго́нитсѧ рыда́нӏ̈е:
Ра́дꙋйсѧ, ꙗ҆́кѡ тобо́ю прино́ситсѧ ра́дованӏ̈е.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ в҃.

Ви́дѧще твои́хъ мѵ́ръ и҆злӏ̈ѧ́нӏ̈е, бг҃омꙋ́дре, просвѣща́емсѧ дꙋша́ми и҆ тѣлесы̀, ди́внагѡ тѧ̀ мѷрото́чца живоно́сна, нӏ̈ко́лае, разꙋмѣ́юще: чꙋдесы́ бо, ꙗ҆́кѡ вода́ми, бл҃года́тӏ̈ю бж҃ӏ̈ею и҆злива́ющимисѧ, напаѧ́еши вѣ́рнѡ вопӏ̈ю́щихъ бг҃ꙋ: А҆ллилꙋ́ӏ̈а.

Ӏ҆́косъ в҃.

Ра́зꙋмъ неꙋразꙋмѣ́нный вразꙋмлѧ́ѧ ѡ҆ ст҃ѣ́й трⷪ҇цѣ, бы́лъ є҆сѝ въ нӏ̈ке́и со ст҃ы́ми ѻ҆тцы̀ побо́рникъ и҆сповѣ́данӏ̈ѧ правосла́вныѧ вѣ́ры: ра́вна бо ѻ҆ц҃ꙋ̀ сн҃а и҆сповѣ́далъ є҆сѝ, соприсносꙋ́щна и҆ сопресто́льна, а҆́рӏ̈а же безꙋ́мнаго ѡ҆бличи́лъ є҆сѝ. Сегѡ̀ ра́ди вѣ́рнӏ̈и наꙋчи́шасѧ воспѣва́ти тебѣ̀:

Ра́дꙋйсѧ, вели́кӏ̈й бл҃гоче́стӏ̈ѧ сто́лпе:
Ра́дꙋйсѧ, вѣ́рныхъ прибѣ́жища гра́де.

Ра́дꙋйсѧ, тве́рдое правосла́вӏ̈ѧ ѹ҆крѣпле́нӏ̈е:
Ра́дꙋйсѧ, чⷭ҇тно́е прест҃ы́ѧ трⷪ҇цы носи́ло и҆ похвале́нӏ̈е.

Ра́дꙋйсѧ, ѻ҆ц҃ꙋ̀ равноче́стна сн҃а проповѣ́давый:
Ра́дꙋйсѧ, а҆́рӏ̈а возбѣси́вшагосѧ ѿ собо́ра ст҃ы́хъ ѿгна́вый.

Ра́дꙋйсѧ, ѻ҆́тче, ѻ҆тцє́въ сла́внаѧ красото̀:
Ра́дꙋйсѧ, всѣ́хъ бг҃омꙋ́дрыхъ премꙋ́драѧ добро́то.

Ра́дꙋйсѧ, ѻ҆́гнєннаѧ словеса̀ и҆спꙋща́ѧй:
Ра́дꙋйсѧ, до́брѣ ста́до своѐ наставлѧ́ѧй.

Ра́дꙋйсѧ, ꙗ҆́кѡ тобо́ю вѣ́ра ѹ҆твержда́етсѧ:
Ра́дꙋйсѧ, ꙗ҆́кѡ тобо́ю є҆́ресь низлага́етсѧ.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ г҃.

Си́лою да́нною тѝ свы́ше, сле́зꙋ всѧ́кꙋ ѿѧ́лъ є҆сѝ ѿ лица̀ лю́тѣ стра́ждꙋщихъ, бг҃оно́се ѻ҆́тче нӏ̈ко́лае: а҆́лчꙋщымъ бо ꙗ҆ви́лсѧ є҆сѝ корми́тель, въ пꙋчи́нѣ морстѣ́й сꙋ́щымъ и҆зрѧ́дный прави́тель, недꙋ́гꙋющымъ и҆сцѣле́нӏ̈е, и҆ всѣ̑мъ всѧ́къ помо́щникъ показа́лсѧ є҆сѝ, вопӏ̈ю́щымъ бг҃ꙋ: А҆ллилꙋ́ӏ̈а.

Ӏ҆́косъ г҃.

И҆мѣ́ѧше вои́стиннꙋ, ѻ҆́тче нӏ̈ко́лае, съ нб҃сѐ пѣ́снь тебѣ̀ воспѣва́ема бы́ти, а҆ не ѿ землѝ: ка́кѡ бо кто̀ ѿ человѣ̑къ возмо́жетъ твоеѧ̀ ст҃ы́ни вели̑чӏ̈ѧ проповѣ́дати; но мы̀ любо́вӏ̈ю твое́ю побѣжда́еми, вопӏ̈е́мъ тѝ си́це:

Ра́дꙋйсѧ, ѡ҆́бразе а҆́гнцєвъ и҆ па́стырей:
Ра́дꙋйсѧ, ст҃о́е ѡ҆чисти́лище нра́вѡвъ.

Ра́дꙋйсѧ, добродѣ́телей вели́кихъ вмѣсти́лище:
Ра́дꙋйсѧ, ст҃ы́ни чи́стое и҆ честно́е жили́ще.

Ра́дꙋйсѧ, свѣти́льниче всесвѣ́тлый и҆ вселюби́мый:
Ра́дꙋйсѧ, свѣ́те златоза́рный и҆ непоро́чный.

Ра́дꙋйсѧ, досто́йный а҆́гг҃лѡвъ собесѣ́дниче:
Ра́дꙋйсѧ, до́брый человѣ́кѡвъ наста́вниче.

Ра́дꙋйсѧ, пра́вило вѣ́ры бл҃гочести́выѧ:
Ра́дꙋйсѧ, ѡ҆́бразе кро́тости дꙋхо́вныѧ.

Ра́дꙋйсѧ, ꙗ҆́кѡ тобо́ю ѿ страсте́й тѣле́сныхъ и҆збавлѧ́емсѧ:
Ра́дꙋйсѧ, ꙗ҆́кѡ тобо́ю сла́достей дх҃о́вныхъ и҆сполнѧ́емсѧ.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ д҃.

Бꙋ́рѧ недоꙋмѣ́нӏ̈ѧ смꙋща́етъ мѝ ѹ҆́мъ, ка́кѡ досто́йно є҆́сть пѣ́ти чꙋдеса̀ твоѧ̑, бл҃же́нне нӏ̈ко́лае; никто́же бо мо́жетъ ѧ҆̀ и҆счестѝ, а҆́ще бы и҆ мно́ги ѧ҆зы́ки и҆мѣ́лъ, и҆ глаго́лати восхотѣ́лъ. Но мы̀ ди́внѡ бг҃ꙋ въ тебѣ̀ прославлѧ́ющемꙋсѧ, дерза́емъ воспѣва́ти: А҆ллилꙋ́ӏ̈а.

Ӏ҆́косъ д҃.

Слы́шаша, бг҃омꙋ́дре нӏ̈ко́лае, бли́жнӏ̈и и҆ да́льнӏ̈и вели́чӏ̈е чꙋде́съ твои́хъ, ꙗ҆́кѡ по воздꙋ́хꙋ ле́гкими бл҃года́тными крила́ми навы́клъ є҆сѝ сꙋ́щихъ въ бѣда́хъ предварѧ́ти, ско́рѡ ѿ тѣ́хъ и҆збавлѧ́ѧ всѣ́хъ вопӏ̈ю́щихъ къ тебѣ̀ такѡва́ѧ:

Ра́дꙋйсѧ, и҆збавле́нӏ̈е ѿ печа́ли:
Ра́дꙋйсѧ, подаѧ́нӏ̈е бл҃года́ти.

Ра́дꙋйсѧ, неча́емыхъ ѕѡ́лъ прогони́телю:
Ра́дꙋйсѧ, жела́емыхъ бл҃ги́хъ насади́телю.

Ра́дꙋйсѧ, ско́рый ѹ҆тѣ́шителю въ бѣдѣ̀ сꙋ́щихъ:
Ра́дꙋйсѧ, стра́шный наказа́телю ѡ҆би́дѧщихъ.

Ра́дꙋйсѧ, чꙋде́съ пꙋчи́но бг҃омъ и҆злӏ̈ѧ́ннаѧ:
Ра́дꙋйсѧ, зако́на хрⷭ҇то́ва скрижа̑ли бг҃омъ пи̑санныѧ.

Ра́дꙋйсѧ, крѣ́пкое па́дающихъ возведе́нӏ̈е:
Ра́дꙋйсѧ, пра́вѡ стоѧ́щихъ ѹ҆твержде́нӏ̈е.

Ра́дꙋйсѧ, ꙗ҆́кѡ тобо́ю всѧ́каѧ ле́сть ѡ҆бнажа́етсѧ:
Ра́дꙋйсѧ, ꙗ҆́кѡ тобо́ю всѧ́каѧ и҆́стина сбыва́етсѧ.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ є҃.

Бг҃оте́чнаѧ ѕвѣзда̀ ꙗ҆ви́лсѧ є҆сѝ, наставлѧ́ѧ по мо́рю пла́вающихъ лю́тѣ, и҆̀мже сме́рть предстоѧ́ше вско́рѣ и҆ногда̀, а҆́ще не бы̀ ты̀ предста́лъ є҆сѝ призыва́ющымъ тѧ̀ въ по́мощь, чꙋдотво́рче ст҃ы́й нӏ̈ко́лае: ѹ҆же́ бо несты́днѡ бѣсѡ́мъ лета́ющымъ, и҆ погрꙋзи́ти кораблѝ хотѧ́щымъ запрети́въ, ѿгна́лъ є҆сѝ и҆̀хъ, вѣ̑рныѧ же наꙋчи́лъ є҆сѝ сп҃са́ющемꙋ тобо́ю бг҃ꙋ взыва́ти: А҆ллилꙋ́ӏ̈а.

Ӏ҆́косъ є҃.

Ви́дѣша ѻ҆трокови̑цы, на бра́къ скве́рный нищеты̀ ра́ди ѹ҆готѡ́ванныѧ, вели́кое твоѐ къ ни́щымъ млⷭ҇рдӏ̈е, пребл҃же́нне ѻ҆́тче нӏ̈ко́лае, є҆гда̀ ста́рцꙋ роди́телю и҆́хъ но́щӏ̈ю ѹ҆зельцы̀ трѝ зла́та таѧ́сѧ по́далъ є҆сѝ, самаго̀ со дще́рьми и҆збавлѧ́ѧ ѿ паде́нӏ̈ѧ грѣхо́внагѡ. Тогѡ̀ ра́ди слы́шиши ѿ всѣ́хъ си́це:

Ра́дꙋйсѧ, млⷭ҇ти превели́кӏ̈ѧ сокро́вище:
Ра́дꙋйсѧ, промышле́нӏ̈ѧ ѡ҆ лю́дехъ прӏ̈ѧ́телище.

Ра́дꙋйсѧ, пи́ще и҆ ѿра́до къ тебѣ̀ прибѣга́ющихъ:
Ра́дꙋйсѧ, хлѣ́бе неснѣда́емый а҆́лчꙋщихъ.

Ра́дꙋйсѧ, бога́тство бѣ́днѣ живꙋ́щымъ на землѝ бг҃омъ да́нное:
Ра́дꙋйсѧ, воздви́женӏ̈е ско́рое ѹ҆бо́гихъ.

Ра́дꙋйсѧ, бы́строе ни́щихъ ѹ҆слы́шанӏ̈е:
Ра́дꙋйсѧ, скорбѧ́щихъ прӏ̈ѧ́тное попече́нӏ̈е.

Ра́дꙋйсѧ, трӏ̈е́хъ дѣ́въ непоро́чный невѣсти́телю:
Ра́дꙋйсѧ, чистоты̀ ѹ҆се́рдный храни́телю.

Ра́дꙋйсѧ, ненаде́жныхъ надѣ́ѧнӏ̈е:
Ра́дꙋйсѧ, всегѡ̀ мӏ́ра наслажде́нӏ̈е.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ ѕ҃.

Проповѣ́дꙋетъ мӏ́ръ ве́сь тебѐ, пребл҃же́нне нӏ̈ко́лае, ско́раго въ бѣда́хъ застꙋ́пника: ꙗ҆́кѡ мно́гажды во є҆ди́номъ часѣ̀, по землѝ пꙋтеше́ствꙋющымъ, и҆ по мо́рю пла́вающымъ, предварѧ́ѧ посо́бствꙋеши, кꙋ́пнѡ всѣ́хъ ѿ ѕлы́хъ сохранѧ́ѧ, вопӏ̈ю́щихъ къ бг҃ꙋ: А҆ллилꙋ́ӏ̈а.

Ӏ҆́косъ ѕ҃.

Возсӏ̈ѧ́лъ є҆сѝ свѣ́тъ живо́тный, и҆збавле́нӏ̈е носѧ̀ воево́дамъ, непра́веднꙋю сме́рть прӏ̈ѧ́ти и҆мꙋ́щымъ, тебѐ до́брый па́стырю нӏ̈ко́лае, призыва́ющымъ, є҆гда̀ вско́рѣ ꙗ҆́вльсѧ во снѣ̀ царе́ви, ѹ҆страши́лъ є҆сѝ є҆го̀, си́хъ же неврежде́нныхъ ѿпꙋсти́ти повелѣ́лъ є҆сѝ. Сегѡ̀ ра́ди съ ни́ми кꙋ́пнѡ и҆ мы̀ бл҃года́рственнѡ вопӏ̈е́мъ тѝ:

Ра́дꙋйсѧ, ѹ҆се́рднѡ призыва́ющымъ тѧ̀ помога́ѧй:
Ра́дꙋйсѧ, ѿ непра́веднагѡ ѹ҆бӏ̈е́нӏ̈ѧ и҆збавлѧ́ѧй.

Ра́дꙋйсѧ, ѿ ле́стныѧ сохранѧ́ѧй клеветы̀:
Ра́дꙋйсѧ, непра́вєдныѧ разрꙋша́ѧй совѣ́ты.

Ра́дꙋйсѧ, растерза́ѧй лжꙋ̀ ꙗ҆́кѡ паꙋчи́нꙋ:
Ра́дꙋйсѧ, возноша́ѧй сла́внѡ и҆́стинꙋ.

Ра́дꙋйсѧ, непови́нныхъ ѿ ѹ҆́зъ разрѣше́нӏ̈е:
Ра́дꙋйсѧ, и҆ мертвецє́въ ѡ҆живле́нӏ̈е.

Ра́дꙋйсѧ, проѧви́телю пра́вды:
Ра́дꙋйсѧ, помрачи́телю непра́вды.

Ра́дꙋйсѧ, ꙗ҆́кѡ тобо́ю непови́ннӏ̈и и҆зба́влени ѿ меча̀:
Ра́дꙋйсѧ, ꙗ҆́кѡ тобо́ю наслади́шасѧ свѣ́та.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ з҃.

Хотѧ̀ богохꙋ́льное є҆ретӏ́ческое ѿгна́ти ѕлосмра́дӏ̈е, мѵ́ро вои́стиннꙋ бл҃гово́нное та́инственное ꙗ҆ви́лсѧ є҆сѝ нӏ̈ко́лае: лю́ди мѷрє́йскӏ̈ѧ ѹ҆па́слъ є҆сѝ, и҆ ве́сь мӏ́ръ свои́мъ бл҃года́тнымъ мѵ́ромъ и҆спо́лнилъ є҆сѝ: и҆ ѿ на́съ ѹ҆̀бо богоме́рзкое грѣхо́вное ѕлосмра́дӏ̈е ѿженѝ, да бл҃гопрӏ̈ѧ́тнѡ бг҃ꙋ вопӏ̈е́мъ: А҆ллилꙋ́ӏ̈а.

Ӏ҆́косъ з҃.

Но́ваго тѧ̀ нѡ́а, наста́вника ковче́га сп҃си́тельнагѡ разꙋмѣ́емъ, ѻ҆́тче ст҃ы́й нӏ̈ко́лае, бꙋ́рю всѣ́хъ лю́тыхъ разгонѧ́ющаго направле́нӏ̈емъ свои́мъ, тишинꙋ́ же бжⷭ҇твеннꙋю приносѧ́щаго вопӏ̈ю́щымъ такѡва́ѧ:

Ра́дꙋйсѧ, ѡ҆бꙋрева́емыхъ ти́хое приста́нище:
Ра́дꙋйсѧ, ѹ҆топа́ющихъ и҆звѣ́стное храни́лище.

Ра́дꙋйсѧ, пла́вающихъ посредѣ̀ пꙋчи́нъ до́брый ко́рмчӏ̈й:
Ра́дꙋйсѧ, треволнє́нӏ̈ѧ морска̑ѧ ѹ҆ставлѧ́ющӏ̈й.

Ра́дꙋйсѧ, превожде́нӏ̈е сꙋ́щихъ въ ви́хрѣхъ:
Ра́дꙋйсѧ, согрѣ́ѧнӏ̈е сꙋ́щихъ во мра́зѣхъ.

Ра́дꙋйсѧ, сӏ̈ѧ́нӏ̈е, ско́рбный мра́къ разгонѧ́ющее:
Ра́дꙋйсѧ, свѣти́ло, всѧ̑ концы̀ землѝ просвѣща́ющее.

Ра́дꙋйсѧ, ѿ бе́здны грѣхо́вныѧ человѣ́ки и҆збавлѧ́ѧй:
Ра́дꙋйсѧ, въ бе́зднꙋ а҆́дскꙋю сатанꙋ̀ вверга́ѧй.

Ра́дꙋйсѧ, ꙗ҆́кѡ тобо́ю дерзнове́ннѡ бе́зднꙋ млⷭ҇рдӏ̈ѧ бж҃ӏ̈ѧ призыва́емъ:
Ра́дꙋйсѧ, ꙗ҆́кѡ тобо́ю ѿ пото́па гнѣ́ва и҆зба́вльшесѧ, ми́ръ съ бг҃омъ ѡ҆брѣта́емъ.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ и҃.

Стра́нное чꙋ́до ꙗ҆влѧ́етсѧ притека́ющымъ къ тебѣ̀, бл҃же́нне нӏ̈ко́лае, сщ҃е́ннаѧ твоѧ̀ це́рковь: въ не́й бо и҆ ма́лое моле́нӏ̈е приносѧ́ще, ве́лӏ̈ихъ недꙋ́гѡвъ прӏ̈е́млемъ и҆сцѣле́нӏ̈е, а҆́ще то́кмѡ по бз҃ѣ ѹ҆пова́нӏ̈е на тѧ̀ возложи́мъ, вѣ́рнѡ вопӏ̈ю́ще: А҆ллилꙋ́ӏ̈а.

Ӏ҆́косъ и҃.

Ве́сь є҆сѝ всѣ̑мъ вои́стиннꙋ помо́щникъ, бг҃оно́се нӏ̈ко́лае, и҆ собра́лъ є҆сѝ вкꙋ́пѣ всѧ̑ прибѣга́ющыѧ къ тебѣ̀, ꙗ҆́кѡ свободи́тель, пита́тель, и҆ вра́чь ско́рый всѣ̑мъ земны̑мъ, на похвалꙋ̀ всѣ́хъ подвиза́ѧ, вопи́ти къ тебѣ̀ си́це:

Ра́дꙋйсѧ, всѧ́кихъ и҆сцѣле́нӏ̈й и҆сто́чниче:
Ра́дꙋйсѧ, лю́тѣ стра́ждꙋщымъ помо́щниче.

Ра́дꙋйсѧ, зарѐ, сӏ̈ѧ́ющаѧ въ нощѝ грѣхо́внѣй блꙋжда́ющымъ:
Ра́дꙋйсѧ, росо̀ небото́чнаѧ въ зно́и трꙋдѡ́въ сꙋ́щымъ.

Ра́дꙋйсѧ, подава́ѧй тре́бꙋющымъ бл҃гострое́нӏ̈е:
Ра́дꙋйсѧ, ѹ҆готовлѧ́ѧй просѧ́щымъ и҆з̾ѻби́лӏ̈е.

Ра́дꙋйсѧ, мно́гажды проше́нӏ̈е предварѧ́ѧй:
Ра́дꙋйсѧ, ста̑рымъ сѣди́намъ си́лꙋ ѡ҆бновлѧ́ѧй.

Ра́дꙋйсѧ, мно́гихъ заблꙋ́ждшихъ ѿ пꙋтѝ и҆́стиннагѡ ѡ҆бличи́телю:
Ра́дꙋйсѧ, та̑инъ бж҃ӏ̈ихъ вѣ́рный слꙋжи́телю.

Ра́дꙋйсѧ, ꙗ҆́кѡ тобо́ю за́висть попира́емъ:
Ра́дꙋйсѧ, ꙗ҆́кѡ тобо́ю бл҃гонра́вное житӏ̈ѐ и҆справлѧ́емъ.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ ѳ҃.

Всѧ̑кӏ̈ѧ ѹ҆толѝ болѣ̑зни, вели́кӏ̈й на́шъ застꙋ́пниче нӏ̈ко́лае, растворѧ́ѧ бл҃года̑тнаѧ врачева̑нӏ̈ѧ, ѹ҆слажда̑ющаѧ дꙋ́шы на́шѧ, сердца́ же веселѧ́щаѧ, всѣ́хъ ѹ҆се́рднѡ къ по́мощи твое́й притека́ющихъ, бг҃ꙋ же вопӏ̈ю́щихъ: А҆ллилꙋ́ӏ̈а.

Ӏ҆́косъ ѳ҃.

Вѣтӏ̑ѧ сꙋемꙋ́дрєнныѧ нечести́выхъ ви́димъ тобо́ю посра́млєнныѧ, бг҃омꙋ́дре ѻ҆́тче нӏ̈ко́лае: а҆́рӏ̈а бо хꙋ́льника раздѣлѧ́юща бж҃ество̀, и҆ саве́ллӏ̈а смѣша́юща ст҃ꙋ́ю трⷪ҇цꙋ, препрѣ́лъ, на́съ же во правосла́вӏ̈и ѹ҆крѣпи́лъ є҆сѝ. Сегѡ̀ ра́ди вопӏ̈е́мъ тѝ си́це:

Ра́дꙋйсѧ, щи́те, защища́ѧй бл҃гоче́стӏ̈е:
Ра́дꙋйсѧ, мечꙋ̀, посѣка́ѧй ѕлоче́стӏ̈е.

Ра́дꙋйсѧ, ѹ҆чи́телю бжⷭ҇твенныхъ велѣ́нӏ̈й:
Ра́дꙋйсѧ, гꙋби́телю бг҃опроти́вныхъ ѹ҆че́нӏ̈й.

Ра́дꙋйсѧ, лѣ́ствице бг҃омъ ѹ҆твержде́ннаѧ, є҆́юже восхо́димъ къ нб҃сѝ:
Ра́дꙋйсѧ, покро́ве бг҃омъ зда́нный, и҆́мже покрыва́ютсѧ мно́зи.

Ра́дꙋйсѧ, немꙋ́дрыхъ ѹ҆мꙋдри́вый твои́ми словесы̀:
Ра́дꙋйсѧ, лѣни́выхъ подви́гнꙋвый твои́ми нра́вы.

Ра́дꙋйсѧ, свѣ́тлосте за́повѣдей бж҃ӏ̈ихъ неꙋгаси́маѧ:
Ра́дꙋйсѧ, лꙋчѐ ѡ҆правда́нӏ̈й гдⷭ҇нихъ пресвѣ́тлаѧ.

Ра́дꙋйсѧ, ꙗ҆́кѡ ѹ҆че́нӏ̈емъ твои́мъ сокрꙋша́ютсѧ є҆ретӏ́чєскӏ̈ѧ главы̑:
Ра́дꙋйсѧ, ꙗ҆́кѡ тобо́ю вѣ́рнӏ̈и сподоблѧ́ютсѧ сла́вы.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ ӏ҃.

Сп҃стѝ хотѧ̀ дꙋ́шꙋ, пло́ть твою̀ дꙋ́хови покори́лъ є҆сѝ вои́стиннꙋ, ѻ҆́тче на́шъ нӏ̈ко́лае: молча́ньми бо пре́жде и҆ боре́ньми съ по́мыслы, дѣѧ́нӏ̈ю бг҃омы́слӏ̈е приложи́лъ є҆сѝ, бг҃омы́слӏ̈емъ же ра́зꙋмъ соверше́нъ стѧжа́лъ є҆сѝ, и҆́мже дерзнове́ннѡ съ бг҃омъ и҆ а҆́гг҃лы бесѣ́довалъ є҆сѝ, всегда̀ вопӏ̈ѧ̀: А҆ллилꙋ́ӏ̈а.

Ӏ҆́косъ ӏ҃.

Стѣна̀ є҆сѝ похвалѧ́ющымъ, пребл҃же́нне, чꙋдеса̀ твоѧ̑, и҆ всѣ̑мъ къ застꙋпле́нӏ̈ю твоемꙋ̀ прибѣга́ющымъ: тѣ́мже и҆ на́съ въ добродѣ́тели ѹ҆бо́гихъ, ѿ нищеты̀, напа́сти, недꙋ́гѡвъ и҆ нꙋ́ждъ разли́чныхъ свобожда́й, вопӏ̈ю́щихъ тѝ съ любо́вӏ̈ю такѡва́ѧ:

Ра́дꙋйсѧ, ѿ ѹ҆бо́жества вѣ́чнагѡ и҆з̾има́ѧй:
Ра́дꙋйсѧ, бога́тство нетлѣ́нное подава́ѧй.

Ра́дꙋйсѧ, бра́шно неги́блющее а҆́лчꙋщымъ пра́вды:
Ра́дꙋйсѧ, питӏ̈ѐ неисчерпа́емое жа́ждꙋщымъ жи́зни.

Ра́дꙋйсѧ, ѿ мѧте́жа и҆ бра́ни соблюда́ѧй:
Ра́дꙋйсѧ, ѿ ѹ҆́зъ и҆ плѣне́нӏ̈ѧ свобожда́ѧй.

Ра́дꙋйсѧ, пресла́вный въ бѣда́хъ застꙋ́пниче:
Ра́дꙋйсѧ, превели́кӏ̈й въ напа́стехъ защи́тниче.

Ра́дꙋйсѧ, мно́гихъ ѿ поги́бели и҆схи́тивый:
Ра́дꙋйсѧ, безчи́сленныхъ неврежде́ннѡ сохрани́вый.

Ра́дꙋйсѧ, ꙗ҆́кѡ тобо́ю лю́тыѧ сме́рти грѣ́шнӏ̈и и҆збѣга́ютъ:
Ра́дꙋйсѧ, ꙗ҆́кѡ тобо́ю жи́знь вѣ́чнꙋю ка́ющӏ̈исѧ полꙋча́ютъ.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ а҃ӏ.

Пѣ́нӏ̈е прест҃ѣ́й трⷪ҇цѣ па́че и҆ны́хъ прине́слъ є҆сѝ, пребл҃же́нне нӏ̈ко́лае, ѹ҆мо́мъ, сло́вомъ и҆ дѣ́ломъ: мно́гимъ бо и҆спыта́нӏ̈емъ правовѣ̑рнаѧ повелѣ̑нӏ̈ѧ ѹ҆ѧсни́лъ є҆сѝ, вѣ́рою, наде́ждою и҆ любо́вӏ̈ю наставлѧ́ѧ на́съ въ трⷪ҇цѣ є҆ди́номꙋ бг҃ꙋ воспѣва́ти: А҆ллилꙋ́ӏ̈а.

Ӏ҆́косъ а҃ӏ.

Свѣтоза́рнꙋю лꙋчꙋ̀ во мра́цѣ житӏ̈ѧ̀ сꙋ́щымъ неꙋгаси́мꙋю, ви́димъ тѧ̀, бг҃омъ и҆збра́нне ѻ҆́тче нӏ̈ко́лае: съ невеще́ственными бо а҆́гг҃льскими свѣ́ты, бесѣ́дꙋеши ѡ҆ несозда́нномъ трⷪ҇ческомъ свѣ́тѣ, вѣ́рныхъ же дꙋ́шы просвѣща́еши, вопӏ̈ю́щихъ тѝ такѡва́ѧ:

Ра́дꙋйсѧ, ѡ҆заре́нӏ̈е трисо́лнечнагѡ свѣ́та:
Ра́дꙋйсѧ, денни́це незаходи́магѡ сл҃нца.

Ра́дꙋйсѧ, свѣщѐ, бжⷭ҇твеннымъ пла́менемъ возжже́ннаѧ:
Ра́дꙋйсѧ, ꙗ҆́кѡ ѹ҆гаси́лъ є҆сѝ бѣсо́вскӏ̈й пла́мень нече́стӏ̈ѧ.

Ра́дꙋйсѧ, свѣ́тлое правовѣ́рӏ̈ѧ проповѣ́данӏ̈е:
Ра́дꙋйсѧ, доброзра́чное свѣ́та є҆ѵⷢ҇льскагѡ сӏ̈ѧ́нӏ̈е.

Ра́дꙋйсѧ, мо́лнӏ̈е, є҆́рєси пожига́ющаѧ:
Ра́дꙋйсѧ, гро́ме, ѹ҆страша́ющӏ̈й соблазнѧ́ющыѧ.

Ра́дꙋйсѧ, и҆́стиннагѡ наꙋчи́телю ра́зꙋма:
Ра́дꙋйсѧ, та́инственнагѡ и҆з̾ѧви́телю ѹ҆ма̀.

Ра́дꙋйсѧ, ꙗ҆́кѡ тобо́ю попра́сѧ поклоне́нӏ̈е тва́ри:
Ра́дꙋйсѧ, ꙗ҆́кѡ тобо́ю наꙋчи́хомсѧ покланѧ́тисѧ творцꙋ̀ въ трⷪ҇цѣ.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ в҃ӏ.

Бл҃года́ть да́ннꙋю тѝ ѿ бг҃а свѣ́дꙋщӏ̈и, ра́дꙋющесѧ твою̀ па́мѧть пра́зднꙋемъ по до́лгꙋ, пресла́вный ѻ҆́тче нӏ̈ко́лае, и҆ къ чꙋ́дномꙋ застꙋпле́нӏ̈ю твоемꙋ̀ вседꙋ́шнѡ притека́емъ. Пресла́вныхъ же твои́хъ дѣѧ́нӏ̈й, ꙗ҆́кѡ песка̀ морска́гѡ и҆ мно́жества ѕвѣ́зднагѡ и҆счестѝ не могꙋ́ще, недоꙋмѣ́нӏ̈емъ ѡ҆б̾ѧ́ти бы́вше, вопӏ̈е́мъ къ бг҃ꙋ: А҆ллилꙋ́ӏ̈а.

Ӏ҆́косъ в҃ӏ.

Пою́ще твоѧ̑ чꙋдеса̀, восхвалѧ́емъ тѧ̀, всехва́льне нӏ̈ко́лае: въ тебѣ́ бо бг҃ъ въ трⷪ҇цѣ прославлѧ́емый ди́внѡ просла́висѧ, но а҆́ще и҆ попремно́гꙋ соста́влєнныѧ ѿ дꙋшѝ ѱалмы̀ и҆ пѣ̑сни прино́симъ тѝ, чꙋдотво́рче ст҃ы́й, ничто́же твори́мъ ра́внѡ дарова́нӏ̈ю чꙋде́съ твои́хъ, и҆̀мже ѹ҆дивлѧ́ющесѧ вопӏ̈е́мъ къ тебѣ̀ такѡва́ѧ:

Ра́дꙋйсѧ, цр҃ѧ̀ ца́рствꙋющихъ и҆ гдⷭ҇а госпо́дствꙋющихъ слꙋжи́телю:
Ра́дꙋйсѧ, слꙋжи́телей є҆гѡ̀ нбⷭ҇ныхъ сожи́телю.

Ра́дꙋйсѧ, лю́демъ вѣ̑рнымъ поможе́нӏ̈е:
Ра́дꙋйсѧ, ро́да хрⷭ҇тӏ̈а́нскагѡ возвыше́нӏ̈е.

Ра́дꙋйсѧ, побѣ́ды тезоимени́тый:
Ра́дꙋйсѧ, вѣнцено́сче наро́читый.

Ра́дꙋйсѧ, всѣ́хъ добродѣ́телей зерца́ло:
Ра́дꙋйсѧ, всѣ́хъ притека́ющихъ къ тебѣ̀ крѣ́пкое забра́ло.

Ра́дꙋйсѧ, по бз҃ѣ и҆ бцⷣѣ, всѐ на́ше ѹ҆пова́нӏ̈е:
Ра́дꙋйсѧ, тѣле́съ на́шихъ здра́вӏ̈е, и҆ дꙋ́шъ сп҃се́нӏ̈е.

Ра́дꙋйсѧ, ꙗ҆́кѡ тобо́ю ѿ вѣ́чныѧ сме́рти свобожда́емсѧ:
Ра́дꙋйсѧ, ꙗ҆́кѡ тобо́ю безконе́чныѧ жи́зни сподоблѧ́емсѧ.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ г҃ӏ.

Ѽ прест҃ы́й и҆ пречꙋ́дный ѻ҆́тче нӏ̈ко́лае, ѹ҆тѣше́нӏ̈е всѣ́хъ скорбѧ́щихъ, ны́нѣшнее на́ше прӏ̈имѝ приноше́нӏ̈е, и҆ ѿ гее́нны и҆зба́витисѧ на́мъ гдⷭ҇а ѹ҆молѝ, бг҃опрӏ̈ѧ́тнымъ твои́мъ хода́тайствомъ, да съ тобо́ю воспѣва́емъ: А҆ллилꙋ́ӏ̈а, а҆ллилꙋ́ӏ̈а, а҆ллилꙋ́ӏ̈а.

Се́й конда́къ глаго́ли три́жды.
И҆ па́ки:

Ӏ҆́косъ а҃.

Ра́дꙋйсѧ, ѿ ѹ҆тро́бы ма́тернӏ̈ѧ ѡ҆чище́нный:
Ра́дꙋйсѧ, да́же до конца̀ ѡ҆сщ҃е́нный.

Ра́дꙋйсѧ, са́де землѝ ѡ҆бѣтова́нӏ̈ѧ:
Ра́дꙋйсѧ, цвѣ́те бжⷭ҇твеннагѡ сажде́нӏ̈ѧ.

Ра́дꙋйсѧ, лозо̀ добродѣ́тельнаѧ вӏ̈ногра́да хрⷭ҇то́ва:
Ра́дꙋйсѧ, дре́во чꙋдото́чное раѧ̀ ӏ҆и҃сова.

Ра́дꙋйсѧ, крӏ́не ра́йскагѡ прозѧбе́нӏ̈ѧ:
Ра́дꙋйсѧ, мѵ́ро хрⷭ҇то́ва бл҃гоꙋха́нӏ̈ѧ.

Ра́дꙋйсѧ, ꙗ҆́кѡ тобо́ю ѿго́нитсѧ рыда́нӏ̈е:
Ра́дꙋйсѧ, ꙗ҆́кѡ тобо́ю прино́ситсѧ ра́дованӏ̈е.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Конда́къ а҃.

Ра́дꙋйсѧ, нӏ̈ко́лае, вели́кӏ̈й чꙋдотво́рче.

Мл҃тва ст҃и́телю нӏ̈кола́ю:

Ѽ всест҃ы́й нӏ̈ко́лае, ѹ҆го́дниче преизрѧ́дный гдⷭ҇нь, те́плый на́шъ застꙋ́пниче, и҆ вездѣ̀ въ ско́рбехъ ско́рый помо́щниче! Помозѝ мнѣ̀ грѣ́шномꙋ и҆ ѹ҆ны́ломꙋ, въ настоѧ́щемъ се́мъ житӏ̈ѝ, ѹ҆молѝ гдⷭ҇а бг҃а дарова́ти мѝ ѡ҆ставле́нӏ̈е всѣ́хъ мои́хъ грѣхѡ́въ, є҆ли́кѡ согрѣши́хъ ѿ ю҆́ности моеѧ̀, во все́мъ житӏ̈ѝ мое́мъ, дѣ́ломъ, сло́вомъ, помышле́нӏ̈емъ и҆ всѣ́ми мои́ми чꙋ́вствы: и҆ во и҆схо́дѣ дꙋшѝ моеѧ̀ помози́ ми ѻ҆каѧ́нномꙋ, ѹ҆молѝ гдⷭ҇а бг҃а всеѧ̀ тва́ри содѣ́телѧ, и҆зба́вити мѧ̀ воздꙋ́шныхъ мыта́рствъ и҆ вѣ́чнагѡ мꙋче́нӏ̈ѧ: да всегда̀ прославлѧ́ю ѻ҆ц҃а̀, и҆ сн҃а, и҆ ст҃а́го дх҃а, и҆ твоѐ млⷭ҇тивное предста́тельство, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

ПОСЛѢ́ДОВАНИЄ КО СТ҃О́МꙊ ПРИЧАЩЄ́НӀ̈Ю.

Мл҃твами ст҃ы́хъ ѻ҆тє́цъ на́шихъ, гдⷭ҇и ӏ҆и҃се хрⷭ҇тѐ бж҃е на́шъ, поми́лꙋй на́съ. А҆ми́нь.

Сла́ва тебѣ̀ бж҃е на́шъ, сла́ва тебѣ̀.

Ст҃ы́й бж҃е, ст҃ы́й крѣ́пкӏ̈й, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. [в҃ӏ.]

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Прӏ̈иди́те, поклони́мсѧ цр҃е́ви на́шемꙋ бг҃ꙋ. Покло́нъ.

Прӏ̈иди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ. Покло́нъ.

Прӏ̈иди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ. Покло́нъ.

Ѱало́мъ к҃в.

Гдⷭ҇ь пасе́тъ мѧ̀, и҆ ничто́же мѧ̀ лиши́тъ. На мѣ́стѣ ѕла́чнѣ, та́мѡ всели́ мѧ, на водѣ̀ поко́йнѣ воспита́ мѧ. Дꙋ́шꙋ мою̀ ѡ҆братѝ, наста́ви мѧ̀ на стєзѝ пра́вды, и҆́мене ра́ди своегѡ̀. А҆́ще бо и҆ пойдꙋ̀ посредѣ̀ сѣ́ни сме́ртныѧ, не ѹ҆бою́сѧ ѕла̀, ꙗ҆́кѡ ты̀ со мно́ю є҆сѝ: же́злъ тво́й и҆ па́лица твоѧ̀, та̑ мѧ̀ ѹ҆тѣ́шиста. Ѹ҆гото́валъ є҆сѝ предо мно́ю трапе́зꙋ, сопроти́въ стꙋжа́ющымъ мнѣ̀: ѹ҆ма́стилъ є҆сѝ є҆ле́омъ главꙋ̀ мою̀, и҆ ча́ша твоѧ̀ ѹ҆поѧва́ющи мѧ̀, ꙗ҆́кѡ держа́вна. И҆ млⷭ҇ть твоѧ̀ пожене́тъ мѧ̀ всѧ̑ дни̑ живота̀ моегѡ̀: и҆ є҆́же всели́ти ми сѧ въ до́мъ гдⷭ҇ень въ долготꙋ̀ днӏ́й.

Ѱало́мъ к҃г.

Гдⷭ҇нѧ землѧ̀, и҆ и҆сполне́нӏ̈е є҆ѧ̀, вселе́ннаѧ, и҆ всѝ живꙋ́щӏ̈и на не́й. То́й на морѧ́хъ ѡ҆снова́лъ ю҆̀ є҆́сть, и҆ на рѣка́хъ ѹ҆гото́валъ ю҆̀ є҆́сть. Кто̀ взы́детъ на го́рꙋ гдⷭ҇ню; и҆лѝ кто̀ ста́нетъ на мѣ́стѣ ст҃ѣ́мъ є҆гѡ̀; Непови́ненъ рꙋка́ма и҆ чи́стъ се́рдцемъ, и҆́же не прӏ̈ѧ́тъ всꙋ́е дꙋ́шꙋ свою̀, и҆ не клѧ́тсѧ ле́стӏ̈ю и҆́скреннемꙋ своемꙋ̀. Се́й прӏ̈и́метъ бл҃гослове́нӏ̈е ѿ гдⷭ҇а, и҆ млⷭ҇тыню ѿ бг҃а сп҃са своегѡ̀. Се́й ро́дъ и҆́щꙋщихъ гдⷭ҇а, и҆́щꙋщихъ лицѐ бг҃а ӏ҆а́кѡвлѧ. Возми́те врата̀ кнѧ́зи ва́шѧ, и҆ возми́тесѧ врата̀ вѣ̑чнаѧ: и҆ вни́детъ цр҃ь сла́вы. Кто́ є҆сть се́й цр҃ь сла́вы; гдⷭ҇ь крѣ́покъ и҆ си́ленъ, гдⷭ҇ь си́ленъ въ бра́ни. Возми́те врата̀ кнѧ́зи ва́шѧ, и҆ возми́тесѧ врата̀ вѣ̑чнаѧ: и҆ вни́детъ цр҃ь сла́вы. Кто́ є҆сть се́й цр҃ь сла́вы; гдⷭ҇ь си́лъ, то́й є҆́сть цр҃ь сла́вы.

Ѱало́мъ рє҃ӏ.

Вѣ́ровахъ, тѣ́мже возглаго́лахъ: а҆́зъ же смири́хсѧ ѕѣлѡ̀. А҆́зъ же рѣ́хъ во и҆зстꙋпле́нӏ̈и мое́мъ: всѧ́къ человѣ́къ ло́жъ. Что̀ возда́мъ гдⷭ҇еви ѡ҆ всѣ́хъ, ꙗ҆̀же воздадѐ мѝ; Ча́шꙋ сп҃се́нӏ̈ѧ прӏ̈имꙋ̀, и҆ и҆́мѧ гдⷭ҇не призовꙋ̀: мл҃твы моѧ̑ гдⷭ҇еви возда́мъ пред̾ всѣ́ми людьмѝ є҆гѡ̀. Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. ѽ гдⷭ҇и, а҆́зъ ра́бъ тво́й, а҆́зъ ра́бъ тво́й, и҆ сы́нъ рабы́ни твоеѧ̀: растерза́лъ є҆сѝ ѹ҆́зы моѧ̑. Тебѣ̀ пожрꙋ̀ же́ртвꙋ хвалы̀, и҆ во и҆́мѧ гдⷭ҇не призовꙋ̀: мл҃твы моѧ̑ гдⷭ҇еви возда́мъ пред̾ всѣ́ми людьмѝ є҆гѡ̀, во дво́рѣхъ до́мꙋ гдⷭ҇нѧ, посредѣ̀ тебє̀ ӏ҆ерⷭ҇ли́ме.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

А҆ллилꙋ́ӏ̈а, а҆ллилꙋ́ӏ̈а, а҆ллилꙋ́ӏ̈а. Три́жды. И҆ покло́ны трѝ.

Тропарѝ, гла́съ и҃:

Беззакѡ́нӏ̈ѧ моѧ̑ пре́зри гдⷭ҇и, ѿ дв҃ы рожде́йсѧ, и҆ се́рдце моѐ ѡ҆чи́сти, хра́мъ то̀ творѧ̀ пречⷭ҇томꙋ твоемꙋ̀ тѣ́лꙋ и҆ кро́ви: нижѐ ѿри́ни менѐ ѿ твоегѡ̀ лица̀, без̾ числа̀ и҆мѣ́ѧй ве́лӏ̈ю млⷭ҇ть.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Во прича́стӏ̈е ст҃ы́нь твои́хъ ка́кѡ ꙾дерзнꙋ̀꙾ недосто́йный; А҆́ще бо дерзнꙋ̀ къ тебѣ̀ пристꙋпи́ти съ досто́йными, хӏ̈тѡ́нъ мѧ̀ ѡ҆блича́етъ, ꙗ҆́кѡ нѣ́сть вече́рнӏ̈й, и҆ ѡ҆сꙋжде́нӏ̈е и҆схода́тайствꙋю многогрѣ́шнѣй дꙋшѝ мое́й. Ѡ҆чи́сти гдⷭ҇и скве́рнꙋ дꙋшѝ моеѧ̀, и҆ сп҃сѝ мѧ̀, ꙗ҆́кѡ чл҃вѣколю́бецъ.

꙾вни́дꙋ꙾

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мнѡ́гаѧ мно́жєства мои́хъ, бцⷣе, прегрѣше́нӏ̈й, къ тебѣ̀ прибѣго́хъ чⷭ҇таѧ, сп҃се́нӏ̈ѧ тре́бꙋѧ: посѣтѝ немощствꙋ́ющꙋю мою̀ дꙋ́шꙋ, и҆ молѝ сн҃а твоего̀ и҆ бг҃а на́шего да́ти мѝ ѡ҆ставле́нӏ̈е, ꙗ҆̀же содѣ́ѧхъ лю́тыхъ, є҆ди́на бл҃гослове́ннаѧ.

[Во ст҃ꙋ́ю же и҆ вели́кꙋю м҃-цꙋ, глаго́ли:

Є҆гда̀ сла́внӏ̈и ѹ҆ч҃нцы̀ на ѹ҆мове́нӏ̈и ве́чери просвѣща́хꙋсѧ, тогда̀ ӏ҆ꙋ́да ѕлочести́вый сребролю́бӏ̈емъ недꙋ́говавъ ѡ҆мрача́шесѧ, и҆ беззакѡ́ннымъ сꙋдӏ̈ѧ́мъ тебѐ првⷣнаго сꙋдӏ̈ю̀ предае́тъ. Ви́ждь, и҆мѣ́нӏ̈й рачи́телю, си́хъ ра́ди ѹ҆давле́нӏ̈е ѹ҆потреби́вша: бѣжѝ несы́тыѧ дꙋшѝ, ѹ҆ч҃тлю такѡва́ѧ дерзнꙋ́вшӏ̈ѧ. И҆́же ѡ҆ всѣ́хъ бл҃гӏ́й гдⷭ҇и, сла́ва тебѣ̀.]

Ѱало́мъ н҃:

Поми́лꙋй мѧ̀ бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ ѡ҆чи́сти беззако́нӏ̈е моѐ. Наипа́че ѡ҆мы́й мѧ̀ ѿ беззако́нӏ̈ѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. Ꙗ҆́кѡ беззако́нӏ̈е моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. Тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ: ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши, внегда̀ сꙋди́ти тѝ. Се́ бо въ беззако́нӏ̈ихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. Се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ѹ҆бѣлю́сѧ. Слꙋ́хꙋ моемꙋ̀ да́си ра́дость и҆ весе́лӏ̈е: возра́дꙋютсѧ кѡ́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нӏ̈ѧ моѧ̑ ѡ҆чи́сти. Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й. Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀. Возда́ждь мѝ ра́дость сп҃се́нӏ̈ѧ твоегѡ̀, и҆ дх҃омъ влⷣчнимъ ѹ҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вӏ̈и къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й бж҃е, бж҃е сп҃се́нӏ̈ѧ моегѡ̀: возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ѹ҆стнѣ̀ моѝ ѿве́рзеши, и҆ ѹ҆ста̀ моѧ̑ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ѹ҆́бѡ: всесожже́нӏ̈ѧ не бл҃говоли́ши. Же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ѹ҆ничижи́тъ. Ѹ҆бл҃жѝ гдⷭ҇и, бл҃говоле́нӏ̈емъ твои́мъ сӏ̈ѡ́на, и҆ да сози́ждꙋтсѧ стѣ́ны ӏ҆ерⷭ҇ли̑мскӏ̈ѧ. Тогда̀ бл҃говоли́ши же́ртвꙋ пра́вды, возноше́нӏ̈е и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.

Канѡ́нъ, гла́съ в҃.

Пѣ́снь а҃.

Ӏ҆рмо́съ: Грѧди́те лю́дӏ̈е, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскӏ̈ѧ, ꙗ҆́кѡ просла́висѧ.

Припѣ́въ: Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й.

Хлѣ́бъ живота̀ вѣ́чнꙋющагѡ да бꙋ́детъ мѝ тѣ́ло твоѐ ст҃о́е, бл҃гоꙋтро́бне гдⷭ҇и, и҆ чⷭ҇тна́ѧ кро́вь, и҆ недꙋ̑гъ многоѡбра́зныхъ и҆сцѣле́нӏ̈е.

Припѣ́въ: Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀.

Ѡ҆скверне́нъ дѣ́лы безмѣ́стными ѻ҆каѧ́нный, твоегѡ̀ пречⷭ҇тагѡ тѣ́ла и҆ бжⷭ҇твенныѧ кро́ве недосто́инъ є҆́смь, хрⷭ҇тѐ, причаще́нӏ̈ѧ: є҆гѡ́же мѧ̀ сподо́би.

Припѣ́въ: Прест҃а́ѧ бцⷣе, сп҃сѝ на́съ.

Землѐ бл҃га́ѧ, бл҃гослове́ннаѧ бг҃оневѣ́сто, кла́съ прозѧ́бшаѧ неѡра́нный и҆ сп҃си́тельный мӏ́рꙋ, сподо́би мѧ̀ се́й ꙗ҆дꙋ́ща сп҃сти́сѧ.

Пѣ́снь г҃.

Ӏ҆рмо́съ: На ка́мени мѧ̀ вѣ́ры ѹ҆тверди́въ, разшири́лъ є҆сѝ ѹ҆ста̀ моѧ̑ на врагѝ моѧ̑. Возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ ꙗ҆́коже бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.

Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й.

Слє́зныѧ мѝ пода́ждь хрⷭ҇тѐ ка̑пли, скве́рнꙋ се́рдца моегѡ̀ ѡ҆чища́ющыѧ: ꙗ҆́кѡ да бл҃го́ю со́вѣстӏ̈ю ѡ҆чище́нъ, вѣ́рою прихождꙋ̀ и҆ стра́хомъ влⷣко, ко причаще́нӏ̈ю бжⷭ҇твенныхъ дарѡ́въ твои́хъ.

Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀.

Во ѡ҆ставле́нӏ̈е да бꙋ́детъ мѝ прегрѣше́нӏ̈й пречⷭ҇тое тѣ́ло твоѐ и҆ бжⷭ҇твеннаѧ кро́вь, дх҃а же ст҃а́гѡ ѻ҆бще́нӏ̈е, и҆ въ жи́знь вѣ́чнꙋю, чл҃вѣколю́бче, и҆ страсте́й и҆ скорбе́й ѿчꙋжде́нӏ̈е.

Прест҃а́ѧ бцⷣе, сп҃сѝ на́съ.

Хлѣ́ба живо́тнагѡ трапе́за прест҃а́ѧ, свы́ше млⷭ҇ти ра́ди сше́дшагѡ, и҆ мӏ́рови но́вый живо́тъ даю́щагѡ, и҆ менѐ ны́нѣ сподо́би недосто́йнаго, со стра́хомъ вкꙋси́ти сегѡ̀, и҆ жи́вꙋ бы́ти.

Пѣ́снь д҃.

Ӏ҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й гдⷭ҇и.

Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й.

Восхотѣ́лъ є҆сѝ на́съ ра́ди вопло́щьсѧ многомлⷭ҇тиве, закла́нъ бы́ти ꙗ҆́кѡ ѻ҆вча̀, грѣ̑хъ ра́ди человѣ́ческихъ: тѣ́мже молю́ тѧ, и҆ моѧ̑ ѡ҆чи́сти согрѣшє́нӏ̈ѧ.

Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀.

И҆сцѣлѝ дꙋшѝ моеѧ̀ ꙗ҆́звы гдⷭ҇и, и҆ всего̀ ѡ҆ст҃ѝ: и҆ сподо́би влⷣко, ꙗ҆́кѡ да причащꙋ́сѧ та́йныѧ твоеѧ̀ бжⷭ҇твенныѧ ве́чери ѻ҆каѧ́нный.

Прест҃а́ѧ бцⷣе, сп҃сѝ на́съ.

Ѹ҆ми́лостиви и҆ мнѣ̀ сꙋ́щаго ѿ ѹ҆тро́бы твоеѧ̀ влⷣчце, и҆ соблюди́ мѧ нескве́рна раба̀ твоего̀ и҆ непоро́чна, ꙗ҆́кѡ да прӏ̈е́мъ ѹ҆́мнаго би́сера, ѡ҆сщ҃ꙋ́сѧ.

Пѣ́снь є҃.

Ӏ҆рмо́съ: Свѣ́та пода́телю и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нӏ̈й наста́ви на́съ: ра́звѣ бо тебє̀ и҆но́гѡ бг҃а не зна́емъ.

Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й.

Ꙗ҆́коже предре́клъ є҆сѝ хрⷭ҇тѐ, да бꙋ́детъ ѹ҆́бѡ хꙋдо́мꙋ рабꙋ̀ твоемꙋ̀, и҆ во мнѣ̀ пребꙋ́ди, ꙗ҆́коже ѡ҆бѣща́лсѧ є҆сѝ: се́ бо тѣ́ло твоѐ ꙗ҆́мъ бжⷭ҇твенное, и҆ пӏ̈ю̀ кро́вь твою̀.

Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀.

Сло́ве бж҃ӏ̈й и҆ бж҃е, ѹ҆́гль тѣ́ла твоегѡ̀ да бꙋ́детъ мнѣ̀ помраче́нномꙋ въ просвѣще́нӏ̈е, и҆ ѡ҆чище́нӏ̈е ѡ҆скверне́нной дꙋшѝ мое́й кро́вь твоѧ̀.

Прест҃а́ѧ бцⷣе, сп҃сѝ на́съ.

Мр҃ӏ́е мт҃и бж҃ӏ̈ѧ, бл҃гоꙋха́нӏ̈ѧ чⷭ҇тно́е селе́нӏ̈е, твои́ми мл҃твами сосꙋ́дъ мѧ̀ и҆збра́нный содѣ́лай, ꙗ҆́кѡ да ѡ҆сщ҃е́нӏ̈й причащꙋ́сѧ сн҃а твоегѡ̀.

Пѣ́снь ѕ҃.

Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й.

Ѹ҆́мъ, дꙋ́шꙋ и҆ се́рдце ѡ҆ст҃ѝ сп҃се, и҆ тѣ́ло моѐ, и҆ сподо́би неѡсꙋжде́ннѡ влⷣко къ стра̑шнымъ та́йнамъ пристꙋпи́ти.

Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀.

Да бы́хъ ѹ҆страни́лсѧ ѿ страсте́й, и҆ твоеѧ̀ бл҃года́ти и҆мѣ́лъ бы приложе́нӏ̈е, живота́ же ѹ҆твержде́нӏ̈е, причаще́нӏ̈емъ ст҃ы́хъ хрⷭ҇тѐ та̑инъ твои́хъ.

Прест҃а́ѧ бцⷣе, сп҃сѝ на́съ.

Бж҃ӏ̈е бж҃е сло́во ст҃о́е, всего́ мѧ ѡ҆ст҃ѝ, ны́нѣ приходѧ́щаго къ бжⷭ҇твєннымъ твои̑мъ та́йнамъ, ст҃ы́ѧ мт҃ре твоеѧ̀ мольба́ми.

Конда́къ, гла́съ в҃:

Хлѣ́бъ хрⷭ҇тѐ взѧ́ти не пре́зри мѧ̀, тѣ́ло твоѐ, и҆ бжⷭ҇твеннꙋю твою̀ ны́нѣ кро́вь, пречⷭ҇тыхъ влⷣко, и҆ стра́шныхъ твои́хъ та̑инъ причасти́тисѧ ѻ҆каѧ́ннаго: да не бꙋ́детъ мѝ въ сꙋ́дъ, да бꙋ́детъ же мѝ въ живо́тъ вѣ́чный и҆ безсме́ртный.

Пѣ́снь з҃.

Ӏ҆рмо́съ: Те́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ѹ҆слы́шасѧ ѹ҆жѐ ѹ҆́стъ ва́шихъ мл҃тва.

Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й.

И҆сто́чникъ бл҃ги́хъ, причаще́нӏ̈е, хрⷭ҇тѐ, безсме́ртныхъ твои́хъ ны́нѣ та́инствъ, да бꙋ́детъ мѝ свѣ́тъ, и҆ живо́тъ, и҆ безстра́стӏ̈е, и҆ къ преспѣ́ѧнӏ̈ю же и҆ ѹ҆множе́нӏ̈ю добродѣ́тели бжⷭ҇твеннѣйшӏ̈ѧ хода́тайственно, є҆ди́не бл҃же, ꙗ҆́кѡ да сла́влю тѧ̀.

Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀.

Да и҆зба́влюсѧ ѿ страсте́й, и҆ врагѡ́въ, и҆ нꙋ́жды, и҆ всѧ́кӏ̈ѧ ско́рби, тре́петомъ и҆ любо́вӏ̈ю, со бл҃гоговѣ́нӏ̈емъ, чл҃вѣколю́бче, пристꙋпа́ѧй ны́нѣ къ твои̑мъ безсмє́ртнымъ и҆ бжⷭ҇твєннымъ та́йнамъ, и҆ пѣ́ти тебѣ̀ сподо́би: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Прест҃а́ѧ бцⷣе, сп҃сѝ на́съ.

Сп҃са хрⷭ҇та̀ ро́ждшаѧ па́че ѹ҆ма̀, бг҃обл҃года́тнаѧ, молю́ тѧ ны́нѣ ра́бъ тво́й, чⷭ҇тꙋю нечи́стый: хотѧ́щаго мѧ̀ ны́нѣ къ пречⷭ҇тымъ та́йнамъ пристꙋпи́ти, ѡ҆чи́сти всего̀ ѿ скве́рны пло́ти и҆ дꙋ́ха.

Пѣ́снь и҃.

Ӏ҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й.

Нбⷭ҇ныхъ и҆ стра́шныхъ и҆ ст҃ы́хъ твои́хъ, хрⷭ҇тѐ, ны́нѣ та̑инъ, и҆ бжⷭ҇твенныѧ твоеѧ̀ и҆ та́йныѧ ве́чери, ѻ҆́бщника бы́ти и҆ менѐ сподо́би ѿча́ѧннаго, бж҃е сп҃се мо́й.

Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀.

Под̾ твоѐ прибѣ́гъ бл҃гоꙋтро́бӏ̈е бл҃же, со стра́хомъ зовꙋ́ ти: во мнѣ̀ пребꙋ́ди сп҃се, и҆ а҆́зъ, ꙗ҆́коже ре́клъ є҆сѝ, въ тебѣ̀: се́ бо дерза́ѧ на млⷭ҇ть твою̀, ꙗ҆́мъ тѣ́ло твоѐ, и҆ пӏ̈ю̀ кро́вь твою̀.

Возда́ждь мѝ ра́дость сп҃се́нӏ̈ѧ твоегѡ̀, и҆ дх҃омъ влⷣчнимъ ѹ҆тверди́ мѧ.

Трепе́щꙋ прӏ̈е́млѧ ѻ҆́гнь, да не ѡ҆палю́сѧ ꙗ҆́кѡ во́скъ и҆ ꙗ҆́кѡ трава̀. ѽле стра́шнагѡ та́инства! ѽле бл҃гоꙋтро́бӏ̈ѧ бж҃ӏ̈ѧ! ка́кѡ бжⷭ҇твеннагѡ тѣ́ла и҆ кро́ве бре́нӏ̈е причаща́юсѧ, и҆ нетлѣ́ненъ сотворѧ́юсѧ;

Пѣ́снь ѳ҃.

Ӏ҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ.

Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й.

Хрⷭ҇то́съ є҆́сть, вкꙋси́те и҆ ви́дите: гдⷭ҇ь на́съ ра́ди, по на́мъ бо дре́вле бы́вый, є҆ди́ною себѐ прине́съ, ꙗ҆́кѡ приноше́нӏ̈е ѻ҆ц҃ꙋ̀ своемꙋ̀, при́снѡ закала́етсѧ, ѡ҆сщ҃а́ѧй причаща́ющыѧсѧ.

Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀.

Дꙋше́ю и҆ тѣ́ломъ да ѡ҆сщ҃ꙋ́сѧ влⷣко, да просвѣщꙋ́сѧ, да сп҃сꙋ́сѧ, да бꙋ́дꙋ до́мъ тво́й, причаще́нӏ̈емъ сщ҃е́нныхъ та̑инъ, живꙋ́щаго тѧ̀ и҆мѣ́ѧ въ себѣ̀ со ѻ҆ц҃е́мъ и҆ дх҃омъ, бл҃годѣ́телю многомлⷭ҇тиве.

Возда́ждь мѝ ра́дость сп҃се́нӏ̈ѧ твоегѡ̀, и҆ дх҃омъ влⷣчнимъ ѹ҆тверди́ мѧ.

Ꙗ҆́коже ѻ҆́гнь да бꙋ́детъ мѝ, и҆ ꙗ҆́кѡ свѣ́тъ тѣ́ло твоѐ, и҆ кро́вь сп҃се мо́й пречⷭ҇тна́ѧ: ѡ҆палѧ́ѧ грѣхо́вное вещество̀, сжига́ѧ же страсте́й те́рнӏ̈е, и҆ всего́ мѧ просвѣща́ѧ, покланѧ́тисѧ бжⷭ҇твꙋ̀ твоемꙋ̀.

Прест҃а́ѧ бцⷣе, сп҃сѝ на́съ.

Бг҃ъ воплоти́сѧ ѿ чⷭ҇тыхъ крове́й твои́хъ, тѣ́мже всѧ́кӏ̈й ро́дъ пое́тъ тѧ̀ влⷣчце, ѹ҆́мнаѧ же мно́жєства сла́вѧтъ, ꙗ҆́кѡ тобо́ю ꙗ҆́вѣ ѹ҆зрѣ́ша всѣ́ми влⷣчествꙋющаго, ѡ҆сꙋществова́вшагосѧ чл҃вѣ́чествомъ.

И҆ а҆́бӏ̈е:

Досто́йно є҆́сть ꙗ҆́кѡ вои́стиннꙋ, бл҃жи́ти тѧ̀ бцⷣꙋ, приснобл҃же́ннꙋю, и҆ пренепоро́чнꙋю, и҆ мт҃рь бг҃а на́шегѡ. Чⷭ҇тнѣ́йшꙋю херꙋвӏ̑мъ, и҆ сла́внѣйшꙋю без̾ сравне́нӏ̈ѧ серафӏ̑мъ, без̾ и҆стлѣ́нӏ̈ѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ. [з҃ӏ]

Ст҃ы́й бж҃е, ст҃ы́й крѣ́пкӏ̈й, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Тропа́рь пра́здника [зрѝ страни́цꙋ].
А҆́ще недѣ́лѧ, тропа́рь воскрⷭ҇нъ гла́са [зрѝ страни́цꙋ].
А҆́ще же нѝ, тропарѝ сӏ̈ѧ̑, гла́съ ѕ҃:

Поми́лꙋй на́съ гдⷭ҇и, поми́лꙋй на́съ: всѧ́кагѡ бо ѿвѣ́та недоꙋмѣ́юще, сӏ̈ю̀ тѝ мл҃твꙋ ꙗ҆́кѡ влⷣцѣ грѣ́шнӏ̈и прино́симъ: поми́лꙋй на́съ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Гдⷭ҇и, поми́лꙋй на́съ, на тѧ́ бо ѹ҆пова́хомъ: не прогнѣ́вайсѧ на ны̀ ѕѣлѡ̀, нижѐ помѧнѝ беззако́нӏ̈й на́шихъ, но при́зри и҆ ны́нѣ ꙗ҆́кѡ бл҃гоꙋтро́бенъ, и҆ и҆зба́ви ны̀ ѿ вра̑гъ на́шихъ: ты́ бо є҆сѝ бг҃ъ на́шъ, и҆ мы̀ лю́дӏ̈е твоѝ, всѝ дѣла̀ рꙋкꙋ̀ твоє́ю, и҆ и҆́мѧ твоѐ призыва́емъ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Млⷭ҇рдӏ̈ѧ двє́ри ѿве́рзи на́мъ, бл҃гослове́ннаѧ бцⷣе: надѣ́ющӏ̈исѧ на тѧ̀ да не поги́бнемъ, но да и҆зба́вимсѧ тобо́ю ѿ бѣ́дъ: ты́ бо є҆сѝ сп҃се́нӏ̈е ро́да хрⷭ҇тӏ̈а́нскагѡ.

Гдⷭ҇и, поми́лꙋй. [м҃.] И҆ покло́ны, є҆ли́кѡ хо́щеши.

И҆ а҆́бӏ̈е настоѧ́щыѧ стӏ̈хѝ:

Хотѧ̀ ꙗ҆́сти, человѣ́че, тѣ́ло влⷣчне,
Стра́хомъ пристꙋпѝ, да не ѡ҆пали́шисѧ: ѻ҆́гнь бо є҆́сть.

Бжⷭ҇твеннꙋю же пӏ̈ѧ̀ кро́вь ко ѻ҆бще́нӏ̈ю,
Пе́рвѣе примири́сѧ тѧ̀ ѡ҆печа́лившымъ.

Та́же дерза́ѧ та́инственное бра́шно ꙗ҆́ждь.

И҆ны̑ѧ стӏ̈хѝ:

Пре́жде прича́стӏ̈ѧ стра́шныѧ же́ртвы,
Животворѧ́щагѡ тѣ́ла влⷣчнѧ,
Си́мъ помоли́сѧ ѡ҆́бразомъ со тре́петомъ.

Мл҃тва а҃, ст҃а́гѡ васӏ́лӏ̈а вели́кагѡ:

Влⷣко гдⷭ҇и ӏ҆и҃се хрⷭ҇тѐ бж҃е на́шъ, и҆сто́чниче жи́зни и҆ безсме́ртӏ̈ѧ, всеѧ̀ тва́ри ви́димыѧ и҆ неви́димыѧ содѣ́телю, безнача́льнагѡ ѻ҆ц҃а̀ соприсносꙋ́щный сн҃е и҆ собезнача́льный, премно́гӏ̈ѧ ра́ди бл҃гости въ послѣ̑днӏ̈ѧ дни̑ въ пло́ть ѡ҆болкӏ́йсѧ, и҆ распны́йсѧ, и҆ погребы́йсѧ за ны̀ неблагода̑рныѧ и҆ ѕлонра̑вныѧ, и҆ твое́ю кро́вӏ̈ю ѡ҆бнови́вый растлѣ́вшее грѣхо́мъ є҆стество̀ на́ше: са́мъ, безсме́ртный цр҃ю̀, прӏ̈имѝ и҆ моѐ грѣ́шнагѡ покаѧ́нӏ̈е, и҆ приклонѝ ѹ҆́хо твоѐ мнѣ̀, и҆ ѹ҆слы́ши глаго́лы моѧ̑: согрѣши́хъ бо, гдⷭ҇и, согрѣши́хъ на нб҃о и҆ пред̾ тобо́ю, и҆ нѣ́смь досто́инъ воззрѣ́ти на высотꙋ̀ сла́вы твоеѧ̀: прогнѣ́вахъ бо твою̀ бл҃гость, твоѧ̑ за́пѡвѣди престꙋпи́въ, и҆ не послꙋ́шавъ твои́хъ повелѣ́нӏ̈й. Но ты̀ гдⷭ҇и, неѕло́бивъ сы́й, долготерпѣли́въ же и҆ многомлⷭ҇тивъ, не пре́далъ є҆сѝ мѧ̀ поги́бнꙋти со беззако́ньми мои́ми, моегѡ̀ всѧ́чески ѡ҆жида́ѧ ѡ҆браще́нӏ̈ѧ. Ты́ бо ре́клъ є҆сѝ, чл҃вѣколю́бче, прⷪ҇ро́комъ твои́мъ: ꙗ҆́кѡ хотѣ́нӏ̈емъ не хощꙋ̀ сме́рти грѣ́шника, но є҆́же ѡ҆брати́тисѧ и҆ жи́вꙋ бы́ти є҆мꙋ̀*. Не хо́щеши бо влⷣко, созда́нӏ̈ѧ твоє́ю рꙋкꙋ̀ погꙋби́ти, нижѐ бл҃говоли́ши ѡ҆ поги́бели человѣ́честѣй, но хо́щеши всѣ̑мъ сп҃сти́сѧ, и҆ въ ра́зꙋмъ и҆́стины прӏ̈итѝ. Тѣ́мже и҆ а҆́зъ, а҆́ще и҆ недосто́инъ є҆́смь нб҃сѐ и҆ землѝ, и҆ сеѧ̀ привре́менныѧ жи́зни, всего̀ себѐ повинꙋ́въ грѣхꙋ̀, и҆ сласте́мъ порабо́тивъ, и҆ тво́й ѡ҆скверни́въ ѡ҆́бразъ: но творе́нӏ̈е и҆ созда́нӏ̈е твоѐ бы́въ, не ѿчаѧва́ю своегѡ̀ сп҃се́нӏ̈ѧ ѻ҆каѧ́нный, на твое́ же безмѣ́рное бл҃гоꙋтро́бӏ̈е дерза́ѧ прихождꙋ̀. Прӏ̈имѝ ѹ҆̀бо и҆ менѐ, чл҃вѣколю́бче гдⷭ҇и, ꙗ҆́коже блꙋдни́цꙋ, ꙗ҆́кѡ разбо́йника, ꙗ҆́кѡ мытарѧ̀, и҆ ꙗ҆́кѡ блꙋ́днаго, и҆ возмѝ моѐ тѧ́жкое бре́мѧ грѣхѡ́въ, грѣ́хъ взе́млѧй мӏ́ра, и҆ не́мѡщи человѣ́чєскӏ̈ѧ и҆сцѣлѧ́ѧй, трꙋжда́ющыѧсѧ и҆ ѡ҆бременє́нныѧ къ себѣ̀ призыва́ѧй и҆ ѹ҆покоева́ѧй, не прише́дый призва́ти првⷣныѧ, но грѣ̑шныѧ на покаѧ́нӏ̈е: и҆ ѡ҆чи́сти мѧ̀ ѿ всѧ́кӏ̈ѧ скве́рны пло́ти и҆ дꙋ́ха, и҆ наꙋчи́ мѧ соверша́ти ст҃ы́ню во стра́сѣ твое́мъ: ꙗ҆́кѡ да чи́стымъ свѣ́дѣнӏ̈емъ со́вѣсти моеѧ̀, ст҃ы́нь твои́хъ ча́сть прӏ̈е́млѧ, соединю́сѧ ст҃о́мꙋ тѣ́лꙋ твоемꙋ̀ и҆ кро́ви, и҆ и҆мѣ́ю тебѐ во мнѣ̀ живꙋ́ща и҆ пребыва́юща, со ѻ҆ц҃е́мъ и҆ ст҃ы́мъ твои́мъ дх҃омъ. Є҆́й, гдⷭ҇и ӏ҆и҃се хрⷭ҇тѐ бж҃е мо́й, и҆ да не въ сꙋ́дъ мѝ бꙋ́детъ прича́стӏ̈е пречⷭ҇тыхъ и҆ животворѧ́щихъ та̑инъ твои́хъ, нижѐ да не́мощенъ бꙋ́дꙋ дꙋше́ю же и҆ тѣ́ломъ, ѿ є҆́же недосто́йнѣ тѣ̑мъ причаща́тисѧ: но да́ждь мѝ да́же до коне́чнагѡ моегѡ̀ и҆здыха́нӏ̈ѧ, неѡсꙋжде́ннѡ воспрӏ̈има́ти ча́сть ст҃ы́нь твои́хъ, въ дх҃а ст҃а́гѡ ѻ҆бще́нӏ̈е, въ напꙋ́тӏ̈е живота̀ вѣ́чнагѡ, и҆ во бл҃гопрӏ̈ѧ́тенъ ѿвѣ́тъ на стра́шнѣмъ сꙋди́щи твое́мъ: ꙗ҆́кѡ да и҆ а҆́зъ со всѣ́ми и҆збра́нными твои́ми ѻ҆́бщникъ бꙋ́дꙋ нетлѣ́нныхъ твои́хъ бл҃гъ, ꙗ҆̀же ѹ҆гото́валъ є҆сѝ лю́бѧщымъ тѧ̀ гдⷭ҇и: въ ни́хже препросла́вленъ є҆сѝ во вѣ́ки. А҆ми́нь.

Мл҃тва в҃, ст҃а́гѡ ӏ҆ѡа́нна златоꙋ́стагѡ:

Гдⷭ҇и бж҃е мо́й, вѣ́мъ, ꙗ҆́кѡ нѣ́смь досто́инъ, нижѐ дово́ленъ, да под̾ кро́въ вни́деши хра́ма дꙋшѝ моеѧ̀, зане́же ве́сь пꙋ́стъ и҆ па́лсѧ є҆́сть, и҆ не и҆́маши во мнѣ̀ мѣ́ста досто́йна, є҆́же главꙋ̀ подклони́ти: но ꙗ҆́коже съ высоты̀ на́съ ра́ди смири́лъ є҆сѝ себѐ, смири́сѧ и҆ ны́нѣ смире́нӏ̈ю моемꙋ̀. и҆ ꙗ҆́коже воспрӏ̈ѧ́лъ є҆сѝ въ верте́пѣ и҆ въ ꙗ҆́слехъ безслове́сныхъ возлещѝ: си́це воспрӏ̈имѝ и҆ въ ꙗ҆́слехъ безслове́сныѧ моеѧ̀ дꙋшѝ, и҆ во ѡ҆скверне́нное моѐ тѣ́ло вни́ти. и҆ ꙗ҆́коже не неꙋдосто́илъ є҆сѝ вни́ти, и҆ свечерѧ́ти со грѣ́шники въ домꙋ̀ сӏ́мѡна прокаже́ннагѡ: та́кѡ и҆зво́ли вни́ти и҆ въ до́мъ смире́нныѧ моеѧ̀ дꙋшѝ, прокаже́нныѧ и҆ грѣ́шныѧ. и҆ ꙗ҆́коже не ѿри́нꙋлъ є҆сѝ подо́бнꙋю мнѣ̀ блꙋдни́цꙋ и҆ грѣ́шнꙋю, прише́дшꙋю и҆ прикоснꙋ́вшꙋюсѧ тебѣ̀: си́це ѹ҆млⷭ҇рдисѧ и҆ ѡ҆ мнѣ̀ грѣ́шнѣмъ, приходѧ́щемъ и҆ прикаса́ющемъ ти сѧ. и҆ ꙗ҆́коже не возгнꙋша́лсѧ є҆сѝ скве́рныхъ є҆ѧ̀ ѹ҆́стъ и҆ нечи́стыхъ, цѣлꙋ́ющихъ тѧ̀: нижѐ мои́хъ возгнꙋша́йсѧ скве́рншихъ ѻ҆́ныѧ ѹ҆́стъ и҆ нечи́стшихъ, нижѐ ме́рзкихъ мои́хъ и҆ нечи́стыхъ ѹ҆сте́нъ, и҆ скве́рнагѡ и҆ нечи́стѣйшагѡ моегѡ̀ ѧ҆зы́ка. но да бꙋ́детъ мѝ ѹ҆́гль прест҃а́гѡ твоегѡ̀ тѣ́ла, и҆ чⷭ҇тны́ѧ твоеѧ̀ кро́ве, во ѡ҆сщ҃е́нӏ̈е, и҆ просвѣще́нӏ̈е, и҆ здра́вӏ̈е смире́ннѣй мое́й дꙋшѝ и҆ тѣ́лꙋ, во ѡ҆блегче́нӏ̈е тѧ́жестей мно́гихъ мои́хъ согрѣше́нӏ̈й, въ соблюде́нӏ̈е ѿ всѧ́кагѡ дӏ̈а́вольскагѡ дѣ́йства, во ѿгна́нӏ̈е и҆ возбране́нӏ̈е ѕла́гѡ моегѡ̀ и҆ лꙋка́вагѡ ѻ҆бы́чаѧ, во ѹ҆мерщвле́нӏ̈е страсте́й, въ снабдѣ́нӏ̈е за́повѣдей твои́хъ, въ приложе́нӏ̈е бжⷭ҇твенныѧ твоеѧ̀ бл҃года́ти, и҆ твоегѡ̀ црⷭ҇твӏ̈ѧ присвое́нӏ̈е. не бо̀ ꙗ҆́кѡ презира́ѧй прихождꙋ̀ къ тебѣ̀ хрⷭ҇тѐ бж҃е, но ꙗ҆́кѡ дерза́ѧ на неизрече́ннꙋю твою̀ бл҃гость: и҆ да не на мно́зѣ ѹ҆далѧ́ѧйсѧ ѻ҆бще́нӏ̈ѧ твоегѡ̀, ѿ мы́сленнагѡ во́лка ѕвѣроꙋловле́нъ бꙋ́дꙋ. Тѣ́мже молю́сѧ тебѣ̀: ꙗ҆́кѡ є҆ди́нъ сы́й ст҃ъ влⷣко, ѡ҆ст҃ѝ мою̀ дꙋ́шꙋ и҆ тѣ́ло, ѹ҆́мъ и҆ се́рдце, чревеса̀ и҆ ѹ҆трѡ́бы, и҆ всего́ мѧ ѡ҆бновѝ, и҆ вкоренѝ стра́хъ тво́й во ѹ҆десѣ́хъ мои́хъ, и҆ ѡ҆сщ҃е́нӏ̈е твоѐ неѿе́млемо ѿ менє̀ сотворѝ: и҆ бꙋ́ди мѝ помо́щникъ и҆ застꙋ́пникъ, ѡ҆кормлѧ́ѧ въ ми́рѣ живо́тъ мо́й, сподоблѧ́ѧ мѧ̀ и҆ ѡ҆деснꙋ́ю тебє̀ предстоѧ́нӏ̈ѧ, со ст҃ы́ми твои́ми: мл҃твами и҆ моле́ньми пречⷭ҇тыѧ твоеѧ̀ мт҃ре, невеще́ственныхъ твои́хъ слꙋжи́телей и҆ пречⷭ҇тыхъ си́лъ, и҆ всѣ́хъ ст҃ы́хъ, ѿ вѣ́ка тебѐ бл҃гоꙋгоди́вшихъ. А҆ми́нь.

Мл҃тва г҃, ст҃а́гѡ сѷмеѡ́на метафра́ста:

Є҆ди́не чⷭ҇тый и҆ нетлѣ́нный гдⷭ҇и, за неизрече́ннꙋю млⷭ҇ть чл҃вѣколю́бӏ̈ѧ, на́ше всѐ воспрӏ̈е́мый смѣше́нӏ̈е ѿ чⷭ҇тыхъ и҆ двⷭ҇твенныхъ крове́й, па́че є҆стества̀ ро́ждшӏ̈ѧ тѧ̀, дх҃а бжⷭ҇твеннагѡ наше́ствӏ̈емъ, и҆ бл҃говоле́нӏ̈емъ ѻ҆ц҃а̀ присносꙋ́щнагѡ, хрⷭ҇тѐ ӏ҆и҃се, премⷣросте бж҃ӏ̈ѧ, и҆ ми́ре, и҆ си́ло: твои́мъ воспрӏ̈ѧ́тӏ̈емъ животворѧ̑щаѧ и҆ сп҃си́тєльнаѧ страда̑нӏ̈ѧ воспрӏ̈е́мый, крⷭ҇тъ, гвѡ́здӏ̈ѧ, копӏ̈ѐ, сме́рть, ѹ҆мертвѝ моѧ̑ дꙋшетлѣ̑нныѧ стра̑сти тѣлє́сныѧ. Погребе́нӏ̈емъ твои́мъ а҆́дѡва плѣни́вый ца̑рствӏ̈ѧ, погребѝ моѧ̑ бл҃ги́ми по́мыслы лꙋка̑ваѧ совѣ́тѡванӏ̈ѧ, и҆ лꙋка́вствӏ̈ѧ дꙋ́хи разорѝ. Тридне́внымъ твои́мъ и҆ живоно́снымъ воскрⷭ҇нӏ̈емъ па́дшаго пра́ѻтца возста́вивый, возста́ви мѧ̀ грѣхо́мъ попо́лзшагосѧ, ѡ҆́бразы мнѣ̀ покаѧ́нӏ̈ѧ предлага́ѧ. Пресла́внымъ твои́мъ вознесе́нӏ̈емъ, плотско́е ѡ҆божи́вый воспрӏ̈ѧ́тӏ̈е, и҆ сӏ̈ѐ десны́мъ ѻ҆ц҃а̀ сѣдѣ́нӏ̈емъ почты́й, сподо́би мѧ̀ прича́стӏ̈емъ ст҃ы́хъ твои́хъ та̑инъ деснꙋ́ю ча́сть сп҃са́емыхъ полꙋчи́ти. Сни́тӏ̈емъ ѹ҆тѣ́шителѧ твоегѡ̀ дх҃а, сосꙋ́ды че́стны сщ҃є́нныѧ твоѧ̑ ѹ҆ч҃нкѝ содѣ́лавый, прӏ̈ѧ́телище и҆ менѐ покажѝ тогѡ̀ прише́ствӏ̈ѧ. Хотѧ́й па́ки прӏ̈итѝ сꙋди́ти вселе́ннѣй пра́вдою, бл҃говолѝ и҆ мнѣ̀ ѹ҆срѣ́сти тѧ̀ на ѻ҆́блацѣхъ, сꙋдӏ̈ю̀ и҆ созда́телѧ моего̀, со всѣ́ми ст҃ы́ми твои́ми: да безконе́чнѡ славосло́влю и҆ воспѣва́ю тѧ̀, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва д҃, ст҃а́гѡ ӏ҆ѡа́нна дамаски́на:

Влⷣко гдⷭ҇и ӏ҆и҃се хрⷭ҇тѐ бж҃е на́шъ, є҆ди́не и҆мѣ́ѧй вла́сть человѣ́кѡмъ ѡ҆ставлѧ́ти грѣхѝ: ꙗ҆́кѡ бл҃гъ и҆ чл҃вѣколю́бецъ, пре́зри моѧ̑ всѧ̑ въ вѣ́дѣнӏ̈и и҆ не въ вѣ́дѣнӏ̈и прегрѣшє́нӏ̈ѧ: и҆ сподо́би мѧ̀ неѡсꙋжде́ннѡ причасти́тисѧ бжⷭ҇твенныхъ, и҆ пресла́вныхъ, и҆ пречⷭ҇тыхъ, и҆ животворѧ́щихъ твои́хъ та̑инъ: не въ тѧ́жесть, ни въ мꙋ́кꙋ, ни въ приложе́нӏ̈е грѣхѡ́въ, но во ѡ҆чище́нӏ̈е, и҆ ѡ҆сщ҃е́нӏ̈е, и҆ ѡ҆брꙋче́нӏ̈е бꙋ́дꙋщагѡ живота̀ и҆ црⷭ҇твӏ̈ѧ: въ стѣ́нꙋ и҆ по́мощь, и҆ въ возраже́нӏ̈е сопроти́вныхъ, во и҆стребле́нӏ̈е мно́гихъ мои́хъ согрѣше́нӏ̈й. Ты́ бо є҆сѝ бг҃ъ млⷭ҇ти, и҆ щедро́тъ, и҆ чл҃вѣколю́бӏ̈ѧ: и҆ тебѣ̀ сла́вꙋ возсыла́емъ, со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва є҃, ст҃а́гѡ васӏ́лӏ̈а вели́кагѡ:

Вѣ́мъ гдⷭ҇и, ꙗ҆́кѡ недосто́йнѣ причаща́юсѧ пречⷭ҇тагѡ твоегѡ̀ тѣ́ла и҆ чⷭ҇тны́ѧ твоеѧ̀ кро́ве: и҆ пови́ненъ є҆́смь, и҆ сꙋ́дъ себѣ̀ ꙗ҆́мъ и҆ пӏ̈ю̀, не разсꙋжда́ѧ тѣ́ла и҆ кро́ве тебє̀ хрⷭ҇та̀ и҆ бг҃а моегѡ̀: но на щедрѡ́ты твоѧ̑ дерза́ѧ, прихождꙋ̀ къ тебѣ̀ ре́кшемꙋ: ꙗ҆ды́й мою̀ пло́ть, и҆ пӏ̈ѧ́й мою̀ кро́вь, во мнѣ̀ пребыва́етъ, и҆ а҆́зъ въ не́мъ. Ѹ҆млⷭ҇рдисѧ ѹ҆̀бо гдⷭ҇и, и҆ не ѡ҆бличи́ мѧ грѣ́шнаго, но сотворѝ со мно́ю по млⷭ҇ти твое́й: и҆ да бꙋ́дꙋтъ мѝ ст҃а̑ѧ сӏ̈ѧ̑ во и҆сцѣле́нӏ̈е, и҆ ѡ҆чище́нӏ̈е, и҆ просвѣще́нӏ̈е, и҆ сохране́нӏ̈е, и҆ сп҃се́нӏ̈е, и҆ во ѡ҆сщ҃е́нӏ̈е дꙋшѝ и҆ тѣ́ла: во ѿгна́нӏ̈е всѧ́кагѡ мечта́нӏ̈ѧ, и҆ лꙋка́вагѡ дѣѧ́нӏ̈ѧ, и҆ дѣ́йства дӏ̈а́вольскагѡ, мы́сленнѣ во ѹ҆десѣ́хъ мои́хъ дѣ́йствꙋемагѡ: въ дерзнове́нӏ̈е и҆ любо́вь, ꙗ҆́же къ тебѣ̀, во и҆справле́нӏ̈е житӏ̈ѧ̀ и҆ ѹ҆твержде́нӏ̈е, въ возраще́нӏ̈е добродѣ́тели и҆ соверше́нства: во и҆сполне́нӏ̈е за́повѣдей, въ дх҃а ст҃а́гѡ ѻ҆бще́нӏ̈е, въ напꙋ́тӏ̈е живота̀ вѣ́чнагѡ, во ѿвѣ́тъ бл҃гопрӏ̈ѧ́тенъ на стра́шнѣмъ сꙋди́щи твое́мъ: не въ сꙋ́дъ и҆лѝ во ѡ҆сꙋжде́нӏ̈е.

Мл҃тва ѕ҃, ст҃а́гѡ сѷмеѡ́на но́вагѡ бг҃осло́ва:

Ѿ скве́рныхъ ѹ҆сте́нъ, ѿ ме́рзкаго се́рдца, ѿ нечи́стагѡ ѧ҆зы́ка, ѿ дꙋшѝ ѡ҆скверне́ны, прӏ̈имѝ моле́нӏ̈е хрⷭ҇тѐ мо́й, и҆ не пре́зри мои́хъ ни слове́съ, нижѐ ѡ҆бразѡ́въ, нижѐ безстꙋ́дӏ̈ѧ. Да́ждь мѝ дерзнове́ннѡ глаго́лати, ꙗ҆̀же хощꙋ̀, хрⷭ҇тѐ мо́й. Па́че же и҆ наꙋчи́ мѧ, что́ ми подоба́етъ твори́ти и҆ глаго́лати. Согрѣши́хъ па́че блꙋдни́цы, ꙗ҆́же ѹ҆вѣ́дѣ, гдѣ̀ ѡ҆бита́еши, мѵ́ро кꙋпи́вши, прӏ̈и́де де́рзостнѣ пома́зати твоѝ но́зѣ, бг҃а моегѡ̀, влⷣки и҆ хрⷭ҇та̀ моегѡ̀. Ꙗ҆́коже ѻ҆́нꙋ не ѿри́нꙋлъ є҆сѝ прише́дшꙋю ѿ се́рдца, нижѐ менє̀ возгнꙋша́йсѧ, сло́ве: твои́ же мѝ пода́ждь но́зѣ, и҆ держа́ти, и҆ цѣлова́ти, и҆ стрꙋѧ́ми сле́зными, ꙗ҆́кѡ многоцѣ́ннымъ мѵ́ромъ, сӏ̈ѧ̑ де́рзостнѡ пома́зати. Ѡ҆мы́й мѧ̀ слеза́ми мои́ми, ѡ҆чи́сти мѧ̀ и҆́ми, сло́ве: ѡ҆ста́ви и҆ прегрѣшє́нӏ̈ѧ моѧ̑, и҆ проще́нӏ̈е мѝ пода́ждь. Вѣ́си ѕѡ́лъ мно́жество, вѣ́си и҆ стрꙋ́пы моѧ̑, и҆ ꙗ҆́звы зри́ши моѧ̑: но и҆ вѣ́рꙋ вѣ́си, и҆ произволе́нӏ̈е зри́ши, и҆ воздыха́нӏ̈е слы́шиши. Не таи́тсѧ тебє̀, бж҃е мо́й, тво́рче мо́й, и҆зба́вителю мо́й, нижѐ ка́плѧ сле́знаѧ, нижѐ ка́пли ча́сть нѣ́каѧ. Несодѣ́ланное моѐ ви́дѣстѣ ѻ҆́чи твоѝ: въ кни́зѣ же твое́й и҆ є҆щѐ несодѣ̑ѧннаѧ напи̑сана тебѣ̀ сꙋ́ть. Ви́ждь смире́нӏ̈е моѐ, ви́ждь трꙋ́дъ мо́й є҆ли́къ, и҆ грѣхѝ всѧ̑ ѡ҆ста́ви мѝ, бж҃е всѧ́ческихъ: да чи́стымъ се́рдцемъ, притре́петною мы́слӏ̈ю, и҆ дꙋше́ю сокрꙋше́нною, нескве́рныхъ твои́хъ причащꙋ́сѧ и҆ прест҃ы́хъ та̑инъ, и҆́миже ѡ҆живлѧ́етсѧ и҆ ѡ҆божа́етсѧ всѧ́къ ꙗ҆ды́й же и҆ пӏ̈ѧ́й чи́стымъ се́рдцемъ. Ты́ бо ре́клъ є҆сѝ, влⷣко мо́й: всѧ́къ ꙗ҆ды́й мою̀ пло́ть, и҆ пӏ̈ѧ́й мою̀ кро́вь, во мнѣ̀ ѹ҆́бѡ се́й пребыва́етъ, въ не́мже и҆ а҆́зъ є҆́смь. И҆́стинно сло́во всѧ́ко влⷣки и҆ бг҃а моегѡ̀: бжⷭ҇твенныхъ бо причаща́ѧйсѧ и҆ бг҃отворѧ́щихъ бл҃года́тей, не ѹ҆́бѡ є҆́смь є҆ди́нъ, но съ тобо́ю хрⷭ҇тѐ мо́й, свѣ́томъ трисо́лнечнымъ, просвѣща́ющимъ мӏ́ръ. Да ѹ҆́бѡ не є҆ди́нъ пребꙋ́дꙋ кромѣ̀ тебє̀ живода́вца, дыха́нӏ̈ѧ моегѡ̀, живота̀ моегѡ̀, ра́дованӏ̈ѧ моегѡ̀, сп҃се́нӏ̈ѧ мӏ́рꙋ. Сегѡ̀ ра́ди къ тебѣ̀ пристꙋпи́хъ, ꙗ҆́коже зри́ши, со слеза́ми, и҆ дꙋше́ю сокрꙋше́нною, и҆збавле́нӏ̈ѧ мои́хъ прегрѣше́нӏ̈й прошꙋ̀ прӏ̈ѧ́ти мѝ, и҆ твои́хъ живода́тельныхъ и҆ непоро́чныхъ та́инствъ причасти́тисѧ неѡсꙋжде́ннѡ. Да пребꙋ́деши, ꙗ҆́коже ре́клъ є҆сѝ, со мно́ю треѻкаѧ́ннымъ: да не кромѣ̀ ѡ҆брѣ́тъ мѧ̀ твоеѧ̀ бл҃года́ти, преле́стникъ восхи́титъ мѧ̀ льсти́внѣ, и҆ прельсти́въ ѿведе́тъ бг҃отворѧ́щихъ твои́хъ слове́съ. Сегѡ̀ ра́ди къ тебѣ̀ припа́даю, и҆ те́плѣ вопӏ̈ю́ ти: ꙗ҆́коже блꙋ́днаго прӏ̈ѧ́лъ є҆сѝ, и҆ блꙋдни́цꙋ прише́дшꙋю, та́кѡ прӏ̈ими́ мѧ блꙋ́днаго и҆ скве́рнаго, ще́дре. Дꙋше́ю сокрꙋше́нною, ны́нѣ бо къ тебѣ̀ приходѧ̀, вѣ́мъ сп҃се, ꙗ҆́кѡ и҆ны́й, ꙗ҆́коже а҆́зъ, не прегрѣшѝ тебѣ̀, нижѐ содѣ́ѧ дѣѧ̑нӏ̈ѧ, ꙗ҆̀же а҆́зъ содѣ́ѧхъ. Но сӏ̈ѐ па́ки вѣ́мъ, ꙗ҆́кѡ не вели́чество прегрѣше́нӏ̈й, ни грѣхѡ́въ мно́жество превосхо́дитъ бг҃а моегѡ̀ мно́гое долготерпѣ́нӏ̈е и҆ чл҃вѣколю́бӏ̈е кра́йнее: но млⷭ҇тӏ̈ю состра́стӏ̈ѧ те́плѣ ка́ющыѧсѧ, и҆ чи́стиши, и҆ свѣ́тлиши, и҆ свѣ́та твори́ши прича́стники, ѻ҆́бщники бжⷭ҇тва̀ твоегѡ̀ содѣ́ловаѧй незави́стнѡ: и҆ стра́нное и҆ а҆́гг҃лѡмъ, и҆ человѣ́чєскимъ мы́слемъ, бесѣ́дꙋеши и҆̀мъ мно́гажды, ꙗ҆́коже дрꙋгѡ́мъ твои̑мъ и҆́стиннымъ. Сӏ̈ѧ̑ де́рзостна творѧ́тъ мѧ̀, сӏ̈ѧ̑ вперѧ́ютъ мѧ̀, хрⷭ҇тѐ мо́й. И҆ дерза́ѧ твои̑мъ бога̑тымъ къ на́мъ бл҃годѣѧ́нӏ̈ємъ, ра́дꙋѧсѧ вкꙋ́пѣ и҆ трепе́щѧ, ѻ҆гне́ви причаща́юсѧ, трава̀ сы́й, и҆ стра́нно чꙋ́до, ѡ҆роша́емь неѡпа́льнѡ, ꙗ҆́коже ѹ҆́бѡ кꙋпина̀ дре́вле неѡпа́льнѣ горѧ́щи. Ны́нѣ бл҃года́рною мы́слӏ̈ю, бл҃года́рнымъ же се́рдцемъ, бл҃года́рными ѹ҆десы̀ мои́ми, дꙋшѝ и҆ тѣ́ла моегѡ̀, покланѧ́юсѧ, и҆ велича́ю, и҆ славосло́влю тѧ̀ бж҃е мо́й, ꙗ҆́кѡ бл҃гослове́на сꙋ́ща, ны́нѣ же и҆ во вѣ́ки.

Мл҃тва з҃, ст҃а́гѡ ӏ҆ѡа́нна златоꙋ́стагѡ:

Бж҃е, ѡ҆сла́би, ѡ҆ста́ви, прости́ ми согрѣшє́нӏ̈ѧ моѧ̑, є҆ли̑ка тѝ согрѣши́хъ, а҆́ще сло́вомъ, а҆́ще дѣ́ломъ, а҆́ще помышле́нӏ̈емъ, во́лею и҆лѝ нево́лею, ра́зꙋмомъ и҆лѝ неразꙋ́мӏ̈емъ, всѧ̑ мѝ простѝ, ꙗ҆́кѡ бл҃гъ и҆ чл҃вѣколю́бецъ: и҆ мл҃твами пречⷭ҇тыѧ твоеѧ̀ мт҃ре, ѹ҆́мныхъ твои́хъ слꙋжи́телей и҆ ст҃ы́хъ си́лъ, и҆ всѣ́хъ ст҃ы́хъ ѿ вѣ́ка тебѣ̀ бл҃гоꙋгоди́вшихъ, неѡсꙋжде́ннѡ бл҃говолѝ прӏ̈ѧ́ти мѝ ст҃о́е и҆ пречⷭ҇тое твоѐ тѣ́ло, и҆ чⷭ҇тнꙋ́ю кро́вь, во и҆сцѣле́нӏ̈е дꙋши́ же и҆ тѣ́ла, и҆ во ѡ҆чище́нӏ̈е лꙋка́выхъ мои́хъ помышле́нӏ̈й. Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва и҃, тогѡ́жде ст҃а́гѡ:

Нѣ́смь дово́ленъ, влⷣко гдⷭ҇и, да вни́деши под̾ кро́въ дꙋшѝ моеѧ̀: но поне́же хо́щеши ты̀ ꙗ҆́кѡ чл҃вѣколю́бецъ жи́ти во мнѣ̀, дерза́ѧ пристꙋпа́ю: повелѣва́еши, да ѿве́рзꙋ двє́ри, ꙗ҆̀же ты̀ є҆ди́нъ созда́лъ є҆сѝ, и҆ вни́деши со чл҃вѣколю́бӏ̈емъ ꙗ҆́коже є҆сѝ: вни́деши и҆ просвѣща́еши помраче́нный мо́й по́мыслъ. Вѣ́рꙋю, ꙗ҆́кѡ сӏ̈ѐ сотвори́ши: не бо̀ блꙋдни́цꙋ со слеза́ми прише́дшꙋю къ тебѣ̀ ѿгна́лъ є҆сѝ, нижѐ мытарѧ̀ ѿве́рглъ є҆сѝ пока́ѧвшасѧ, нижѐ разбо́йника позна́вша црⷭ҇тво твоѐ ѿгна́лъ є҆сѝ, нижѐ гони́телѧ пока́ѧвшасѧ ѡ҆ста́вилъ є҆сѝ є҆́же бѣ̀: но ѿ покаѧ́нӏ̈ѧ тебѣ̀ прише́дшыѧ, всѧ̑ въ ли́цѣ твои́хъ дрꙋгѡ́въ вчини́лъ є҆сѝ, є҆ди́нъ сы́й бл҃гослове́нный всегда̀, ны́нѣ и҆ въ безконє́чныѧ вѣ́ки. А҆ми́нь.

Мл҃тва ѳ҃, тогѡ́жде ст҃а́гѡ:

Гдⷭ҇и ӏ҆и҃се хрⷭ҇тѐ бж҃е мо́й, ѡ҆сла́би, ѡ҆ста́ви, ѡ҆чи́сти и҆ прости́ ми грѣ́шномꙋ, и҆ непотре́бномꙋ, и҆ недосто́йномꙋ рабꙋ̀ твоемꙋ̀ прегрѣшє́нӏ̈ѧ, и҆ согрѣшє́нӏ̈ѧ, и҆ грѣхопадє́нӏ̈ѧ моѧ̑, є҆ли̑ка тѝ ѿ ю҆́ности моеѧ̀ да́же до настоѧ́щагѡ днѐ и҆ часа̀ согрѣши́хъ, а҆́ще въ ра́зꙋмѣ и҆ въ неразꙋ́мӏ̈и, а҆́ще въ словесѣ́хъ и҆лѝ дѣ́лѣхъ, и҆лѝ помышле́нӏ̈ихъ и҆ мы́слехъ и҆ начина́нӏ̈ихъ, и҆ всѣ́хъ мои́хъ чꙋ́вствахъ. И҆ мл҃твами безсѣ́меннѡ ро́ждшӏ̈ѧ тѧ̀, пречⷭ҇тыѧ и҆ приснодв҃ы мр҃ӏ́и мт҃ре твоеѧ̀, є҆ди́ныѧ непосты́дныѧ наде́жды и҆ предста́тельства и҆ сп҃се́нӏ̈ѧ моегѡ̀, сподо́би мѧ̀ неѡсꙋжде́ннѡ причасти́тисѧ пречⷭ҇тыхъ, безсме́ртныхъ, животворѧ́щихъ, и҆ стра́шныхъ твои́хъ та́инствъ, во ѡ҆ставле́нӏ̈е грѣхѡ́въ и҆ въ жи́знь вѣ́чнꙋю: во ѡ҆сщ҃е́нӏ̈е, и҆ просвѣще́нӏ̈е, крѣ́пость, и҆сцѣле́нӏ̈е, и҆ здра́вӏ̈е дꙋши́ же и҆ тѣ́ла, и҆ въ потребле́нӏ̈е и҆ всесоверше́нное погꙋбле́нӏ̈е лꙋка́выхъ мои́хъ помыслѡ́въ, и҆ помышле́нӏ̈й, и҆ предпрӏ̈ѧ́тӏ̈й, и҆ нощны́хъ мечта́нӏ̈й, те́мныхъ и҆ лꙋка́выхъ дꙋхѡ́въ: ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, и҆ че́сть, и҆ поклоне́нӏ̈е, со ѻ҆ц҃е́мъ и҆ ст҃ы́мъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ӏ҃, ст҃а́гѡ ӏ҆ѡа́нна дамаски́на:

Пред̾ две́рьми хра́ма твоегѡ̀ предстою̀, и҆ лю́тыхъ помышле́нӏ̈й не ѿстꙋпа́ю: но ты̀ хрⷭ҇тѐ бж҃е, мытарѧ̀ ѡ҆правди́вый, и҆ ханане́ю поми́ловавый, и҆ разбо́йникꙋ раѧ̀ двє́ри ѿве́рзый, ѿве́рзи мѝ ѹ҆трѡ́бы чл҃вѣколю́бӏ̈ѧ твоегѡ̀, и҆ прӏ̈ими́ мѧ приходѧ́ща и҆ прикаса́ющасѧ тебѣ̀, ꙗ҆́кѡ блꙋдни́цꙋ, и҆ кровоточи́вꙋю: ѻ҆́ва ѹ҆́бѡ кра́ѧ ри́зы твоеѧ̀ коснꙋ́вшисѧ, ѹ҆до́бь и҆сцѣле́нӏ̈е прӏ̈ѧ́тъ: ѻ҆́ва же пречⷭ҇тѣи твоѝ но́зѣ ѹ҆держа́вши, разрѣше́нӏ̈е грѣхѡ́въ понесѐ. А҆́зъ же ѻ҆каѧ́нный всѐ твоѐ тѣ́ло дерза́ѧ воспрӏ̈ѧ́ти, да не ѡ҆пале́нъ бꙋ́дꙋ: но прӏ̈ими́ мѧ ꙗ҆́коже ѻ҆́ныѧ, и҆ просвѣтѝ моѧ̑ дꙋшє́внаѧ чꙋ̑вства, попалѧ́ѧ моѧ̑ грѣхѡ́вныѧ вины̑, мл҃твами безсѣ́меннѡ ро́ждшӏ̈ѧ тѧ̀, и҆ нбⷭ҇ныхъ си́лъ: ꙗ҆́кѡ бл҃гослове́нъ є҆сѝ во вѣ́ки вѣкѡ́въ. А҆ми́нь.

Мл҃тва ст҃а́гѡ ӏ҆ѡа́нна златоꙋ́стагѡ:

Вѣ́рꙋю, гдⷭ҇и, и҆ и҆сповѣ́дꙋю, ꙗ҆́кѡ ты̀ є҆сѝ вои́стиннꙋ хрⷭ҇то́съ сн҃ъ бг҃а жива́гѡ, прише́дый въ мӏ́ръ грѣ̑шныѧ сп҃стѝ, ѿ ни́хже пе́рвый є҆́смь а҆́зъ. Є҆щѐ вѣ́рꙋю, ꙗ҆́кѡ сӏ̈ѐ є҆́сть са́мое пречⷭ҇тое тѣ́ло твоѐ, и҆ сӏ̈ѧ̀ є҆́сть са́маѧ чⷭ҇тна́ѧ кро́вь твоѧ̀. Молю́сѧ ѹ҆̀бо тебѣ̀: поми́лꙋй мѧ̀, и҆ прости́ ми прегрѣшє́нӏ̈ѧ моѧ̑, вѡ́льнаѧ и҆ невѡ́льнаѧ, ꙗ҆̀же сло́вомъ, ꙗ҆̀же дѣ́ломъ, ꙗ҆̀же вѣ́дѣнӏ̈емъ и҆ невѣ́дѣнӏ̈емъ, и҆ сподо́би мѧ̀ неѡсꙋжде́ннѡ причасти́тисѧ пречⷭ҇тыхъ твои́хъ та́инствъ, во ѡ҆ставле́нӏ̈е грѣхѡ́въ, и҆ въ жи́знь вѣ́чнꙋю. А҆ми́нь.

Приходѧ́й же причасти́тисѧ, глаго́ли въ себѣ̀
настоѧ́щыѧ стӏ̈хѝ метафра́ста:

Сѐ пристꙋпа́ю къ бжⷭ҇твенномꙋ причаще́нӏ̈ю.
Содѣ́телю, да не ѡ҆пали́ши мѧ̀ прӏ̈ѡбще́нӏ̈емъ:
Ѻ҆́гнь бо є҆сѝ недостѡ́йныѧ попалѧ́ѧй.
Но ѹ҆́бѡ ѡ҆чи́сти мѧ̀ ѿ всѧ́кӏ̈ѧ скве́рны.

Та́же глаго́ли:

Ве́чери твоеѧ̀ та́йныѧ дне́сь, сн҃е бж҃ӏ̈й, прича́стника мѧ̀ прӏ̈имѝ: не бо̀ врагѡ́мъ твои̑мъ та́йнꙋ повѣ́мъ, ни лобза́нӏ̈ѧ тѝ да́мъ ꙗ҆́кѡ ӏ҆ꙋ́да, но ꙗ҆́кѡ разбо́йникъ и҆сповѣ́даю тѧ̀: помѧни́ мѧ, гдⷭ҇и, во црⷭ҇твӏ̈и твое́мъ.

Па́ки стӏ̈хѝ сӏ̈ѧ̑:

Бг҃отворѧ́щꙋю кро́вь ѹ҆жасни́сѧ, человѣ́че, зрѧ̀:
Ѻ҆́гнь бо є҆́сть недостѡ́йныѧ попалѧ́ѧй.

Бжⷭ҇твенное тѣ́ло и҆ ѡ҆божа́етъ мѧ̀, и҆ пита́етъ:
Ѡ҆божа́етъ дꙋ́хъ, ѹ҆́мъ же пита́етъ стра́ннѡ.

Та́же тропарѝ:

Ѹ҆слади́лъ мѧ̀ є҆сѝ любо́вӏ̈ю хрⷭ҇тѐ, и҆ и҆змѣни́лъ мѧ̀ є҆сѝ бжⷭ҇твеннымъ твои́мъ раче́нӏ̈емъ: но попалѝ ѻ҆гне́мъ невеще́ственнымъ грѣхѝ моѧ̑, и҆ насы́титисѧ є҆́же въ тебѣ̀ наслажде́нӏ̈ѧ сподо́би, да ликꙋ́ѧ возвелича́ю бл҃же, два̀ пришє́ствӏ̈ѧ твоѧ̑.

Во свѣ́тлостехъ ст҃ы́хъ твои́хъ ка́кѡ вни́дꙋ недосто́йный; а҆́ще бо дерзнꙋ̀ совни́ти въ черто́гъ, ѻ҆де́жда мѧ̀ ѡ҆блича́етъ, ꙗ҆́кѡ нѣ́сть бра́чна, и҆ свѧ́занъ и҆зве́рженъ бꙋ́дꙋ ѿ а҆́гг҃лѡвъ: ѡ҆чи́сти гдⷭ҇и, скве́рнꙋ дꙋшѝ моеѧ̀, и҆ сп҃си́ мѧ, ꙗ҆́кѡ чл҃вѣколю́бецъ.

Та́же мл҃твꙋ:

Влⷣко чл҃вѣколю́бче, гдⷭ҇и ӏ҆и҃се хрⷭ҇тѐ бж҃е мо́й, да не въ сꙋ́дъ мѝ бꙋ́дꙋтъ ст҃а̑ѧ сӏ̈ѧ̑, за є҆́же недосто́йнꙋ мѝ бы́ти: но во ѡ҆чище́нӏ̈е и҆ ѡ҆сщ҃е́нӏ̈е дꙋши́ же и҆ тѣ́ла, и҆ во ѡ҆брꙋче́нӏ̈е бꙋ́дꙋщӏ̈ѧ жи́зни и҆ црⷭ҇твӏ̈ѧ. Мнѣ́ же є҆́же прилѣплѧ́тисѧ бг҃ꙋ бл҃го є҆́сть, полага́ти во гдⷭ҇ѣ ѹ҆пова́нӏ̈е сп҃се́нӏ̈ѧ моегѡ̀.

И҆ па́ки: Ве́чери твоеѧ̀ та́йныѧ дне́сь, сн҃е бж҃ӏ̈й, прича́стника мѧ̀ прӏ̈имѝ: не бо̀ врагѡ́мъ твои̑мъ та́йнꙋ повѣ́мъ, ни лобза́нӏ̈ѧ тѝ да́мъ ꙗ҆́кѡ ӏ҆ꙋ́да, но ꙗ҆́кѡ разбо́йникъ и҆сповѣ́даю тѧ̀: помѧни́ мѧ, гдⷭ҇и, во црⷭ҇твӏ̈и твое́мъ.

БЛ҃ГОДА́РСТВЄННЫѦ МЛ҃ТВЫ
ПО СТ҃Ѣ́МЪ ПРИЧАЩЄ́НИИ

Є҆гда́ же полꙋчи́ши до́брагѡ причаще́нӏ̈ѧ животворѧ́щихъ та́инственныхъ дарова́нӏ̈й воспо́й а҆́бӏ̈е, бл҃годарѝ вельмѝ, и҆ сӏ̈ѧ̑ те́плѣ ѿ дꙋ́ши бг҃ꙋ глаго́ли:

Сла́ва тебѣ̀ бж҃е. Сла́ва тебѣ̀ бж҃е. Сла́ва тебѣ̀ бж҃е.

Та́же бл҃года́рственнꙋю сӏ̈ю̀ мл҃твꙋ:

Блгода́рственнаѧ мл҃тва, а҃:

Бл҃годарю́ тѧ гдⷭ҇и бж҃е, мо́й, ꙗ҆́кѡ не ѿри́нꙋлъ мѧ̀ є҆сѝ грѣ́шнаго, но ѻ҆́бщника мѧ̀ бы́ти ст҃ы́нь твои́хъ сподо́билъ є҆сѝ. бл҃годарю́ тѧ, ꙗ҆́кѡ менѐ недосто́йнаго причасти́тисѧ пречⷭ҇тыхъ твои́хъ и҆ нбⷭ҇ныхъ дарѡ́въ сподо́билъ є҆сѝ. но влⷣко чл҃вѣколю́бче, на́съ ра́ди ѹ҆ме́рый же и҆ воскр҃сы́й, и҆ дарова́вый на́мъ стра̑шнаѧ сӏ̈ѧ̑ и҆ животворѧ̑щаѧ та̑инства, во бл҃годѣѧ́нӏ̈е и҆ ѡ҆сщ҃е́нӏ̈е дꙋ́шъ и҆ тѣле́съ на́шихъ, да́ждь бы́ти си̑мъ и҆ мнѣ̀ во и҆сцѣле́нӏ̈е дꙋши́ же и҆ тѣ́ла, во ѿгна́нӏ̈е всѧ́кагѡ сопроти́внагѡ, въ просвѣще́нӏ̈е ѻ҆́чӏ̈ю се́рдца моегѡ̀, въ ми́ръ дꙋше́вныхъ мои́хъ си́лъ, въ вѣ́рꙋ непосты́днꙋ, въ любо́вь нелицемѣ́рнꙋ, во и҆сполне́нӏ̈е премꙋ́дрости, въ соблюде́нӏ̈е за́повѣдей твои́хъ, въ приложе́нӏ̈е бж҃е́ственныѧ твоеѧ̀ бл҃года́ти, и҆ твоегѡ̀ црⷭ҇твӏ̈ѧ присвое́нӏ̈е: да во ст҃ы́ни твое́й тѣ́ми сохранѧ́емь, твою̀ бл҃года́ть помина́ю всегда̀, и҆ не ктомꙋ̀ себѣ̀ живꙋ̀, но тебѣ̀ на́шемꙋ влⷣцѣ и҆ бл҃годѣ́телю. и҆ та́кѡ сегѡ̀ житӏ̈ѧ̀ и҆зше́дъ ѡ҆ наде́ждѣ живота̀ вѣ́чнагѡ, въ присносꙋ́щный дости́гнꙋ поко́й, и҆дѣ́же пра́зднꙋющихъ гла́съ непреста́нный и҆ безконе́чнаѧ сла́дость зрѧ́щихъ твоегѡ̀ лица̀ добро́тꙋ неизрече́ннꙋю: ты́ бо є҆сѝ и҆́стинное жела́нӏ̈е, и҆ неизрече́нное весе́лӏ̈е лю́бѧщихъ тѧ̀, хрⷭ҇тѐ бж҃е на́шъ, и҆ тѧ̀ пое́тъ всѧ̀ тва́рь во вѣ́ки. А҆ми́нь.

Мл҃тва ст҃а́го васӏ́лӏ̈а вели́кагѡ, в҃:

Влⷣко хрⷭ҇тѐ бж҃е, цр҃ю̀ вѣкѡ́въ и҆ содѣ́телю всѣ́хъ, бл҃годарю́ тѧ ѡ҆ всѣ́хъ, ꙗ҆̀же мѝ є҆сѝ по́далъ бл҃ги́хъ, и҆ ѡ҆ причаще́нӏ̈и пречⷭ҇тыхъ и҆ животворѧ́щихъ твои́хъ та́инствъ. молю̀ ѹ҆́бѡ тѧ̀ бл҃же и҆ чл҃вѣколю́бче, сохрани́ мѧ под̾ кро́вомъ твои́мъ, и҆ въ сѣ́ни крилꙋ̑ тво_е́ю, и҆ да́рꙋй мѝ чи́стою со́вѣстӏ̈ю да́же до послѣ́днѧгѡ моегѡ̀ и҆здыха́нӏ̈ѧ, досто́йнѡ причаща́тисѧ ст҃ы́нь твои́хъ во ѡ҆ставле́нӏ̈е грѣхѡ́въ, и҆ въ жи́знь вѣ́чнꙋю: ты́ бо є҆сѝ хлѣ́бъ живо́тный, и҆сто́чникъ ст҃ы́ни, пода́тель бл҃ги́хъ, и҆ тебѣ̀ сла́вꙋ возсыла́емъ со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва ст҃а́го сѷмеѡ́на метафра́ста, г҃:

Да́вый пи́щꙋ мнѣ̀ пло́ть твою̀ во́лею, Ѻ҆́гнь сы́й и҆ ѡ҆палѧ́ѧй недостѡ́йныѧ, да не ѡ҆пали́ши менѐ содѣ́телю мо́й: Па́че же пройдѝ во ѹ҆́ды моѧ̑, Во всѧ̑ соста́вы, во ѹ҆тро́бꙋ, въ се́рдце. Попалѝ те́рнӏ̈е всѣ́хъ мои́хъ прегрѣше́нӏ̈й. Дꙋ́шꙋ ѡ҆чи́сти, ѡ҆ст҃ѝ помышл_е́нӏ̈ѧ. Соста́вы ѹ҆твердѝ съ костьмѝ вкꙋ́пѣ. Чꙋ́вствъ просвѣтѝ простꙋ́ю пѧтери́цꙋ. Всего́ мѧ спригвоздѝ стра́хꙋ твоемꙋ̀. При́снѡ покры́й, соблюди́ же, и҆ сохрани́ мѧ Ѿ всѧ́кагѡ дѣ́ла и҆ сло́ва дꙋшетлѣ́ннагѡ, Ѡ҆чи́сти и҆ ѡ҆мы́й, и҆ ѹ҆красѝ мѧ̀, Ѹ҆добрѝ, вразꙋмѝ, и҆ просвѣти́ мѧ. Покажи́ мѧ твоѐ селе́нӏ̈е є҆ди́нагѡ дх҃а, И҆ не ктомꙋ̀ селе́нӏ̈е грѣха̀, да ꙗ҆́кѡ твоегѡ̀ до́мꙋ вхо́домъ причаще́нӏ̈ѧ, Ꙗ҆́кѡ ѻ҆гнѧ̀ менѐ бѣжи́тъ всѧ́къ sлодѣ́й, всѧ́ка стра́сть. Мл҃твенники тебѣ̀ приношꙋ̀ всѧ̑ ст҃ы̑ѧ: Чинонача̑лӏ̈ѧ же безпло́тныхъ, Прⷣте́чꙋ твоего̀, премꙋ̑дрыѧ а҆пⷭ҇лы, Къ си̑мъ же твою̀ нескве́рнꙋю чⷭ҇тꙋю мт҃рь. И҆́хже мольбы̑ бл҃гоꙋтро́бне прӏ̈имѝ хрⷭ҇тѐ мо́й, И҆ сы́номъ свѣ́та содѣ́лай твоего̀ слꙋжи́телѧ. Ты́ бо є҆сѝ ѡ҆сщ҃е́нӏ̈е, и҆ є҆ди́ный На́шихъ, бл҃же, дꙋ́шъ и҆ свѣ́тлость. И҆ тебѣ̀ лѣпоподо́бнѡ ꙗ҆́кѡ бг҃ꙋ и҆ влⷣцѣ сла́вꙋ всѝ возсыла́емъ на всѧ́къ де́нь.

Мл҃тва д҃:

Тѣ́ло твоѐ ст҃о́е гдⷭ҇и ӏ҆и҃се хрⷭ҇тѐ бж҃е на́шъ, да бꙋ́детъ мѝ въ живо́тъ вѣ́чный, и҆ кро́вь твоѧ̀ чⷭ҇тна́ѧ во ѡ҆ставле́нӏ̈е грѣхѡ́въ: бꙋ́ди же мѝ бл҃годаре́нӏ̈е сӏ̈ѐ въ ра́дость, здра́вӏ̈е и҆ весе́лӏ̈е: въ стра́шное же и҆ второ́е прише́ствӏ̈е твоѐ сподо́би мѧ̀ грѣ́шнаго ста́ти ѡ҆деснꙋ́ю сла́вы твоеѧ̀: мл҃твами пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ.

Мл҃тва є҃, ко прест҃ѣ́й бцⷣѣ:

Прест҃а́ѧ влⷣчце бцⷣе, свѣ́те помраче́нныѧ моеѧ̀ дꙋшѝ, наде́ждо, покро́ве, прибѣ́жище, ѹ҆тѣше́нӏ̈е, ра́дованӏ̈е моѐ, бл҃годарю́ тѧ ꙗ҆́кѡ сподо́била мѧ̀ є҆сѝ недосто́йнаго, прича́стника бы́ти пречⷭ҇тагѡ тѣ́ла и҆ чⷭ҇тны́ѧ кро́ве сн҃а твоегѡ̀. но ро́ждшаѧ и҆́стинный свѣ́тъ, просвѣтѝ моѧ̑ ѹ҆́мныѧ ѻ҆́чи се́рдца: ꙗ҆́же и҆сто́чникъ безсме́ртӏ̈ѧ ро́ждшаѧ, ѡ҆животвори́ мѧ ѹ҆мерщвле́ннаго грѣхо́мъ: ꙗ҆́же млⷭ҇тивагѡ бг҃а любобл҃гоꙋтро́бнаѧ мт҃и, поми́лꙋй мѧ̀, и҆ да́ждь мѝ ѹ҆миле́нӏ̈е, и҆ сокрꙋше́нӏ̈е въ се́рдцѣ мое́мъ, и҆ смире́нӏ̈е въ мы́слехъ мои́хъ, и҆ воззва́нӏ̈е въ плѣне́нӏ̈ихъ помышле́нӏ̈й мои́хъ. и҆ сподо́би мѧ̀ до послѣ́днѧгѡ и҆здыха́нӏ̈ѧ, неѡсꙋжде́ннѡ прӏ̈има́ти пречⷭ҇тыхъ та̑инъ ѡ҆сщ҃е́нӏ̈е, во и҆сцѣле́нӏ̈е дꙋши́ же и҆ тѣ́ла. и҆ пода́ждь мѝ сле́зы покаѧ́нӏ̈ѧ, и҆ и҆сповѣ́данӏ̈ѧ, во є҆́же пѣ́ти и҆ сла́вити тѧ̀ во всѧ̑ дни̑ живота̀ моегѡ̀: ꙗ҆́кѡ бл҃гослове́на, и҆ препросла́влена є҆сѝ во вѣ́ки. А҆ми́нь.

Та́же:

Ны́нѣ ѿпꙋща́еши раба̀ твоего̀ влⷣко, по глаго́лꙋ твоемꙋ̀ съ ми́ромъ: ꙗ҆́кѡ ви́дѣста ѻ҆́чи моѝ сп҃се́нӏ̈е твоѐ, є҆́же є҆сѝ ѹ҆гото́валъ пред̾ лице́мъ всѣ́хъ люде́й, свѣ́тъ во ѿкрове́нӏ̈е ꙗ҆зы́кѡвъ, и҆ сла́вꙋ люде́й твои́хъ ӏ҆и҃лѧ.

Ст҃ы́й бж҃е, ст҃ы́й крѣ́пкӏ̈й, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. Три́жды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

А҆́ще ст҃а́гѡ ӏ҆ѡа́нна златоꙋ́стагѡ лӏ̈тꙋргӏ́а, чтѝ ст҃о́мꙋ ӏ҆ѡа́ннꙋ:

Тропа́рь, гла́съ и҃:

Ѹ҆́стъ твои́хъ ꙗ҆́коже свѣ́тлость ѻ҆гнѧ̀ возсӏ̈ѧ́вши бл҃года́ть, вселе́ннꙋю просвѣтѝ: не сребролю́бӏ̈ѧ мӏ́рови сокрѡ́вища сниска̀, высотꙋ̀ на́мъ смиреномꙋ́дрӏ̈ѧ показа̀. Но твои́ми словесы̀ наказꙋ́ѧ, ѻ҆́тче ӏ҆ѡа́нне златоꙋ́сте, молѝ сло́ва хрⷭ҇та̀ бг҃а, спасти́сѧ дꙋша́мъ на́шымъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Конда́къ, гла́съ ѕ҃:

Ѿ нб҃съ прӏ̈ѧ́лъ є҆сѝ бжⷭ҇твеннꙋю бл҃года́ть, и҆ твои́ма ѹ҆стна́ма всѧ̑ ѹ҆чи́ши покланѧ́тисѧ въ трⷪ҇цѣ є҆ди́номꙋ бг҃ꙋ, ӏ҆ѡа́нне златоꙋ́сте всебл҃же́нне, прпⷣбне, досто́йнѡ хва́лимъ тѧ̀: є҆си́ бо наста́вникъ, ꙗ҆́кѡ бжⷭ҇твєннаѧ ꙗ҆влѧ́ѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ:

[А҆́ще же ст҃а́гѡ васӏ́лӏ̈а вели́кагѡ лӏ̈тꙋргӏ́а, чтѝ ст҃о́мꙋ васӏ́лӏ̈ю:

Тропа́рь, гла́съ а҃:

Во всю̀ зе́млю и҆зы́де вѣща́нӏ̈е твоѐ, ꙗ҆́кѡ прӏ̈е́мшꙋю сло́во твоѐ, и҆́мже бг҃олѣ́пнѡ наꙋчи́лъ є҆сѝ, є҆стество̀ сꙋ́щихъ ѹ҆ѧсни́лъ є҆сѝ, человѣ́чєскӏ̈ѧ ѻ҆бы́чаи ѹ҆краси́лъ є҆сѝ. Цр҃ское сщ҃е́нӏ̈е, ѻ҆́тче прпⷣбне, молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Конда́къ, гла́съ д҃:

Ꙗ҆ви́лсѧ є҆сѝ ѡ҆снова́нӏ̈е непоколеби́мое цр҃кве, подаѧ̀ всѣ́мъ некра́домое гдⷭ҇ство человѣ́кѡмъ, запечатлѣ́ѧ твои́ми велѣ́ньми, нб҃оѧвле́нне васӏ́лӏ̈е прпⷣбне.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ:

[А҆́ще же лӏ̈тꙋргӏ́а преждеѡсщ҃е́нныхъ, чтѝ ст҃о́мꙋ григо́рӏ̈ю:

Тропа́рь, гла́съ д҃:

И҆́же ѿ бг҃а свы́ше бжⷭ҇твеннꙋю бл҃года́ть воспрӏ̈е́мъ, сла́вне григо́рӏ̈е, и҆ тогѡ̀ си́лою ѹ҆крѣплѧ́емь, є҆ѵⷢ҇льски ше́ствовати и҆зво́лилъ є҆сѝ. ѿѻнꙋ́дꙋже ѹ҆ хрⷭ҇та̀ возме́здӏ̈е трꙋдѡ́въ прӏ̈ѧ́лъ є҆сѝ, всебл҃же́нне: є҆го́же молѝ, да сп҃се́тъ дꙋ́шы на́шѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Конда́къ, гла́съ г҃:

Подобонача́льникъ показа́лсѧ є҆сѝ нача́льника па́стырємъ хрⷭ҇та̀, и҆́нокѡвъ чреды̑, ѻ҆́тче григо́рӏ̈е, ко ѡ҆гра́дѣ нбⷭ҇нѣй наставлѧ́ѧ, и҆ ѿтꙋ́дꙋ наꙋчи́лъ є҆сѝ ста́до хрⷭ҇то́во за́повѣдемъ є҆гѡ̀: ны́нѣ же съ ни́ми ра́дꙋешисѧ, и҆ ликꙋ́еши въ нбⷭ҇ныхъ кро́вѣхъ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ:

Та́же: Гдⷭ҇и, поми́лꙋй. в҃ӏ.

Чⷭ҇тнѣ́йшꙋю херꙋвӏ̑мъ, и҆ сла́внѣйшꙋю без̾ сравне́нӏ̈ѧ серафӏ̑мъ, без̾ и҆стлѣ́нӏ̈ѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. Три́жды.

Гдⷭ҇и ӏ҆и҃се хрⷭ҇тѐ сн҃е бж҃ӏ̈й, мл҃твъ ра́ди пречⷭ҇тыѧ твоеѧ̀ мт҃ре, прпⷣбныхъ и҆ бг҃оно́сныхъ ѻ҆тє́цъ на́шихъ, и҆ всѣ́хъ ст҃ы́хъ, поми́лꙋй на́съ. А҆ми́нь.

По причаще́нӏ̈и же да храни́тъ себѐ кӏ́йждо въ трезвѣ́нӏ̈и, и҆ воздержа́нӏ̈и, и҆ немногоглаго́ланӏ̈и: да бы̀ въ то́й де́нь че́стнѡ соблю́лъ въ себѣ̀ хрⷭ҇та̀ прӏ̈ѧ́таго.

ЧАСЫ̀ СТ҃Ы́Ѧ ПА́СХИ.

Мл҃твами ст҃ы́хъ ѻ҆тє́цъ на́шихъ, гдⷭ҇и ӏ҆и҃се хрⷭ҇тѐ бж҃е на́шъ, поми́лꙋй на́съ. А҆ми́нь.

Хрⷭ҇то́съ воскр҃се и҆з̾ ме́ртвыхъ, сме́ртӏ̈ю сме́рть попра́въ, и҆ сꙋ́щымъ во гробѣ́хъ живо́тъ дарова́въ. Три́жды.

Гла́съ ѕ҃:

Воскрⷭ҇нӏ̈е хрⷭ҇то́во ви́дѣвше, поклони́мсѧ ст҃о́мꙋ гдⷭ҇ꙋ ӏ҆и҃сꙋ, є҆ди́номꙋ безгрѣ́шномꙋ. Крⷭ҇тꙋ̀ твоемꙋ̀ покланѧ́емсѧ хрⷭ҇тѐ, и҆ ст҃о́е воскрⷭ҇нӏ̈е твоѐ пое́мъ и҆ сла́вимъ: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не зна́емъ, и҆́мѧ твоѐ и҆менꙋ́емъ. Прӏ̈иди́те всѝ вѣ́рнӏ̈и, поклони́мсѧ ст҃о́мꙋ хрⷭ҇то́вꙋ воскрⷭ҇нӏ̈ю: се́ бо прӏ̈и́де крⷭ҇то́мъ ра́дость всемꙋ̀ мӏ́рꙋ. Всегда̀ бл҃гословѧ́ще гдⷭ҇а, пое́мъ воскрⷭ҇нӏ̈е є҆гѡ̀: распѧ́тӏ̈е бо претерпѣ́въ, сме́ртӏ̈ю сме́рть разрꙋшѝ. Три́жды.

Ѵ҆пакоѝ, гла́съ д҃:

Предвари́вшыѧ ѹ҆́тро ꙗ҆̀же ѡ҆ марӏ́и, и҆ ѡ҆брѣ́тшыѧ ка́мень ѿвале́нъ ѿ гро́ба, слы́шахꙋ ѿ а҆́гг҃ла: во свѣ́тѣ присносꙋ́щнѣмъ сꙋ́щаго, съ ме́ртвыми что̀ и҆́щете ꙗ҆́кѡ человѣ́ка; ви́дите грѡ́бныѧ пелєны̀, тецы́те, и҆ мӏ́рꙋ проповѣ́дите, ꙗ҆́кѡ воста̀ гдⷭ҇ь, ѹ҆мертви́вый сме́рть, ꙗ҆́кѡ є҆́сть сн҃ъ бг҃а, сп҃са́ющагѡ ро́дъ человѣ́ческӏ̈й. Є҆ди́нощи.

Конда́къ, гла́съ и҃:

А҆́ще и҆ во гро́бъ снизше́лъ є҆сѝ, безсме́ртне, но а҆́довꙋ разрꙋши́лъ є҆сѝ си́лꙋ, и҆ воскрⷭ҇лъ є҆сѝ ꙗ҆́кѡ побѣди́тель хрⷭ҇тѐ бж҃е, жена́мъ мѷроно́сицамъ вѣща́вый: ра́дꙋйтесѧ! и҆ твои̑мъ а҆пⷭ҇лѡмъ ми́ръ да́рꙋѧй, па́дшымъ подаѧ́й воскрⷭ҇нӏ̈е. Є҆ди́нощи.

И҆ тропарѝ:

Во гро́бѣ пло́тски, во а҆́дѣ же съ дꙋше́ю ꙗ҆́кѡ бг҃ъ, въ раи́ же съ разбо́йникомъ, и҆ на прⷭ҇то́лѣ бы́лъ є҆сѝ, хрⷭ҇тѐ, со ѻ҆ц҃е́мъ и҆ дх҃омъ, всѧ̑ и҆сполнѧ́ѧй неѡпи́санный.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Ꙗ҆́кѡ живоно́сецъ, ꙗ҆́кѡ раѧ̀ краснѣ́йшӏ̈й, вои́стиннꙋ и҆ черто́га всѧ́кагѡ ца́рскагѡ показа́сѧ свѣтлѣ́йшӏ̈й, хрⷭ҇тѐ, гро́бъ тво́й, и҆сто́чникъ на́шегѡ воскрⷭ҇нӏ̈ѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Вы́шнѧгѡ ѡ҆сщ҃е́нное бжⷭ҇твенное селе́нӏ̈е, ра́дꙋйсѧ. Тобо́ю бо даде́сѧ ра́дость, бцⷣе, зовꙋ́щымъ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце.

Гдⷭ҇и, поми́лꙋй. [м҃.]

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. Три́жды.

СТӀ̈ХИ̑РЫ СТ҃Ы́Ѧ ПА́СХИ.

Гла́съ є҃.

Стӏ́хъ: Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀.

Па́сха сщ҃е́ннаѧ на́мъ дне́сь показа́сѧ, па́сха но́ва ст҃а́ѧ, па́сха та́инственнаѧ, па́сха всечⷭ҇тна́ѧ, па́сха хрⷭ҇то́съ и҆зба́витель: па́сха непоро́чнаѧ, па́сха вели́каѧ, па́сха вѣ́рныхъ: па́сха двє́ри ра̑йскӏ̈ѧ на́мъ ѿверза́ющаѧ: па́сха всѣ́хъ ѡ҆сщ҃а́ющаѧ вѣ́рныхъ.

Стӏ́хъ: Ꙗ҆́кѡ и҆счеза́етъ ды́мъ, да и҆сче́знꙋтъ.

Прӏ̈иди́те ѿ видѣ́нӏ̈ѧ жєны̀ бл҃говѣ̑стницы, и҆ сӏ̈ѡ́нꙋ рцы́те: прӏ̈имѝ ѿ на́съ ра́дости бл҃говѣ́щенӏ̈ѧ, воскрⷭ҇нӏ̈ѧ хрⷭ҇то́ва: красꙋ́йсѧ, ликꙋ́й, и҆ ра́дꙋйсѧ ӏ҆ерⷭ҇ли́ме, цр҃ѧ̀ хрⷭ҇та̀ ѹ҆зрѣ́въ и҆з̾ гро́ба, ꙗ҆́кѡ жениха̀ происходѧ́ща.

Стӏ́хъ: Та́кѡ да поги́бнꙋтъ грѣ̑шницы ѿ лица̀ бж҃ӏ̈ѧ, а҆ првⷣницы да возвеселѧ́тсѧ.

Мѷронѡ́сицы жєны̀, ѹ҆́трꙋ глꙋбокꙋ̀, предста́вшѧ гро́бꙋ живода́вца, ѡ҆брѣто́ша а҆́гг҃ла на ка́мени сѣдѧ́ща, и҆ то́й провѣща́въ и҆̀мъ, си́це глаго́лаше: что̀ и҆́щете жива́гѡ съ ме́ртвыми; что̀ пла́чете нетлѣ́ннагѡ во тлѝ; ше́дше проповѣ́дите ѹ҆ч҃нкѡ́мъ є҆гѡ̀.

Стӏ́хъ: Се́й де́нь, є҆го́же сотворѝ гдⷭ҇ь, возра́дꙋемсѧ и҆ возвесели́мсѧ во́нь.

Па́сха кра́снаѧ, па́сха, гдⷭ҇нѧ па́сха, па́сха всечⷭ҇тна́ѧ на́мъ возсӏ̈ѧ̀: па́сха, ра́достӏ̈ю дрꙋ́гъ дрꙋ́га ѡ҆б̾и́мемъ. ѽ па́сха! и҆збавле́нӏ̈е ско́рби, и҆́бо и҆з̾ гро́ба дне́сь, ꙗ҆́кѡ ѿ черто́га возсӏ̈ѧ́въ хрⷭ҇то́съ, жєны̀ ра́дости и҆спо́лни, глаго́лѧ: проповѣ́дите а҆пⷭ҇лѡмъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Воскрⷭ҇нӏ̈ѧ де́нь, и҆ просвѣти́мсѧ торжество́мъ, и҆ дрꙋ́гъ дрꙋ́га ѡ҆б̾и́мемъ. Рце́мъ, бра́тӏ̈е, и҆ ненави́дѧщымъ на́съ, прости́мъ всѧ̑ воскрⷭ҇нӏ̈емъ, и҆ та́кѡ возопӏ̈и́мъ:

Хрⷭ҇то́съ воскр҃се и҆з̾ ме́ртвыхъ, сме́ртӏ̈ю сме́рть попра́въ, и҆ сꙋ́щымъ во гробѣ́хъ живо́тъ дарова́въ.

КАНѠ́НЪ СТ҃Ы́Ѧ ПА́СХИ.

Творе́нӏ̈е ст҃а́гѡ ӏ҆ѡа́нна дамаски́на.

Гла́съ а҃.

Пѣ́снь а҃.

Їрмо́съ: Воскрⷭ҇нӏ̈ѧ де́нь, просвѣти́мсѧ лю́дӏ̈е: па́сха, гдⷭ҇нѧ па́сха! ѿ сме́рти бо къ жи́зни, и҆ ѿ землѝ къ нб҃сѝ, хрⷭ҇то́съ бг҃ъ на́съ преведѐ, побѣ́днꙋю пою́щыѧ.

Припѣ́въ: Хрⷭ҇то́съ воскр҃се и҆з̾ ме́ртвыхъ.

Ѡ҆чи́стимъ чꙋ̑вствӏ̈ѧ, и҆ ѹ҆́зримъ непристꙋ́пнымъ свѣ́томъ воскрⷭ҇нӏ̈ѧ, хрⷭ҇та̀ блиста́ющасѧ, и҆ ра́дꙋйтесѧ, рекꙋ́ща ꙗ҆́снѡ да ѹ҆слы́шимъ, побѣ́днꙋю пою́ще.

Хрⷭ҇то́съ воскр҃се и҆з̾ ме́ртвыхъ.

Нб҃са̀ ѹ҆̀бо досто́йнѡ да веселѧ́тсѧ, землѧ́ же да ра́дꙋетсѧ, да пра́зднꙋетъ же мӏ́ръ, ви́димый же ве́сь и҆ неви́димый: хрⷭ҇то́съ бо воста̀, весе́лӏ̈е вѣ́чное.^[и҃ӏ]

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Бг҃оро́диченъ: Ѹ҆мерщвле́нӏ̈ѧ предѣ́лъ сломи́ла є҆сѝ, вѣ́чнꙋю жи́знь ро́ждшаѧ хрⷭ҇та̀, и҆з̾ гро́ба возсӏ̈ѧ́вшаго дне́сь, дв҃о всенепоро́чнаѧ, и҆ мӏ́ръ просвѣти́вшаго.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Воскрⷭ҇шаго ви́дѣвши сн҃а твоего̀ и҆ бг҃а, ра́дꙋйсѧ со а҆пⷭ҇лы бг҃обл҃года́тнаѧ чⷭ҇таѧ: и҆ є҆́же ра́дꙋйсѧ пе́рвѣе, ꙗ҆́кѡ всѣ́хъ ра́дости вина̀, воспрӏ̈ѧ́ла є҆сѝ, бг҃омт҃и всенепоро́чнаѧ.

Пѣ́снь г҃.

Їрмо́съ: Прӏ̈иди́те пи́во пӏ̈е́мъ но́вое, не ѿ ка́мене непло́дна чꙋдодѣ́емое, но нетлѣ́нӏ̈ѧ и҆сто́чникъ, и҆з̾ гро́ба ѡ҆дожди́вша хрⷭ҇та̀, въ не́мже ѹ҆твержда́емсѧ.

Хрⷭ҇то́съ воскр҃се и҆з̾ ме́ртвыхъ.

Ны́нѣ всѧ̑ и҆спо́лнишасѧ свѣ́та, нб҃о же и҆ землѧ̀ и҆ преиспѡ́днѧѧ: да пра́зднꙋетъ ѹ҆̀бо всѧ̀ тва́рь воста́нӏ̈е хрⷭ҇то́во, въ не́мже ѹ҆твержда́етсѧ.

Хрⷭ҇то́съ воскр҃се и҆з̾ ме́ртвыхъ.

Вчера̀ спогребо́хсѧ тебѣ̀ хрⷭ҇тѐ, совостаю̀ дне́сь воскрⷭ҇шꙋ тебѣ̀, сраспина́хсѧ тебѣ̀ вчера̀, са́мъ мѧ̀ спросла́ви, сп҃се, во црⷭ҇твӏ̈и твое́мъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Бг҃оро́диченъ: На нетлѣ́ннꙋю жи́знь прихождꙋ̀ дне́сь бл҃гостӏ̈ю ро́ждшагѡсѧ и҆з̾ тебє̀, чⷭ҇таѧ, и҆ всѣ̑мъ концє́мъ свѣ́тъ ѡ҆блиста́вшагѡ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Бг҃а є҆го́же родила̀ є҆сѝ пло́тӏ̈ю, и҆з̾ ме́ртвыхъ, ꙗ҆́коже речѐ, воста́вша ви́дѣвши чⷭ҇таѧ, ликꙋ́й, и҆ сегѡ̀ ꙗ҆́кѡ бг҃а, пречⷭ҇таѧ, возвелича́й.

Ѵ҆пакоѝ, гла́съ д҃:

Пѣ́снь д҃.

Їрмо́съ: На бжⷭ҇твеннѣй стра́жи, бг҃оглаго́ливый а҆ввакꙋ́мъ да ста́нетъ съ на́ми, и҆ пока́жетъ свѣтоно́сна а҆́гг҃ла, ꙗ҆́снѡ глаго́люща: дне́сь сп҃се́нӏ̈е мӏ́рꙋ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.

Хрⷭ҇то́съ воскр҃се и҆з̾ ме́ртвыхъ.

Мꙋ́жескӏ̈й ѹ҆́бѡ по́лъ, ꙗ҆́кѡ разве́рзый двⷭ҇твеннꙋю ѹ҆тро́бꙋ, ꙗ҆ви́сѧ хрⷭ҇то́съ: ꙗ҆́кѡ чл҃вѣ́къ же, а҆́гнецъ нарече́сѧ: непоро́ченъ же, ꙗ҆́кѡ невкꙋ́сенъ скве́рны, на́ша па́сха, и҆ ꙗ҆́кѡ бг҃ъ и҆́стиненъ, соверше́нъ рече́сѧ.

Хрⷭ҇то́съ воскр҃се и҆з̾ ме́ртвыхъ.

Ꙗ҆́кѡ є҆динолѣ́тный а҆́гнецъ, бл҃гослове́нный на́мъ вѣне́цъ хрⷭ҇то́съ, во́лею за всѣ́хъ закла́нъ бы́сть, па́сха чⷭ҇ти́тельнаѧ, и҆ па́ки и҆з̾ гро́ба кра́сное пра́вды на́мъ возсӏ̈ѧ̀ сл҃нце.

Хрⷭ҇то́съ воскр҃се и҆з̾ ме́ртвыхъ.

Бг҃оѻц҃ъ ѹ҆́бѡ дв҃дъ пред̾ сѣ́ннымъ ковче́гомъ скака́ше и҆гра́ѧ, лю́дӏ̈е же бж҃ӏ̈и ст҃ӏ́и, ѻ҆бразѡ́въ сбытӏ̈ѐ зрѧ́ще, весели́мсѧ бжⷭ҇твеннѣ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Бг҃оро́диченъ: Созда́вый а҆да́ма твоего̀ пра́ѻц҃а чⷭ҇таѧ, зи́ждетсѧ ѿ тебє̀, и҆ сме́ртное жили́ще разорѝ свое́ю сме́ртӏ̈ю дне́сь, и҆ ѡ҆зарѝ всѧ̑ бжⷭ҇твенными блиста́ньми воскрⷭ҇нӏ̈ѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Є҆го́же родила̀ є҆сѝ хрⷭ҇та̀, прекра́снѡ и҆з̾ ме́ртвыхъ возсӏ̈ѧ́вша, чⷭ҇таѧ, зрѧ́щи, до́браѧ и҆ непоро́чнаѧ въ жена́хъ и҆ кра́снаѧ, дне́сь во сп҃се́нӏ̈е всѣ́хъ, со а҆пⷭ҇лы ра́дꙋющисѧ того̀ прославлѧ́й.

Пѣ́снь є҃.

Їрмо́съ: Ѹ҆́тренюемъ ѹ҆́треннюю глꙋбокꙋ̀, и҆ вмѣ́стѡ мѵ́ра пѣ́снь принесе́мъ влⷣцѣ, и҆ хрⷭ҇та̀ ѹ҆́зримъ, пра́вды сл҃нце, всѣ̑мъ жи́знь возсӏ̈ѧ́юща.

Хрⷭ҇то́съ воскр҃се и҆з̾ ме́ртвыхъ.

Безмѣ́рное твоѐ бл҃гоꙋтро́бӏ̈е а҆́довыми ѹ҆́зами содержи́мӏ̈и зрѧ́ще, къ свѣ́тꙋ и҆дѧ́хꙋ хрⷭ҇тѐ, весе́лыми нога́ми, па́схꙋ хва́лѧще вѣ́чнꙋю.

Хрⷭ҇то́съ воскр҃се и҆з̾ ме́ртвыхъ.

Пристꙋ́пимъ свѣщено́снӏ̈и, и҆сходѧ́щꙋ хрⷭ҇тꙋ̀ и҆з̾ гро́ба ꙗ҆́кѡ женихꙋ̀, и҆ спра́зднꙋимъ любопра́зднственными чи́нми па́схꙋ бж҃ӏ̈ю сп҃си́тельнꙋю.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Бг҃оро́диченъ: Просвѣща́етсѧ бжⷭ҇твенными лꙋча́ми и҆ живоно́сными воскрⷭ҇нӏ̈ѧ сн҃а твоегѡ̀, бг҃омт҃и пречⷭ҇таѧ, и҆ ра́дости и҆сполнѧ́етсѧ бл҃гочести́выхъ собра́нӏ̈е.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Не разве́рзлъ є҆сѝ врата̀ двⷭ҇тва въ воплоще́нӏ̈и, гро́ба не разрꙋши́лъ є҆сѝ печа́тей, цр҃ю̀ созда́нӏ̈ѧ: ѿѻнꙋ́дꙋже воскрⷭ҇шаго тѧ̀ зрѧ́щи мт҃и, ра́довашесѧ.

Пѣ́снь ѕ҃.

Їрмо́съ: Снизше́лъ є҆сѝ въ преиспѡ́днѧѧ землѝ, и҆ сокрꙋши́лъ є҆сѝ верєѝ вѣ́чныѧ, содержа́щыѧ свѧ̑занныѧ, хрⷭ҇тѐ, и҆ тридне́венъ ꙗ҆́кѡ ѿ ки́та ӏ҆ѡ́на, воскр҃слъ є҆сѝ ѿ гро́ба.

Хрⷭ҇то́съ воскр҃се и҆з̾ ме́ртвыхъ.

Сохрани́въ цѣ̑ла зна́мєнӏ̈ѧ хрⷭ҇тѐ, воскр҃слъ є҆сѝ ѿ гро́ба, ключѝ дв҃ы не вреди́вый въ ржⷭ҇твѣ̀ твое́мъ, и҆ ѿве́рзлъ є҆сѝ на́мъ ра̑йскӏ̈ѧ двє́ри.

Хрⷭ҇то́съ воскр҃се и҆з̾ ме́ртвыхъ.

Сп҃се мо́й, живо́е же и҆ неже́ртвенное заколе́нӏ̈е, ꙗ҆́кѡ бг҃ъ са́мъ себѐ во́лею приве́дъ ѻ҆ц҃ꙋ̀, совоскр҃си́лъ є҆сѝ всеро́днаго а҆да́ма, воскр҃съ ѿ гро́ба.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Бг҃оро́диченъ: Возведе́сѧ дре́вле держи́мое сме́ртӏ̈ю и҆ тлѣ́нӏ̈емъ, воплоти́вшимсѧ ѿ твоегѡ̀ пречⷭ҇тагѡ чре́ва, къ нетлѣ́ннѣй, и҆ присносꙋ́щнѣй жи́зни, бцⷣе дв҃о.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Сни́де въ преиспѡ́днѧѧ землѝ, въ ложесна̀ твоѧ̑ чⷭ҇таѧ сше́дый, и҆ всели́выйсѧ и҆ воплоти́выйсѧ па́че ѹ҆ма̀, и҆ воздви́же съ собо́ю а҆да́ма, воскр҃съ ѿ гро́ба.

Конда́къ, гла́съ и҃:

Ӏ҆́косъ:

Є҆́же пре́жде со́лнца сл҃нце заше́дшее и҆ногда̀ во гро́бъ, предвари́ша ко ѹ҆́трꙋ, и҆́щꙋщыѧ ꙗ҆́кѡ днѐ мѷронѡ́сицы дѣ̑вы, и҆ дрꙋга̀ ко дрꙋзѣ́й вопӏ̈ѧ́хꙋ: ѽ дрꙋги́ни! прӏ̈иди́те, вонѧ́ми пома́жемъ тѣ́ло живоно́сное и҆ погребе́ное, пло́ть воскр҃си́вшагѡ па́дшаго а҆да́ма, лежа́щꙋю во гро́бѣ. И҆́демъ, потщи́мсѧ ꙗ҆́коже волсвѝ, и҆ поклони́мсѧ, и҆ принесе́мъ мѵ̑ра ꙗ҆́кѡ да́ры, не въ пелена́хъ, но въ плащани́цѣ ѡ҆бви́томꙋ, и҆ пла́чимъ, и҆ возопӏ̈и́мъ: ѽ влⷣко, воста́ни, па́дшымъ подаѧ́й воскрⷭ҇нӏ̈е.

Та́же глаго́лемъ во гла́съ ѕ҃:

Воскр҃съ ӏ҆и҃съ ѿ гро́ба, ꙗ҆́коже проречѐ, дадѐ на́мъ живо́тъ вѣ́чный, и҆ ве́лӏ̈ю ми́лость. Три́жды.

Пѣ́снь з҃.

Їрмо́съ: Ѻ҆́троки ѿ пе́щи и҆зба́вивый, бы́въ чл҃вѣ́къ, стра́ждетъ ꙗ҆́кѡ сме́ртенъ, и҆ стрⷭ҇тӏ̈ю сме́ртное въ нетлѣ́нӏ̈ѧ ѡ҆блачи́тъ бл҃голепӏ̈е, є҆ди́нъ бл҃гослове́нъ ѻ҆тцє́въ бг҃ъ, и҆ препросла́вленъ.

Хрⷭ҇то́съ воскр҃се и҆з̾ ме́ртвыхъ.

Жєны̀ съ мѵ́ры бг҃омꙋ̑дрыѧ въ слѣ́дъ тебє̀ теча́хꙋ: є҆го́же ꙗ҆́кѡ ме́ртва со слеза́ми и҆ска́хꙋ, поклони́шасѧ ра́дꙋющыѧсѧ живо́мꙋ бг҃ꙋ, и҆ па́схꙋ та́йнꙋю твои̑мъ хрⷭ҇тѐ ѹ҆ченикѡ́мъ бл҃говѣсти́ша.

Хрⷭ҇то́съ воскр҃се и҆з̾ ме́ртвыхъ.

Сме́рти пра́зднꙋемъ ѹ҆мерщвле́нӏ̈е, а҆́дово разрꙋше́нӏ̈е, и҆но́гѡ житӏ̈ѧ̀ вѣ́чнагѡ нача́ло, и҆ и҆гра́юще пое́мъ вино́внаго, є҆ди́наго бл҃гослове́ннаго ѻ҆тцє́въ бг҃а, и҆ препросла́вленнаго.

Хрⷭ҇то́съ воскр҃се и҆з̾ ме́ртвыхъ.

Ꙗ҆́кѡ вои́стиннꙋ сщ҃е́ннаѧ, и҆ всепра́зднственнаѧ сӏ̈ѧ̀ сп҃си́тельнаѧ но́щь, и҆ свѣтоза́рнаѧ, свѣтоно́снагѡ днѐ воста́нӏ̈ѧ сꙋ́щи провозвѣ́стница: въ не́йже безлѣ́тный свѣ́тъ и҆з̾ гро́ба пло́тски всѣ̑мъ возсӏ̈ѧ̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Бг҃оро́диченъ: Ѹ҆мертви́въ сн҃ъ тво́й сме́рть, всенепоро́чнаѧ, дне́сь, всѣ̑мъ смє́ртнымъ пребыва́ющӏ̈й живо́тъ во вѣ́ки вѣкѡ́въ дарова̀, є҆ди́нъ бл҃гослове́нный ѻ҆тцє́въ бг҃ъ, и҆ препросла́вленный.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Всѣ́мъ црⷭ҇твꙋѧй созда́нӏ̈емъ, бы́въ чл҃вѣ́къ, всели́сѧ во твою̀ бг҃облагода́тнаѧ ѹ҆тро́бꙋ, и҆ распѧ́тӏ̈е претерпѣ́въ и҆ сме́рть, воскр҃се бг҃олѣ́пнѡ, совозста́вивъ на́съ ꙗ҆́кѡ всеси́ленъ.

Пѣ́снь и҃.

Їрмо́съ: Се́й нарече́нный и҆ ст҃ы́й де́нь, є҆ди́нъ сꙋббѡ́тъ цр҃ь и҆ гдⷭ҇ь, пра́здникѡвъ пра́здникъ, и҆ торжество̀ є҆́сть торже́ствъ: во́ньже бл҃гослови́мъ хрⷭ҇та̀ во вѣ́ки.

Хрⷭ҇то́съ воскр҃се и҆з̾ ме́ртвыхъ.

Прӏ̈иди́те но́вагѡ вӏ̈ногра́да рожде́нӏ̈ѧ, бжⷭ҇твеннагѡ весе́лӏ̈ѧ, въ наро́читомъ днѝ воскрⷭ҇нӏ̈ѧ, црⷭ҇твӏ̈ѧ хрⷭ҇то́ва прӏ̈ѡбщи́мсѧ, пою́ще є҆го̀ ꙗ҆́кѡ бг҃а во вѣ́ки.

Хрⷭ҇то́съ воскр҃се и҆з̾ ме́ртвыхъ.

Возведѝ ѻ҆́крестъ ѻ҆́чи твоѝ сӏ̈ѡ́не и҆ ви́ждь: се́ бо прӏ̈идо́ша къ тебѣ̀ ꙗ҆́кѡ бг҃освѣ̑тлаѧ свѣти̑ла, ѿ за́пада, и҆ сѣ́вера, и҆ мо́рѧ, и҆ восто́ка ча̑да твоѧ̑, въ тебѣ̀ бл҃гословѧ̑щаѧ хрⷭ҇та̀ во вѣ́ки.

Прест҃а́ѧ трⷪ҇це бж҃е на́шъ, сла́ва тебѣ̀.

Ѻ҆́ч҃е вседержи́телю, и҆ сло́ве, и҆ дш҃е, тремѝ соединѧ́емое во ѵ҆поста́сѣхъ є҆стество̀, пресꙋ́щественне и҆ пребжⷭ҇твенне, въ тѧ̀ крⷭ҇ти́хомсѧ, и҆ тѧ̀ бл҃гослови́мъ во всѧ̑ вѣ́ки.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Бг҃оро́диченъ: Прӏ̈и́де тобо́ю въ мӏ́ръ гдⷭ҇ь, дв҃о бцⷣе, и҆ чре́во а҆́дово расто́ргъ, смє́ртнымъ на́мъ воскрⷭ҇нӏ̈е дарова̀: тѣ́мже бл҃гослови́мъ є҆го̀ во вѣ́ки.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Всю̀ низложи́въ сме́рти держа́вꙋ сн҃ъ тво́й дв҃о, свои́мъ воскрⷭ҇нӏ̈емъ, ꙗ҆́кѡ бг҃ъ крѣ́пкӏ̈й совознесѐ на́съ и҆ ѡ҆божѝ: тѣ́мже воспѣва́емъ є҆го̀ во вѣ́ки.

Пѣ́снь ѳ҃.

Сӏ̈ѧ̑ два̀ припѣ̑ва чте́мъ пред̾ ӏ҆рмосо́мъ Свѣти́сѧ, свѣти́сѧ:

Припѣ́въ: Вели́читъ дꙋша̀ моѧ̀ воскрⷭ҇шаго тридне́внѡ ѿ гро́ба, хрⷭ҇та̀ жизнода́вца.

Їрмо́съ: Свѣти́сѧ, свѣти́сѧ, но́вый ӏ҆ерⷭ҇ли́ме: сла́ва бо гдⷭ҇нѧ на тебѣ̀ возсӏ̈ѧ̀. Ликꙋ́й ны́нѣ, и҆ весели́сѧ сӏ̈ѡ́не. Ты́ же чⷭ҇таѧ красꙋ́йсѧ бцⷣе, ѡ҆ воста́нӏ̈и ржⷭ҇тва̀ твоегѡ̀.

Припѣ́въ: Вели́читъ дꙋша̀ моѧ̀ во́лею страда́вша, и҆ погребе́на, и҆ воскрⷭ҇шаго тридне́внѡ ѿ гро́ба.

Припѣ́въ: Хрⷭ҇то́съ но́ваѧ па́сха, же́ртва жива́ѧ, а҆́гнецъ бж҃ӏ̈й взе́млѧй грѣхѝ ми́ра.

Ѽ бжⷭ҇твеннагѡ, ѽ любе́знагѡ, ѽ сладча́йшагѡ твоегѡ̀ гла́са! Съ на́ми бо нело́жнѡ ѡ҆бѣща́лсѧ є҆сѝ бы́ти, до сконча́нӏ̈ѧ вѣ́ка хрⷭ҇тѐ: є҆го́же, вѣ́рнӏ̈и, ѹ҆твержде́нӏ̈е наде́жди и҆мꙋ́ще, ра́дꙋемсѧ.

Припѣ́въ: А҆́гг҃лъ вопӏ̈ѧ́ше бл҃года́тнѣй: чⷭ҇таѧ дв҃о ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскр҃се тридне́венъ ѿ гро́ба, и҆ мє́ртвыѧ воздви́гнꙋвый: лю́дӏ̈е весели́тесѧ.

Припѣ́въ: Возбꙋди́лъ є҆сѝ, ѹ҆снꙋ́въ, мє́ртвыѧ ѿ вѣ́ка, цр҃ски рыка́вый ꙗ҆́кѡ ѿ ӏ҆ꙋ́ды ле́въ.

Припѣ́въ: Магдали́на марӏ́а притечѐ ко гро́бꙋ, и҆ хрⷭ҇та̀ ви́дѣвши, ꙗ҆́кѡ вертогра́дарѧ вопроша́ше.

Припѣ́въ: А҆́гг҃лъ ѡ҆блиста́ѧй жена́мъ вопӏ̈ѧ́ше: преста́ните ѿ сле́зъ, ꙗ҆́кѡ хрⷭ҇то́съ воскр҃се.

Ѽ па́сха ве́лӏ̈ѧ и҆ сщ҃е́ннѣйшаѧ, хрⷭ҇тѐ! ѽ мꙋ́дросте, и҆ сло́ве бж҃ӏ̈й, и҆ си́ло! подава́й на́мъ и҆́стѣе тебє̀ причаща́тисѧ, въ невече́рнѣмъ днѝ црⷭ҇твӏ̈ѧ твоегѡ̀.

Припѣ́въ: Хрⷭ҇то́съ воскр҃се, сме́рть попра́вый, и҆ мє́ртвыѧ воздви́гнꙋвый, лю́дӏ̈е весели́тесѧ.

Припѣ́въ: Дне́сь всѧ́ка тва́рь весели́тсѧ и҆ ра́дꙋетсѧ: ꙗ҆́кѡ хрⷭ҇то́съ воскр҃се, и҆ а҆́дъ плѣни́сѧ.

Припѣ́въ: Дне́сь влⷣка плѣнѝ а҆́да, воздви́гнꙋвый ю҆́зники, ꙗ҆̀же ѿ вѣ́ка и҆мѧ́ше лю́тѣ ѡ҆держи̑мыѧ.

Припѣ́въ: Вели́читъ дꙋша̀ моѧ̀ трӏ̈ѷпоста́снагѡ и҆ нераздѣ́льнагѡ бжⷭ҇тва̀ держа́вꙋ.

Бг҃оро́диченъ: Согла́снѡ дв҃о, тебѐ бл҃жи́мъ вѣ́рнӏ̈и: ра́дꙋйсѧ две́ре гдⷭ҇нѧ: ра́дꙋйсѧ гра́де ѡ҆дꙋшевле́нный: ра́дꙋйсѧ, є҆ѧ́же ра́ди на́мъ ны́нѣ возсӏ̈ѧ̀ свѣ́тъ, и҆з̾ тебє̀ рожде́ннагѡ и҆з̾ ме́ртвыхъ воскрⷭ҇нӏ̈ѧ.

Припѣ́въ: Ра́дꙋйсѧ дв҃о, ра́дꙋйсѧ, ра́дꙋйсѧ бл҃гослове́ннаѧ, ра́дꙋйсѧ препросла́вленнаѧ: тво́й бо сн҃ъ воскр҃се тридне́венъ ѿ гро́ба.

Бг҃оро́диченъ: Весели́сѧ и҆ ра́дꙋйсѧ бжⷭ҇твеннаѧ две́ре свѣ́та: заше́дый бо ӏ҆и҃съ во гро́бъ возсӏ̈ѧ̀, просӏ̈ѧ́въ со́лнца свѣтлѣ́е, и҆ вѣ̑рныѧ всѧ̑ ѡ҆зари́въ, бг҃ора́дованнаѧ влⷣчце.

Є҆ѯапостӏ̈ла́рӏ̈й. Самогла́сенъ:

Пло́тӏ̈ю ѹ҆снꙋ́въ, ꙗ҆́кѡ ме́ртвъ, цр҃ю̀ и҆ гдⷭ҇и, тридне́венъ воскр҃слъ є҆сѝ, а҆да́ма воздви́гъ ѿ тлѝ, и҆ ѹ҆праздни́въ сме́рть: па́сха нетлѣ́нӏ̈ѧ, мӏ́ра сп҃се́нӏ̈е. Три́жды.

ТРОПАРЍ И҆ КОНДАКЍ ВОСКРⷭ҇НЫ
Ѻ҆СМЍ ГЛАСѠ́ВЪ.

ТРОПАРЍ И҆ КОНДАКЍ ВСЄѦ̀ СЄДМИ́ЦЫ

Въ недѣ́лю ве́чера и҆ въ понедѣ́льникъ ѹ҆́тра,
нбⷭ҇нымъ чинѡ́мъ безплѡ́тнымъ.

Тропа́рь, гла́съ д҃:

Нбⷭ҇ныхъ во́инствъ а҆рхӏ̈страти́зи, / мо́лимъ ва́съ при́снѡ мы̀ недосто́йнӏ̈и, / да ва́шими мл҃твами ѡ҆градитѐ на́съ / кро́вомъ кри́лъ невеще́ственныѧ ва́шеѧ сла́вы, / сохранѧ́юще на́съ припа́дающихъ прилѣ́жнѡ, и҆ вопӏ̈ю́щихъ: / ѿ бѣ́дъ и҆зба́вите на́съ, // ꙗ҆́кѡ чинонача̑льницы вы́шнихъ си́лъ.

Конда́къ, гла́съ в҃:

А҆рхӏ̈страти́зи бж҃ӏ̈и, / слꙋжи́телӏ̈е бжⷭ҇твенныѧ сла́вы, / а҆́гг҃лѡвъ нача̑льницы, и҆ человѣ́кѡмъ наста̑вницы, / поле́зное на́мъ проси́те, / и҆ ве́лӏ̈ю млⷭ҇ть, // ꙗ҆́кѡ безпло́тныхъ а҆рхӏ̈страти́зи.

Въ понедѣ́льникъ ве́чера и҆ во вто́рникъ ѹ҆́тра,
прⷪ҇ро́кꙋ ӏ҆ѡа́ннꙋ прⷣте́чи.

Тропа́рь, гла́съ в҃:

Па́мѧть првⷣнагѡ съ похвала́ми, / тебѣ́ же довлѣ́етъ свидѣ́тельство гдⷭ҇не, прⷣте́че: / показа́лъ бо сѧ є҆сѝ вои́стиннꙋ и҆ прⷪ҇ро́кѡвъ чⷭ҇тнѣ́йшӏ̈й, / ꙗ҆́кѡ и҆ въ стрꙋѧ́хъ крⷭ҇ти́ти сподо́билсѧ є҆сѝ проповѣ́даннаго. / Тѣ́мже за и҆́стинꙋ пострада́въ ра́дꙋѧсѧ, / бл҃говѣсти́лъ є҆сѝ и҆ сꙋ́щымъ во а҆́дѣ бг҃а ꙗ҆́вльшагосѧ пло́тӏ̈ю, / взе́млющаго грѣ́хъ мӏ́ра, // и҆ подаю́щаго на́мъ ве́лӏ̈ю млⷭ҇ть.

Конда́къ, гла́съ то́йже:

Прⷪ҇ро́че бж҃ӏ̈й, и҆ прⷣте́че бл҃года́ти, / главꙋ̀ твою̀ ꙗ҆́кѡ ши́покъ сщ҃е́ннѣйшӏ̈й ѿ землѝ ѡ҆брѣ́тше, / и҆сцѣлє́нӏ̈ѧ всегда̀ прӏ̈е́млемъ: / и҆́бо па́ки ꙗ҆́коже пре́жде // въ мӏ́рѣ проповѣ́дꙋеши покаѧ́нӏ̈е.

Во вто́рникъ ве́чера и҆ въ сре́дꙋ ѹ҆́тра,
чⷭ҇тно́мꙋ крⷭ҇тꙋ̀.

Тропа́рь, гла́съ а҃:

Сп҃сѝ, гдⷭ҇и, лю́ди твоѧ̑, / и҆ бл҃гословѝ достоѧ́нӏ̈е твоѐ, / побѣ̑ды правосла̑внымъ хрⷭ҇тӏ̈а́нѡмъ на сопроти̑вныѧ да́рꙋѧ, // и҆ твоѐ сохранѧ́ѧ крⷭ҇то́мъ твои́мъ жи́тельство.

Конда́къ, гла́съ д҃:

Вознесы́йсѧ на крⷭ҇тъ во́лею, / тезоимени́томꙋ твоемꙋ̀ но́вомꙋ жи́тельствꙋ, / щедрѡ́ты твоѧ̑ да́рꙋй хрⷭ҇тѐ бж҃е, / возвеселѝ на́съ си́лою твое́ю, / побѣ̑ды даѧ̀ на́мъ на сопоста́ты, / посо́бӏ̈е и҆мꙋ́щымъ твоѐ ѻ҆рꙋ́жӏ̈е ми́ра, // непобѣди́мꙋю побѣ́дꙋ.

Въ сре́дꙋ ве́чера и҆ въ четверто́къ ѹ҆́тра,
а҆пⷭ҇лѡмъ, и҆ ст҃и́телю нӏ̈кола́ю.

Тропа́рь а҆пⷭ҇лѡмъ, гла́съ г҃:

А҆пⷭ҇ли ст҃ӏ́и, / моли́те млⷭ҇тиваго бг҃а, / да прегрѣше́нӏ̈й ѡ҆ставле́нӏ̈е // пода́стъ дꙋша́мъ на́шымъ.

Тропа́рь ст҃и́телю нӏ̈кола́ю, гла́съ д҃:

Пра́вило вѣ́ры, и҆ ѡ҆́бразъ кро́тости, / воздержа́нӏ̈ѧ ѹ҆чи́телѧ, / ꙗ҆ви́ тѧ ста́дꙋ твоемꙋ̀, / ꙗ҆́же веще́й и҆́стина: / сегѡ̀ ра́ди стѧжа́лъ є҆сѝ смире́нӏ̈емъ высѡ́каѧ, / нището́ю бога̑таѧ. / Ѻ҆́тче сщ҃еннонача́льниче нӏ̈ко́лае, / молѝ хрⷭ҇та̀ бг҃а, // сп҃сти́сѧ дꙋша́мъ на́шымъ.

Конда́къ а҆пⷭ҇лѡмъ, гла́съ в҃:

Твє́рдыѧ и҆ бг҃овѣща̑нныѧ проповѣ́датели, / ве́рхъ ѹ҆ч҃нкъ твои́хъ гдⷭ҇и, / прӏ̈ѧ́лъ є҆сѝ въ наслажде́нӏ̈е бл҃ги́хъ твои́хъ и҆ поко́й: / болѣ̑зни бо ѻ҆́нѣхъ, и҆ сме́рть прӏ̈ѧ́лъ є҆сѝ па́че всѧ́кагѡ всепло́дӏ̈ѧ, // є҆ди́не свѣ́дый сердє́чнаѧ.

Конда́къ ст҃и́телю нӏ̈кола́ю, гла́съ г҃:

Въ мѵ́рѣхъ, ст҃е, сщ҃еннодѣ́йствитель показа́лсѧ є҆сѝ, / хрⷭ҇то́во бо, прпⷣбне, є҆ѵⷢ҇лӏ̈е и҆спо́лнивъ: / положи́лъ є҆сѝ дꙋ́шꙋ твою̀ ѡ҆ лю́дехъ твои́хъ, / и҆ сп҃слъ є҆сѝ непови̑нныѧ ѿ сме́рти. / Сегѡ̀ ра́ди ѡ҆ст҃и́лсѧ є҆сѝ, // ꙗ҆́кѡ вели́кӏ̈й таи́нникъ бж҃ӏ̈ѧ бл҃года́ти.

Въ четверто́къ ве́чера и҆ въ пѧто́къ ѹ҆́тра,
чⷭ҇тно́мꙋ крⷭ҇тꙋ̀.

Тропа́рь, гла́съ а҃:

Конда́къ, гла́съ д҃:

Въ пѧто́къ ве́чера и҆ въ сꙋббѡ́тꙋ ѹ҆́тра,
всѣ̑мъ ст҃ы̑мъ, и҆ за ѹ҆поко́й.

Тропа́рь ст҃ы̑мъ, гла́съ в҃:

А҆пⷭ҇ли, мч҃нцы и҆ прⷪ҇ро́цы, / ст҃и́телӏ̈е, прпⷣбнӏ̈и и҆ првⷣнӏ̈и, / до́брѣ по́двигъ соверши́вшӏ̈и, и҆ вѣ́рꙋ соблю́дшӏ̈и, / дерзнове́нӏ̈е и҆мꙋ́ще ко сп҃сꙋ, / ѡ҆ на́съ того̀ ꙗ҆́кѡ бл҃га моли́те // сп҃сти́сѧ, мо́лимсѧ, дꙋша́мъ на́шымъ.

Дрꙋгӏ́й за ѹ҆поко́й, гла́съ то́йже:

Помѧнѝ гдⷭ҇и, ꙗ҆́кѡ бл҃гъ, рабы̑ твоѧ̑, / и҆ є҆ли̑ка въ житӏ̈ѝ согрѣши́ша, простѝ: / никто́же бо безгрѣ́шенъ, то́кмѡ ты̀ // могӏ́й и҆ преста́влєннымъ да́ти поко́й.

Конда́къ, гла́съ и҃:

Со ст҃ы́ми ѹ҆поко́й хрⷭ҇тѐ дꙋ́шы ра̑бъ твои́хъ, и҆дѣ́же нѣ́сть болѣ́знь, ни печа́ль, ни воздыха́нӏ̈е, но жи́знь безконе́чнаѧ.

Мч҃нченъ, гла́съ то́йже:

Ꙗ҆́кѡ нача́тки є҆стества̀, насади́телю тва́ри, / вселе́ннаѧ прино́ситъ тѝ гдⷭ҇и бг҃онѡ́сныѧ мч҃нки: / тѣ́хъ мл҃твами въ ми́рѣ глꙋбо́цѣ, // цр҃ковь твою̀, жи́тельство твоѐ бцⷣею соблюдѝ, многомлⷭ҇тиве.

ТРОПАРЍ, КОНДАКЍ, ЗАДОСТО́ЙНИКИ И҆ ВЄЛИЧА̑НӀ̈Ѧ ДВАНАДЄСѦ́ТЫХЪ ПРА́ЗДНИКОВ И҆ ПА́СХИ.

Ржⷭ҇тво̀ прест҃ы́ѧ влⷣчцы на́шеѧ бцⷣы,
и҆ приснодв҃ы мр҃ӏ́и:

мѣ́сѧца септе́мврӏ̈а въ и҃ де́нь (к҃а септе́мврӏ̈а).

Тропа́рь, гла́съ д҃:

Ржⷭ҇тво̀ твоѐ бцⷣе дв҃о, / ра́дость возвѣстѝ все́й вселе́ннѣй: / и҆з̾ тебє́ бо возсӏ̈ѧ̀ сл҃нце пра́вды, хрⷭ҇то́съ бг҃ъ на́шъ, / и҆ разрꙋши́въ клѧ́твꙋ, дадѐ бл҃гослове́нӏ̈е, // и҆ ѹ҆праздни́въ сме́рть, дарова̀ на́мъ живо́тъ вѣ́чный.

Конда́къ, гла́съ то́йже:

Їѡакӏ́мъ и҆ а҆́нна поноше́нӏ̈ѧ безча́дства, / и҆ а҆да́мъ и҆ є҆́ѵа ѿ тлѝ сме́ртныѧ свободи́стасѧ, пречⷭ҇таѧ, / во ст҃ѣ́мъ ржⷭ҇твѣ̀ твое́мъ. / То̀ пра́зднꙋютъ и҆ лю́дӏ̈е твоѝ, / вины̀ прегрѣше́нӏ̈й и҆зба́вльшесѧ, / внегда̀ зва́ти тѝ: // непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

Задосто́йникъ, гла́съ и҃:

Припѣ́въ: Велича́й дꙋшѐ моѧ̀, / пресла́вное ржⷭ҇тво̀ бж҃ӏ̈ѧ мт҃ре.

А҆рха́гг҃льскӏ̈й гла́съ вопӏ̈е́мъ тѝ, чⷭ҇таѧ: / ра́дꙋйсѧ бл҃года́тнаѧ, // гдⷭ҇ь съ тобо́ю.

Вхо́дъ гдⷭ҇ень въ ӏ҆ерⷭ҇ли́мъ:

въ недѣ́лю ва́ӏ̈й.

Тропа́рь, гла́съ а҃:

Ѻ҆́бщее воскрⷭ҇нӏ̈е пре́жде твоеѧ̀ стрⷭ҇ти ѹ҆вѣрѧ́ѧ, / и҆з̾ ме́ртвыхъ воздви́глъ є҆сѝ ла́зарѧ хрⷭ҇тѐ бж҃е. / Тѣ́мже и҆ мы̀ ꙗ҆́кѡ ѻ҆́троцы побѣ́ды зна́мєнӏ̈ѧ носѧ́ще, / тебѣ̀ побѣди́телю сме́рти вопӏ̈е́мъ: / ѡ҆са́нна въ вы́шнихъ, // бл҃гослове́нъ грѧды́й во и҆́мѧ гдⷭ҇не.

И҆ дрꙋгӏ́й, гла́съ д҃:

Спогре́бшесѧ тебѣ̀ креще́нӏ̈емъ хрⷭ҇тѐ бж҃е на́шъ, / безсме́ртныѧ жи́зни сподо́бихомсѧ воскрⷭ҇нӏ̈емъ твои́мъ, / и҆ воспѣва́юще зове́мъ: / ѡ҆са́нна въ вы́шнихъ, // бл҃гослове́нъ грѧды́й во и҆́мѧ гдⷭ҇не.

Конда́къ, гла́съ ѕ҃:

На прⷭ҇то́лѣ на нб҃сѝ, / на жребѧ́ти на землѝ носи́мый хрⷭ҇тѐ бж҃е, / а҆́гг҃лѡвъ хвале́нӏ̈е, и҆ дѣте́й воспѣва́нӏ̈е / прӏ̈ѧ́лъ є҆сѝ зовꙋ́щихъ тѝ: / бл҃гослове́нъ є҆сѝ // грѧды́й а҆да́ма воззва́ти.

Задосто́йникъ, гла́съ д҃:

Їрмо́съ: Бг҃ъ гдⷭ҇ь, и҆ ꙗ҆ви́сѧ на́мъ, / соста́вите пра́здникъ, / и҆ веселѧ́щесѧ прӏ̈иди́те, возвели́чимъ хрⷭ҇та̀, / съ ва́ӏ̈ами и҆ вѣ́твьми, пѣ́сньми зовꙋ́ще: // бл҃гослове́нъ грѧды́й во и҆́мѧ гдⷭ҇а сп҃са на́шегѡ.

Велича́нӏ̈е:

Велича́емъ тѧ̀, / живода́вче хрⷭ҇тѐ, / ѡ҆са́нна въ вы́шнихъ, и҆ мы̀ тебѣ̀ вопӏ̈е́мъ: / бл҃гослове́нъ грѧды́й // во и҆́мѧ гдⷭ҇не.

Свѣ́тлое хрⷭ҇то́во воскрⷭ҇нӏ̈е. Па́сха.

Тропа́рь, гла́съ є҃:

Хрⷭ҇то́съ воскр҃се и҆з̾ ме́ртвыхъ, / сме́ртӏ̈ю сме́рть попра́въ, // и҆ сꙋ́щымъ во гробѣ́хъ живо́тъ дарова́въ.

Конда́къ, гла́съ и҃:

А҆́ще и҆ во гро́бъ снизше́лъ є҆сѝ, безсме́ртне, / но а҆́довꙋ разрꙋши́лъ є҆сѝ си́лꙋ, / и҆ воскрⷭ҇лъ є҆сѝ ꙗ҆́кѡ побѣди́тель хрⷭ҇тѐ бж҃е, / жена́мъ мѷроно́сицамъ вѣща́вый: ра́дꙋйтесѧ! / и҆ твои̑мъ а҆пⷭ҇лѡмъ ми́ръ да́рꙋѧй, // па́дшымъ подаѧ́й воскрⷭ҇нӏ̈е.

Задосто́йникъ, гла́съ а҃:

Припѣ́въ: А҆́гг҃лъ вопӏ̈ѧ́ше бл҃года́тнѣй: / чⷭ҇таѧ дв҃о ра́дꙋйсѧ, / и҆ па́ки рекꙋ̀, ра́дꙋйсѧ: / тво́й сн҃ъ воскр҃се тридне́венъ ѿ гро́ба, / и҆ мє́ртвыѧ воздви́гнꙋвый: // лю́дӏ̈е весели́тесѧ.

Їрмо́съ: Свѣти́сѧ, свѣти́сѧ, / но́вый ӏ҆ерⷭ҇ли́ме: / сла́ва бо гдⷭ҇нѧ / на тебѣ̀ возсӏ̈ѧ̀. / Ликꙋ́й ны́нѣ, / и҆ весели́сѧ сӏ̈ѡ́не. / Ты́ же чⷭ҇таѧ красꙋ́йсѧ бцⷣе, // ѡ҆ воста́нӏ̈и ржⷭ҇тва̀ твоегѡ̀.

Велича́нӏ̈е въ недѣ́лю а҆нтӏ̈па́схи:

Велича́емъ тѧ̀, / живода́вче хрⷭ҇тѐ, / на́съ ра́ди во а҆́дъ сше́дшаго, // и҆ съ собо́ю всѧ̑ воскр҃си́вшаго.

Вознесе́нӏ̈е гдⷭ҇а бг҃а и҆ сп҃са на́шегѡ ӏ҆и҃са хрⷭ҇та̀:

въ четверто́къ ѕ҃-ѧ седми́цы по па́сцѣ.

Тропа́рь, гла́съ д҃:

Возне́слсѧ є҆сѝ во сла́вѣ хрⷭ҇тѐ бж҃е на́шъ, / ра́дость сотвори́вый ѹ҆ченикѡ́мъ / ѡ҆бѣтова́нӏ̈емъ ст҃а́гѡ дх҃а, / и҆звѣщє́ннымъ и҆̀мъ бы́вшымъ бл҃гослове́нӏ̈емъ, // ꙗ҆́кѡ ты̀ є҆сѝ сн҃ъ бж҃ӏ̈й, и҆зба́витель мӏ́ра.

Конда́къ, гла́съ ѕ҃:

Є҆́же ѡ҆ на́съ и҆спо́лнивъ смотре́нӏ̈е, / и҆ ꙗ҆̀же на землѝ соедини́въ нбⷭ҇нымъ, / возне́слсѧ є҆сѝ во сла́вѣ хрⷭ҇тѐ бж҃е на́шъ, / ника́коже ѿлꙋча́ѧсѧ, но пребыва́ѧ неѿстꙋ́пный, / и҆ вопӏ̈ѧ̀ лю́бѧщымъ тѧ̀: // а҆́зъ є҆́смь съ ва́ми, и҆ никто́же на вы̀.

Задосто́йникъ, гла́съ є҃:

Припѣ́въ: Велича́й дꙋшѐ моѧ̀, / возне́сшагосѧ ѿ землѝ на нб҃о, // хрⷭ҇та̀ жизнода́вца.

Їрмо́съ: Тѧ̀ па́че ѹ҆ма̀ и҆ словесѐ мт҃рь бж҃ӏ̈ю, / въ лѣ́то безлѣ́тнаго неизрече́ннѡ ро́ждшꙋю, // вѣ́рнӏ̈и є҆диномꙋ́дреннѡ велича́емъ.

Велича́нӏ̈е:

Велича́емъ тѧ̀, / живода́вче хрⷭ҇тѐ, / и҆ почита́емъ є҆́же на нб҃са̀ / съ пречⷭ҇тою твое́ю пло́тӏ̈ю, // бж҃е́ственное вознесе́нӏ̈е.

Пѧтдесѧ́тница. Де́нь ст҃ы́ѧ трⷪ҇цы:

въ недѣ́лю и҃-ю по па́сцѣ.

Тропа́рь, гла́съ и҃:

Бл҃гослове́нъ є҆сѝ хрⷭ҇тѐ бж҃е на́шъ, / и҆́же премꙋ́дры ловцы̀ ꙗ҆вле́й, / низпосла́въ и҆̀мъ дх҃а ст҃а́го, / и҆ тѣ́ми ѹ҆ловле́й вселе́ннꙋю, // человѣколю́бче сла́ва тебѣ̀.

Конда́къ, гла́съ то́йже:

Є҆гда̀ снизше́дъ ѧ҆зы́ки слӏ̈ѧ̀, раздѣлѧ́ше ꙗ҆зы́ки вы́шнӏ̈й: / є҆гда́ же ѻ҆́гненныѧ ѧ҆зы́ки раздаѧ́ше, въ соедине́нӏ̈е всѧ̑ призва̀: // и҆ согла́снѡ сла́вимъ всест҃а́го дх҃а.

Задосто́йникъ, гла́съ д҃:

Припѣ́въ: А҆пⷭ҇ли соше́ствӏ̈е ѹ҆тѣ́шителѧ зрѧ́ще ѹ҆диви́шасѧ, // ка́кѡ въ ви́дѣ ѻ҆́гненныхъ ѧ҆зы̑къ ꙗ҆ви́сѧ дх҃ъ ст҃ы́й.

Їрмо́съ: Ра́дꙋйсѧ цр҃и́це, / матеродѣ́вственнаѧ сла́во: / всѧ́ка бо ѹ҆добоѡбраща́тельнаѧ бл҃гоглаго́ливаѧ ѹ҆ста̀ вѣтӏ́йствовати не мо́гꙋтъ / тебѐ пѣ́ти досто́йнѡ: / низꙋмѣва́етъ же ѹ҆́мъ всѧ́къ твоѐ рождество̀ разꙋмѣ́ти. // Тѣ́мже тѧ̀ согла́снѡ сла́вимъ.

Велича́нӏ̈е:

Велича́емъ тѧ̀, / живода́вче хрⷭ҇тѐ, / и҆ чти́мъ всест҃а́го дх҃а твоего̀, / є҆го́же ѿ ѻ҆ц҃а̀ посла́лъ є҆сѝ // бж҃е́ствєннымъ ѹ҆ч҃нкѡ́мъ твои̑мъ.

Преѡбраже́нӏ̈е гдⷭ҇а бг҃а и҆ сп҃са на́шегѡ ӏ҆и҃са хрⷭ҇та̀:

мѣ́сѧца а҆́ѵгꙋста въ ѕ҃ де́нь (ѳ҃ӏ а҆́ѵгꙋста).

Тропа́рь, гла́съ з҃:

Преѡбрази́лсѧ є҆сѝ на горѣ̀ хрⷭ҇тѐ бж҃е, / показа́вый ѹ҆ч҃нкѡ́мъ твои̑мъ сла́вꙋ твою̀, ꙗ҆́коже можа́хꙋ: / да возсӏ̈ѧ́етъ и҆ на́мъ грѣ̑шнымъ свѣ́тъ тво́й присносꙋ́щный, // мл҃твами бцⷣы, свѣтода́вче сла́ва тебѣ̀.

Конда́къ, гла́съ то́йже:

На горѣ̀ преѡбрази́лсѧ є҆сѝ, / и҆ ꙗ҆́коже вмѣща́хꙋ ѹ҆ч҃нцы̀ твоѝ, сла́вꙋ твою̀ хрⷭ҇тѐ бж҃е ви́дѣша: / да є҆гда́ тѧ ѹ҆́зрѧтъ распина́ема, / страда́нӏ̈е ѹ҆́бѡ ѹ҆разꙋмѣ́ютъ во́льное, / мӏ́рови же проповѣ́дѧтъ: // ꙗ҆́кѡ ты̀ є҆сѝ вои́стиннꙋ ѻ҆́ч҃ее сӏ̈ѧ́нӏ̈е.

Задосто́йникъ, гла́съ д҃:

Припѣ́въ: Велича́й дꙋшѐ моѧ̀, // на ѳавѡ́рѣ преѡбрази́вшагосѧ гдⷭ҇а.

Їрмо́съ: Ржⷭ҇тво̀ твоѐ нетлѣ́нно ꙗ҆ви́сѧ: / бг҃ъ и҆з̾ бокꙋ̀ твоє́ю про́йде, / ꙗ҆́кѡ плотоно́сецъ ꙗ҆ви́сѧ на землѝ, / и҆ съ человѣ́ки поживѐ. // Тѧ̀ бцⷣе, тѣ́мъ всѝ велича́емъ.

Велича́нӏ̈е:

Велича́емъ тѧ̀, / живода́вче хрⷭ҇тѐ, / и҆ почита́емъ пречⷭ҇тыѧ пло́ти твоеѧ̀ // пресла́вное преѡбраже́нӏ̈е.

Ѹ҆спе́нӏ̈е прест҃ы́ѧ влⷣчцы на́шеѧ бцⷣы,
и҆ приснодв҃ы мр҃ӏ́и:

мѣ́сѧца а҆́ѵгꙋста въ є҃ӏ де́нь (к҃ӏ а҆́ѵгꙋста).

Тропа́рь, гла́съ а҃:

Въ ржⷭ҇твѣ̀ двⷭ҇тво сохрани́ла є҆сѝ, / во ѹ҆спе́нӏ̈и мӏ́ра не ѡ҆ста́вила є҆сѝ бцⷣе, / преста́виласѧ є҆сѝ къ животꙋ̀, мт҃и сꙋ́щи живота̀: // и҆ мл҃твами твои́ми и҆збавлѧ́еши ѿ сме́рти дꙋ́шы на́шѧ.

Конда́къ, гла́съ в҃:

Въ мл҃твахъ неꙋсыпа́ющꙋю бцⷣꙋ, / и҆ въ предста́тельствахъ непрело́жное ѹ҆пова́нӏ̈е, / гро́бъ и҆ ѹ҆мерщвле́нӏ̈е не ѹ҆держа́ста: / ꙗ҆́коже бо живота̀ мт҃рь, / къ животꙋ̀ преста́ви, // во ѹ҆тро́бꙋ всели́выйсѧ приснодв҃ственнꙋю.

Задосто́йникъ, гла́съ а҃:

Припѣ́въ: А҆́гг҃ли ѹ҆спе́нӏ̈е пречⷭ҇тыѧ ви́дѣвше ѹ҆диви́шасѧ, // ка́кѡ дв҃а восхо́дитъ ѿ землѝ на нб҃о.

Їрмо́съ: Побѣжда́ютсѧ є҆стества̀ ѹ҆ста́вы / въ тебѣ̀, дв҃о чⷭ҇таѧ: / дѣ́вствꙋетъ бо ржⷭ҇тво̀, и҆ живо́тъ пред̾ѡбрꙋча́етъ сме́рть. / По ржⷭ҇твѣ̀ дв҃а, и҆ по сме́рти жива̀, / сп҃са́еши при́снѡ, // бцⷣе, наслѣ́дӏ̈е твоѐ.

Велича́нӏ̈е:

Велича́емъ тѧ̀, / пренепоро́чнаѧ мт҃и / хрⷭ҇та̀ бг҃а на́шегѡ, / и҆ всесла́вное сла́вимъ // ѹ҆спе́нӏ̈е твоѐ.

МЛ҃ТВЫ РА̑ЗНЫѦ.

Мл҃тва ӏ҆и҃сова:

Гдⷭ҇и ӏ҆и҃се хрⷭ҇тѐ, сн҃е бж҃ӏ̈й, поми́лꙋй мѧ̀ грѣ́шнаго.

Мл҃тва ст҃а́гѡ є҆фре́ма сѵ́рӏ̈на:

Гдⷭ҇и и҆ влⷣко живота̀ моегѡ̀, дꙋ́хъ пра́здности, ѹ҆ны́нӏ̈ѧ, любонача́лӏ̈ѧ и҆ праздносло́вӏ̈ѧ не да́ждь мѝ. Покло́нъ вели́кӏ̈й.

Дꙋ́хъ же цѣломꙋ́дрӏ̈ѧ, смиреномꙋ́дрӏ̈ѧ, терпѣ́нӏ̈ѧ и҆ любвѐ, да́рꙋй мѝ рабꙋ̀ твоемꙋ̀. Покло́нъ вели́кӏ̈й.

Є҆́й, гдⷭ҇и цр҃ю̀, да́рꙋй мѝ зрѣ́ти моѧ̑ прегрѣшє́нӏ̈ѧ, и҆ не ѡ҆сꙋжда́ти бра́та моегѡ̀: ꙗ҆́кѡ бл҃гослове́нъ є҆сѝ во вѣ́ки вѣкѡ́въ. А҆ми́нь. Покло́нъ вели́кӏ̈й.

Та́же ма́лыхъ в҃ӏ, глаго́лѧ на кӏ́йждо покло́нъ:

Бж҃е, ѡ҆чи́сти мѧ̀ грѣ́шнаго.

И҆ па́ки послѣдѝ мл҃твꙋ всю̀:

Гдⷭ҇и и҆ влⷣко живота̀ моегѡ̀, дꙋ́хъ пра́здности, ѹ҆ны́нӏ̈ѧ, любонача́лӏ̈ѧ и҆ праздносло́вӏ̈ѧ не да́ждь мѝ. Дꙋ́хъ же цѣломꙋ́дрӏ̈ѧ, смиреномꙋ́дрӏ̈ѧ, терпѣ́нӏ̈ѧ и҆ любвѐ, да́рꙋй мѝ рабꙋ̀ твоемꙋ̀. Є҆́й, гдⷭ҇и цр҃ю̀, да́рꙋй мѝ зрѣ́ти моѧ̑ прегрѣшє́нӏ̈ѧ, и҆ не ѡ҆сꙋжда́ти бра́та моегѡ̀: ꙗ҆́кѡ бл҃гослове́нъ є҆сѝ во вѣ́ки вѣкѡ́въ. А҆ми́нь.

И҆ покло́нъ є҆ди́нъ вели́кӏ̈й.

Мл҃тва и҆дꙋ́шагѡ въ цр҃ковь:

Возвесели́хсѧ ѡ҆ ре́кшихъ мнѣ̀: въ до́мъ гдⷭ҇ень по́йдемъ. А҆́зъ же мно́жеством млⷭ҇ти твоеѧ̀ вни́дꙋ въ до́мъ тво́й, поклоню́сѧ ко хра́мꙋ ст҃о́мꙋ твоемꙋ̀, в стра́сѣ твое́мъ. Гдⷭ҇и, наста́ви мѧ̀ пра́вдою твое́ю, вра̑гъ мои́хъ ра́ди и҆спра́ви пред̾ тобо́ю пꙋ́ть мо́й: да без̾ преткнове́нӏ̈ѧ прославлю є҆ди́но бжⷭ҇тво̀, ѻ҆ц҃а̀, и҆ сн҃а, и҆ ст҃а́го дх҃а, ны́не и при́снѡ, и҆ во вѣ́ки вѣкѡ̀въ. А҆ми́нь.

Мл҃тва при вкꙋше́нӏ̈и просфоры̀ и҆ ст҃ы́ѧ воды̀:

Гдⷭ҇и бж҃е мо́й, да бꙋ́детъ да́ръ тво́й ст҃ы́й: просфора́ и҆ ст҃а́ѧ вода̀ во ѡ҆ставле́нӏ̈е грѣхѡ́въ мои́хъ, въ просвѣще́нӏ̈е ѹ҆ма̀ моегѡ̀, во ѹ҆крѣпле́нӏ̈е дꙋше́вныхъ и҆ тѣле́сныхъ мои́хъ си́лъ, во здра́вӏ̈е дꙋшѝ и҆ тѣ́ла моегѡ̀, въ покоре́нӏ̈е страсте́й и҆ не́мощей мои́хъ: по беспредѣ́льномꙋ чл҃вѣколю́бӏ̈ю твоемꙋ̀, мл҃твами пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ твои́хъ. А҆ми́нь.

Мл҃тва пред̾ вкꙋше́нӏ̈емъ пи́щи:

Бцⷣе дв҃о ра́дꙋйсѧ, бл҃года́тнаѧ мр҃ӏ́е, гдⷭ҇ь съ тобо́ю: бл҃гослове́на ты̀ въ жена́хъ, и҆ бл҃гослове́нъ пло́дъ чре́ва твоегѡ̀, ꙗ҆́кѡ сп҃са родила̀ є҆сѝ дꙋ́шъ на́шихъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. Три́жды.

Мл҃твами ст҃ы́хъ ѻ҆тє́цъ на́шихъ, гдⷭ҇и ӏ҆и҃се хрⷭ҇тѐ бж҃е на́шъ, поми́лꙋй на́съ. А҆ми́нь.

И҆лѝ, вмѣ́стѡ Ѻ҆́ч҃е на́шъ: и҆ Бцⷣе дв҃о:

Ѻ҆́чи всѣ́хъ на тѧ̀ гдⷭ҇и ѹ҆пова́ютъ, и҆ ты̀ дае́ши и҆̀мъ пи́щꙋ во бл҃говре́менӏ̈и: ѿверза́еши ты̀ ще́дрꙋю рꙋ́кꙋ твою̀, и҆ и҆сполнѧ́еши всѧ́кое живо́тно бл҃говоле́нӏ̈ѧ.

И҆лѝ:

Ꙗ҆дѧ́тъ ѹ҆бо́зӏ̈и и҆ насы́тѧтсѧ, и҆ восхва́лѧтъ гдⷭ҇а взыска́ющӏ̈и є҆го̀: жива̑ бꙋ́дꙋтъ сердца̀ и҆́хъ въ вѣ́къ вѣ́ка.

Мл҃тва по вкꙋше́нӏ̈и пи́щи:

Бл҃годари́мъ тѧ̀ хрⷭ҇тѐ бж҃е на́шъ, ꙗ҆́кѡ насы́тилъ є҆сѝ на́съ земны́хъ твои́хъ бла̑гъ: не лишѝ на́съ и҆ нбⷭ҇нагѡ твоегѡ̀ црⷭ҇твӏ̈ѧ: но ꙗ҆́кѡ посредѣ̀ ѹ҆ченикѡ́въ твои́хъ прише́лъ є҆сѝ сп҃се, ми́ръ даѧ̀ и҆̀мъ, прӏ̈идѝ къ на́мъ, и҆ сп҃сѝ на́съ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Гдⷭ҇и, поми́лꙋй. Три́жды.

Мл҃твами ст҃ы́хъ ѻ҆тє́цъ на́шихъ, гдⷭ҇и ӏ҆и҃се хрⷭ҇тѐ бж҃е на́шъ, поми́лꙋй на́съ. А҆ми́нь.

Призыва́нӏ̈е по́мощи бж҃ӏ̈ѧ
пред̾ нача́ломъ всѧ́кагѡ до́брагѡ дѣ́ла:

Тропа́рь, гла́съ в҃:

Тво́рче и҆ созда́телю всѧ́ческихъ, бж҃е, дѣла̀ рꙋ́къ на́шихъ, къ сла́вѣ твое́й начина́ємаѧ, твои́мъ бл҃гослове́нӏ̈емъ спѣ́шнѡ и҆спра́ви, и҆ на́съ ѿ всѧ́кагѡ ѕла̀ и҆зба́ви, ꙗ҆́кѡ є҆ди́нъ всеси́ленъ, и҆ чл҃вѣколю́бецъ.

Конда́къ, гла́съ ѕ҃:

Ско́рый въ застꙋпле́нӏ̈е и҆ крѣ́пкӏ̈й въ по́мощь, предста́ни бл҃года́тӏ̈ю си́лы твоеѧ̀ ны́нѣ, и҆ бл҃гослови́въ ѹ҆крѣпѝ, и҆ въ соверше́нӏ̈е намѣ́рєнӏ̈ѧ бл҃га́гѡ дѣ́ла рабѡ́въ твои́хъ произведѝ: всѧ̑ бо є҆ли̑ка хо́щеши, ꙗ҆́кѡ всеси́льный бг҃ъ, твори́ти мо́жеши.

Мл҃тва: (что́маѧ ѿ є҆ди́нагѡ):

Гдⷭ҇и ӏ҆и҃се хрⷭ҇тѐ, сн҃е є҆диноро́дный безнача́льнагѡ твоегѡ̀ ѻ҆ц҃а̀, ты̀ ре́клъ є҆сѝ пречⷭ҇тыми ѹ҆сты̀ твои́ми: ꙗ҆́кѡ без̾ менє̀ не мо́жете твори́ти ничесо́же. Гдⷭ҇и мо́й гдⷭ҇и, вѣ́рою ѡ҆б̾е́мь въ дꙋшѝ мое́й и҆ се́рдцѣ тобо́ю речє́ннаѧ, припа́даю твое́й бла́гости: помози́ ми грѣ́шномꙋ, сӏ̈ѐ дѣ́ло, мно́ю начина́емо, ѡ҆ тебѣ̀ самѣ́мъ соверши́ти, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а. А҆ми́нь.

Мл҃тва: (что́маѧ ѿ мно́зѣхъ):

Гдⷭ҇и ӏ҆и҃се хрⷭ҇тѐ, сн҃е є҆диноро́дный безнача́льнагѡ твоегѡ̀ ѻ҆ц҃а̀, ты̀ ре́клъ є҆сѝ пречⷭ҇тыми ѹ҆сты̀ твои́ми: ꙗ҆́кѡ без̾ менє̀ не мо́жете твори́ти ничесо́же. Гдⷭ҇и на́шъ гдⷭ҇и, вѣ́рою ѡ҆б̾е́мше въ дꙋша́хъ на́шихъ и҆ сердца́хъ тобо́ю речє́ннаѧ, припа́даемъ твое́й бла́гости: помози́ на́мъ грѣ̑шнымъ, сӏ̈ѐ дѣ́ло, на́ми начина́емо, ѡ҆ тебѣ̀ самѣ́мъ соверши́ти, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а. А҆ми́нь.

Бл҃годаре́нӏ̈е ѡ҆ всѧ́комъ бл҃годѣѧ́нӏ̈и бж҃ӏ̈и.

Тропа́рь, гла́съ д҃:

Бл҃года́рни сꙋ́ще недосто́йнӏ̈и рабѝ твоѝ гдⷭ҇и, ѡ҆ твои́хъ вели́кихъ бл҃годѣѧ́нӏ̈ихъ на на́съ бы́вшихъ, сла́вѧще тѧ̀ хва́лимъ, бл҃гослови́мъ, бл҃годари́мъ, пое́мъ, и҆ велича́емъ твоѐ бл҃гоꙋтро́бӏ̈е, и҆ ра́бски любо́вӏ̈ю вопӏ̈е́мъ тѝ: бл҃годѣ́телю сп҃се нашъ, сла́ва тебѣ̀.

Конда́къ, гла́съ г҃:

Твои́хъ бл҃годѣѧ́нӏ̈й и҆ дарѡ́въ тꙋ́не, ꙗ҆́кѡ рабѝ непотре́бнӏ̈и сподо́бльшесѧ, влⷣко, къ тебѣ̀ ѹ҆се́рднѡ притека́юще, бл҃годаре́нӏ̈е по си́лѣ прино́симъ, и҆ тебѐ ꙗ҆́кѡ бл҃годѣ́телѧ и҆ творца̀ сла́вѧще, вопӏ̈е́мъ: сла́ва тебѣ̀, бж҃е всеще́дрый.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Бцⷣе, хрⷭ҇тӏ̈а́нѡмъ помо́щнице, твоѐ предста́тельство стѧжа́вше рабѝ твоѝ, бл҃года́рнѡ тебѣ̀ вопӏ̈е́мъ: ра́дꙋйсѧ, пречⷭ҇таѧ бцⷣе дв҃о, и҆ ѿ всѣ́хъ на́съ бѣ́дъ твои́ми мл҃твами всегда̀ и҆зба́ви, є҆ди́на вско́рѣ предста́тельствꙋющаѧ.

Пѣ́снь хвале́бнаѧ ст҃а́гѡ а҆мвро́сӏ̈а, є҆пⷭ҇кпа медӏ̈ола́нскагѡ:

Тебѐ бг҃а хва́лимъ, / тебѐ гдⷭ҇а и҆сповѣ́дꙋемъ, / тебѐ превѣ́чнаго ѻ҆ц҃а̀ всѧ̀ землѧ̀ велича́етъ: / тебѣ̀ всѝ а҆́гг҃ли, / тебѣ̀ нб҃са̀ и҆ всѧ̑ си̑лы, / тебѣ̀ херꙋвӏ́ми и҆ серафӏ́ми непреста́нными гла́сы взыва́ютъ: / ст҃ъ, ст҃ъ, ст҃ъ гдⷭ҇ь бг҃ъ саваѡ́ѳъ, / пѡ́лна сꙋ́ть нб҃са̀ и҆ землѧ̀ вели́чества сла́вы твоеѧ̀. / Тебѐ пресла́вный а҆пⷭ҇льскӏ̈й ли́къ, / тебѐ прⷪ҇ро́ческое хвале́бное число̀, / тебѐ хва́литъ пресвѣ́тлое мч҃ническое во́инство: / тебѐ по все́й вселе́ннѣй и҆сповѣ́дꙋетъ ст҃а́ѧ цр҃ковь, / ѻ҆ц҃а̀ непостижи́магѡ вели́чества, / покланѧ́емаго твоего̀ и҆́стиннаго и҆ є҆диноро́днаго сн҃а, / и҆ ст҃а́го ѹ҆тѣ́шителѧ дх҃а. / Ты̀ цр҃ю̀ сла́вы, хрⷭ҇тѐ, / ты̀ ѻ҆ц҃а̀ прⷭ҇носꙋ́щный сн҃ъ є҆сѝ: / ты̀ ко и҆збавле́нӏ̈ю прӏ̈е́млѧ человѣ́ка, / не возгнꙋша́лсѧ є҆сѝ дв҃и́ческагѡ чре́ва: / ты̀ ѡ҆долѣ́въ сме́рти жа́ло, / ѿве́рзлъ є҆сѝ вѣ́рꙋющымъ црⷭ҇тво нбⷭ҇ное. / Ты̀ ѡ҆деснꙋ́ю бг҃а сѣди́ши во сла́вѣ ѻ҆́ч҃ей, / сꙋдӏ̈ѧ̀ прӏ̈итѝ вѣ́ришисѧ. / Тебѐ ѹ҆̀бо про́симъ: / помозѝ рабѡ́мъ твои̑мъ, / и҆̀хже чⷭ҇тно́ю кро́вӏ̈ю и҆скꙋпи́лъ є҆сѝ: / сподо́би со ст҃ы́ми твои́ми въ вѣ́чной сла́вѣ твое́й ца́рствовати. / Сп҃сѝ лю́ди твоѧ̑, гдⷭ҇и, / и҆ блгⷭ҇вѝ достоѧ́нӏ̈е твоѐ, / и҆спра́ви ѧ҆̀, и҆ вознесѝ и҆̀хъ во вѣ́ки: / во всѧ̑ дни̑ блгⷭ҇ви́мъ тебѐ, / и҆ восхва́лимъ и҆́мѧ твоѐ во вѣ́къ, и҆ въ вѣ́къ вѣ́ка. / Сподо́би гдⷭ҇и, въ де́нь се́й без̾ грѣха̀ сохрани́тисѧ на́мъ: / поми́лꙋй на́съ гдⷭ҇и, поми́лꙋй на́съ: / бꙋ́ди млⷭ҇ть твоѧ̀, гдⷭ҇и, на на́съ, / ꙗ҆́коже ѹ҆пова́хомъ на тѧ̀: / на тѧ̀ гдⷭ҇и, ѹ҆пова́хомъ, // да не постыди́мсѧ во вѣ́ки. А҆ми́нь.

Ѡ҆ пꙋтеше́ствꙋющихъ.

Тропа́рь, гла́съ в҃:

Пꙋ́ть и҆ и҆́стина сы́й хрⷭ҇тѐ, спꙋ́тника а҆́гг҃ла твоего̀ рабѡ́мъ твои̑мъ [и҆лѝ: рабꙋ̀ твоемꙋ̀, рабѣ̀ твое́й] ны́нѣ, ꙗ҆́коже тѡвӏ́и и҆ногда̀, послѝ сохранѧ́юща, и҆ невреди́мыхъ [и҆лѝ: невреди́ма, невреди́мꙋ], къ сла́вѣ твое́й, ѿ всѧ́кагѡ ѕла̀ во всѧ́комъ бл҃гополꙋ́чӏ̈и соблюда́юща, мл҃твами бцⷣы, є҆ди́не чл҃вѣколю́бче.

Конда́къ, гла́съ то́йже:

Лꙋцѣ̀ и҆ клео́пѣ во є҆ммаꙋ́съ спꙋтеше́ствовавый сп҃се, сше́ствꙋй и҆ ны́нѣ рабѡ́мъ твои̑мъ [и҆лѝ: рабꙋ̀ твоемꙋ̀, рабѣ̀ твое́й], пꙋтеше́ствовати хотѧ́щымъ [и҆лѝ: хотѧ́щемꙋ, хотѧ́щей], ѿ всѧ́кагѡ и҆збавлѧ́ѧ и҆̀хъ [и҆лѝ: є҆го̀, ю҆̀] ѕла́гѡ ѡ҆бстоѧ́нӏ̈ѧ: всѧ̑ бо ты̀ ꙗ҆́кѡ чл҃вѣколю́бецъ, мо́жеши хотѧ́й.

Мл҃тва:

Гдⷭ҇и ӏ҆и҃се хрⷭ҇тѐ бж҃е на́шъ, и҆́стинный и҆ живы́й пꙋтю̀, состра́нствовати мни́момꙋ твоемꙋ̀ ѻ҆тцꙋ̀ ӏ҆ѡ́сифꙋ, и҆ пречⷭ҇тѣй тѝ дв҃ѣ мт҃ри, во є҆гѵ́петъ и҆зво́ливый, и҆ лꙋцѣ̀ и҆ клео́пѣ во є҆ммаꙋ́съ спꙋтеше́ствовавый: и҆ ны́нѣ смире́ннѡ мо́лимъ тѧ̀, влⷣко прест҃ы́й, и҆ рабѡ́мъ твои̑мъ си̑мъ [и҆лѝ: рабꙋ̀ твоемꙋ̀ семꙋ̀, рабѣ̀ твое́й се́й], [и҆́мⷬ҇къ], твое́ю бл҃года́тӏ̈ю спꙋтеше́ствꙋй. И҆ ꙗ҆́коже рабꙋ̀ твоемꙋ̀ тѡвӏ́и, а҆́гг҃ла храни́телѧ и҆ наста́вника послѝ, сохранѧ́юща и҆ и҆збавлѧ́юща и҆̀хъ [и҆лѝ: є҆го̀, ю҆̀] ѿ всѧ́кагѡ ѕла́гѡ ѡ҆бстоѧ́нӏ̈ѧ ви́димыхъ и҆ неви́димыхъ врагѡ́въ, и҆ ко и҆сполне́нӏ̈ю за́повѣдей твои́хъ наставлѧ́юща, ми́рнѡ же и҆ бл҃гополꙋ́чнѡ и҆ здра́вѡ препровожда́юща, и҆ па́ки цѣ́лѡ и҆ безмѧте́жнѡ возвраща́юща: и҆ да́ждь и҆̀мъ [и҆лѝ: є҆мꙋ̀, є҆́й] всѐ бл҃го́е своѐ намѣ́ренӏ̈е ко бл҃гоꙋгожде́нӏ̈ю твоемꙋ̀ бл҃гополꙋ́чнѡ въ сла́вꙋ твою̀ и҆спо́лнити. Твое́ бо є҆́сть, є҆́же ми́ловати и҆ сп҃са́ти на́съ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ со прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѡ҆ недꙋ́жныхъ.

Тропа́рь, гла́съ д҃:

Ско́рый въ застꙋпле́нӏ̈и є҆ди́нъ сы́й хрⷭ҇тѐ, ско́рое свы́ше покажѝ посѣще́нӏ̈е стра́ждꙋщымъ рабѡ́мъ твои̑мъ [и҆лѝ: стра́ждꙋщемꙋ рабꙋ̀ твоемꙋ̀, стра́ждꙋщей рабѣ̀ твое́й], и҆ и҆зба́ви ѿ недꙋ̑гъ и҆ го́рькихъ болѣ́зней, и҆ воздви́гни во є҆́же пѣ́ти тѧ̀, и҆ сла́вити непреста́ннѡ, мл҃твами бцⷣы, є҆ди́не чл҃вѣколю́бче.

Конда́къ, гла́съ в҃:

На ѻ҆дрѣ̀ болѣ́зни лежа́щихъ [и҆лѝ: лежа́щаго, лежа́щꙋю], и҆ сме́ртною ра́ною ѹ҆ѧ́звленныхъ [и҆лѝ: ѹ҆ѧ́звленнаго, ѹ҆ѧ́звленнꙋю], ꙗ҆́коже и҆ногда̀ воздви́глъ є҆сѝ сп҃се, петро́вꙋ те́щꙋ, и҆ разсла́бленнаго на ѻ҆дрѣ̀ носи́маго: си́це и҆ ны́нѣ млⷭ҇рде, стра́ждꙋщихъ [и҆лѝ: стра́ждꙋщаго, стра́ждꙋщꙋю] посѣтѝ и҆ и҆сцѣлѝ: ты́ бо є҆ди́нъ є҆сѝ недꙋ́ги и҆ болѣ̑зни ро́да на́шегѡ понесы́й, и҆ всѧ̑ могӏ́й ꙗ҆́кѡ многомлⷭ҇тивъ.

Мл҃тва:

Влⷣко вседержи́телю, ст҃ы́й цр҃ю̀, наказꙋ́ѧй и҆ не ѹ҆мерщвлѧ́ѧй, ѹ҆твержда́ѧй низпа́дающыѧ, и҆ возводѧ́й низве́ржєнныѧ, тѣлє́сныѧ человѣ́кѡвъ скѡ́рби и҆справлѧ́ѧй, мо́лимсѧ тебѣ̀ бж҃е на́шъ, рабѡ́въ твои́хъ [и҆лѝ: раба̀ твоего̀, рабꙋ̀ твою̀], [и҆́мⷬ҇къ], немощствꙋ́ющихъ [и҆лѝ: немощствꙋ́юща, немощствꙋ́ющꙋ] посѣтѝ млⷭ҇тӏ̈ю твое́ю, простѝ и҆̀мъ [и҆лѝ: є҆мꙋ̀, є҆́й] всѧ́кое согрѣше́нӏ̈е во́льное и҆ нево́льное. Є҆́й, гдⷭ҇и, враче́бнꙋю твою̀ си́лꙋ съ нб҃сѐ низпослѝ, прикосни́сѧ тѣлесѝ, ѹ҆гасѝ ѻ҆гне́вицꙋ, ѹ҆кротѝ стра́сть и҆ всѧ́кꙋю не́мощь таѧ́щꙋюсѧ: бꙋ́ди вра́чь рабѡ́въ твои́хъ [и҆лѝ: раба̀ твоегѡ̀, рабы̀ твоеѧ̀], [и҆́мⷬ҇къ], воздви́гни и҆̀хъ [и҆лѝ: є҆го̀, ю҆̀] ѿ ѻ҆дра̀ болѣ́зненнагѡ, и҆ ѿ ло́жа ѡ҆ѕлобле́нӏ̈ѧ цѣ́лыхъ и҆ всесоверше́нныхъ [и҆лѝ: цѣ́ла и҆ всесоверше́нна, цѣ́лꙋ и҆ всесоверше́ннꙋ], да́рꙋй и҆̀хъ [и҆лѝ: є҆го̀, ю҆̀] цр҃кви твое́й бл҃гоꙋгожда́ющихъ и҆ творѧ́щихъ [и҆лѝ: бл҃гоꙋгожда́юща и҆ творѧ́ща, бл҃гоꙋгожда́ющꙋ и҆ творѧ́щꙋ] во́лю твою̀. Твое́ бо є҆́сть, є҆́же ми́ловати и҆ сп҃са́ти ны̀, бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѡ҆ ѹ҆множе́нӏ̈и любвѐ,
и҆ и҆скорене́нӏ̈и не́нависти и҆ всѧ́кӏ̈ѧ ѕло́бы.

Тропа́рь, гла́съ д҃:

Сою́зомъ любвѐ а҆пⷭ҇лы твоѧ̑ свѧза́вый хрⷭ҇тѐ, и҆ на́съ твои́хъ вѣ́рныхъ рабѡ́въ къ себѣ̀ тѣ́мъ крѣ́пкѡ свѧза́въ, твори́ти за́повѣди твоѧ̑, и҆ дрꙋ́гъ дрꙋ́га люби́ти нелицемѣ́рнѡ сотворѝ, мл҃твами бцⷣы, є҆ди́не чл҃вѣколю́бче.

Конда́къ, гла́съ є҃:

Пла́менемъ любвѐ распалѝ къ тебѣ̀ сердца̀ на̑ша, хрⷭ҇тѐ бж҃е, да то́ю разжига́еми, се́рдцемъ, мы́слӏ̈ю же и҆ дꙋше́ю, и҆ все́ю крѣ́постӏ̈ю на́шею возлю́бимъ тѧ̀, и҆ и҆́скреннѧго своего̀ ꙗ҆́кѡ себѐ, и҆ повелѣ̑нӏ̈ѧ твоѧ̑ хранѧ́ще сла́вимъ тѧ̀, всѣ́хъ бла̑гъ да́телѧ.

Ѡ҆ ненави́дѧщихъ и҆ ѡ҆би́дѧщихъ на́съ.

Тропа́рь, гла́съ д҃:

Ѡ҆ распе́ншихъ тѧ̀ моли́выйсѧ, любодꙋ́шне гдⷭ҇и, и҆ рабѡ́мъ твои̑мъ ѡ҆ вразѣ́хъ моли́тисѧ повелѣ́вый, ненави́дѧщихъ и҆ ѡ҆би́дѧщихъ на́съ простѝ, и҆ ѿ всѧ́кагѡ ѕла̀ и҆ лꙋка́вства къ братолю́бномꙋ и҆ добродѣ́тельномꙋ наста́ви жи́тельствꙋ, смире́ннѡ мольбꙋ̀ тебѣ̀ прино́симъ: да въ согла́сномъ є҆диномы́слӏ̈и сла́вимъ тѧ̀, є҆ди́наго чл҃вѣколю́бца.

Конда́къ, гла́съ є҃:

Ꙗ҆́коже первомч҃нкъ тво́й стефа́нъ ѡ҆ ѹ҆бива́ющихъ є҆го̀ молѧ́ше тѧ̀ гдⷭ҇и, и҆ мы̀ припа́дающе мо́лимъ: ненави́дѧщихъ всѣ́хъ и҆ ѡ҆би́дѧщихъ на́съ простѝ, во є҆́же ни є҆ди́номꙋ ѿ ни́хъ на́съ ра́ди поги́бнꙋти, но всѣ̑мъ сп҃сти́сѧ, бл҃года́тӏ̈ю твое́ю, бж҃е всеще́дрый.

Мл҃тва ѿ ѡ҆скверне́нӏ̈ѧ
ст҃а́гѡ васӏ́лӏ̈а вели́кагѡ:

Многомлⷭ҇тиве, нетлѣ́нне, нескве́рне, безгрѣ́шне гдⷭ҇и, ѡ҆чи́сти мѧ̀ непотре́бнаго раба̀ твоего̀ ѿ всѧ́кӏ̈ѧ скве́рны плотскӏ́ѧ и҆ дꙋше́вныѧ, и҆ ѿ невнима́нӏ̈ѧ и҆ ѹ҆ны́нӏ̈ѧ моегѡ̀ прибы́вшꙋю мѝ нечистотꙋ̀, со и҆нѣ́ми всѣ́ми беззакѡ́нӏ̈и мои́ми, и҆ ꙗ҆ви́ мѧ нескве́рна влⷣко, за бл҃гость хрⷭ҇та̀ твоегѡ̀, и҆ ѡ҆ст҃и́ мѧ наше́ствӏ̈емъ прест҃а́гѡ твоегѡ̀ дх҃а: ꙗ҆́кѡ да возбнꙋ́въ ѿ мглы̀ нечи́стыхъ привидѣ́нӏ̈й дӏ̈а́вольскихъ, и҆ всѧ́кӏ̈ѧ скве́рны, сподо́блюсѧ чи́стою со́вѣстӏ̈ю ѿве́рсти сквє́рнаѧ моѧ̑ и҆ нечи̑стаѧ ѹ҆ста̀, и҆ воспѣва́ти всест҃о́е и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Во вре́мѧ бѣ́дствӏ̈ѧ, и҆ при нападе́нӏ̈и врагѡ́въ.

Тропа́рь, гла́съ д҃:

Ско́рѡ предварѝ, пре́жде да́же не порабо́тимсѧ врагѡ́мъ хꙋ́лѧщымъ тѧ̀, и҆ претѧ́щымъ на́мъ, хрⷭ҇тѐ бж҃е на́шъ: погꙋбѝ крⷭ҇то́мъ твои́мъ борю́щыѧ на́съ, да ѹ҆разꙋмѣ́ютъ, ка́кѡ мо́жетъ правосла́вныхъ вѣ́ра, мл҃твами бцⷣы, є҆ди́не чл҃вѣколю́бче.

Конда́къ, гла́съ и҃:

Возбра́нный воево́до и҆ гдⷭ҇и, а҆́да побѣди́телю, ꙗ҆́кѡ и҆зба́вльсѧ ѿ вѣ́чныѧ сме́рти, похва̑льнаѧ восписꙋ́ю тѝ, созда́нӏ̈е и҆ ра́бъ тво́й: но ꙗ҆́кѡ и҆мѣ́ѧй млⷭ҇рдӏ̈е неизрече́нное, ѿ всѧ́кихъ мѧ̀ бѣ́дъ свободѝ, зовꙋ́ща: ӏ҆и҃се сн҃е бж҃ӏ̈й, поми́лꙋй мѧ̀.

Ѱало́мъ ч҃:

Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ. Рече́тъ гдⷭ҇еви: застꙋ́пникъ мо́й є҆сѝ, и҆ прибѣ́жище моѐ, бг҃ъ мо́й, и҆ ѹ҆пова́ю на него̀. Ꙗ҆́кѡ то́й и҆зба́витъ тѧ̀ ѿ сѣ́ти ло́вчи, и҆ ѿ словесѐ мѧте́жна: плещма̀ свои́ма ѡ҆сѣни́тъ тѧ̀, и҆ под̾ крилѣ̑ є҆гѡ̀ надѣ́ешисѧ. Ѻ҆рꙋ́жӏ̈емъ ѡ҆бы́детъ тѧ̀ и҆́стина є҆гѡ̀, не ѹ҆бои́шисѧ ѿ стра́ха нощна́гѡ, ѿ стрѣлы̀ летѧ́щӏ̈ѧ во днѝ, ѿ ве́щи во тьмѣ̀ преходѧ́щӏ̈ѧ, ѿ срѧ́ща, и҆ бѣ́са полꙋ́деннагѡ. Паде́тъ ѿ страны̀ твоеѧ̀ ты́сѧща, и҆ тьма̀ ѡ҆деснꙋ́ю тебє̀, къ тебѣ́ же не прибли́житсѧ: ѻ҆ба́че ѻ҆чи́ма твои́ма смо́триши, и҆ воздаѧ́нӏ̈е грѣ́шникѡвъ ѹ҆́зриши. Ꙗ҆́кѡ ты̀ гдⷭ҇и, ѹ҆пова́нӏ̈е моѐ: вы́шнѧго положи́лъ є҆сѝ прибѣ́жище твоѐ. Не прӏ̈и́детъ къ тебѣ̀ ѕло̀, и҆ ра́на не прибли́житсѧ тѣлесѝ твоемꙋ̀. Ꙗ҆́кѡ а҆́гг҃лѡмъ свои̑мъ заповѣ́сть ѡ҆ тебѣ̀, сохрани́ти тѧ̀ во всѣ́хъ пꙋте́хъ твои́хъ. На рꙋка́хъ во́змꙋтъ тѧ̀, да не когда̀ преткне́ши ѡ҆ ка́мень но́гꙋ твою̀. На а҆́спӏ̈да и҆ васӏ̈лӏ́ска настꙋ́пиши, и҆ попере́ши льва̀ и҆ ѕмӏ́ѧ. Ꙗ҆́кѡ на мѧ̀ ѹ҆пова̀, и҆ и҆зба́влю и҆̀: покры́ю и҆̀, ꙗ҆́кѡ позна̀ и҆́мѧ моѐ. Воззове́тъ ко мнѣ̀, и҆ ѹ҆слы́шꙋ є҆го̀: съ ни́мъ є҆́смь въ ско́рби, и҆змꙋ̀ є҆го̀, и҆ просла́влю є҆го̀: долгото́ю дне́й и҆спо́лню є҆го̀, и҆ ꙗ҆влю̀ є҆мꙋ̀ сп҃се́нӏ̈е моѐ.

Мл҃тва чⷭ҇тно́мꙋ крⷭ҇тꙋ̀:

Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщӏ̈и є҆го̀. Ꙗ҆́кѡ и҆счеза́етъ ды́мъ, да и҆сче́знꙋтъ, ꙗ҆́кѡ та́етъ во́скъ ѿ лица̀ ѻ҆гнѧ̀, та́кѡ да поги́бнꙋтъ бѣ́си ѿ лица̀ лю́бѧщихъ бг҃а, и҆ зна́менающихсѧ крⷭ҇тнымъ зна́менӏ̈емъ, и҆ въ весе́лӏ̈и глаго́лющихъ: ра́дꙋйсѧ, пречⷭ҇тны́й и҆ животворѧ́щӏ̈й крⷭ҇те гдⷭ҇ень, прогонѧ́ѧй бѣ́сы си́лою на тебѣ̀ пропѧ́тагѡ гдⷭ҇а на́шегѡ ӏ҆и҃са хрⷭ҇та̀, во а҆́дъ сше́дшагѡ, и҆ попра́вшагѡ си́лꙋ дӏ̈а́волю, и҆ дарова́вшагѡ на́мъ тебѐ, крⷭ҇тъ сво́й чⷭ҇тны́й, на прогна́нӏ̈е всѧ́кагѡ сꙋпоста́та. Ѽ пречⷭ҇тны́й и҆ животворѧ́щӏ̈й крⷭ҇те гдⷭ҇ень! помога́й мѝ со ст҃о́ю гпⷭ҇же́ю дв҃ою бцⷣею, и҆ со всѣ́ми ст҃ы́ми во вѣ́ки. А҆ми́нь.

Мл҃тва при нача́тӏ̈и ѹ҆че́нӏ̈ѧ:

Премꙋ́дрости наста́вниче, смы́сла пода́телю, немꙋ́дрыхъ наказа́телю и҆ ни́щихъ защи́тителю, ѹ҆твердѝ, вразꙋмѝ се́рдце моѐ, влⷣко! Ты̀ да́ждь мѝ сло́во, ѻ҆́ч҃ее сло́во: се́ бо ѹ҆стнѣ̑ моѝ не возбраню̀, во є҆́же зва́ти тебѣ̀: млⷭ҇тиве, поми́лꙋй мѧ̀ па́дшаго.

Мл҃тва при нача́тӏ̈и ѹ҆че́нӏ̈ѧ ѻ҆трокѡ́въ:

Пребл҃гӏ́й гдⷭ҇и, низпослѝ на́мъ бл҃года́ть дх҃а твоегѡ̀ ст҃а́гѡ, да́рствꙋющагѡ и҆ ѹ҆крѣплѧ́ющагѡ дꙋшє́вныѧ на́шѧ си̑лы, дабы̀ внима́юще преподава́емомꙋ на́мъ ѹ҆че́нӏ̈ю, возраслѝ мы̀ тебѣ̀ на́шемꙋ созда́телю, во сла́вꙋ, роди́телємъ же на́шымъ на ѹ҆тѣше́нӏ̈е, цр҃кви и҆ ѻ҆те́чествꙋ на по́льзꙋ.

Мл҃тва по ѡ҆конча́нӏ̈и ѹ҆че́нӏ̈ѧ :

Бл҃годари́мъ тебѐ, созда́телю, ꙗ҆́кѡ сподо́билъ є҆сѝ на́съ бл҃года́ти твоеѧ̀, во є҆́же внима́ти ѹ҆че́нӏ̈ю. Бл҃гословѝ на́шихъ нача́льникѡвъ, роди́телей и҆ ѹ҆чи́телей, ведꙋ́щихъ на́съ къ позна́нӏ̈ю бла́га, и҆ пода́ждь на́мъ си́лꙋ и҆ крѣ́пость къ продолже́нӏ̈ю ѹ҆че́нӏ̈ѧ сегѡ̀.

СЛОВАРЬ

А҆́бӏ̈е – вскоре, тотчас, вдруг.

А҆́г҃глъ – ангел, вестник, посланник, бесплотный дух.

А҆́ггелъ – аггел, падший, нечистый дух.

А҆́гнецъ – ягненок, ветхозаветная жертва, Христос – Агнец Божий.

А҆́зъ – я (личное местоимение). А҆́зъ со всѣ́ми и҆збра́нными твои́ми – я со всеми избранными Твоими.

А҆́лкати – чувствовать голод.

А҆́ще – ли, если, когда, хотя. А҆́ще въ словесѣ́хъ и҆лѝ дѣ́лѣхъ – если в словах или делах.

Безго́днѡ – безвременно, преждевременно. Безго́днѡ спа́хъ - неумеренно спал.

Безплѡ́тныѧ – не имеющий плоти, тела дух вышний или падший. Нбⷭ҇нымъ чинѡ́мъ безплѡ́тнымъ – небесным чинам бесплотных Ангелов (служба).

Би́сер – жемчуг, драгоценный камень, учение Христово.

Бл҃гоꙋтро́бӏ̈е – благоутробие, милосердие, внутренняя благость. Твоѐ бл҃гоꙋтро́бӏ̈е, бл҃же – Твое милосердие, Благой Боже.

Блаже́нный - обретший благодать Божью, счастливый. Присноблаже́нную и Пренепорочную и Матерь Бога нашего – Всегда счастливую и ни чуть не порочную Матерь Бога нашего. Всегда счастливую от благодати Божией в своем смиренном Богу сердце.

Блюстѝ – соблюдать, хранить, присматривать. Соблюди́ мѧ нескве́рна – сохрани меня не скверным.

Взбра́нный - сильный в брани, чрезвычайно воинственный, храбрый. Взбра́нной воево́дѣ побѣди́тєльнаѧ - Сильной в брани Воеводе триумфальное, победное чествование. Богородице, укрепленной смиренным послушанием Богу (Лук.1:38,48), так ставшей особым проводником благодати Божией в жизни почитающих Её, Пренепорочную Марию Деву Матерь Божью.

Вина̀ – вина, провинность, порок, причина, состав преступления. Попалѧ́ѧ моѧ̑ грѣхѡ́вныѧ вины̑ - сжигая мои пороки и виновность.

Внегда̀ – когда. Внегда̀ пѣ́ти си́це – когда петь это.

Во и҆́мѧ – от имени, по поручению, по заповеди. Во и҆́мѧ ѻ҆ц҃а̀ – по заповеди Отца.

Во́нѧ – запах, благоухание, благовонное масло. Прӏ̈иди́те, вонѧ́ми пома́жемъ тѣ́ло живоно́сное и҆ погребе́ное – придите благовониями помажем Тело, жизнь несущее и погребенное. Так призывали одна другую жены мироносицы.

Вопӏ̈ѧ́ти – громко взывать, вопить, кричать. Вопӏ̈е́мъ тѝ – взываем к тебе.

Врата̀ – врата, например, городские; совет старейшин города у ворот в древности. Врата̀ а҆́да – возможно, в прямом смысле врата и в переносном, как совет, царствование ада, сатаны, которое никогда не одолеет Церковь (Мф.16:18).

Всꙋ́е – в суете, напрасно, без размышления. Не прӏ̈ѧ́тъ всꙋ́е дꙋ́шꙋ свою̀ – не клялся напрасно душою своею (не утверждал истину в суете).

Вы́нꙋ – всегда, непрестанно, во всякое время. Предо мно́ю вы́нꙋ – предо мною всегда.

Гнꙋ́съ - зловоние, нечистота, возбуждающая отвращение. Ѡ҆пле́тшасѧ ѕлѣ̀ во гнꙋ́сныхъ дѣ́лѣхъ - запутавшегося весьма в зловонных и отвратительных делах.

Горѣ̀ – вверху, вверх, ввысь, в направлении к вершине горы. В духовном плане, движение от святых образов к небесным первообразам, в познание Бога, Его правды и воли.

Десни́ца – правая рука. Десны́мъ ѻ҆ц҃а̀ сѣдѣ́нӏ̈емъ – сидя по правую руку от Отца.

До́лꙋ, до́лѣ – вниз, внизу, в долине. Ѿ мра́чныхъ ѹ҆до́лӏ̈й - от мрачных долин, падений.

Є҆сѝ – есть (форма глагола быть). Ст҃ъ є҆сѝ бж҃е – свят есть (Ты) Боже.

Є҆ли́кѡ – сколько. И҆ покло́ны, є҆ли́кѡ хо́щеши – и поклоны, сколько хочешь.

Є҆ли́цы – которые.

Живо́тъ – жизнь, органическое существование, бытие в единстве духа, души и тела человека. Хлѣ́ба живо́тнагѡ – Хлеба жизни (Ин.6:35,48,51).

Живода́вче – жизни податель (зват. форма). Велича́емъ тѧ̀, живода́вче хрⷭ҇тѐ – величаем Тебя, Христе, Подающего жизнь.

Ѕѣлѡ̀ – сильно, очень; точно, тщательно; совершенно; прекрасно.

Зна́менӏ̈е – знак, символ, образ, знамя, чудо, как знак проявления духовных сил. Зна́менꙋющихсѧ крⷭ҇тнымъ зна́менӏ̈емъ – отмечающих себя христианами путем наложения крестного знамения, верующими в Крестную смерть и Воскресение Христа Спасителя. Также свидетельствующими о животворящей силе Креста, который смиренных возводит ко Христу и низводит им благодать Спасения от смерти в вечную жизнь и славу Божью.

Зна́менӏ̈е крⷭ҇тное – знамение крестное, изображение Честного Креста Господня, совершаемое рукой с определённым сложением перстов или священной вещью, Евангелием, крестом, иконой. Знаменуется человек и разные предметы, стороны света. Крест и его знамение является прообразом распятого на Кресте Христа Спасителя, направляющим дух и душу человека к Первообразу – Христу и Богу. Об этом знамении говорит Господь устами верного пророка: «Сам Господь даст вам знамение: се, Дева во чреве приимет и родит Сына, и нарекут имя Ему: Еммануил» (Ис.7:14). «Младенец родился нам - Сын дан нам; владычество на раменах Его, и нарекут имя Ему: Чудный, Советник, Бог крепкий, Отец вечности, Князь мира. Умножению владычества Его и мира нет предела» (Ис.9:6,7).

И҆́же – кто, который, которые, кто-нибудь, что, итак, так как, так что, если, же. И҆́же є҆сѝ на нб҃сѣ́хъ – Который есть на небесах.

Им҃рекъ – имя изречь. В тексте слова указывает, что вместо него необходимо вписать или назвать имена.

И҆скꙋше́нӏ̈е – испытание, упражнение, опыт.

И҆сповѣ́данӏ̈е – прославление, величание; открытое признание, объявление веры или, например, раскаяния во грехе. Бцⷣꙋ сӏ̈ю̀ и҆сповѣ́дающе, ꙗ҆́кѡ вои́стиннꙋ ро́ждшꙋю на́мъ бг҃а воплоще́нна - Богородицу исповедуя, как воистину родившую нам воплотившегося Бога.

Ка́мѡ – куда.

Киво́тъ – ковчег, ящик. Ковчег Завета (Исх.25:10-22). Прообраз Богородицы, носвшей в себе Слово Бога, прежде Введенной во Святое Святых храма где должен быть, к тому времени утерянный, Ковчег Завета (Евр.9:4).

Коегѡ́ждо – каждого. Коегѡ́ждо дѣѧ̑нӏ̈ѧ – каждого деяния.

Крамо́ла – восстание, мятеж, распря. Не преда́ждь менє̀ крамолѣ̀ ѕмӏ̈и́нѣ – не предай меня мятежу змеиному. То есть мятежу, происходящему от змея-сатаны, противящегося Богу.

Лѣ́пѡ – хорошо, красиво. Чⷭ҇тна́ѧ цр҃ковь бг҃олѣ́пнѡ пое́тъ – Честная Церковь поет в Божией красоте.

Мзда̀ – плата, воздаяние, награда. Мздꙋ̀ нае́мничꙋ – плату наемного работника.

Мӏ́ръ – космос, вселенная, всё творение Божье; святые, живущие в мире; падшая часть человеческого общества; всё, что уводит человека от Бога.

Ми́ръ – гармония, спокойствие, тишина, результат порядка Христа и Бога.

Мре́жа – сеть для ловли рыбы или дичи.

Мы́слєнно – умно, духовно. Ѻ҆́чи мы́слєнныѧ – глаза разума, глаза духовные.

Насꙋ́щный - необходимый для существования.

Неневѣ́стнаѧ – не бывшая невестой для мужа. Невѣ́сто неневѣ́стнаѧ – Пречистая Мария Дева Богородица, Невеста, не бывшая невестой для брачного ложа, но родившая от Святого Духа.

Неча́ѧнӏ̈е – отсутствие надежды. Въ неча́ѧнӏ̈и лежа́ща – лежащего в безнадежнсти, в безчувствии

Нижѐ – не же. Нижѐ погꙋби́лъ – не погубил же.

Николи́же – никогда не. Николи́же сотвори́хъ бл҃го́е – никогда не сотворил благое.

Но́вый ӏ҆ерⷭ҇ли́мъ – Новый Иерусалим (Град Мира), построенный Богом в Небесах для обитания в нем народа Божия, спасенного во Христе в вечность века будущего (Откр.21:1-22:5; Гал.4:26; Евр.12:22).

Ѻ҆ба́че – впрочем, однако, но, а. Ѻ҆ба́че ѻ҆чи́ма твои́ма смо́триши, и҆ воздаѧ́нӏ̈е грѣ́шникѡвъ ѹ҆́зриши – только смотреть будешь очами твоими и видеть возмездие нечестивым (Пс.90:8).

Ѡ҆бнажа́ти – лишать, обнажать, открывать. Ѡ҆бнаже́нномꙋ всѧ́кагѡ дѣ́ла бл҃га – лишенному всякого благого дела.

Ѻ҆́дръ – кровать, постель, ложе.

Ѻ҆каѧ́нный – бедный, несчастный, жалкий, злодейский.

Ѿню́дꙋже – откуда. Ѿню́дꙋже ра́нами твои́ми мы̀ и҆сцѣлѣ́вше – поэтому (откуда же пришло исцеление) ранами Твоими мы исцелились (Ис.53:5; 1Петр.2:24).

Ѡ҆ставлѧ́ти – прощать, освобождать, отменить, оставлять без взыскания. Ѡ҆ставлѧ́емъ должникѡ́мъ – прощаем должникам.

Па́ки – снова, опять, напротив. Па́ки возвратѝ – снова возврати.

Па́стырь – пастух, духовный руководитель к вышним и земным благам. Ӏ҆и҃се, до́брый па́стырю твои́хъ ѻ҆ве́цъ: – Иисусе, добрый Пастырю Твоих овец… То есть ведуший к насыщенной свыше благами жизни нынешнего и будущего века.

Па́че – более, выше. Наипа́че же порабо́таю гдⷭ҇ꙋ – более и особенно потружусь Господу.

Пра́здность – пустое, бесплодное времяпрепровождение. Дꙋ́хъ пра́здности – дух пустой траты времени.

Предста́тельство – покровительство, защита, помощь. Предста́тельство хрⷭ҇тӏ̈а́нъ непосты́дное – Защита христиан, никогда не ведущая к стыду.

Преложи́тисѧ – обращаться, изменяться. Пла́мень въ ро́сꙋ прело́жшаго бг҃а – пламя в росу обратившего Бога (Дан.3:49-51,91-95).

Припада́ти – приклоняться, нагибаться, падать ниц. Припаде́мъ самомꙋ̀ хрⷭ҇тꙋ̀ – приклонимся к Самому Христу, то есть только ко Христу, но как к в полноте Богу.

Присѣща́ти – наблюдать, надсматривать, посещать. И҆дѣ́же присѣща́етъ свѣ́тъ лица̀ твоегѡ̀ - где же присутствует свет лица Твоего.

При́снѡ – всегда, непрестанно, беспрерывно. И҆ ны́нѣ и҆ при́снѡ – и ныне и всегда.

Присносꙋ́щный - всегда существующий. Безнача́льный и҆ присносꙋ́щный свѣ́те – не имеющий начала и всегда существующий Свете (звательная форма слова Свет).

Приснодв҃а – всегда Дева, до рождения и после рождения Сына Божия Христа Спасителя (Иез.44:1-3).

При́четъ – причтенный, зачисленный в какой либо коллектив, список. При́четъ цр҃ко́вный – церковнослужители (не имеющие сана), например, пономари, чтецы.

Поне́же – ибо, потому что. Но поне́же хо́щеши ты̀ ꙗ҆́кѡ чл҃вѣколю́бецъ жи́ти во мнѣ̀ - но поскольку хочешь Ты, яко Человеколюбец, жить во мне.

Прозѧба́ти – прорастать. Добродѣ́телей приноси́ти прозѧбє́нӏ̈ѧ – добродетелей приносить прорастание (возникновение и рост).

Ра́ди – для, по. И҆́мене твоегѡ̀ ра́ди – для Твоего имени, для Тебя и Твоей радости.

Ра́мо – плечо.

Расточа́ти – рассеивать, неразумно тратить. Расточа́тсѧ вразѝ є҆гѡ̀ – рассеются враги Его.

Ри́за – одежда. Кра́ѧ ри́зы – края одежды.

Сва́дити – ссорить, поссорить.

Си́рѣчь (сӏ̈ѧ̀ рѣ́чь) – то есть.

Сӏ̈ѡ́нъ – сияющий, солнечный, холм, башня; гора в Иерусалиме. Образ сияющих Небес, взирая на который, народ Божий простирается к первообразу Христу и Богу Свету (Ин.1:51; Мф.17:1-5). Не пытается взгромоздиться на святое, на место Бога, и править чем-либо чужим (Ис.14:13-14; Иез.28:13-19), но в смирении Христу и Богу обретает силу и власть для заботы о своем от Бога обретенном уделе (Быт.2:7; Ин.1:11-13).

Сокро́вище – хранилище ценностей, сокровищница, кладовая, ценная вещь, богатство, казны хранилище. Сокро́вище бл҃ги́хъ – сокровищница благ.

Сподоблѧ́ти – удостаивать, изволять, благоволить. Сподо́бивый мѧ̀ – удостоивший меня, его волей действовавший в достижении мною цели.

Сꙋпоста́тъ – противник, неприятель, враг.

Сы́й – сущий. И҆́же вездѣ̀ сы́й - Который везде Сущий.

Тещѝ – течь, быстро двигаться. Влⷣко, къ тебѣ̀ ѹ҆се́рднѡ притека́юще – Владыко, к Тебе усердно приближаясь (двигаясь).

То́кмѡ – только. Всѧ̑ бо твори́ши хрⷭ҇тѐ, то́кмѡ є҆́же хотѣ́ти – всё ибо можешь творить, только если хочешь.

То́чӏ̈ю – только. То́чӏ̈ю, гдⷭ҇и бж҃е мо́й, помози́ ми – только, Господи Боже мой, помоги мне.

Тридне́венъ – продолжающийся три дня. хрⷭ҇тѐ, и҆ тридне́венъ ꙗ҆́кѡ ѿ ки́та ӏ҆ѡ́на, воскр҃слъ є҆сѝ ѿ гро́ба – Христос, и тридневный, как от кита иона (Ионы 2:1), Воскрес из гроба.

Ѹ҆бл҃жа́ти – нести благо, делать блаженным, прославлять за это. Ѹ҆бл҃жѝ гдⷭ҇и – облагодетельствуй, Господи.

Ѹ҆глѣба́ти – погрязать, утопать. Доко́лѣ ѹ҆глѣба́еши ꙗ҆́кѡ пчела̀, собира́ющи бога́тство твоѐ: - доколе будешь утопать в тленном, как пчела, собирая богатство твое…

Ѹ҆добри́ти – украсить.

Ѹ҆́дъ – член тела. Трепе́щꙋтъ мѝ ѹ҆́ди, всѣ́ми бо сотвори́хъ винꙋ̀ - трепещут мои члены, всеми ибо сотворил грех и виновен, во-первых, пред Богом.

Ѹ҆ны́нӏ̈е – удрученность, бездействие, слабость, погибельное отсутствие дел спасения.

Ѹ҆́треневати – с утра бодрствовать, заниматься чем-либо. Ѹ҆́треневати и҆ славосло́вити держа́вꙋ твою̀ – с утра (пробудившись рано) в песнях, молитвах и делах славить Державу, Силу и Власть Твою Божью.

Це́рковь – церковь, как здание, собрание верующих; Церковь Тело Христа и Дом Божий.

Ѧ҆зы́къ – язык, орган тела человека, его речь. Слꙋ́хъ и҆ ѧ҆зы́къ ѿве́рзлъ – открыл, исцелил слух и речь.
Ꙗ҆зы́ки – язычники, народы, говорящие на ином (иностранном) языке или на языке, не содержащем истины Слова Божия. Ѿкрове́нӏ̈е ꙗ҆зы́кѡвъ – откровение Божье для язычников.

Ꙗ҆́кѡ – как, тоже, так что, ибо. Ꙗ҆́кѡ по сꙋ́хꙋ – как по суше.

Ѵ҆ссѡ́пъ – иссоп, душистое растение, связанные стебли которого использовались для окропления водой или иной жидкостью. Ѡ҆кропи́ши мѧ̀ ѵ҆ссѡ́помъ – окропи меня иссопом.

Содержание полное

СОДЕРЖАНИЕ КРАТКОЕ

МЛ҃ТВЫ Ѹ҆́ТРЄННӀ̈Ѧ.. 3.

Мл҃тва предначина́тельнаѧ: 3

Мл҃тва ст҃о́мꙋ дх҃ꙋ: 3

Трист҃ое: 3

Мл҃тва ко прест҃ѣ́й трⷪ҇цѣ: 3

Мл҃тва гдⷭ҇нѧ: 3

Тропарѝ трⷪ҇чны, гла́съ а҃: 3

Ѱало́мъ н҃: 4

Сѷмво́лъ правосла́вныѧ вѣ́ры: 4

Мл҃тва а҃, ст҃а́гѡ мака́рӏ̈а вели́кагѡ: 5

Мл҃тва в҃, тогѡ́жде ст҃а́гѡ: 5

Мл҃тва г҃, тогѡ́жде ст҃а́гѡ: 5

Мл҃тва д҃, тогѡ́жде ст҃а́гѡ: 5

Мл҃тва є҃, ст҃а́гѡ васӏ́лӏ̈а вели́кагѡ: 5

Мл҃тва ѕ҃ тогѡ́жде ст҃а́го: 5

Мл҃тва з҃, пѣ́снь полꙋ́нощнаѧ, ко прест҃ѣ́й бцⷣѣ: 6

Мл҃тва и҃, ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀: 6

Мл҃тва ѳ҃, к храни́телю человѣ́ческӏ̈ѧ жи́зни а҆́гг҃лꙋ: 7

Мл҃тва ӏ҃, ѹ҆́треннѧѧ коне́чнаѧ, ко прест҃ѣ́й бцⷣѣ: 7

Мл҃твенное призыва́нӏ̈е ст҃а́гѡ, є҆гẃже и҆́мѧ но́сиши: 7

Пѣ́снь прест҃ѣ́й бцⷣѣ, гла́съ д҃: 7

Тропа́рь крⷭ҇тꙋ̀, гла́съ а҃, мл҃итва за ѻ҆те́чество: 7

Мл҃тва ѡ҆ живы́хъ: 7

Мл҃тва ѡ҆ ѹ҆со́пшихъ: 7

Ѡ҆конча́ние мл҃итвъ: 8

ПОМѦ́ННИК. 8.

Ѡ҆ живы́хъ: 8

Ѡ҆ ѹ҆со́пшихъ: 9

Ѡ҆конча́ние молитвъ: 9

МЛ҃ТВЫ НА СО́НЪ ГРѦДꙊ́ЩИМЪ.. 10.

Тропарѝ, гла́съ ѕ҃: 10

Мл҃тва а҃, ст҃а́гѡ мака́рӏ̈а вели́кагѡ, къ бг҃ꙋ ѻ҆ц҃ꙋ̀: 10

Мл҃тва в҃, ст҃а́гѡ а҆нтӏ̈о́ха, ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀: 11

Мл҃тва г҃, ко прест҃о́мꙋ дх҃ꙋ: 11

Мл҃тва д҃, ст҃а́гѡ мака́рӏ̈а вели́кагѡ: 11

Мл҃тва є҃: 12

Мл҃тва ѕ҃: 12

Мл҃тва з҃, ст҃а́гѡ ӏ҆ѡа́нна златоꙋ́стагѡ: мл҃твы молє́бныѧ, число́мъ два́десѧтимъ четы́ремъ часѡ́мъ, дневны̑мъ и҆ нощны̑мъ. 12

Мл҃тва и҃, ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀: 13

Мл҃тва ѳ҃, ко прест҃ѣ́й бцⷣѣ, ст҃а́гѡ петра̀ стꙋдӏ́йскагѡ: 13

Мл҃тва ӏ҃, ко прест҃ѣ́й бцⷣѣ: 13

Мл҃тва а҃ӏ, ко ст҃о́мꙋ а҆́гг҃лꙋ храни́телю: 13

Конда́къ бцⷣѣ, гла́съ и҃: 14

Мл҃тва ст҃а́гѡ ӏ҆ѡаннӏ́кӏ̈а: 14

Мл҃тва ст҃а́гѡ ӏ҆ѡа́нна дамаски́на, ю҆́же ѹ҆казꙋ́ѧ на ѻ҆́дръ тво́й, глаго́ли: 14

Мл҃тва чⷭ҇тно́мꙋ крⷭ҇тꙋ̀: 15

Та́же, вмѣ́стѡ проще́нӏ̈ѧ: 15

Мл҃тва: 15

МЛ҃И́ТВЫ КО КАНѠ́НАМ.. 16

КАНѠ́НЪ ПОКАѦ́ННЫЙ КО ГДⷭ҇Ꙋ НА́ШЄМꙊ Ӏ҆И҃СꙊ ХРⷭ҇ТꙊ.. 16.

Гла́съ ѕ҃. Пѣ́снь а҃. 16

Пѣ́снь г҃. 17

Сѣда́ленъ, гла́съ ѕ҃: 17

Мл҃тва ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀: 20

КАНѠ́НЪ МОЛЄ́БНЫЙ КО ПРЄСТ҃Ѣ́Й БЦⷣѢ.. 20.

Тропа́рь бцⷣѣ: 20

Канѡ́нъ ко прест҃ѣ́й бцⷣѣ, гла́съ и҃. 21

Пѣ́снь а҃. 21

Пѣ́снь г҃. 21

Та́же: 22

Тропа́рь, гла́съ в҃: 22

Пѣ́снь д҃. 22

Пѣ́снь є҃. 22

Пѣ́снь ѕ҃. 23

Конда́къ, гла́съ ѕ҃: 23

И҆́нъ конда́къ, гла́съ то́йже: 23

Стихи́ра, гла́съ то́йже: 23

Пѣ́снь з҃. 24

Пѣ́снь и҃. 24

Пѣ́снь ѳ҃. 24

Стихи́ры, глас в҃: 25

Мл҃твы ко прест҃ѣ́й бцⷣѣ: 25

КАНѠ́НЪ А҆́ГГ҃ЛꙊ ХРАНИ́ТЄЛЮ.. 26.

Тропа́рь, гла́съ ѕ҃. 26

Бг҃оро́диченъ: 26

Канѡ́нъ, гла́съ и҃. 26

Пѣ́снь а҃. 26

Пѣ́снь г҃. 26

Сѣда́ленъ, гла́съ в҃. 27

Конда́къ, гла́съ д҃: 28

Мл҃тва ко а҆́гг҃лꙋ храни́телю: 29

КАНѠ́НЪ СТ҃О́МꙊ Ӏ҆ѠА́ННꙊ ПРⷣТЄ́ЧИ. 30

Гла́съ в҃. 30

Пѣ́снь а҃. 30

Пѣ́снь г҃. 30

Сѣда́ленъ, гла́съ в҃. 31

Пѣ́снь д҃. 31

Пѣ́снь є҃. 31

Пѣ́снь ѕ҃. 32

Конда́къ, гла́съ г҃. 32

А҆КА́ФӀ̈СТЪ Ӏ҆И҃СꙊ СЛАДЧА́ЙШЄМꙊ. 33.

Конда́къ а҃, гла́съ и҃: 33

Конда́къ а҃, гла́съ и҃: 40

Мл҃тва ко гдⷭ҇ꙋ на́шемꙋ ӏ҆и҃сꙋ хрⷭ҇тꙋ̀: 41

А҆КА́ФӀ̈СТЪ ПРЄСТ҃Ѣ́Й ВЛⷣЧЦѢ НА́ШЄЙ БЦⷣѢ. 41

Се́й конда́къ глаго́ли три́жды. И҆ па́ки: 48

Ӏ҆́косъ а҃. 48

Конда́къ а҃. 48

Мл҃твы ко прест҃ѣ́й бцⷣѣ: 48

А҆КА́ФӀ̈СТЪ СТ҃И́ТЄЛЮ ХРⷭ҇ТО́ВꙊ НӀ̈КОЛА́Ю ЧꙊДОТВО́РЦꙊ. 49

Мл҃тва ст҃и́телю нӏ̈кола́ю: 57

ПОСЛѢ́ДОВАНИЄ КО СТ҃О́МꙊ ПРИЧАЩЄ́НӀ̈Ю. 57

Ѱало́мъ к҃в. 57

Ѱало́мъ к҃г. 58

Ѱало́мъ рє҃ӏ. 58

Тропарѝ, гла́съ и҃: 58

[Во ст҃ꙋ́ю же и҆ вели́кꙋю м҃-цꙋ, глаго́ли: 58

Ѱало́мъ н҃: 59

Канѡ́нъ, гла́съ в҃. 59

Конда́къ, гла́съ в҃: 61

И҆ а҆́бӏ̈е настоѧ́щыѧ стӏ̈хѝ: 63

И҆ны̑ѧ стӏ̈хѝ: 63

Мл҃тва а҃, ст҃а́гѡ васӏ́лӏ̈а вели́кагѡ: 63

Мл҃тва в҃, ст҃а́гѡ ӏ҆ѡа́нна златоꙋ́стагѡ: 64

Мл҃тва г҃, ст҃а́гѡ сѷмеѡ́на метафра́ста: 64

Мл҃тва д҃, ст҃а́гѡ ӏ҆ѡа́нна дамаски́на: 65

Мл҃тва є҃, ст҃а́гѡ васӏ́лӏ̈а вели́кагѡ: 65

Мл҃тва ѕ҃, ст҃а́гѡ сѷмеѡ́на но́вагѡ бг҃осло́ва: 65

Мл҃тва з҃, ст҃а́гѡ ӏ҆ѡа́нна златоꙋ́стагѡ: 66

Мл҃тва и҃, тогѡ́жде ст҃а́гѡ: 66

Мл҃тва ѳ҃, тогѡ́жде ст҃а́гѡ: 67

Мл҃тва ӏ҃, ст҃а́гѡ ӏ҆ѡа́нна дамаски́на: 67

Мл҃тва ст҃а́гѡ ӏ҆ѡа́нна златоꙋ́стагѡ: 67

Приходѧ́й же причасти́тисѧ, глаго́ли въ себѣ̀ настоѧ́щыѧ стӏ̈хѝ метафра́ста: 67

Та́же глаго́ли: 67

Па́ки стӏ̈хѝ сӏ̈ѧ̑: 68

Та́же тропарѝ: 68

Та́же мл҃твꙋ: 68

БЛ҃ГОДА́РСТВЄННЫѦ МЛ҃ТВЫ ПО СТ҃Ѣ́МЪ ПРИЧАЩЄ́НИИ.. 68.

Блгода́рственнаѧ мл҃тва, а҃: 68

Мл҃тва ст҃а́го васӏ́лӏ̈а вели́кагѡ, в҃: 69

Мл҃тва ст҃а́го сѷмеѡ́на метафра́ста, г҃: 69

Мл҃тва д҃: 69

Мл҃тва є҃, ко прест҃ѣ́й бцⷣѣ: 69

Тропа́рь, гла́съ и҃: 70

Конда́къ, гла́съ ѕ҃: 70

Бг҃оро́диченъ: 70

Тропа́рь, гла́съ а҃: 70

Конда́къ, гла́съ д҃: 70

Бг҃оро́диченъ: 71

Тропа́рь, гла́съ д҃: 71

Конда́къ, гла́съ г҃: 71

Бг҃оро́диченъ: 71

ЧАСЫ̀ СТ҃Ы́Ѧ ПА́СХИ. 71

Гла́съ ѕ҃: 72

Ѵ҆пакоѝ, гла́съ д҃: 72

Конда́къ, гла́съ и҃: 72

И҆ тропарѝ: 72

СТӀ̈ХИ̑РЫ СТ҃Ы́Ѧ ПА́СХИ. 72

КАНѠ́НЪ СТ҃Ы́Ѧ ПА́СХИ. 73

Гла́съ а҃. 73

Пѣ́снь а҃. 73

Пѣ́снь г҃. 74

Ѵ҆пакоѝ, гла́съ д҃: 74

Пѣ́снь д҃. 74

Пѣ́снь є҃. 75

Пѣ́снь ѕ҃. 75

Конда́къ, гла́съ и҃: 76

Ӏ҆́косъ: 76

Та́же глаго́лемъ во гла́съ ѕ҃: 76

Пѣ́снь з҃. 76

Пѣ́снь и҃. 77

Пѣ́снь ѳ҃. 77

Є҆ѯапостӏ̈ла́рӏ̈й. Самогла́сенъ: 78

ТРОПАРЍ И҆ КОНДАКЍ ВОСКРⷭ҇НЫ Ѻ҆СМЍ ГЛАСѠ́ВЪ. 79

ТРОПАРЍ И҆ КОНДАКЍ ВСЄѦ̀ СЄДМИ́ЦЫ.. 81.

Въ недѣ́лю ве́чера и҆ въ понедѣ́льникъ ѹ҆́тра, нбⷭ҇нымъ чинѡ́мъ безплѡ́тнымъ. 81

Въ понедѣ́льникъ ве́чера и҆ во вто́рникъ ѹ҆́тра, прⷪ҇ро́кꙋ ӏ҆ѡа́ннꙋ прⷣте́чи.

Во вто́рникъ ве́чера и҆ въ сре́дꙋ ѹ҆́тра, чⷭ҇тно́мꙋ крⷭ҇тꙋ̀. 81

Въ сре́дꙋ ве́чера и҆ въ четверто́къ ѹ҆́тра, а҆пⷭ҇лѡмъ, и҆ ст҃и́телю нӏ̈кола́ю. 82

Въ четверто́къ ве́чера и҆ въ пѧто́къ ѹ҆́тра, чⷭ҇тно́мꙋ крⷭ҇тꙋ̀. 82

Въ пѧто́къ ве́чера и҆ въ сꙋббѡ́тꙋ ѹ҆́тра, всѣ̑мъ ст҃ы̑мъ, и҆ за ѹ҆поко́й. 82

ТРОПАРЍ, КОНДАКЍ, ЗАДОСТО́ЙНИКИ И҆ ВЄЛИЧА̑НӀ̈Ѧ ДВАНАДЄСѦ́ТЫХЪ ПРА́ЗДНИКОВ И҆ ПА́СХИ 83.

Ржⷭ҇тво̀ прест҃ы́ѧ влⷣчцы на́шеѧ бцⷣы, и҆ приснодв҃ы мр҃ӏ́и: 83

Воздви́женӏ̈е чⷭ҇тна́гѡ и҆ животворѧ́щагѡ крⷭ҇та̀: 83

Вхо́дъ во хра́мъ прест҃ы́ѧ влⷣчцы на́шеѧ бцⷣы, и҆ приснодв҃ы мр҃ӏ́и: 84

Ржⷭ҇тво̀ гдⷭ҇а бг҃а и҆ сп҃са на́шегѡ ӏ҆и҃са хрⷭ҇та̀: 84

Бг҃оѧвле́нӏ̈е гдⷭ҇а бг҃а и҆ сп҃са на́шегѡ ӏ҆и҃са хрⷭ҇та̀: 85

Срѣ́тенӏ̈е гдⷭ҇а бг҃а и҆ сп҃са на́шегѡ ӏ҆и҃са хрⷭ҇та̀: 85

Бл҃говѣ́щенӏ̈е прест҃ы́ѧ влⷣчцы на́шеѧ бцⷣы, и҆ приснодв҃ы мр҃ӏ́и: 86

Вхо́дъ гдⷭ҇ень въ ӏ҆ерⷭ҇ли́мъ: 86

Свѣ́тлое хрⷭ҇то́во воскрⷭ҇нӏ̈е. Па́сха. 87

Вознесе́нӏ̈е гдⷭ҇а бг҃а и҆ сп҃са на́шегѡ ӏ҆и҃са хрⷭ҇та̀: 88

Пѧтдесѧ́тница. Де́нь ст҃ы́ѧ трⷪ҇цы: 88

Преѡбраже́нӏ̈е гдⷭ҇а бг҃а и҆ сп҃са на́шегѡ ӏ҆и҃са хрⷭ҇та̀: 89

Ѹ҆спе́нӏ̈е прест҃ы́ѧ влⷣчцы на́шеѧ бцⷣы, и҆ приснодв҃ы мр҃ӏ́и: 89

МЛ҃ТВЫ РА̑ЗНЫѦ.. 94.

Мл҃тва ӏ҆и҃сова: 94

Мл҃тва ст҃а́гѡ є҆фре́ма сѵ́рӏ̈на: 94

Мл҃тва и҆дꙋ́шагѡ въ цр҃ковь: 94

Мл҃тва при вкꙋше́нӏ̈и просфоры̀ и҆ ст҃ы́ѧ воды̀: 94

Мл҃тва пред̾ вкꙋше́нӏ̈емъ пи́щи: 95

Мл҃тва по вкꙋше́нӏ̈и пи́щи: 95

Призыва́нӏ̈е по́мощи бж҃ӏ̈ѧ пред̾ нача́ломъ всѧ́кагѡ до́брагѡ дѣ́ла: 95

Бл҃годаре́нӏ̈е ѡ҆ всѧ́комъ бл҃годѣѧ́нӏ̈и бж҃ӏ̈и. 96

Ѡ҆ пꙋтеше́ствꙋющихъ. 97

Ѡ҆ недꙋ́жныхъ. 97

Ѡ҆ ѹ҆множе́нӏ̈и любвѐ, и҆ и҆скорене́нӏ̈и не́нависти и҆ всѧ́кӏ̈ѧ ѕло́бы. 98

Ѡ҆ ненави́дѧщихъ и҆ ѡ҆би́дѧщихъ на́съ. 98

Мл҃тва ѿ ѡ҆скверне́нӏ̈ѧ ст҃а́гѡ васӏ́лӏ̈а вели́кагѡ: 98

Во вре́мѧ бѣ́дствӏ̈ѧ, и҆ при нападе́нӏ̈и врагѡ́въ. 99

Мл҃тва при нача́тӏ̈и ѹ҆че́нӏ̈ѧ: 100

Мл҃тва при нача́тӏ̈и ѹ҆че́нӏ̈ѧ ѻ҆трокѡ́въ: 100

Мл҃тва по ѡ҆конча́нӏ̈и ѹ҆че́нӏ̈ѧ : 100

СЛОВАРЬ.. 100

СОДЕРЖАНИЕ ПОЛНОЕ.. 105

ОТ РЕДАКТОРА.. 113

ОТ РЕДАКТОРА

Молитвослов на церковнославянском языке содержит молитвословия, необходимые мирянину Православной Церкви для домашнего ежедневного молитвенного правила и подготовки ко Святому Причастию.

В «Предисловии о пользе книг церковных» (1758 г.) Михаил Васильевич Ломоносов отмечает, что «и российский язык в полной силе, красоте и богатстве переменам и упадку не подвержен утвердится, коль долго Церковь Российская славословием Божиим на славянском языке украшаться будет». При этом в составленной им «Российской грамматике», для достижения «наилучшего рассудительного её употребления», предписывается так наблюдать за правописанием, «чтобы оно служило удобному чтению, каждому знающему российскую грамоту, чтобы не отходило далече от главных российских диалектов, которых суть три: московский, северный и украинский…» (1755). Учитывая это, мы понимаем, что не следует оставлять церковнославянский язык, чтобы и русскому языку не истощиться, и единому народу от одних отцов единого Отечества не отложиться от полноты особого духовного дыхания и святой жизни, объединяющей нас во Христе Спасителе и Боге, во Святом Православии. Исходит же это дыхание и единство, а с ним вышняя свобода и исцеление духа, души и тела человека, каждой семьи и отечества, от Бога. Начинается с первого Адама (Быт.2:7; Ин.14:15-18,23), продолжается в наших святых отцах и во всех святых, просиявших также и среди славян, на Руси Божией и среди всех народов до краев земли.

А чтобы это дыхание Христа и Бога и Его Святого Православия было у человека достаточным и животворящим, ему необходима молитва, а кроме того, что человеку должно говорить Богу, важно еще видеть и слушать Его. Потому кроме регулярного молитвенного утреннего и вечернего правила важно еще и ежедневное чтение Святого Писания в соответствии с церковным богослужебным календарем. Также – чтение жития святых, дарующих нам добрые примеры следования за Христом и богоугождения, освящения в преданности Христу Спасителю и Его Церкви, совершенствования в добродетелях, возрастания к зрелости в духовности и нравственности. Учитывая предупреждение в пророках: «Кто отклоняет ухо свое от слушания закона, того и молитва – мерзость» (Прит.28:9), важно проявить усердие в изучении Закона Божия, богослужения, святых канонов, вероучения и жизни Православной Церкви. Звучит предупреждение и в апостоле: «Кто будет есть хлеб сей или пить чашу Господню недостойно, виновен будет против Тела и Крови Господней. Да испытывает же себя человек, и таким образом пусть ест от хлеба сего и пьет из чаши сей. Ибо, кто ест и пьет недостойно, тот ест и пьет осуждение себе, не рассуждая о Теле Господнем. От того многие из вас немощны и больны и немало умирает» (1Кор.11:27-30). Потому необходима благоговейная во страхе Божием подготовка к участию в Святом Причастии, обычно, с трехдневным постом, чтением представленных в данном молитвослове трех канонов, Христу Спасителю, Богородице и Ангелу Хранителю, правила ко Причастию, молитв после Причастия. При этом необходимо участие в вечерней службе накануне, с исповедью вечером или утром до начала богослужения. А также реальное и смиренное участие в жизни ближайшего прихода Православной Церкви.

Мирянам подобает во всем научаться добрым примерам священства, живущего по Святому Писанию и Преданию Церкви, в соответствии с её канонами и традициями. Так Правило 19 Шестого Вселенского Собора предписывает: «Предстоятели церквей должны во вся дни, наипаче же во дни воскресные, поучать весь клир и народ словесам благочестия, избирая из Божественного Писания разумения и рассуждения истины, и не преступая положенных уже пределов и предания богоносных отцов: и если будет исследуемо слово Писания, то не иначе да изъясняют оное, разве как изложили светила и учители Церкви в своих писаниях, и сими более да удовлетворяются, нежели составлением собственных слов, дабы, при недостатке умения в сем, не уклониться от подобающего. Ибо, чрез учение вышереченных отцов, люди, получая познание о добром и достойном избрания, и о неполезном и достойном отвращения, исправляют жизнь свою на лучшее, и не страждут недугом неведения, но внимая учению, побуждают себя к удалению от зла, и, страхом угрожающих наказаний, соделывают свое спасение». Так же и не только в вероучении, но и в молитвах мирянам хорошо следовать этому правилу, не составлять собственных молитв, но научаться общению с Богом молитвами, дарованными через отцов Церкви. В молитвенном движении к Спасителю, неизменно, открывая и помыслы собственного сердца, но так уже направляемые в русло благочестия и спасения во Христе и Боге, и Церкви Святой Православной.

Для построения же действительно незыблемого основания молитвенного общения с Богом самые основные молитвы необходимо с молодых лет выучить наизусть. Далее приводится список молитв, знание которых требуется при поступлении в православную духовную семинарию, то есть входящих в православный компонент общего образования.

Молитвы начальные:
1. «Слава, Тебе, Боже наш, слава Тебе»
2. «Царю Небесный…»
3. «Святый Боже…»
4. «Пресвятая Троице…»
5. «Отче наш…»
6. «Приидите, поклонимся…»

Молитвы утренние:
1. «Боже, очисти мя грешнаго…»
2. «От сна востав, полунощную песнь приношу Ти…»
3. «Святый Ангеле, предстояй окаянной моей души…»
4. «Пресвятая Владычице моя Богородице…»

Молитвы вечерние:
1. «Боже вечный и Царю всякаго создания…»
2. «Вседержителю, Слово Отчее…»
3. «Благаго Царя благая Мати…»
4. «Ангеле Христов, хранителю мой святый…»
5. «Да воскреснет Бог…» (Молитва Честному Кресту)

Божией Матери:
1. «Богородице Дево, радуйся…»
2. «Достойно есть…»
3. «Взбранной Воеводе…»,
4. «Милосердия двери…»
5. «Не имамы иныя помощи…»

Так же наизусть необходимо знать тропари двунадесятых праздников, псалмы: 50, 90, молитвы до и после трапезы, до и после учения, до и после труда. Молитву перед Причастием (Верую, Господи и исповедую…) и великопостную молитву Ефрема Сирина.

Молиться должно каждому православному человеку, как то заповедует и подает пример Христос Спаситель, а также и Его ученики, пророки и апостолы. Учить же этому должны своих детей родители, во-первых, собственным примером. Старшие братья – младших. Учителя – учащихся. Начальствующие – подчиненных. На службе, Уставом воинским 1716 г., а затем и морским, в составлении которых принимал участие царь Петр I и затем утвердил, что учить молитве солдат предписывается каждому офицеру, читать молитвы, при отсутствии священника – секретарю (гл. 64). А далее, с развитием образованности в армии и на флоте и с упразднением чина корабельного секретаря, в отсутствие священника и по приказу командира читать обычные молитвы предписывается офицерам. Священникам же вменяется править службы, творить молитвы и наставлять в вере. По этому же Уставу строго наказываются хулители Христа и Бога, Церкви, Богородицы, предписывается почитание святынь и особое уважение священства. Так все научаются доброй во Христе дисциплине пред Богом Отцом Вседержителем, наставляя в этом своих детей, младших и подчиненных. Чтобы Божией благодатью истинно служить своему Творцу и Спасителю Христу, Церкви и Отечеству, созидая и храня мир и все приготовленные Богом его плоды, начиная от своей души и простираясь до краев земли, века сего и будущего жизни вечной.

Необходимо учесть, что различные издания молитвословов Русской Православной Церкви с прошлых веков и доныне незначительно разнятся своим содержанием, некоторыми словами, буквами, надстрочными знаками и знаками пунктуации. Из этих разных изданий взяты и сверены с современными тексты данного сборника, однако данный молитвослов не является строгим эталоном грамматики. При этом возникающие вопросы в части содержания, филологии текстов необходимо решать в общепринятом в Православной Церкви, в науке и образовании порядке, путем обращения к официальным изданиям, а также в академические и синодальные структуры. Пребывая при этом в послушании Христу и Богу и Его Святой Церкви Православной, а также в молитвах и трудах создания по воле Божией, на научной и богословской основе разработанного и утвержденного Церковью стандарта, как молитвослова, так и всей богослужебной литературы, с последующей её публикацией в цифровом формате.

Издание выполнено, как часть образовательной программы Школы права имени святого равноапостольного Владимира, представляющей собой основы православной веры и культуры. Может быть использовано, во-первых, в учебных курсах «Церковнославянский язык» и «Молитва», а также в иных и для повседневного молитвенного правила мирянина. Лицензируется для свободного распространения и использования в соответствии со святыми канонами Православной Церкви и с законодательством России.

Целью указанной бразовательной программы Школы является построение богоугодного, спасительного в вечность, ведущего ко благам века сего и будущего порядка в личной и общественной жизни человека, созидаемого действием Божьей благодати на основании духовно-нравственных ценностей Православной Церкви. Программа называется «Путь освящения», представлена на странице журнала «Праведность и мир»: http://sancti.ru/sl/hs/intr-pre/spirit.htm.

В библиотеке Школы, в части церковно-славянского языка и молитвы, для полного освоения курса продолжительностью в жизнь человека предлагаются:
- Молитвословы на церковнославянском языке, в том числе с параллельным толковым переводом на русский язык, кратким словарем и введением: http://sancti.ru/patr/in-libre.htm#pry.
- Учебник церковнославянской азбуки с краткой историей создания славянской письменности, необходимый для правильного чтения и составления текстов, в том числе в электронном формате: http://sancti.ru/patr/in-libre.htm#cu.
- Жития святых равноапостольных Мефодия и Кирилла: http://sancti.ru/plus/stkm/st-km.htm.
- Клавиатура и шрифт церковнославянского языка, необходимые для его освоения в электронном формате. Свежие обновления на странице: http://sancti.ru/patr/soft/font/slavonic.htm#font.
- Краткое пособие по молитве, необходимое для понимания сущности, содержания, форм и результатов молитвы: http://sancti.ru/sl/hs/intr-pre/vera/pravoslav-3.pdf.
- Катехизис Святителя Филарета (Дроздова), тексты в разных форматах, учебный курс: http://sancti.ru/patr/in-libre.htm#prvf.

Божией помощи во святом дыхании искренних молитв и праведных трудов.
Е-почта: sl@sаncti.ru, vcsl-k@yа.ru.

[а҃] Въ пасха́льнꙋю седми́цꙋ вмѣ́стѡ ѹ҆́треннихъ и вече́рних мл҃твъ чте́мъ часы̀ па́схи [зрѝ страни́цꙋ].

[в҃] Ѿ недѣ́ли ѳѡмины̀ до вознесе́нӏ̈ѧ вмѣ́стѡ сеѧ̀ мл҃твы глаго́лемъ тропа́рь: Хрⷭ҇то́съ воскр҃се и҆з̾ ме́ртвыхъ, сме́ртӏ̈ю сме́рть попра́въ, и҆ сꙋ́щымъ во гробѣ́хъ живо́тъ дарова́въ. Три́жды.
Ѿ вознесе́нӏ̈ѧ же до трⷪ҇цы вмѣ́стѡ Цр҃ю̀ нбⷭ҇ный: ничто́же глаго́лемъ, та́кожде и҆ въ мл҃твах на со́нъ грдꙋ́щым, и҆ въ после́дованӏ̈и ко ст҃мꙋ прича́щению, но по нача́льномъ Гдⷭ҇и ӏ҆и҃се хрⷭ҇тѐ: а҆́бӏ̈е чте́мъ Ст҃ы́й бж҃е:

[г҃] Є҆гда̀ пи́сано є҆́сть Сла́ва:, чтѝ си́це: Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ. Є҆гда̀ пи́сано є҆́сть И҆ ны́нѣ:, чтѝ: И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь. Є҆гда́ же пи́сано є҆́сть Сла́ва, и҆ ны́нѣ:, чтѝ: Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

[д҃] Мл҃твенное призыва́нӏ̈е ст҃ы́ѧ, є҆ѧ́же и҆́мѧ но́сиши: ст҃а́ѧ ѹ҆го́днице бж҃ӏ̈ѧ

[є҃] Ѿ па́схи до вознесе́нӏ̈ѧ вмѣ́стѡ сеѧ̀ мл҃твы глаго́лемъ задосто́йникъ па́схи, си́рѣчь припѣ́въ и҆ ӏ҆рмо́съ ѳ҃-ѧ пѣ́сни пасха́льнагѡ канѡ́на:
А҆́гг҃лъ вопӏ̈ѧ́ше бл҃года́тнѣй: чⷭ҇таѧ дв҃о, ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскре́се тридне́венъ ѿ гро́ба, и҆ мє́ртвыѧ воздви́гнꙋвый: лю́дӏ̈е весели́тесѧ.
Свѣти́сѧ, свѣти́сѧ но́вый ӏ҆ерⷭ҇ли́ме: сла́ва бо гдⷭ҇нѧ на тебѣ̀ возсӏ̈ѧ̀. ликꙋ́й ны́нѣ, и҆ весели́сѧ сӏ̈ѡ́не. ты́ же чи́стаѧ красꙋ́йсѧ бцⷣе, ѡ҆ воста́нӏ̈и ржⷭ҇тва̀ твоегѡ̀.
Та́кожде и҆ въ мл҃твах на со́нъ грдꙋ́щым.

[ѕ҃] Ѿ па́схи до вознесе́нӏ̈ѧ вмѣ́стѡ сеѧ̀ мл҃твы глаго́лемъ задосто́йникъ па́схи, си́рѣчь припѣ́въ и҆ ӏ҆рмо́съ ѳ҃-ѧ пѣ́сни пасха́льнагѡ канѡ́на:
А҆́гг҃лъ вопӏ̈ѧ́ше бл҃года́тнѣй: чи́стаѧ дв҃о, ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскре́се тридне́венъ ѿ гро́ба, и҆ мє́ртвыѧ воздви́гнꙋвый: лю́дӏ̈е, весели́тесѧ.
Свѣти́сѧ, свѣти́сѧ, но́вый ӏ҆ерꙋсали́ме: сла́ва бо гдⷭ҇нѧ на тебѣ̀ возсӏ̈ѧ̀. ликꙋ́й ны́нѣ, и҆ весели́сѧ сӏ̈ѡ́не. ты́ же чи́стаѧ красꙋ́йсѧ бцⷣе, ѡ҆ воста́нӏ̈и ржⷭ҇ства̀ твоегѡ̀. Та́кожде и҆ въ мл҃твах на со́нъ грдꙋ́щым.

[з҃] Въ пасха́льнꙋю седми́цꙋ вмѣ́стѡ ѹ҆́треннихъ и вече́рних мл҃твъ чте́мъ часы̀ па́схи [зрѝ страни́цꙋ].

[и҃] Ѿ недѣ́ли ѳѡмины̀ до вознесе́нӏ̈ѧ вмѣ́стѡ сеѧ̀ мл҃твы глаго́лемъ тропа́рь: Хрⷭ҇то́съ воскр҃се и҆з̾ ме́ртвыхъ, сме́ртӏ̈ю сме́рть попра́въ, и҆ сꙋ́щымъ во гробѣ́хъ живо́тъ дарова́въ. Три́жды.
Ѿ вознесе́нӏ̈ѧ же до трⷪ҇цы вмѣ́стѡ Цр҃ю̀ нбⷭ҇ный: ничто́же глаго́лемъ, та́кожде и҆ въ мл҃твах на со́нъ грдꙋ́щым, и҆ въ после́дованӏ̈и ко ст҃мꙋ прича́щению, но по нача́льномъ Гдⷭ҇и ӏ҆и҃се хрⷭ҇тѐ: а҆́бӏ̈е чте́мъ Ст҃ы́й бж҃е:

[ѳ҃] Ѿ па́схи до вознесе́нӏ̈ѧ вмѣ́стѡ сеѧ̀ мл҃твы глаго́лемъ задосто́йникъ па́схи, си́рѣчь припѣ́въ и҆ ӏ҆рмо́съ ѳ҃-ѧ пѣ́сни пасха́льнагѡ канѡ́на:
А҆́гг҃лъ вопӏ̈ѧ́ше бл҃года́тнѣй: чⷭ҇таѧ дв҃о, ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскре́се тридне́венъ ѿ гро́ба, и҆ мє́ртвыѧ воздви́гнꙋвый: лю́дӏ̈е весели́тесѧ. Свѣти́сѧ, свѣти́сѧ но́вый ӏ҆ерⷭ҇ли́ме: сла́ва бо гдⷭ҇нѧ на тебѣ̀ возсӏ̈ѧ̀. ликꙋ́й ны́нѣ, и҆ весели́сѧ сӏ̈ѡ́не. ты́ же чи́стаѧ красꙋ́йсѧ бцⷣе, ѡ҆ воста́нӏ̈и ржⷭ҇тва̀ твоегѡ̀.

[ӏ҃] Въ пасха́льнꙋю седми́цꙋ вмѣ́стѡ канѡ́нѡвъ покаѧ́ннагѡ, бцⷣѣ и҆ а҆́гг҃лꙋ храни́телю глаго́лемъ канѡ́нъ па́схи [зрѝ страни́цꙋ].

[а҃ӏ] Ѿ па́схи до вознесе́нӏ̈ѧ вмѣ́стѡ сеѧ̀ мл҃твы глаго́лемъ тропа́рь: Хрⷭ҇то́съ воскр҃се и҆з̾ ме́ртвыхъ, сме́ртӏ̈ю сме́рть попра́въ, и҆ сꙋ́щымъ во гробѣ́хъ живо́тъ дарова́въ. Три́жды.

Ѿ вознесе́нӏ̈ѧ же до трⷪ҇цы вмѣ́стѡ Цр҃ю̀ нбⷭ҇ный: ничто́же глаго́лемъ, но по нача́льномъ Гдⷭ҇и ӏ҆и҃се хрⷭ҇тѐ: а҆́бӏ̈е чте́мъ Ст҃ы́й бж҃е:

[в҃ӏ] Въ пасха́льнꙋю седми́цꙋ вмѣ́стѡ канѡ́нѡвъ покаѧ́ннагѡ, бцⷣѣ и҆ а҆́гг҃лꙋ храни́телю глаго́лемъ канѡ́нъ па́схи [зрѝ страни́цꙋ].

[г҃ӏ] Въ пасха́льнꙋю седми́цꙋ вмѣ́стѡ канѡ́нѡвъ покаѧ́ннагѡ (и҆лѝ ӏ҆и҃сꙋ сладча́йшемꙋ), бцⷣѣ и҆ а҆́гг҃лꙋ храни́телю глаго́лемъ канѡ́нъ па́схи [зрѝ страни́цꙋ].

[д҃ӏ] Въ пасха́льнꙋю седми́цꙋ вмѣ́стѡ канѡ́нѡвъ покаѧ́ннагѡ и҆лѝ ӏ҆и҃сꙋ сладча́йшемꙋ, бцⷣѣ и҆ а҆́гг҃лꙋ храни́телю глаго́лемъ канѡ́нъ па́схи [зрѝ страни́цꙋ].

[є҃ӏ] Тропа́рь ӏ҆и҃сꙋ хрⷭ҇тꙋ̀ то́чӏ̈ю въ пе́рвой и҆ девѧ́той пѣ́снехъ канѡ́на.

[ѕ҃ӏ] Ѿ па́схи до вознесе́нӏ̈ѧ вмѣ́стѡ сеѧ̀ мл҃твы глаго́лемъ тропа́рь: Хрⷭ҇то́съ воскр҃се и҆з꙽ ме́ртвыхъ, сме́ртӏ̈ю сме́рть попра́въ, и҆ сꙋ́щымъ во гробѣ́хъ живо́тъ дарова́въ. Три́жды.
Ѿ вознесе́нӏ̈ѧ же до трⷪ҇цы вмѣ́стѡ Цр҃ю̀ нбⷭ҇ный: ничто́же глаго́лемъ, та́кожде и҆ въ мл҃твах на со́нъ грдꙋ́щым, и҆ въ после́дованӏ̈и ко ст҃мꙋ прича́щению, но по нача́льномъ Гдⷭ҇и ӏ҆и҃се хрⷭ҇тѐ: а҆́бӏ̈е чте́мъ Ст҃ы́й бж҃е:

[з҃ӏ] Ѿ па́схи до вознесе́нӏ̈ѧ вмѣ́стѡ сеѧ̀ мл҃твы глаго́лемъ задосто́йникъ па́схи, си́рѣчь припѣ́въ и҆ ӏ҆рмо́съ ѳ҃-ѧ пѣ́сни пасха́льнагѡ канѡ́на:
А҆́гг҃лъ вопӏ̈ѧ́ше бл҃года́тнѣй, чи́стаѧ дв҃о ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскре́се тридне́венъ ѿ гро́ба, и҆ мє́ртвыѧ воздви́гнꙋвый, лю́дӏ̈е весели́тесѧ.
Свѣти́сѧ, свѣти́сѧ но́вый ӏ҆ерꙋсали́ме: сла́ва бо гдⷭ҇нѧ на тебѣ̀ возсӏ̈ѧ̀. ликꙋ́й ны́нѣ, и҆ весели́сѧ сӏ̈ѡ́не. ты́ же чи́стаѧ красꙋ́йсѧ бцⷣе, ѡ҆ воста́нӏ̈и рождества̀ твоегѡ̀. Та́кожде и҆ въ мл҃твах на со́нъ грдꙋ́щым.
Въ попра́зднство дванадесѧ́тыхъ пра́здникѡвъ глаго́лемъ и҆́хъ задосто́йники

[и҃ӏ] Два̀ послѣ̑днѧѧ бг҃орѡ́дична тропарѧ̑ коеѧ́ждо пѣ́сни въ пе́рвый де́нь па́схи не глаго́лемъ.

[ѳ҃ӏ] Ѿ па́схи до вознесе́нӏ̈ѧ вмѣ́стѡ сеѧ̀ мл҃твы глаго́лемъ задосто́йникъ па́схи, си́рѣчь припѣ́въ и҆ ӏ҆рмо́съ ѳ҃-ѧ пѣ́сни пасха́льнагѡ канѡ́на:

А҆́гг҃лъ вопӏ̈ѧ́ше бл҃года́тнѣй: чⷭ҇таѧ дв҃о ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскр҃се тридне́венъ ѿ гро́ба, и҆ мє́ртвыѧ воздви́гнꙋвый: лю́дӏ̈е весели́тесѧ.

Свѣти́сѧ, свѣти́сѧ, но́вый ӏ҆ерⷭ҇ли́ме: сла́ва бо гдⷭ҇нѧ на тебѣ̀ возсӏ̈ѧ̀. Ликꙋ́й ны́нѣ, и҆ весели́сѧ сӏ̈ѡ́не. Ты́ же чⷭ҇таѧ красꙋ́йсѧ бцⷣе, ѡ҆ воста́нӏ̈и ржⷭ҇тва̀ твоегѡ̀.

Въ попра́зднство дванадесѧ́тыхъ пра́здникѡвъ глаго́лемъ и҆́хъ задосто́йники.

ПРАВОСЛАВНЫЙ МОЛИТВОСЛОВ

Правосла́вный молитвосло́въ

Богослужебное издание

Выпуск 6.3.

Редакция, верстка: Калашников Ю.В.
Разработка церковнославянского шрифта «Pаnteley-1.8.ttf» (utf-8, cu):
Калашников Ю. В.

Подписано в издание 2024.05.23.
Печ. л. 6.85
Электронное издание, расширение html.

Школа права имени святого
равноапостольного Владимира
283087. ДНР, г. Донецк, ул. Куйбышева, д. 135, к. 6.

Сайт: http://sancti.ru
E-mail: sl@sancti.ru, vcsl-k@ya.ru, vcsl.yk@gmail.com

МЛ҃ТВЫ Ѹ҆́ТРЄННӀ̈Ѧ

Ѡ҆конча́ние мл҃итвъ: [є҃]

ПОМѦ́ННИК

МЛ҃ТВЫ НА СО́НЪ ГРѦДꙊ́ЩИМЪ

Мл҃тва ст҃а́гѡ ӏ҆ѡа́нна дамаски́на, ю҆́же ѹ҆казꙋ́ѧ на ѻ҆́дръ тво́й, глаго́ли:

МЛ҃И́ТВЫ КО КАНѠ́НАМ

КАНѠ́НЪ ПОКАѦ́ННЫЙ КО ГДⷭ҇Ꙋ НА́ШЄМꙊ Ӏ҆И҃СꙊ ХРⷭ҇ТꙊ

КАНѠ́НЪ МОЛЄ́БНЫЙ КО ПРЄСТ҃Ѣ́Й БЦⷣѢ,

КАНѠ́НЪ А҆́ГГ҃ЛꙊ ХРАНИ́ТЄЛЮ[д҃ӏ]

КАНѠ́НЪ СТ҃О́МꙊ Ӏ҆ѠА́ННꙊ ПРⷣТЄ́ЧИ.

А҆КА́ФӀ̈СТЪ Ӏ҆И҃СꙊ СЛАДЧА́ЙШЄМꙊ

А҆КА́ФӀ̈СТЪ ПРЄСТ҃Ѣ́Й ВЛⷣЧЦѢ НА́ШЄЙ БЦⷣѢ.

Мл҃тва ст҃а́гѡ ӏ҆ѡа́нна дамаски́на,
ю҆́же ѹ҆казꙋ́ѧ на ѻ҆́дръ тво́й, глаго́ли:

КАНѠ́НЪ ПОКАѦ́ННЫЙ
КО ГДⷭ҇Ꙋ НА́ШЄМꙊ Ӏ҆И҃СꙊ ХРⷭ҇ТꙊ

КАНѠ́НЪ А҆́ГГ҃ЛꙊ ХРАНИ́ТЄЛЮ [д҃ӏ]